পঞ্চচত্তালীসতিম পৰিচ্ছেদ

১. ৰঞ্ঞো তস্সচ্চযে ৰাজা, মাণৱম্মো অহোসি সো;

কিং গোত্তো কস্স পুত্তো চ, কথং ৰজ্জমপাপুণি.

২. মহাসম্মতৱংসম্হি, জাতো জাতিগুণাৱহো;

পুত্তো কস্সপনামস্স, থূপাৰামস্স ভেদিনো.

৩. ধীতা মলযৰাজস্স, সঙ্ঘনামস্স ৰাজিনো;

তং লভিত্ৱা ৱসং দেসে, উত্তৰে লীনৱুত্তিকো.

৪. হত্থদাঠনৰিন্দেন, তস্মিং অত্থেৱ ধাৰিতে;

জম্বুদীপমুপাগম্ম, নৰসীহং মহীপতি.

৫. গন্ত্ৱা ৱত্ৱা সকং নামং, সেৱিতুং তমুপক্কমি;

আৰাধেসি চ সব্বেহি, পযোগেহি নৰাধীপং.

৬. ৱিদিত্ৱা তস্স সোহজ্জং, নেত্ৱা ভৰিযমত্তনো;

ৱাসং তত্থেৱ কপ্পেসি, সেৱমানো দিৱানিসং.

৭. সোপি আৰাধিতো তেন, কণ্ডুৱেট্ঠি নৰুত্তমো;

সব্বং নেন্তোৱ তং ৰজ্জং, মহাভোগমদাপযি.

৮. তেন সংৱাসমন্ৱায, ভৰিযা সঙ্ঘনামিকা;

চতস্সো ধীতৰো পুত্তে, চত্তাৰোপি ৱিজাযথ.

৯. অথেকদিৱসং ৰাজা, হত্থিক্খন্ধৱৰং গতো;

সঞ্চৰন্তো যথাকামং, মাণৱম্মেন একতো.

১০. নাড়িকেৰং পিৱিত্ৱান, তত্ৰট্ঠোৱ পিপাসিতো;

মাণৱম্মস্স পাদাসি, মঞ্ঞন্তো অঞ্ঞমেৱ তং.

১১. সো তং গহেত্ৱা চিন্তেসি, সখং পেস নৰাধিপো;

উচ্ছিট্ঠং নাম কিং হোতি, সত্তানং পৰমত্থতো.

১২. তস্মা যুত্তং মযাপাতু-মীতি চিন্তিয তং পিৱি;

এৱং হোন্তি মহুস্সাহা, দেতুকামাহি বুদ্ধিনো.

১৩. ৰাজাপি দিস্ৱা তং ভীতো, তস্সপী তাৱ সেসকং;

সযং পিৱি তথাহোতি, কম্মং পুঞ্ঞৱতং সদা.

১৪. ঠপেসি সকৱেসেৱ, ততো পট্ঠায অত্তনো;

ভোজনে সযনে চেৱ, পৰিহাৰে চ ৱাহনে.

১৫. এৱং তেসু ৱসন্তেসু, যুদ্ধত্থাযমুপক্কমি;

ৱল্লভো নৰসীহেন, নৰসীহো ৱিচিন্তযি.

১৬. অযং খো মম সেৱায, ৰজ্জং ৱংস গতং সকং;

লভিস্সামীতি সেৱেতি, ৰত্তিং দিৱ মতন্দিতো.

১৭. সচে সোপি মযা গন্ত্ৱা, যুজ্ঝন্তো মৰণং গতো;

তক্কিতং তস্স ময্হঞ্চ, সব্বং তমফলং ভৱে.

১৮. এৱং চিন্তিযতং ৰাজা, নিৱত্তেত্ৱা সকে পুৰে;

সযং ৱল্লভৰাজেন, কাতুং সঙ্গামমাৰসি.

১৯. মাণৱম্মোপি চিন্তেসি, সচে’যং মযি জীৱিতি;

ৰাজা মীযতি যুদ্ধম্হি, কিং ফলং মম জীৱিতে.

২০. ৱিস্সাসো দুক্কতো তেন, ভৱিস্সতি তথাসতি;

সঙ্গহেসি কিমত্থং মং, সমানত্তেন অত্তনো.

২১. তস্মা যুত্তং মযা গন্তুং, সহসঙ্গাম মণ্ডলং;

সুখঞ্হি সদ্ধিং তেনেত্থ, জীৱিতং মৰণংপি ৱা.

২২. এৱং চিন্তিয সন্নদ্ধ-বলো হত্থিৱৰং গতো;

গন্ত্ৱা দস্সেসি অত্তানং, সো তং সঙ্গাম মণ্ডলে.

২৩. নৰসীহোৱ তং দিস্ৱা, হট্ঠতুট্ঠো সমুগ্গিৰি;

সহো সন্থৱমেতস্মিং, কত্তব্বং মে কতং ইতি.

২৪. ততো মানস্স সেনা চ, সেনা চেৱস্সৰাজিনো;

সেনং ৱল্লভৰাজস্স, ৱিদ্ধংসেসি সমাগতা.

২৫. মাণৱম্মোপি দস্সেসি, তহিং সুৰত্তমত্তনো;

পৰক্কমন্তো দেৱানং, ৰণে নাৰাযণো ৱিয.

২৬. নৰসীতোপি সন্তুট্ঠো, মাণৱম্মস্স ৱিক্কমে;

আলিঙ্গত্ৱা সিনেহেন, ত্ৱং খো মে জযদো ইতি.

২৭. অত্তনো পুৰমাগম্ম, কত্ৱা ৱিজযমঙ্গলং;

মাণৱম্মস্স সেনায, কত্তব্বং সব্বমাচৰি.

২৮. অথেৱং চিন্তযি ৰাজা, কত্তব্বং মে সহাযকো;

অত্তনা’কাসি সব্বঞ্চ, অনণো সো মমজ্জতো.

২৯. ইণং মমাপি সোধেমি, কত্ৱা কত্তব্বমত্তনা;

কত্তঞ্ঞূ কতৱেদীহি, পুৰিসা’তীৱদুল্লভা.

৩০. অমচ্চে সন্নিপাতেত্ৱা, ইদং ৱচনমব্ৰৱি;

সহাযস্স মমেতস্স, কম্মে তুম্হেপি সক্খিনো.

৩১. মযাপি তস্স কত্তব্বং, কম্মং সাধু সুখাৱহং;

উপকাৰো হি সাধূনং, ধম্মো পুব্বোপকাৰিনো.

৩২. এৱং ৱুত্তে অমচ্চা তে, পচ্চাহংসু মহীপতি;

যং যমিচ্ছতি দেৱোহি, তং তং ৰুচ্চতি নো ইতি.

৩৩. অথ সো মাণৱম্মস্স, সেনং দত্ৱা সৱাহনং;

সব্বোপকৰণঞ্চেৱ, সব্বকম্মকৰেপি চ.

৩৪. গচ্ছাতি ৱত্ৱা তং যন্তং, সহসেনাযপেক্খিয;

পৰিদেৱিত্থ ভূমিন্দো, ৱিপ্পৱুত্থং’ৱ পুত্তকং.

৩৫. মাণৱম্মোপি আৰুয্হ, নাৱাযো জলধীতটে;

ন চিৰেনেৱ আগম্ম, সমত্তিক্কম্ম ৱেগসা.

৩৬. সহ সেনায মদ্দন্থো, লঙ্কাদীপমুপৱিসী;

তং সুত্ৱান পলাযিত্থ, ৰাজা দাঠোপতিস্সকো.

৩৭. মাণৱম্মো পুৰং গন্ত্ৱা, অহুত্ৱাৱ নৰাধিপো;

পলাতমনুবন্ধিত্থ, পদানুপদমুগতো.

৩৮. তদা সা দমিড়ি সেনা, অস্সোসি কিৰ সামিকো;

মহাৰোগা’ভিভূতোতি, সুত্ৱা তং সা অপক্কমি.

৩৯. সুত্ৱা দাঠোপতিস্সো তং, সমাদায মহাবলং;

মাণৱম্মং উপাগম্ম, কাতুমাৰভি সংযুধং.

৪০. মাণৱম্মো চ চিন্তেসি, সব্বা সেনা গতা মম;

মতে মযি সমিজ্ঝেয্য, ৱেৰিনো মে মনোৰথং.

৪১. জম্বুদীপংৱ তস্মা’হং, গন্ত্ৱা’দাস বলং ততো;

পুন ৰজ্জং গহেস্সংতি, তস্মা এৱমকাসি সো.

৪২. গন্ত্ৱা পুন’পি দিস্ৱান, সহাযং নৰসীহকং;

আৰাধহন্তো নিপুণং, সক্কচ্চং তমুপট্ঠহি.

৪৩. যাৱ ৰাজচতুক্কংসো, মাণাম্মো তহিং ৱসি;

নৰসীহো’থ চিন্তেসি, মানত্থদ্ধো যসোধনো.

৪৪. ৰজ্জত্থং মে সহা যো মং, সেৱন্তোযেৱ অদ্ধগো;

ৱুদ্ধো হেস্সতি তং পস্সং, কথং ৰজ্জং কৰোমহং.

৪৫. ইমস্মিং পন ৱাৰস্মিং, পেসযিত্ৱা বলং মম;

ৰজ্জং তং ন গহেস্সামি, কো অত্থো জীৱিতেন মে.

৪৬. এৱং চিন্তিয সো সেনং, সন্নিপাতিয অত্তনো;

সন্নাহেত্ৱা যথা যোগং, দাপেত্ৱান যথাৰুচিং.

৪৭. সযমেৱ তমাদায, সমুদ্দতটমাগতো;

নাৱাযো চিত্তৰূপাযো, কাৰযিত্ৱা থিৰা বহূ.

৪৮. অমচ্চে আহ ‘‘এতেন, সদ্ধিং গচ্ছথ ভো’’ইতি;

নাৱং আৰোহিতুং সব্বে, ন ইচ্ছিংসু তদা জনা.

৪৯. তদা সীহো ৱিচিন্তেত্ৱা, সযং হুত্ৱা তিৰোহিতো;

অত্তনো পৰিহাৰং সো, ৰাজলক্খণসম্মতং.

৫০. সব্বং তস্সেৱ দত্ৱান, অলঙ্কাৰম্পি অত্তনো;

আৰোপেত্ৱান তং নাৱং, গচ্ছ ঠত্ৱান সাগৰে.

৫১. ইমং ভেৰিংচ ৱাদেহি, কোট্ঠনামন্তি যোজযী;

সো’পি সব্বং তথাকাসি, ৰাজানো অগমা ইতি.

৫২. আৰুহিংসু জনা নাৱং, একং কত্ৱা নৰাধিপং;

সো তং সেনঙ্গমাদায, মাণো গন্তুং সমাৰভি.

৫৩. কেৱলো’পি সমুদ্দো সো, অহোভি নগৰূপমো;

অথ সো পট্টনং পত্ৱা, ওতৰিত্ৱা সৱাহনো.

৫৪. ৱিস্সামেত্ৱা বলং তত্থ, ৱসং কতিপযে দিনে;

উত্তৰং দেসমাদায, কত্ৱা হত্থগতং জনং.

৫৫. অক্খোব্ভিয মহাসেনো, নগৰং গন্তুমাৰভি;

পোত্থকুট্ঠোপি তং সুত্ৱা, পচ্চুগ্গঞ্ছি মহাবলো.

৫৬. সংগচ্ছিংসু উভো সেনা, ভিন্নৱেলা’ৱ সাগৰা;

মাণৱম্মো ততো হত্থি-মাৰুয্হ গহিতাযুধো.

৫৭. পোত্থকুট্ঠঞ্চ ৰাজানং, দ্ৱেধা কত্ৱা পলাপযি;

হত্থদাঠং পলাযন্তং, দিস্ৱা জনপদা নৰা.

৫৮. সীসমস্স গহেত্ৱান, মাণৱম্মস্স দস্সযুং;

পোত্থকুট্ঠোপলাযিত্ৱা, মেৰুকন্দৰমাগমি.

৫৯. ততো তং সামিকো দিস্ৱা, সহাযো মে অযংচিৰং;

তস্মা ন সক্কা চড্ডেতুং, আপদে সৰণাগতং.

৬০. সামিনো চ সহাযস্স, নিদ্দোসোহং কথং ভৱে;

ইতি চিন্তিয পূৱং সো, সৱিসং খাদিযা’মৰি.

৬১. কুট্ঠকোপি চ তেনেৱ, খাদিত্ৱা পূৱকং মতো;

মাণৱম্মস্স তস্সেৱং, দীপো আসি অকণ্টকো.

৬২. মাণৱম্মো ততো দীপে, ছত্তং উস্সাপযি তদা;

ৱাৰেন্তো ৱিয তেনেৱ, দুক্খং দীপে জনস্স সো.

৬৩. পুঞ্ঞকম্মানি সো’কাসি, অনগ্ঘানি বহূনি চ;

সমত্থো কোহি তং সব্বং, ৱত্তুং পটিপদং নৰো.

৬৪. কপ্পগামৱ্হযঞ্চেৱ, তথা সেপণ্ণিনামকং;

পধানৰক্খে চ সিৰিং, সিৰীসঙ্ঘাদি বোধিকে.

৬৫. পাসাদং সোৱ কাৰেসি, পসাদাৱহমুত্তমো;

ছাদেসি লোহপাসাদং, থূপাৰামঘৰং তথা.

৬৬. থূপাৰামে চ পাসাদং কত্ৱা’দা পংসুকূলিনং;

জিণ্ণকং পটিসঙ্খাসি ছত্তং চেতিযমুদ্ধনি;

বহৱো জিণ্ণকাৱাসে তত্থেৱ পটিসঙ্খৰি.

[এত্থ মাণৱম্মস্স ৰজ্জকথায ঊনতা দিস্সতি. ইতো পট্ঠায অগ্গবোধিস্স ৰজ্জপটিবদ্ধা কথা ৱিৰ খাযতি.]