তেচত্তালীসতিম পৰিচ্ছেদ

চতুৰাজকো

১. ততো ৱিজিতসঙ্গামো, কস্সপো পুৰিতাসযো;

মহাপাড়িম্হি সঙ্ঘস্স, সমিদ্ধং ভোজনং অকা.

২. নাগসালা নিৱাসিং সো, মহাধম্মকথিং যতিং;

মহাপূজায পূজেত্ৱা, সদ্ধম্মং তেন ৱাচযি.

৩. ৱসন্তং ভাতুআৱাসে, সমুদ্দিস্স লিখাপযি;

কটন্ধকাৰৱাসিং সো, পাড়ি সব্বং সসঙ্গহং.

৪. জিণ্ণং সঙ্খৰিকম্মঞ্চ, নৱং কাৰেসি চেতিযে;

সঙ্ঘভোগমনেকঞ্চ, তত্থ তত্থ পৱত্তযি.

৫. নানামণিসমুজ্জোতং, কাসি চূড়মণিত্তযং;

সতং পণ্ডুপলাসানং, ৱত্থদানেন তপ্পযি.

৬. তস্সাসুং বহৱো পুত্তা, জেট্ঠো তেসঞ্চ মাণকো;

সব্বে তে ন ৱযপ্পত্তা, বালাৱিগতবুদ্ধিনো.

৭. ততো সো ব্যাধিনা ফুট্ঠো, অতেকিচ্ছেন কেনচি;

পুত্তা মে বালকা সব্বে, নে’তে ৰজ্জক্খমা ইতি.

৮. ৱসন্তং ৰোহণে দেসে, ভাগিনেয্যং মহামতিং;

আহুয সব্বং পাদাসি, ৰজ্জং পুত্তেহি অত্তনো.

৯. গন্ধমালাদিপূজাহি, পূজযিত্ৱান চেতিযে;

ভিক্খুসঙ্ঘং খমাধপসি, দত্ৱান চতুপচ্চযং.

১০. এৱং ধম্মং চৰিত্ৱান, মিত্তামচ্চজনেসু চ;

গতো নৱহি ৱস্সেহি, যথাকম্মং নৰাধিপো.

১১. কত্ৱা কত্তব্বকিচ্চং সো, মাতুলস্স সগাৰৱো;

সঙ্গহন্তো জনং মাণো, দমিড়ে নীহৰাপযি.

১২. একতো দমিড়া হুত্ৱা, নিব্বাসেম ইমং ইতি;

তস্মিং ঠিতে বহিদ্ধাৱ, অগ্গহেসুং পুৰং সযং.

১৩. হত্ত দাঠস্স পেসেসি, জম্বুদীপগতস্স তে;

আগন্তুংতৱ কালোতি, সাসনং ৰজ্জগাহণে.

১৪. মাণো’পি সঙ্ঘং পেসেসি, সাসনং পিতুৰোহণং;

পিতা সুত্ৱান তং আগা, ন চীৰেনেৱ ৰোহণা.

১৫. উভে তে মন্তযিত্ৱান, অকংসু সন্ধিলেসকং;

উমিড়েহি ততো জাতা, সব্বে তে সমৱুত্তিনো.

১৬. ততো সো পিতৰং ৰজ্জে, অভিসিঞ্চিত্থ মাণকো;

সো’ভিসিত্তো নিকাযানং, সহস্সানং তযং অদা.

১৭. সঙ্ঘং ৰট্ঠঞ্চ সঙ্গয্হ, সব্বং ৰাজকুলট্ঠিতং;

ভণ্ডং পেসেসি সত্তূহি, ৰক্খণত্থায ৰোহণং.

১৮. হত্থদাঠোপি সুত্ৱান, দমিড়ানং তু সাসনং;

খণেনা’গা ইমং দীপং, গহেত্ৱা দমিড়্হং বলং.

১৯. তদা তে দমিড়া সব্বে, পৰিভূতা ইধ ঠিতা;

আযন্তমেৱ তং গন্ত্ৱা, পৰিৱাৰেসু মঞ্জসে.

২০. মাণোপি সুত্ৱা তং সব্বং, নাযং কালোতি যুজ্ঝিতুং;

পেসেত্ৱা পিতুৰাজানং, সদ্ধিং সাৰেন ৰোহণং.

২১. পুব্বদেসং সযং গন্ত্ৱা, সঙ্গণ্হন্তো জনং ৱসী;

লদ্ধা দমিড়পক্খং সো, গহেত্ৱা ৰাজকং পুৰং.

২২. দাঠোপতিস্সো ৰাজাতি, নামং সাৱেতি অত্তনো;

মাতুলং ৱিয তং লোকো, তেন নামেন ৱোহৰি.

২৩. পিতুচ্ছপুত্তমানেত্ৱা, অগ্গবোধি সনামকং;

ঠপেত্ৱা যুৱৰাজত্তে, দেসঞ্চা’দাসি দক্খিণং.

২৪. ঠানন্তৰঞ্চ পাদাসি, নিস্সিতানং যথাৰহং;

সাসনস্স চ লোকস্স, সব্বং কত্তব্বমাচৰি.

২৫. মহাপাড়িম্হি দাপেসি, সৱত্থং দধিভত্তকং;

খীৰং পাযাসকঞ্চেৱ, ধম্মং সুণি উপোসথি.

২৬. কাৰেত্ৱা সব্বপূজাযো, দেসা পেত্ৱান দেসনং;

এৱমাদীহি পুঞ্ঞেহি, অত্তানং’কাসি ভদ্দকং.

২৭. কস্সপস্স ৱিহাৰস্স, দত্ৱাসেনৱ্হগামকং;

মহাগল্লঞ্চ পাদাসি, পধানঘৰকস্স সো.

২৮. পৰিৱেণস্স মোৰস্স, অকাসি সকগামকং;

থূপাৰামস্স পুণ্ণোড়িং, দত্ৱা সক্কাসি চেতিযং.

২৯. কপ্পূৰপৰিৱেণং সো, কাৰেসি অভযুত্তৰে;

ৱিহাৰং তিপুথুল্লৱ্হং, কত্ৱা তস্সেৱ দাপযি.

৩০. তস্মিং কৰোন্তে ৱাৰেসুং, সীমাযন্তো’তি ভিক্খৱো;

থেৰিযা তে কিবাহেত্ৱা, বলং তথেৱ কাৰযি.

৩১. অথ তে তে থেৰিযা ভিক্খূ, দুম্মঞ্ঞূ তত্থ ৰাজিনি;

অস্সদ্ধং তং ৱিদিত্ৱান, পত্তনিক্কুজ্জনং কৰুং.

৩২. ৱুত্তঞ্হি মুনিনা তেন, অস্সদ্ধো যো উপাসকো;

অলাভায চ ভিক্খূনং, চেতেত’ক্কোসতি চ তে.

৩৩. পত্তনিকুজ্জনং তস্স, কত্তব্বন্তি ততো হি তে;

তস্স তং কম্মমকৰুং, লোকো মঞ্ঞিত্থ অঞ্ঞথা.

৩৪. আদাযু কুজ্জিতং পত্তং, চৰন্তো ভিক্খুভিক্খকং;

নিকুজ্জেয্য ঘৰদ্ৱাৰে, তস্সা’তি কথিকং কৰুং.

৩৫. তস্মিং সো সমযে ফুট্ঠো, ব্যাধিনা মহতামৰি;

ৱস্সম্হি নৱমে ৰাজা, সম্পত্তো জীৱিতক্খযং.

৩৬. দপ্পুলোপি ততো ৰাজা, গতো ৰোহণকং সকং;

ৱাসং কপ্পেসি তত্থেৱ, কৰোন্তো পুঞ্ঞসঞ্চযং.

৩৭. ইতো পট্ঠায ৱক্খাম, তস্স ৱংসমনাকুলং;

ৱুচ্চমানম্হি এত্থেৱ, তস্মিং হোতি অসঙ্কৰো.

৩৮. জাতো ওক্কাকৱংসম্হি, মহাতিস্সোতি ৱিস্সুতো;

আসি একো মহাপুঞ্ঞো, সমাকিণ্ণগুণাকৰো.

৩৯. তস্সে’কা ভৰিযা আসি, সঙ্ঘপিৱাতি ৱীস্সুতা;

ধঞ্ঞপুঞ্ঞগুণূপেতা, ধীতা ৰোহণসামিনো.

৪০. তস্সাপুত্তা তযো আসুং, পঠমো অগ্গবেধিকো;

দুতিযো দপ্পুলো নাম, ততিযো মণিঅক্খিকো.

৪১. একাৱ ধীতা তস্সাসি, ৰাজনমগমা চ সা;

জেট্ঠো ৰোহণনামস্স, দেসস্সা’সি সযং ৱসী.

৪২. মহাপাড়িং স কাৰেসি, মহাগামে মহাধনো;

দাঠগ্গবোধিনামঞ্চ, পৰিৱেণং তহি ৱংসো.

৪৩. কাণগামম্হি কাণানং, গিলানানঞ্চ সালকে;

ৱিহাৰে পটিমাৱ্হে চ, মহন্তং পটিমাঘৰং.

৪৪. পতিট্ঠপেসি কত্ৱান, বুদ্ধতত্থ সিলামযং;

মহন্তনামং সপ্পঞ্ঞো, ইদ্ধীহি ৱিয নিম্মিতং.

৪৫. সালৱাণঞ্চ কাৰেসি, ৱিহাৰং অত্তনামকং,

পৰিৱেণৱিহাৰঞ্চ, তথা কাজৰগামকং.

৪৬. নৱকম্মানি কাৰেত্ৱা, ধম্মসালৱিহাৰকে;

সযং ৱচ্চকুটী এস, তত্থ সোধেসি বুদ্ধিমা.

৪৭. উচ্চিট্ঠং ভিক্খুসঙ্ঘস্স, ভোজনং পৰিভুঞ্জিয;

মণ্ডগামঞ্চ সঙ্ঘস্স, গামং’দাসি মসাদৱা.

৪৮. পুঞ্ঞানে’তানিচঞ্ঞানি, কত্ৱা তস্মিং দিৱঙ্গতে;

আসী তস্সা’নুজো তত্থ, সামি দপ্পুলনামকো.

৪৯. ইস্সেৰং তত্থ ৱত্তেসি, সম্পমদ্দিয সত্ত ৱো;

মহাদানং পৱত্তেসি, নিস্সঙ্কং ৰোহণং অগা.

৫০. তস্স তুট্ঠো জনো আহ, মহাসামীতি এসনো;

ততো পট্ঠায তং লোকো-মহাসামীতি ৱোহৰি.

৫১. সুত্ৱান তং সিলাদাঠো, নৰিন্দো সকধীতৰং;

তস্স পাদাসি সন্তুট্ঠো, গুণেহি বহুকেহি চ.

৫২. যুজৰাজত্তমস্সাদা, ৰজ্জযোগ্গোতি মানিতুং;

মাণৱম্মাদযো তস্স, পুত্তা আসুং মহাসযা.

৫৩. পাসাণদিপৱাসিস্স, মহাথেৰস্স সন্তিকে;

ধম্মং সুত্ৱা পসীদিত্ৱা, তস্মিং তং বহুমানিতুং.

৫৪. ৱিহাৰং ৰোহণে কত্ৱা, তস্স পাদাসি সোপি তং;

চাতুদ্দিসিযসঙ্ঘস্স, পৰিভোগায ৱিস্সজ্জি.

৫৫. অম্বমালা ৱিহাৰাদি, ৱিহাৰে কাৰযি বহূ;

খদিৰালিৱিহাৰঞ্চ, কত্ৱা দেৱ মপূজযি.

৫৬. পাসাদমনুৰাৰামং, মুত্তোলম্বং সুজিণ্ণকং;

সীৰিৱড্ঢঞ্চ পাসাদং, তথা তক্কম্বিলং পৰং.

৫৭. সোধেত্ৱা ভিক্খৱো তত্থ, দ্ৱত্তিংস পৰিৱাসযি;

সব্বপচ্চযদানেন, সন্তপ্পেত্ৱা মহীমতি.

৫৮. অদা কেৱট্টগম্ভীৰং, গামং নাগৱিহাৰকে;

তথা ৰাজৱিহাৰস্স, গোন্নগামং সমাদিযি.

৫৯. অদা তীসৱিহাৰস্স, তথাকন্তিকপব্বকং;

চিত্তলপব্বতস্সা’দা, গামং সো গোন্নৱিট্ঠিকং.

৬০. দত্ৱা ৰিযাকৰস্সেস, গামং সোমালৱত্থুকং;

অকাসি পটিমাগেহং, তথেৱ সুমনোহৰং.

৬১. তত্ৰট্ঠস্স জিনস্সা’কা, উণ্ণলোমং মহগ্ঘিযং;

হেমপট্টঞ্চ কাৰেসি, সব্বং পূজাৱিধিং স’কা.

৬২. চেতিযে পৰিজিণ্ণে সো, সুধাকম্মেন ৰঞ্জযি;

তিপঞ্চহত্থং কাৰেসি, মেত্তেয্যং সুগতং পৰং.

৬৩. এৱমাদিনি পুঞ্ঞানি, অপ্পমেয্যানি সো ৱিভূ;

অকাসি চ সযং সাধু, পৰিৱাৰেহী কাৰযি.

৬৪. পৰিৱাৰা চ তস্সাসুং, বহূপুঞ্ঞকৰা নৰা;

ৱিহাৰা নেককা আসুং, কতা তেহি সপ্পচ্চযা.

৬৫. কদাচি মগ্গং গচ্ছং সো, অৰঞ্ঞম্হি অগামকে;

সেনং সংৱিদহিত্ৱান, ৱাসং কপ্পেসি ৰত্তিযং.

৬৬. সুনহাতৱিল্লিত্তো সো, সুভুত্তোসযনে সুখে;

নিপন্নেসু ঘৰে ৰম্মে, নিদ্দাযিতুমুপক্কমি.

৬৭. অলভন্তো তদা নিদ্দং, কিন্নু খো ইতি কাৰণং;

পৱত্তিং উপধাৰেন্তো, দিৱসে সব্বমত্তনো.

৬৮. অদিস্ৱা কাৰণং অন্তো, অৱস্সং বহি হেস্সতি;

ইতি চিন্তিয যোজেসি, মনুস্সেতং গৱেসিতুং.

৬৯. এৱমাহ চ নিস্সঙ্কং, অয্যকা মম ৰত্তিযং;

তেমেন্তা ৰুক্খমূলস্মিং, ঠিতা আনেথ তে ইতি.

৭০. তেপি গন্ত্ৱা গৱেসন্তা, দীপহত্থা মহাজনা;

মহাগামা’গতে ভিক্খূ, ৰুক্খমূলগতে তদা.

৭১. তে গন্ত্ৱা সাসনং ৰঞ্ঞো, আৰোচেসুং পধাৱিসো;

দিস্ৱা চ ভিক্খু সন্তুট্ঠো, নেত্ৱা ৱাসঘৰং সকং.

৭২. নিচ্চদানায ভিক্খূনং, ঠপিতে ৰত্তচীৱৰে;

তেসং দত্ৱান তিন্তানি, চীৱৰানি সমাদিয.

৭৩. সুক্খাপিয চ কত্ৱান, পাদধোৱনকাদিকং;

নিসীদাপিয তে সব্বে, সযনে সাধু সন্থতে.

৭৪. ভেসজ্জং পটিযাদেত্ৱা, সযমেৱো’পনামিয;

পচ্চূসেপি চ কত্ৱান, কত্তব্বং ভোজনাদিকং.