চতুচত্তালীসতিম পৰিচ্ছেদ

তিৰাজকো

১. অচ্চযে হত্থদাঠস্স, অগ্গবোধিকুমাৰকো;

কণিট্ঠো ৰাজিনো আসি, সিৰিসঙ্ঘাদি বোধিকো.

২. ধম্মৰাজা অযং আসি, সম্মা দস্সনসঞ্ঞুতো;

তস্মা সো পুঞ্ঞকম্মানি, অপ্পমেয্যানি ৱত্তযি.

৩. নিকাযত্তযৱাসীনং, ভত্তগ্গমৱলোকযি;

মহাপাড়িঞ্চ ৱড্ঢেসি, মাঘাতঞ্চেৱ কাৰযি.

৪. ঠানন্তৰঞ্চ দাপেসি, যথাৰহ মনালযো;

সিপগোত্তাদিযোগ্গেহি, সংগতেহি চ সংগহি.

৫. যত্থ কত্থচি দিস্ৱাপি, ভিক্খৱো সো মহামতি;

সক্কত্ৱা সোভণাপেসি, পৰিত্তং সাসনোগধং.

৬. থেৰং সো উপসঙ্কম্ম, নাগসালনিৱাসিনং;

দাঠাসিৱং মহাপঞ্ঞং, সীলৱন্তং বহুস্সুতং.

৭. সক্কচ্চ নং ততো সুত্ৱা, সম্মাসম্বুদ্ধসাসনং;

ধম্মে’তীৱপসীদিত্ৱা, সব্বসন্তিকৰো ইতি.

৮. সুত্ৱা থেৰিযৱাদানং, পুব্বঞাতীনমত্তনো;

পাপানং দুট্ঠচিত্তানং, অপকাৰে কতে বহূ.

৯. ৱিহাৰে পৰিৱেণে চ, জিণ্ণেপাকতিকে অকা;

ভোগগামে চ দাপেসি, তত্থ তত্থ বহূদযে.

১০. ৱিচ্ছিন্নপচ্চযে চাকা, তদাত্যং কুৰিতে ৱিয;

দাসকেপি চ সঙ্ঘস্স, যথাঠানে ঠপাপযি.

১১. পধানঘৰ মেতস্স, থেৰস্স’কাসনামকং;

পটিগ্গহেত্ৱা তং সো’পি, সঙ্ঘস্সা’দা মহামতী.

১২. ভোগগামে চ তস্সা’দা, ভৰত্তালং কিহিম্বিলং;

কতকঞ্চ তুলাধাৰং, অন্ধকাৰকমেৱ চ.

১৩. অন্ধকাৰং অন্তুৰেড়িং, বালৱং দ্ৱাৰনাযকং;

মহানিকড্ঢিকঞ্চেৱ, পেড়হাড়ং তথাপৰং.

১৪. এতে অঞ্ঞে চ সো দত্ৱা, ভোগগামে নৰিস্সৰো;

দাসি আৰামিকে চেৱ, অত্তনো কিৰ ঞাতকে.

১৫. তথা দ্ৱিন্নং নিকাযানং, ৱিহাৰে মন্দপচ্চযে;

দিস্ৱাপি চ সুত্ৱা ৱা, ভোগগামে বহূ অদা.

১৬. বহুনা কিন্তুৱুত্তেন, নিকাযেসু’পি তীসু’পি;

অদা গামসহস্সং সো, বহুপ্পাদং নিৰাকুলং.

১৭. অনুস্সৰন্তো সো তিণ্ণং, ৰতনানং গুণে ৱৰে;

একাৱলিং গহেত্ৱান, অক্খমাল মকা কিৰ.

১৮. এৱং সব্বপ্পযোগেহি, সো’হু ধম্মপৰাযনো;

সব্বে তমনুসিক্খন্তা, হেসু ধম্মকৰা নৰা.

১৯. দমিড়ো পোত্থকুট্ঠৱো, তস্স কম্মকৰো তদা;

মাটম্বিযৱ্হং কাৰেসি, পধানঘৰমব্ভুতং.

২০. বূককল্লে অম্বৱাপিং, তন্তৱাযিকচাটিকং;

গামং নিট্ঠিলৱেট্ঠিঞ্চ, তস্সা’দা সো সদা সকং.

২১. কপ্পূৰপৰিৱেণে চ, কুৰুন্দপিল্লকে তথা;

মহাৰাজঘৰে চেৱ, পাসাদে সো’ৱ কাৰযি.

২২. অঞ্ঞত্থা’দা তযো গামে, ৱিহাৰেসু মহাধনো;

পোত্থসাতৱ্হযো পঞ্ঞো, ৱিহাৰে জেতনামকে.

২৩. সেনাপতিৰাজনামং, পৰিৱেণং সমাপযি;

মহাকন্দো চ দমিড়ো, পৰিৱেণং সনামকং.

২৪. চুল্লপন্থং তথা একো, সেহালউপৰাজকং;

উপৰাজা সকাৰেসি, সঙ্ঘতিস্সো’পি ৰাজিনো.

২৫. অঞ্ঞেসু বহৱো আসুং, ৱিহাৰে এৱমাদিকে;

ভস্স ৰঞ্ঞো’ নুৱত্তন্তা, এৱং ধম্মীহি পাণিনো.

২৬. পাপং ৱাপি হি পুঞ্ঞং ৱা,

পধানোযং কৰোতি যো;

লো কো তং তং কৰোতেৱ,

তং ৱিজনেয্য পণ্ডিতো.

২৭. জেট্ঠনামা মহাপুঞ্ঞা, মহেসী তস্স ৰাজিনো;

জেট্ঠাৰামঞ্চ কাৰেসি, ভিক্খূনীনমুপস্সযং.

২৮. তস্সা’দাসি চ দ্ৱে গামে, পক্কপাসাণভূমিযং;

তম্বুদ্ধং ভেলগামঞ্চ, আৰামিকসতং তথা.

২৯. অকা মলযৰাজাপি, ধাতুগেহং মহাৰহং;

মণ্ডলগিৰিৱিহাৰম্হি, চেতিযস্স মহাধনো.

৩০. লোহপাসাদকে সো’ৱ, ছাদেসি মজ্ঝকূটকং;

বোধিতিস্সৱিহাৰঞ্চ, বোধিতস্সো মহাযসো.

৩১. দীপে মণ্ডলিকা সব্বে, তত্থ তত্থ যথাবলং;

ৱিহাৰে পৰিৱেণে চ, কাৰযিংসু অনপ্পকে.

৩২. তস্স কালো নৰিন্দস্স, পুঞ্ঞকম্মমযো ইধ;

অতিৱিত্থাৰভীতেন, সব্বসো ন ৱিচাৰিতং.

৩৩. পুব্বকোপি কথামগ্গো, আকুলো ৱিয ভাতিমে;

যথাপধানং কথিতং, হেতূনং উপলক্খণং.

৩৪. অথাপৰেন কালেন, পুলত্থিনগৰং গতো;

ৱাসং তত্থেৱ কপ্পেসি, কৰোন্তো পুঞ্ঞসঞ্চযং.

৩৫. অতেকিচ্ছিযৰোগেন, সম্ফুট্ঠো কালমত্তনো;

মৰণস্স ৱিদিত্ৱান, তমাহুযমহাজনং.

৩৬. ওৱদিত্ৱান ধম্মেন, মৰণং সো উপাগমি;

মহাজনো মতে তস্মিং, বাড়্হসোকো পৰোদিয.

৩৭. কত্ৱা আড়হণে তস্স, কিচ্চং সব্বমসেসতো;

তস্সাড়াহণভস্মম্পি, কত্ৱা ভেসজ্জমত্তনো.

৩৮. ৰাজা ভণ্ডঞ্চ তং সব্বং, সব্বঞ্চ বলৱাহনং;

সম্মা আদায গোপেত্ৱা, নগৰং সমুপাগমি.

৩৯. এৱং সোড়সমে ৱস্সে, ৰাজা আসি দিৱঙ্গতো;

পোত্থকুট্ঠোপি দমিড়ো, ৰজ্জং তস্স ৱিচাৰযি.

৪০. উপৰাজং গহেত্ৱান, দাঠাসিৱং খিপাপযি;

চাৰকো ৱিহিতুং সম্মা, ৰক্খাৱৰণ মাদিসি.

৪১. ৱিনা ৰঞ্ঞা ন সক্কাতি, মেদিনিং পৰিভুঞ্জিতুং;

আনেত্ৱা দত্তনামকং, ধনপিট্ঠপ্পধানকং.

৪২. উপ্পন্নং ৰাজৱংসম্হি, ৰজ্জে তং অভিসিঞ্চিয;

তস্স নামং ঠপেত্ৱান, সযং সব্বং ৱিচাৰযি.

৪৩. দন্তো সো ধনপিট্ঠিম্হি, ৱিহাৰং সকনামকং;

কাৰযিত্ৱান পুঞ্ঞানি, অঞ্ঞানিপি সমাচিনি.

৪৪. সমকন্তু সো ঠত্ৱা’ৱ, ৱস্সদ্ৱয মহুমতো;

পোত্থকুট্ঠো মতেতস্মিং, পুন অঞ্ঞম্পি মাণৱং.

৪৫. হত্থদাঠং সমাহূয, উণ্হা নগৰসম্ভৱং;

তম্পি ৰজ্জে ভিসিঞ্চিত্ৱা, যথা পুব্বং সযংৱসী.

৪৬. কাড়দীঘাৱিকং কত্ৱা, পধানঘৰকং তথা;

পুঞ্ঞমঞ্ঞং ছমাসেহি, সো’পি মচ্চুৱসং গতো.

৪৭. এৱং ৱিদিত্ৱা বহুপদ্দৱানি;

ধনানি ধঞ্ঞানি চ ৱাহনানি;

ৱিহায ৰজ্জেসু ৰতিংসপ্পঞ্ঞা;

মনুঞ্ঞপুঞ্ঞাভিৰতা ভৱেয্যুং.

সুজনপ্পসাদসংৱেগত্থায কতে মহাৱংসে

তিৰাজকো নাম

চতুচত্তালীসতিমো পৰিচ্ছেদো.