ছচত্তালীসতিম পৰিচ্ছেদ

১. …ৱাসং-কত্ৱা সুলভপচ্চযং;

দাসি ধম্মৰুচিনং সো, ৰাজিনী দীপকম্পি চ.

২. কাৰেত্ৱান পৰিচ্ছেদং, মহানেত্তাদি পাদিকং;

তেসমেৱ অদা কোড়ু-ৱাতে সো দেৱতিস্সকং.

৩. ৱহত্থলে চ সো কত্ৱা, কদম্বগোননামকং;

দেৱপাড়িম্হি কত্ৱান, গীৰিৱ্হনগৰং তথা.

৪. কত্ৱা অন্তৰসোব্ভম্হি, দেৱনামং ৱিহাৰকং;

ৰাজমাতিকমাৰামং, কত্ৱা’দা পংসুকূলিনং.

৫. গোকণ্ণকৱিহাৰে’কা, পধানঘৰমেৱ চ;

জিণ্ণগেহঞ্চ কাৰেসি, ৱড্ঢমানকবোধিযা.

৬. সঙ্ঘমিত্তৱ্হযে চেৱ, অঞ্ঞত্থ চ মহাযসো;

তত্থ তত্থ ৱিহাৰেসু, নৱকম্মমকাৰযি.

৭. ছব্বীসতি সহস্সানি, সুৱণ্ণানং সমপ্পিয;

জিণ্ণানি পটিসঙ্খাসি, ৰাজা চেতিযপব্বতে.

৮. তালৱত্থুৱিহাৰঞ্চ, কাৰেত্ৱা পণ্ণভত্তকং;

ৱিহাৰস্স মহাসেন-নৰিন্দৱ্হস্স দাপযি.

৯. গোণ্ডিগামিকৱাপিঞ্চ, ছিন্নং বন্ধি যথা পুৰা;

দানভণ্ডঞ্চ সো সব্বং, সব্বেসং দাসি পাণিনং.

১০. উপোসথং উপৱসতি, সদ্ধিং দীপজনেহি সো;

ধম্মঞ্চ তেসং দেসেতি, দাতুং লোকুত্তৰং সুখং.

১১. কম্মং সোৱগ্গিযং তস্স, ৰজ্জে সব্বো সমাচৰি;

যং কৰোতি মহীপালো, তং তস্স কুৰুতে জনো.

১২. তস্মা ৰাজা মহাপঞ্ঞো, ধম্মমেৱ সমাচৰে;

সো নিৱুত্থনিৱুত্থম্হি, ঠানে হোতি মহাযসো.

১৩. সম্পত্তপৰিৱাৰো চ, অন্তে গচ্ছতি নিব্বুতিং;

অত্তত্থঞ্চ পৰত্থঞ্চ, তস্মা পস্সেয্য বুদ্ধিমা.

১৪. অত্তনা যদি একেন, ৱিনিতেন মহাজনা;

ৱিনযং যন্তি সব্বেপি, কোতং নাসেয্য পণ্ডিতো.

১৫. পযোগো যো হি সত্তানং, লোহদ্ৱয হিতাৱহো;

সো তেন অকতো নত্থি, ৰত্তন্দিৱমতন্দিনা.

১৬. অত্তনো সো নিৱত্থানি, ৱত্থানি সুখুমানি চ;

পংসূকূলিকভিক্খূনং, চীৱৰত্থায দাপযি.

১৭. অট্ঠানৱিনিযোগোপি, সঙ্গহো ৱা ৱিৰূপকো;

সাৱজ্জো পৰিভোগো ৱা, তস্স নাহোসি সব্বসো.

১৮. যে যে সত্তা যদা হাৰা, তেসং তং তং সদাপযি;

যে যেন সুখী হোন্তি, তে তে তেন সুখাপযী.

১৯. এৱং পুঞ্ঞানি কত্ৱান, ছব্বস্সানি নৰাধিপো;

অগমা দেৱৰাজস্স, সন্তিকং সন্তিযাৱহো.

২০. অথ তস্স নুজো ৰাজা, কস্সপো হোতি খত্তিযো;

সমত্থো ৰজ্জভাৰস্স, ৱহিতুং পুব্বৱুত্তিনো.

২১. পিতা ৱিয নিযং পুত্তং, সো সঙ্গণ্হি মহাজনং;

দানেন পেয্যৱজ্জেন, অত্থস্স চৰিযায চ.

২২. ঠানন্তৰঞ্চ দাপেসি, তস্স তস্স যথাৰহং;

সযং ভুঞ্জিত্থ ভোগেপি, সব্বদুক্খৱিৱজ্জিতো.

২৩. গীহিনঞ্চেৱ ভিক্খূনং, ব্ৰহ্মণানঞ্চ খত্তিযো;

ৱত্তাপযি সকাৱাৰে, মাঘাতঞ্চেৱ কাৰযি.

২৪. মচ্ছতিত্থে দুৱে চেৱ, আৱাসং হেড়িগামকং;

ৱণিজ্জগামমাৰামং, কস্সপাদীগিৰিং তথা.

২৫. তথা অম্বতনৱ্হঞ্চ, পধানঘৰ মুত্তমং; ভোগগামঞ্চ…

[এত্থকস্সপস্স ৰজ্জপটিবদ্ধায কথায ঊনতা দিস্সতি.]

২৬. তেসং সব্বকনিট্ঠোপি, মহিন্দো নাম খত্তিযো;

সম্পত্তৰজ্জো নাহোসি, ৰাজা ৰজ্জ ধুৰন্ধৰো.

২৭. তস্সপি কিৰ নিলৱ্হো, সহাযো চীৰসত্থুতো;

মতো পুব্বেৱ তস্মা, সো সৰন্তো তং ন ইচ্ছিতং.

২৮. অহোৰজ্জম্পি দীপম্হি, ন মঞ্ঞিত্থ সুখাৱহং;

অভাৱেন সহাযস্স, সহাযা’তীৱ দুল্লভা.

২৯. তেনেৱ ৱুত্তং মুনিনা, ধম্মা যেকেচি লোকিযা;

তথা লোকুত্তৰা চেৱ, ধম্মা নিব্বানগামিনো.

৩০. কল্যাণমিত্তং আগম্ম, সব্বে তে হোন্তি পাণিনং;

তস্মা কল্যাণমিত্তেসু, কত্তব্বো’তি সদা দৰো.

৩১. আদিপাদোৱ সো তস্মা, হুত্ৱা ৰজ্জং ৱিচাৰযি;

পালেতুংযেৱ দীপম্হি, জিৱন্তো ৱিয পাণিনো.

৩২. কস্সপস্স সভাতুস্স, পুত্তং সো অগ্গবোধিকং;

ঠপেত্ৱা ওপৰজ্জম্হি, দত্ৱা ভোগমনপ্পকং.

৩৩. দেসং দত্ৱান পাচিনং, ৱসিতুং তত্থ পেসিয;

দেসং দক্খিণমাদাসি, ৰাজ পুত্তস্স অত্তনো.

৩৪. মহাপাড়িম্হি দানঞ্চ, দাপেসি দসৱাহণং;

সব্বে ভোগে সমে’কাসি, যাচনানং সহ’ত্তনা.

৩৫. অদত্ৱা যাচকানং সো, নু কিঞ্চি পৰিভুঞ্জতি;

ভুত্তং ৱা সতিযা দেতি, দ্ৱি গুণং অত্তভুত্ততো.

৩৬. সকনামং সকাৰেসি, ভিক্খুনী ন মুপস্সযং;

পাদানগৰগল্লঞ্চ, আৰাম মৰিযাদকং.

৩৭. মহিন্দতটমাৰামং, সম্পত্ত চতুপচ্চযং;

অঞ্ঞম্পি বহুধা কাসি, পুঞ্ঞং পুঞ্ঞগুণেৰতো.

৩৮. তিণী ৱস্সানি কাৰেত্ৱা, ৰজ্জমেৱ মহামতি;

গৱেসন্তো সহাযং’ৱ, দেৱলোকমুপাগমি.

৩৯. ৱসন্তো দক্খিণে দেসে, অগ্গবোধি কুমাৰকো;

কেনাপি কৰণীযেন, নগৰং আগতো অহু.

৪০. তস্মিং তত্থ ৱসন্তম্হি, আদিপাদো মহিন্দকো;

মতো আসি ততো তস্স, ৰজ্জং হত্থগতং অহু.

৪১. সো তং হত্থগতং কত্ৱা, সণ্ঠপেত্ৱান সাসনং;

পাচিন দেসপতিনো, অগ্গবোধিস্স পেসযি.

৪২. স আগন্ত্ৱা অহু ৰাজা, সিলামেঘোতি সঞ্ঞিতো;

ওপৰজ্জে কুমাৰঞ্চ, অভিসিঞ্চিত্থ ভূপতি.

৪৩. সো ৰাজা নং নিযোজেত্ৱা, চিন্তা ভাৰং ৱিমুঞ্চিয;

ভোগে ভুঞ্জথ তুম্হেতি, সযং ৰজ্জং ৱিচাৰযি.

৪৪. যথাযোগং জনস্সেস-কাসি নিগ্গহসংগহে;

দেসে উব্বিনযং সব্বং, মগ্গং পাপেসি চক্খুমা.

৪৫. এৱং তেসু ৱসন্তেসু, ওতাৰং পাপকম্মিনো;

ন লভন্তা ৱিচিন্তেসুং, ভিন্দিতব্বা ইমে ইতি.

৪৬. ৰাজানমুপসঙ্কম্ম, অৱোচুং পিসুনং ৰহো;

তুৱং ৰাজাসি নামেন, ৰাজা অঞ্ঞো সভাৱহো.

৪৭. উপৰাজা অযং ৰজ্জং, গণ্হিস্সতি মহাজনং;

সঙ্গয্হ ন চিৰেনেৱ, হোতি ৰাজা ন সংসযো.

৪৮. তং সুত্ৱান মহীপালো, পৰিভিজ্জি কুমাৰকে;

কুমাৰোপি ৱিধিত্ৱা তং, চোৰো হুত্ৱান ৰাজিন্দো.

৪৯. পলাযিত্ৱা সকং দেসং, সঙ্গণ্হিত্ৱা তহিং জনে;

মহন্তং বলমাদায, কাতুং সঙ্গাম মাৰভি.

৫০. কদল্যাদিনিৱাতম্হি, সঙ্গামো ভিংসনো অহু;

গতো তত্থ পৰাজিত্ৱা, কুমাৰো মলযং ৱসো.

৫১. ততো ৰাজা কতঞ্ঞূ সো, উপকাৰং সভাতুনো;

চিন্তেত্ৱা ৰজ্জদানাদিং, পৰিদেৱিত্থ পাকটং.

৫২. কুমাৰোপি চ তং সুত্ৱা, অহোসি মুদুচিত্তকো;

এৱং তে অঞ্ঞমঞ্ঞস্স, সিনিদ্ধন্তং পকাসযুং.

৫৩. ৰাজা গন্ত্ৱা সযংযেৱ, মলযং এককো ৱংসো;

কুমাৰং তং সমাদায, আগমিত্থ সকং পুৰং.

৫৪. হোতি নিস্সংসযং [এৱংপি চিত্তো] অতীৱ সো;

ৱিৱাহং তেন কাৰেসি, ধীতৰং সঙ্ঘনামিকং.

৫৫. তায সদ্ধিং ৱসন্তো সো, ৱিস্সত্থো তেন ৰাজিনা;

পহাৰং তায পাদাসি, দুট্ঠো দোসম্হি কিস্মিংচি.

৫৬. পিতৰং সা উপাগম্ম, কৰুণং ৰোদিতম্পতি;

অকাৰণে মং মাৰেতি, দিন্নো ৱো সামিকো ইতি.

৫৭. সোপি তং সুতমত্তেৱ, দুক্কতং ৱত মে ইতি;

পব্বাজেসি লহুং গন্ত্ৱা, ভিক্খূনী ন মুপস্সযং.

৫৮. অগ্গবোধিসনামোথ, তস্সা মাতুল পুত্তকো;

সুচিৰেনেৱ কালেন, তস্সং সা ৰত্তমানসো.

৫৯. কালো’যন্তি ৱিদিত্ৱান, তমাদায পলাযিতুং;

অঞ্ঞতো তং গহেত্ৱান, গতো একোৱ ৰোহণং.

৬০. অগ্গবোধিং নৰিন্দো সো, অগ্গবোধি নমাদিয;

অগ্গবোধিং নিহন্তুং তং, ৰোহণং তমুপাৱীসি.

৬১. অগ্গবোধি নিসেধেত্ৱা, অগ্গবোধিং সভাতৰং;

অপৰে পব্বতে হন্তু-মগ্গবোধিং সযং গতো.

৬২. কসিণং ৰোহণং হত্থ-গতং কত্ৱা মহা বলো;

যুজ্ঝিত্ৱা তেন তং গণ্হি, ভৰিযং সঙ্ঘমত্তনো.

৬৩. ততো পট্ঠায সুখিতা, সমগ্গা তে তযো জনা;

ৱিস্সট্ঠা অঞ্ঞমঞ্ঞেসু, ৱিহৰিংসু যথাৰুচিং.

৬৪. ৱাপাৰনিং অকাৰামং, তথা মাণগ্গবোধিকং;

সভত্তুদ্দেসভোগঞ্চ, ৱিহাৰে অতিযুত্তৰে.

৬৫. হত্থি কুচ্ছিৱিহাৰে চ, ৱিহাৰে পুন পিট্ঠিকে;

মহাদীপৰিৱেণে চ, পাসাদে ৱাহদীপকে.

৬৬. থূপাৰামম্হি গেহস্স, দ্ৱাৰে চ পৰিজিণ্ণকে;

কাসি পাকতিকং তত্থ, থম্ভে চ পৰিৱত্তযি.

৬৭. এৱং কত্ৱান পুঞ্ঞানি, পুঞ্ঞানি চ যথাবলং;

চত্তালীসতিমে ৱস্সে, যথাকম্ম মুপাগমি.

৬৮. অথোপৰাজা ৰাজা’সি, অগ্গবোধি সিৰীধৰো;

তনযো সো মহিন্দস্স, আদিপাদস্স ধীমতো.

৬৯. সাসনম্পি চ লোকঞ্চ, সঙ্গণিত্থ যথাৰহং;

ওপৰজ্জে’ভিসিঞ্চত্থ, মহিন্দং পুত্তমত্তনো.

৭০. মহাবোধিস্স কাৰেসি, ঘৰং জিণ্ণং নৱং থিৰং;

আৰামে দ্ৱে চ কাৰেসি, কড়ন্দং মল্লৱাতকং.

৭১. ধম্মকম্মেহি সক্কচ্চং, সোধেসি জিনসাসনং;

ৱিনিচ্ছনন্তো ধম্মেন, ছিন্দি কূটট্টকাৰকে.

৭২. ভেসজ্জঞ্চ গিলানানং, মঙ্গলং চাৱমঙ্গলং;

লঙ্কাদীপম্হি সকলে, সযমেৱ ৱিচাৰযী.

৭৩. সলাকভত্তং দাপেসি, নিকাযত্তয ৱাসিনং;

ভোজনং পংসুকূলীনং, অত্তযোগ্গং মহাৰহং.

৭৪. এৱমাদীনি কত্ৱান, পুঞ্ঞানি সসযং ৱসী;

চুতো’সি ছহি ৱস্সেহি, পুলত্থিনগৰে ৱসং.

৭৫. ততো পুব্বেৱ তস্সাসি, পুত্তো সো যুৱৰাজকো;