সত্তচত্তালীসতিম পৰিচ্ছেদ

পঞ্চৰাজকো

১. অচ্চযে পিতুনো ৰাজা, উপৰাজা অহোসি সো;

সমত্থো সক্কুমিত্তানং, কাতুং নিগ্গহ সংগহে.

২. সেনা নামসি সপ্পঞ্ঞা, মহেসী তস্স ৰাজিনো;

খুদ্দপুত্তা পীযা’তীৱ, ৰঞ্ঞো কল্যাণদস্সনা.

৩. অদাসি যুৱৰাজত্তং, জেট্ঠপুত্তস্স অত্তনো;

আদিপাদে’পৰেকাসি, ৰাজিনীপি চ ধীতৰো.

৪. দত্ৱা ঠানন্তৰং ৰাজা, তেসং তেসং যথাৰহং;

জনং সঙ্গহৱত্থূহি, সঙ্গহেসি চতূহিপি.

৫. অথ কেনাপি সো গন্ত্ৱা, হেতুনা মণিহীৰকং;

ৱসন্তো কিৰ অস্সোসি, পচ্চন্তো কুপিতো ইতি.

৬. ততো সেনাপতিঞ্চেৱ, জেট্ঠপুত্তঞ্চ অত্তনো;

গন্ত্ৱা সাধেথ তং দেস-মীতি পেসেসি সজ্জুকং.

৭. তেসু তত্থোপযাতেসু, পিসুনা ভেদচিন্তকা;

ৱত্ৱা যংকিঞ্চি ভিন্দিংসু, তে উভোপি নৰাধিপে.

৮. ততো দ্ৱে ৱেৰিনো হুত্ৱা, দেসং গণ্হিতুমাৰভুং;

ৰাজা সুত্ৱা খণেনেৱ, দুৰতিস্স মুপাগমি.

৯. তে উভো তত্থ ঘাতেত্ৱা, তেসং সব্বং সমাদিয;

হন্ত্ৱা তং পক্খিযে সব্বে, পুড়ত্থিনগৰং গমি.

১০. তদা ৰোহণদেসম্হি, ভোগাধিপতিনো সুতো;

দাঠাসিৱাদিপাদস্স, মহিন্দো নাম খত্তিযো.

১১. পিতুনো সো’পৰিজ্ঝিত্ৱা, ৰঞ্ঞো সন্তিকমাগমা;

দিস্ৱা ৰাজাপি সন্তুট্ঠো, তং সঙ্গণ্হি যথাৰহং.

১২. তেন মেত্তিং থিৰং কাতুং, ধীতৰং দেৱ নামিকং;

তস্স দত্ৱান পাহেসি, বলং ৰোহণমেৱসো.

১৩. সো গন্ত্ৱা ৰাজসেনায, মদ্দাপেত্ৱান ৰোহণং;

জম্বুদীপং পলাপেত্ৱা, পিতৰং ৰোহণং লভি.

১৪. মহাৱিহাৰে কাৰেসি, সলাকগ্গং থিৰং সুভং;

খোলক্খিযমুনিন্দস্স, পৰিহাৰায দাপযি.

১৫. মহানামৱ্হযং গামং, পূজযিত্ৱা যথাবলং;

ৱড্ঢমানদুমিন্দস্স, জিণ্ণং গেহঞ্চ কাৰিয.

১৬. ৰুক্খণত্থায তস্সা;দা, কোট্ঠাগামং বহুদযং;

নীলাৰামস্স পাদাসি, কাড়ুস্সং নাম গামকং.

১৭. লোহৰূপস্স পাদাসি, আৰামস্স চ গামকং;

জিণ্ণঞ্চ পটিসঙ্খাসি, পটিমাযো চ কাৰযি.

১৮. পাসাদে চেতিযো চেৱ, ৱিহাৰে চ অনপ্পকে;

পুড়ত্থিনগৰে’কাসি, ৱেজ্জসালং মহাদযো.

১৯. তথা পণ্ডা ৱিযঞ্চেৱ, ভোগগামসমাযুতং;

পিট্ঠসপ্পিনমন্ধানং, সালাযো চ তহিং তহিং.

২০. পোত্থকেসু লিখাপেত্ৱা, অট্টে সম্মা ৱিনিচ্ছিতে;

ৰাজগেহে ঠপাপেসি, উক্কোটনভযেন সো.

২১. নাগৱড্ঢননামস্স, ভোগগামে বহূ অদা;

লেখে’পুব্বে ন ৱাৰেত্ৱা, পালেত্ৱা পুব্বসাসনং.

২২. পিতৰা চ মহাদানং, পুঞ্ঞমঞ্ঞম্পি ৱা কতং;

সব্বং তমৱিনাসেত্ৱা, নিচ্চং সো ৰক্খি সাদৰো.

২৩. মহেসী চ মহাৰঞ্ঞো, পুঞ্ঞানি বহুকাৰযি;

কণ্টকং চেতিযং কাসি, দেৱী চেতিযপব্বতে.

২৪. কাৰেত্ৱা জযসেনঞ্চ, পব্বতং গামিকস্সদা;

ভিক্খুসঙ্ঘস্স সা গামং, মহুম্মাৰঞ্চ তস্স দা.

২৫. সিলামেঘৱ্হযং কত্ৱা, ভিক্খুনীনমুপস্সযং;

সিলামেঘৱ্হযে দাসি, ভিক্খুনীনঞ্চ পচ্চযে.

২৬. গামাযে’সুং পুৰাকীতা, ৱিহাৰো তত্থ সাধনং;

দত্ৱা তে মে চযিত্ৱান, ৱিহাৰস্সেৱ দাপযি.

২৭. ছাদযিত্ৱা মহাৰুক্খে, সব্বে চেতিযপব্বতে;

নানাৰাগে ধজে চেৱ, পটাকাযো চ পূজযি.

২৮. পুব্বাৰামকভাগম্পি, পাসাদং পটিসঙ্খৰি;

উস্সানৱিট্ঠিং দুব্ভোগং, সুভোগং তস্স কাৰযি.

২৯. ৱিহাৰং গিৰিভণ্ডঞ্চ, নট্ঠং পাকতিকং কৰি;

ভোগগামে চ দাপেসি, ভিক্খূনং তন্নিৱাসিনং.

৩০. অম্বুয্যানম্হি আৱাসং, কত্ৱা দপ্পুড়পব্বতং;

ভিক্খূনং তিসতস্সা’দা, সম্পন্নচতুপচ্চযং.

৩১. কাৰেত্ৱা নীলগল্লঞ্চ, আৰামং সো মনোৰমং;

দকৱাৰং বহুপ্পাদং, তস্স দাপেসি কাৰিয.

৩২. অৰিকাৰি ৱিহাৰে চ, পটিসঙ্খাসি জিণ্ণকং;

সলাকগ্গঞ্চ পাসাদং, অপুব্বংযেৱ কাৰযি.

৩৩. ৱাহদীপে সকাৰেসি, সেনগ্গবোধিপব্বতং;

ধম্মং তীসু নিকাযেসু, ৱাচযিত্থ বহুস্সুতে.

৩৪. গণ্হাপেসি চ ভিক্খূনং, অযোপত্তেসু গণ্ঠিকে;

পুঞ্ঞন্তি ৱুত্তং সব্বং সো, ন কিঞ্চি পৰিৱজ্জযি.

৩৫. কুলীনানমনাথানং, ইত্থীনং’দা পিড়ন্ধনং;

ভোজনং ভোজনত্থীনং, বহু সো দাসি ৰত্তিযং.

৩৬. গুন্নং সস্সানি পাদাসি, কাকাদীনঞ্চ ভত্তকং;

তণ্ডুলঞ্চ কুমাৰানং, মধুফাণিতসংযুত্তং.

৩৭. এৱং পুঞ্ঞানি কত্ৱান, নৰিন্দো সো সপাৰিসো;

ভুত্ৱা পঞ্চসু ৱস্সেসু, মেদিনিং সম্পৰিচ্চজি.

৩৮. ততো তস্স সুতো আসি, সীহড়ানং ৰথেসতো;

সব্বৰূপগুণোপেতো, মহিন্দো নাম খত্তিযো.

৩৯. সো ধম্মিকসীলামেঘো, ইচ্চাসি ধৰণীতলে;

ধম্মদীপো ধম্মধজো, সুদ্ধধম্মপৰাযনো.

৪০. পুব্বকেহি নৰিন্দেহি, কতং ধম্মপথানুগং;

সব্বং কাসি অহাপেত্ৱা, অধম্মং তু ৱিৱজ্জযি.

৪১. ৰাজাৰতনপাসাদে, কাতুং সো নৱকম্মকং;

সব্বকালেসু দাপেসি, গেট্ঠুম্বদকৱাৰকং.

৪২. জিণ্ণঞ্চ পটিসঙ্খাসি, পুঞ্ঞকম্মমকাসি চ;

ৰজ্জং কত্ৱান চতূসু, ৱস্সেসু নিধনং গতো.

৪৩. অগ্গবোধি ততো ৰাজা, ছত্তং উস্সাপযি পুৰে;

কাৰেন্তো সব্বসত্তানং, হিতং সুখমসেসতো.

৪৪. ধাতুপূজং সকাৰেসি, সত্থুসব্বগুণাৰহং;

পিতামহকতস্সা’পি, সম্বুদ্ধস্স মহামহং.

৪৫. উদযগ্গাদিবোধিঞ্চ, পৰিৱেণং সকাৰযি;

নামং গহেত্ৱা পিতুনো, অত্তনো চ নৰাধিপো.

৪৬. সভোগং পৰিৱেণঞ্চ, কত্ৱা তং ভূতনামকং;

সকাচৰিযকস্সা’দা, ভিক্খূনং তিসতস্স চ.

৪৭. ৰাজসালায দাপেসি, চূড়ৱাপিযগামকং;

গামদ্ৱযঞ্চ দাপেসি, কাড়ূলমল্লৱাতকে.

৪৮. পৱেসং ৱিনিৱাৰেসি, উপোসথদিনেসু সো;

মচ্ছমংসসুৰাদীনং, অন্তোনগৰমত্তনো.

৪৯. ভিক্খূ ৱা চেতিযে ৱা সো, ৱন্দিত্ৱা নিক্খমং ততো;

ৱালুকা হা ৱিনস্সন্তু, ইতি পাদেসু ৱোধযী.

৫০. যং যং সোৱগ্গিযং কম্মং, কম্মং নিস্সৰণৱহং;

ৱত্থুত্তযে পসন্নো সো, কম্মং তং সব্বমাচৰি.

৫১. মাতুপট্ঠাননিৰতো, ৰত্তিন্দিৱমহোসিসো;

গন্ত্ৱা তস্সা উপট্ঠানং, পাতোৱ কিৰ ভূপতি.

৫২. সীসং তেলেন মক্খেত্ৱা, উব্বট্টেত্ৱান জল্লিকং;

নখে ৱিসুদ্ধে কত্ৱান, নহাপেত্ৱান সাদৰং.

৫৩. অচ্ছাদেত্ৱা নৱং ৱত্থং, সুখসম্ফস্সমত্তনো;

ৱত্থং ছড্ডিতমাদায, পেল্লেত্ৱা সযমেৱ তং.

৫৪. তস্স তোযেন সিঞ্চিত্ৱা, সীসং সমকুটং সকং;

গন্ধমালাহি তং সম্মা, চেতিযং ৱিহ পূজিয.

৫৫. নমস্সিত্ৱান তিক্খত্তুং, কত্ৱা তং সো পদক্খিণং;

দাপেত্ৱা পৰিসায’স্সা, ৱত্থাদীনি যথাৰুচিং.

৫৬. সহত্থেনেৱ ভোজেত্ৱা, ভোজনং তং মহাৰহং;

ভুত্থাৱসেসং ভুঞ্জিত্ৱা, সমাকিৰিযমত্থকে.

৫৭. ভোজেত্ৱা পৰিসং তস্সা, ৰাজভোজনমুত্তমং;

সজ্জেত্ৱা ৱাসগেহঞ্চ, সুগন্ধপৰিৱাসিতং.

৫৮. সহত্থা পঞ্ঞপেত্ৱান, সযনং তত্থ সাধুকং;

পাদে ধোৱিয মক্খেত্ৱা, গন্ধতেলেন সণ্হকং.

৫৯. সম্বাহেন্তো নিসীদিত্ৱা, কত্ৱা নিদ্দমুপেতকং;

কত্ৱা পদক্খিণং মঞ্চং, তিক্খত্তুং সাধুৱন্দিয.

৬০. আৰক্খকে নিযোজেত্ৱা, দাসেকম্মকৰেপি চ;

তস্সা পিট্ঠিমকত্ৱান, অপক্কমেৱ পিট্ঠিতো.

৬১. ঠত্ৱা অদস্সনে ঠানে, তিক্খত্তুং পুন ৱন্দিয;

সন্তুট্ঠো তেন কম্মেন, সৰন্তো তং পুনপ্পুনং.

৬২. গেহং যাতি সজীৱন্তং, এৱমেৱ উপট্ঠহি;

একদা দাসৱাদেন, ৱন্দিত্ৱা দাসমত্তনো.

৬৩. তেনত্তনো কথাপেসি, খমাপেতুং সযং ৱচো;

অত্তানং ভিক্খুসঙ্ঘস্স, দাপযিত্ৱান মাতৰা.

৬৪. ধনমত্থগ্ঘনং ঞত্ৱা, ভুজিস্সো আসি বুদ্ধিমা;

এৱং পুঞ্ঞপৰো হুত্ৱা, কত্ৱা দীপস্স সঙ্গহং.

৬৫. একাদসহি ৱস্সেহি, দেৱলোকমুপাগমি;

তস্সানুজো দপ্পুড়ো’থ, ৰাজা হোসি তদচ্চযে.

৬৬. সব্বং পুব্বকৰাজূনং, চৰিযং সো সমাচৰি;

তদা মহিন্দনামস্স, পুত্তাৰোহণসামিনো.

৬৭. পিতৰা নিহটা’গঞ্ছুং, ৰাজানং মাতুলং সকং;

সো তে দিস্ৱা পৱত্তিং তং, সুত্ৱা দত্ৱা মহাবলং.

৬৮. পাহেসি পিতৰা যুদ্ধং, কাতুং বন্ধু হিতে ৰতে;

মহিন্দোপি তথাভাৱং, ৱিদিত্ৱা ৰোহণাধিপো.

৬৯. যুদ্ধং পটিপদেযেৱ, তেসং’কাসি মহাবলো;

তে উভোপি পলাযিংসু, দত্ৱা সেনায নাযকং.

৭০. পুনাগন্ত্ৱা মহীপালং, সেৱমানা ইধা’ৱসুং;

পিতাপি তেন সন্তুট্ঠো, অঞ্ঞেন সকবন্ধুনা.

৭১. যুজ্ঝন্তো মৰণং গঞ্ছি, ঞাতিসোপি মতো কিৰ;

তদা’দা ভাগিনেয্যস্স, ৰাজা কিত্তগ্গবোধিনো.

৭২. সব্বৰূপগুণোপেতং, ধিতৰং দেৱ নামিকং;

সো দপ্পুড়ং ঠপেত্ৱান, সেৱত্থং তস্স ৰাজিনো.

৭৩. সযং সেনঙ্গমাদায, ৰোহণং সমুপাগমি;

ৰোহণাধিপতি হুত্ৱা, সব্বাকাৰসমপ্পিতো.

৭৪. পুত্তধীতাহি ৱড্ঢেন্তো, ৱাসং তত্থেৱ কপ্পযি;

ৰাজাকাসি দুমিন্দস্স, ঘৰং জিণ্ণং নৱং থিৰং.