অট্ঠচত্তালীসতিম পৰিচ্ছেদ

একৰাজকো

১. ততো তস্সা’নুজো সেনো, ছত্তং উস্সাপযী পুৰে;

পিযং’ৱ পুত্তং পস্সন্তো, সত্তে সব্বে মহাধনো.

২. চৰিযং পুব্বৰাজূনং, সমাচৰি যথাভতং;

অপুব্বম্পি চ ৱত্তেসি, চৰিযং ধম্মসংহিতং.

৩. ভিক্খূনং ভিক্খূনীনঞ্চ, ঞাতীনং দীপৱাসিনং;

মচ্ছানং মিগপক্খীনং, কত্তব্বং স সমাচৰি.

৪. মহিন্দং পৰতীৰং সো, গতং যোজিযমাৰযি;

এৱং সো সুৱিসোধেসি, ৰজ্জপচ্চত্থিকে’খিলে.

৫. মহাদানং পৱত্তেসি, যাচকানং ধনেসিনং;

ভিক্খূনং ব্ৰাহ্মণানঞ্চ, মনুঞ্ঞং ৰাজভোজনং.

৬. অহেসুং অনুজাতস্স, মহিন্দো কস্সপো তথা;

উদযোতি তযো তেসু, মহিন্দো যুৱৰাজকো.

৭. হুত্ৱা তস্সানুৱত্তন্তো, সক্কচ্চং তমুপট্ঠহি;

সঙ্ঘানামাসি ৰাজস্স, ভৰিযা তস্স ৰাজিনী.

৮. কীড়নত্থং সমুদ্দস্স, গতে ৰাজিনি পট্টনং;

উদযো আদিপাদোসো, ওহীনো নগৰে তদা.

৯. নালনামং গহেত্ৱান, ধীতৰং মাণিলানিযা;

ৰক্খিতং ৰাজৰক্খায, পুড়ত্থিনগৰং অগা.

১০. ৰাজা তস্মিং অকুজ্ঝিত্ৱা, সন্ধিং কত্ৱা অকুপ্পিযং;

মহাদীপাদং পেসেত্ৱা, তোসত্ৱা তং ইধানযি.

১১. এৱং সমগ্গা তে আসুং, ততো পট্ঠায খত্তিযা;

ৰক্খন্তা সাসনং লোকং, ৱসিংসু সুসমাহিতা.

১২. ততো কেনচি কালেন, পণ্ডুৰাজা মহাবলো;

জম্বুদীপা ইধা’গম্ম, দীপ গণ্হিতুমাৰভি.

১৩. ৰাজা সুত্ৱা মহাসেনং, পেসুযিত্থ তদন্তিকং;

অমচ্চানং ৱিৱাদেন, থদ্ধোতাৰো নাৰাধিপো.

১৪. পণ্ডুৰাজা ৱিনাসেন্তো, সব্বং তং দেসমুত্তৰং;

খন্ধাৱাৰং নিৱেসেসি, মহাতালিতগামকে.

১৫. ৱসন্তা দমিড়া এত্থ, বহৱো যে তহিং তহিং;

সব্বে তং পক্খিযাহেসুং, ততো সো বলৱা অহু.

১৬. তত্থ গন্তা মহাসেনা, ৰঞ্ঞো যুজ্ঝিতুমাৰভি;

হত্থিক্খন্ধগতো পণ্ডু-ৰাজাপি সমুপাৱিসি.

১৭. অহু দমিড়সেনাসা, পস্সন্তি সামিনো মুখং;

সম্পত্তবলহুস্সাহা, তদত্থে চত্তজীৱিতা.

১৮. দীপসেনা তু সামিন-মভাৱেন নিৰুস্সুক্কা;

যুজ্ঝন্তি পৰিভিন্দিত্ৱা, পলাযিত্থ ততো ততো.

১৯. ওতৰিত্থমহাসেনা, পণ্ডুৰাজাস্স তঙ্খণে;

মাৰসেনাৱ গচ্ছন্তি, ৱিচুণ্ণেন্তি মহাজনং.

২০. ৰাজা সেনায ভিন্নত্তং, সুক্কা সব্বং সমাদিয;

হত্থসাৰং পুৰং হিত্ৱা, মলযাভিমুখো গতো.

২১. ততো হত্থিং সমাৰুয্হ, যুৱৰাজা মহিন্দকো;

যুজ্ঝন্তো সকসেনায, পলাতত্তং সমেক্খিয.

২২. একেনমে ন সক্কা ৱে, সব্বে এতেহি মাৰিতুং;

এতেসং ন চ নীচানং, হত্থেসু মৰণং সুখং.

২৩. তস্মা ৱৰং মে মৰণং, মযা এৱেতি চিন্তিয;

হত্থিক্খন্ধগতোযেৱ, ছিন্দি সো সীসমত্তনো.

২৪. তং দিস্ৱা বহৱো সীসে, তত্থ ছিন্দিংসু সেৱকা;

তং দিস্ৱা দমিড়ী সেনা, হট্ঠতুট্ঠা পমোদিসা.

২৫. এতং সব্বং সমেক্খিত্ৱা, আদাপাদো সকস্সপো;

তুৰঙ্গৱৰমাৰুয্হ, সুসন্নদ্ধো মহাযুধো.

২৬. ৱিহাৰমুপসঙ্কম্ম, অভযং এককোৱ সো;

তাদিসম্পি মহাসেনং, ওগাহেত্ৱা ৱিদাৰযি.

২৭. সুপণ্ণো ৱিয গণ্হন্তো, ভূজগেন সলিলাল যে;

সো তং সব্বং নিৱত্তেসি, অত্তানঞ্চ সুগোপযি.

২৮. অস্সো একোৱ দিস্সিত্থ, তুৰঙ্গাৱলিসন্নিভো;

অত্তনো সো জনং কঞ্চি, অপস্সন্তো’নুগামিনং.

২৯. কিং মে একেন ৱেৰিনং, পূৰিতেন মনোৰথং;

কালন্তৰেহং জীৱন্তো, পূৰেস্সং মে মনোৰথং.

৩০. তস্মা গন্তুংৱ যুত্তন্তি, নিম্ফোটেত্ৱা মহাবলং;

নিব্ভযোৱ মহাযোধো, কোণ্ডিৱাতমুপাগমি.

৩১. পণ্ডুৰাজা মহাসেনা, অগ্গহেসি ততো পুৰং;

সীসং তং যুৱৰাজস্স, পণ্ডুৰাজস্স দস্সযুং.

৩২. সো তং দিস্ৱা চ ঝাপেত্ৱা, ৰাজূনং পণ্ডুদেসিনং;

সব্বমাড়াহনে কিচ্চং, তস্স কাতুং নিযোজযি.

৩৩. সব্বং সাৰং হৰাপেসি, ভণ্ডাগাৰম্হি ৰাজিনো;

অগ্গণ্হিত্থ গহেতব্বং, ৱিহাৰে নগৰেপি চ.

৩৪. পাসাদে ৰতনে সব্বে, সোৱণ্ণংসত্থুবিম্বকং;

সিলাময মুনিন্দস্স, চক্খুভূক মণিদ্ৱযং.

৩৫. তথা সোৱণ্ণপট্টে চ, থূপাৰামম্হি চেতিযে;

সুৱণ্ণ পটিমাযো চ, ৱিহাৰেসু তহিং তহিং.

৩৬. সব্বং গহেত্ৱা নিস্সাৰং, লঙ্কাদীপ মকাসি সো;

ছড্ডযিত্থ পুৰং ৰম্ম, যক্খভক্খিত ৰূপকং.

৩৭. ৰাজা’পি ৰক্খং দত্ৱান, মহামগ্গে তহিং তহিং;

গঙ্গাদ্ৱয মুখে ৱাসং, কপ্পেসি পৰিসঙ্কিতো.

৩৮. পণ্ডুৰাজা ততো সদ্ধিং, কাতুং সীহড়সামিনা;

অমচ্চে তত্থ পেসেসি, দিস্ৱা তে সীহলাধিপো.

৩৯. সুণিত্ৱা সাসনং তেসং, সব্বং তং সম্পটিচ্ছিয;

দূতানং কাৰযিত্ৱান, যথাকামেন সঙ্গহং.

৪০. হত্থিদ্ৱযং সদত্ৱান, সব্বমাভৰণম্পি চ;

তস্স পেসেসি দূতেসো, অত্তনোপি হিতাৱহে.

৪১. পণ্ডুৰাজা সিতং সব্বং, দিস্ৱা সন্তুট্ঠমানসো;

নিয্যাতেত্ৱান দূতানং, তদহেৱ মহাপুৰং.

৪২. নিক্খমিত্ৱা পুৰা গন্ত্ৱা, ন চিৰেনেৱ পট্টনং;

তত্থ আৰুয্হ নাৱং সো, সক দেস মুপাগমি.

৪৩. ততো আগম্ম নগৰং, সীলামেঘো মহীপতি;

যথাঠানে ঠপেত্ৱান, দীপং ৱসি সমাহিতো.

৪৪. ভাতৰং দুতিযং কত্ৱা, উদযং নাম খত্তিযং;

মহাদীপাদং তস্সা’দা, সোগত্থং দক্খিণং দিসং.

৪৫. সোপি খো ন চিৰেনেৱ, কত্ৱা পুঞ্ঞং যথাৰহং;

ৰোগেনেকেন সম্ফুট্ঠো, পৱিট্ঠো মচ্চুনো মুখং.

৪৬. কস্সপো আদিপাদোপি, পুলত্থিনগৰে ৱসং;

যোজেত্ৱা পণ্ডুৰাজেন, অহোসি কিৰ মাৰিতো.

৪৭. তদা কস্সপনামস্স, পুত্তা আসুং মহাৰহা;

আদিপাদস্স চত্তাৰো, ধঞ্ঞলক্খণ সঞ্ঞুতা.

৪৮. যো সেনং সব্বপঠমো, সেনো নাম কুমাৰকো;

সূৰো ৱীৰো মহুস্সাহো, ৰাজভাৰক্খমো সমো.

৪৯. ৰাজা মহাদীপাদত্তং, তস্স দত্ৱা যথাৱিধিং;

ভোগত্থং দক্খিণং দেসং, সৱাহন মুপাদিসি.

৫০. ৰোহণাধিপতিস্সা’সুং, পুত্তা কিত্তগ্গবোধিতো;

চত্তাৰো ধীতৰো তিস্সো, দস্সনেয্যা মনোৰমা.

৫১. তদা জেট্ঠসুতং তস্স, মহিন্দং নাম খত্তিযং;

পিতুচ্ছা মাৰযিত্ৱান, দেসং গণ্হি সসাধনং.

৫২. ভাতৰো তে তযো তস্মিং,

সংৰুট্ঠা ভাতু ঘাতনে;

আদায ভগীনী তিস্সো,

ৰঞ্ঞো সন্তিকমাগমুং.

৫৩. ৰাজাপি দিস্ৱা তেতীৱ, মমাযন্তো দযালুকো;

সব্বে দেৱকুমাৰেৱ, সুখং ৱড্ঢেসি পেমৱা.

৫৪. ততো কস্সপনামং সো, তেসং জেট্ঠং নৰিস্সৰো;

দেসং তং গণ্হ যাহীতি, দত্ৱা বলমপেসযি.

৫৫. সো’পি গন্ত্ৱান তং হন্ত্ৱা, ৰোহণং কসিণম্পি তং;

কত্ৱা হত্থগতং তত্থ, ৱসিত্থ নিৰুপদ্দৱো.

৫৬. অথ সো ভাতৰো দ্ৱে’পি, সেনঞ্চ উদযং তথা;

পক্কোসিত্ৱান, ভাজেত্ৱা, দেসং তেহি সহাৱসি.

৫৭. ৰাজা তা সাধু ৱড্ঢেত্ৱা, ৱযপত্তাসু তীসু সো;

ৰাজকঞ্ঞাসু ধঞ্ঞাসু, দেৱচ্ছৰসূ ৰূপিসু.

৫৮. ঠপেত্ৱা ৰাজিনি ঠানে, উপৰাজস্স দাপযি;

সঙ্ঘনামং মহাভোগং, দত্ৱা ৰজ্জসৰিক্খকং.

৫৯. কণিট্ঠো উপৰাজস্স, মহিন্দো নাম ভাতুকো;

অত্থি সব্বগুণোপেতো, সব্বসত্থৱিসাৰদো.

৬০. তস্সা’দাসি দুৱে ৰাজা, ৰাজকঞ্ঞা মনোহৰা;

তিস্সৱ্হকিত্ত নামঞ্চ, দত্ৱা ভোগং যথাৰুচিং.

৬১. এৱং কৰোন্তো ঞাতীনং, সংগহং সো যথাৰহং;

আৰাধেন্তো চ দানাদি-সঙ্গহেহি মহাজনং.

৬২. ৰাজা দসযি ৰাজূনং, ধম্মেহি সমুপাগতো;

সমাচৰন্তো পুঞ্ঞানি, পৰিভুঞ্জিত্থ মেদিনিং.

৬৩. পংসুকূলিক ভিক্খূনং, কত্ৱা’ৰিট্ঠম্হি পব্বতে;

মহাভোগং অদাৰামং, নিম্মিতং ৱিয ইদ্ধিযা.

৬৪. পৰিহাৰঞ্চ তস্সদা, ৰাজাৰহমসেসতো;

আৰামিকে চ বহৱো, দাসে কম্মকৰেপি চ.

৬৫. পাসাদং সোৱ কাৰেসি, ৱিহাৰে জেতনামকে;

অনেকভূমিং ভূমিন্দো, বুদ্ধভূমিগতাসযো.

৬৬. ৱড্ঢেত্ৱা তত্থ কাৰেত্ৱা, সব্ব সোৱণ্ণযং জিনং;

সণ্ঠপেত্ৱা মহাভোগং, ৱসাপেসি চ ভিক্খৱো.

৬৭. মহাদি পৰিৱেণম্হি, কাৰেসি সুমনোহৰং;

পাসাদ মগ্গিসন্দংড্ঢং, তস্মিংযেৱ ৱিহাৰকে.

৬৮. কত্ৱা ৱীৰঙ্কুৰাৰামং, ৱিহাৰে অভযুত্তৰে;

মহাসঙ্ঘিক ভিক্খূনং, থেৰিযানঞ্চ দাপযি.

৬৯. পুব্বাৰামঞ্চ কাৰেসি, সম্পন্ন চতুপচ্চযং;

সদ্ধিং সো সঙ্ঘনামায, দেৱিযাপি চ অত্তনো.

৭০. মহাৱিহাৰেতাযেৱ, সদ্ধিং কাৰেসি ভূমিপো;

আৱাসং সঙ্ঘসেনৱ্হং, মহাভোগং মহামতি.

৭১. কাৰেত্ৱা সব্বসোৱণ্ণং, কেসধাতু কৰণ্ডকং;

মহাপূজং পৱত্তেসি, ৰজ্জং ৱিস্সজ্জি উত্তমো.

৭২. চেতিযস্স গীৰিস্সাদা, কাণৱাপিং বহুদযং;

ভিক্খূনং দিপৱাসীনং, দাপেসি চ তিচীৱৰং.

৭৩. পুলত্থি নগৰে কাসি, ৱাপিযো থুসৱাপিযা;

সেনগ্গবোধিমাৱাসং, গামাৰামিক সঞ্ঞুতং.