দ্ৱিচত্তালীসতিম পৰিচ্ছেদ

ছ ৰাজকো

১. সঙ্ঘতিস্সো ততো আসি, অসিগ্গাহো মহীপতি;

সাসনস্স চ ৰট্ঠস্স, ৱুদ্ধিকামো নযে ৰতো.

২. ঠানন্তৰং যথাৰহং, দত্ৱা সঙ্গণ্হিসো জনং;

তদা খুদ্দকৰাজস্স, মোগ্গল্লানো চমূপতি.

৩. ৱসন্তো ৰোহণে সুত্ৱা, সঙ্ঘতিস্সস্স ৰাজতং;

খন্ধৱাৰং সযুদ্ধত্থং, মহাগল্লে নিৱেসযি.

৪. সঙ্ঘতিস্সো চ সুত্ৱা তং, বলকাযমপেসযি;

যুজ্ঝিতুং তেন তজ্জেসি, মোগ্গল্লানো মহব্বলো.

৫. ততো হত্থস্সমাদায, গন্ত্ৱা ৰত্তিৱিহাৰকং;

বলং সো সন্নিপাতেন্তো, ৱাসং তত্থেৱ কপ্পযি.

৬. ৰাজা সুত্ৱা পুনা’গন্ত্ৱা, কদল্লাদীনিৱাতকে;

যুজ্ঝিত্ৱা তং পলাপেত্ৱা, পেসেত্ৱা বলমত্তনো.

৭. সযং পুৰমুপাগঞ্ছি, সোপি নট্ঠং সৱাহিনিং;

পুন পাকতিকং কত্ৱা, কৰেহেৰমুপাগমি.

৮. ৰঞ্ঞো সেনাপতি পুত্তং, পেসেত্ৱা চোৰসন্তিকং;

যেন কেনচি লেসেন, সযং দুক্খিৱ দুম্মনো.

৯. আতুৰো ৱিয বাড়্হং সো, হোসি মঞ্চপৰাযনো;

ৰাজা সুত্ৱা পৱত্তিতং, উপসঙ্কম্ম তঙ্খণে.

১০. মা ত্ৱং সোচি কুমাৰস্স, সম্মানেত্ৱানুসাসিয;

হন্দ ত্ৱং নগৰং ৰক্খ, নতে সক্কা মযা সহ.

১১. যুদ্ধমণ্ডলমাগন্তুং, গিলানত্তাতি যোজযি;

উব্বাসিতে জনে সব্বে, ৱিচ্ছিন্নে ৰাজভোজনে.

১২. মহাপাড়িম্হি সম্পক্কং, ৰঞ্ঞো ভোজনমাহৰুং;

ৰাজা দ্ৱিস্ৱা’তি নিবিন্নো, যাৱ মন্দো ন হেস্সতি.

১৩. এক্কো পীতি ৱিচিন্তেত্ৱা, যুদ্ধায সমাসা’গমা;

সদ্ধিং পুত্তেন আৰুয্হ, হত্থিংসন্নদ্ধৱাহনো.

১৪. থোকেনেৱ বলেনাগা, পাচিনতিস্সপব্বতং;

এৱং উভযতো চূড়-সঙ্গামে পচ্চুপট্ঠিতে.

১৫. সেনাপতিসমিত্তদ্দু, যুদ্ধমাৰভি পচ্ছতো;

পুত্তো দিস্ৱা নৰিন্দস্স, ঘাতেস্সামি ইমং ইতি.

১৬. আহ ৰাজা নিৱাৰেসি, মা তে ৰুচ্চি বলং ইদং;

নেৱ সক্কা’ধিৱাসেতুং, অতিমন্দং হনিস্সতি.

১৭. দুৱিন্নং বলকাযানং, ৰাজামজ্ঝগতো অহু;

ততো সেনা দ্ৱিধা’হোসি, চোৰসেনাপতীপতি.

১৮. ৰঞ্ঞো নাগো মধুকৱ্হ ৰুক্খচ্ছাযং সমাৱিসি;

তদা ছত্তং পতিতস্স, সাখমাহচ্চ ভূমিযং.

১৯. চোৰস্স সেনা তং দিত্ৱা, হৰিত্ৱা সামিনো অদা;

সো তং উস্সাপযিছত্তং, ঠত্ৱাপব্বতমুদ্ধনি.

২০. তদা ৰাজবলং ৰাজা, নুনমেসোতি চিন্তিয;

গন্ত্ৱা তং পৰিৱাৰেসি, ৰাজা আসি তদেককো.

২১. হত্থিক্খন্ধা তদোৰুয্হ-পুত্তং’মচ্চঞ্চ সোহদং;

উপাৱিসি সমীপম্হি, মেৰুমজ্জৰকাননং.

২২. মোগ্গল্লানো ততো লদ্ধ-জযো ৱাহনমাদিয;

সেনাপতিংচ মিত্তদ্দুং, তস্স পুত্তঞ্চ পাপিনং.

২৩. উপাগম্ম পুৰং ৰাজা, আসী লঙ্কা তলাধিপো;

ততো চিন্তেসি জীৱন্তে, সত্তুম্হি ন সুখং ইতি.

২৪. সো সুত্ৱা পুব্বৰাজস্স, পুত্তো এত্থাতি কুজ্ঝিয;

আণাপেসি চ তস্সা’সু, হত্থপাদানি ছিন্দিতুং.

২৫. উপক্কমি তদা ৰঞ্ঞা, আণত্তো পুৰিসো খণে;

ছিন্দিতুং হত্থপাদং সো, কুমাৰো ৰোদি দুম্মনো.

২৬. পূৱখাদকহত্থং মে, ছিন্দেয্যং চে তদা অহং;

খাদিসং তেন পূৱেতি, হং সুত্ৱা ৰাজকম্মিকো.

২৭. ৰোদিত্ৱা পৰিদেৱিত্ৱা, ৰাজাণায দুখদ্দিতো;

ৱামং হত্থঞ্চ পাদঞ্চ, তস্স ছিন্দি নৰাধমো.

২৮. জেট্ঠতিস্সো পলাযিত্ৱা, ৰঞ্ঞো পুত্তো’পৰো অগা;

অঞ্ঞতো মলযং দেসং, মেৰুকন্দৰনামকং.

২৯. ৰাজা’থ সসুতা’মচ্চো, গন্ত্ৱা ৱেড়ুৱনং ৰহো;

চোদিতো তত্থ ভিক্খূহি, কাসাৱানি সমাদিযি.

৩০. ভিক্খুৱেসং গহেত্ৱান, ৰোহণং গন্তুমানসো;

মণিহীৰং সমাগঞ্ছি, তত্ৰঠা ৰাজসেৱকা.

৩১. সঞ্জানিত্ৱা তযোপেতে, তেসং পাদেৱৰুজ্ঝিয;

সাসনং তস্স পেসেসুং, ৰাজা সুত্ৱা ৱিসেসতো.

৩২. তুট্ঠো আণাপযি গন্ত্ৱা, সীঘমাদায তেজনে;

ততো সীহগিৰিংনেত্ৱা, তিস্সঙ্কং নিৰুপদ্দৱং.

৩৩. সীসং গণ্হথ তত্থেৱ, ৰঞ্ঞো চ তনযস্স চ;

অমচ্চং পন জীৱন্ত-মানেয্যাথ মম’ন্তিকং.

৩৪. মনুস্সা এৱমাণত্তা, তে গহেত্ৱা তযোজনে;

নেত্ৱা সীহগিৰিংকাতুং, যথাৱুত্তমুপক্কমুং.

৩৫. ততো ৰাজসুতো আহ, পুৰিসে কম্মকাৰকে;

সীসং মে পঠমং ছেত্ৱা, দেথ ময্হং সুখং ইতি.

৩৬. ৰাজপোসা তথা’কাসুং, পচ্ছাছিন্দিংসু ৰাজিনো;

সীসং পস্সথ বালানং, কম্মং কম্মৱিদূজনা.

৩৭. এৱং অনিচ্চা ভোগাহি, অধুৱা অসযংৱসী;

তত্থ লগ্গা কথং নিচ্চং, সুখং ভো ন গৱেসথ.

৩৮. ৰঞ্ঞো সাসনমাহংসু, অমচ্চস্স হিতেসিনো;

তং সুত্ৱান হসিত্ৱান, ইদং ৱচনমব্ৰৱি.

৩৯. ছিন্নসীসো মযা দিট্ঠো, মযি জীৱতি সামিকো;

ঠপেত্ৱা হম্পি সেৱামি, অহো অঞ্ঞঞ্হি সামিকং.

৪০. ইধ তং মাৰযিত্ৱান, ছাযং তস্স হৰিস্সথ;

অহো অঞ্ঞাণকা তুম্হে, মঞ্ঞে উম্মত্তকা ইতি.

৪১. ইতি ৱত্ৱান সো পাদে, গহেত্ৱা সামিনো সযি;

তস্স তে হৰণোপাযং, অপস্সন্তা যথা তথা.

৪২. তস্সাপি সীসং ছেত্ৱান, মচ্চা আদায তীণি’পি;

ৰঞ্ঞো দস্সেতুমাহচ্চ, ৰাজা তুসিত্থ নিব্ভযো.

৪৩. দুট্ঠসেনা পতিস্সা’দা, ততো মলযৰাজতং;

অসিগ্গাহকঠানম্হি, তস্স পুত্তং ঠপেসি চ.

৪৪. থূপত্তযম্পি ছাদেসি, ৱত্থেহি অহতেহি সো;

তথা লঙ্কাতলে সব্বে, থূপেকাসি মহুস্সৱং.

৪৫. কেসধাতুঞ্চ নাথস্স, দাঠাধাতুং তথেৱ চ;

মহাবোধিং সসক্কচ্চং, মহাপূজায সক্কৰি.

৪৬. সব্বং ৱেসাখপূজাদিং, চাৰিত্তংনুগতং অকা;

ধম্মকম্মেন সোধেসি, সব্বং সুগতসাসনং.

৪৭. পিটকানঞ্চ সজ্ঝাযং, মহাপূজায কাৰযি;

লাভং দত্ৱা তিৰেকেন, পূজযিত্থ বহুস্সুতে.

৪৮. ভিক্খূনং দীপৱাসীনং, সব্বেসং চীৱৰং অগা;

আৱাসেসু চ সব্বেসু, কথিনং অত্থৰাপযি.

৪৯. পটিমাযো চ কাৰেসি, জিণ্ণঞ্চ পটিসঙ্খৰি;

লোণক্খেত্তঞ্চ পাদাসি, সঙ্ঘস্স তিসতাধিকং.

৫০. কাৰপিট্ঠিম্হি কাৰেসি, মোগ্গল্লান ৱিহাৰকং;

ৱিহাৰা পিট্ঠিগামঞ্চ, সগামং ৱটগামকং.

৫১. তথা চেতিযগেহঞ্চ’-কাসি ৰক্খৱিহাৰকে;

ৱিহাৰং নং বহুন্নং সো, ভোগগামে বহূ অদা.

৫২. এৱং পুঞ্ঞানী সো’কাসি, অপ্পমেয্যানি ভূমিপো;

সম্পত্তীনমনিচত্তং, সৰন্তো পুব্বৰাজিনো.

৫৩. তদা কেনচি দোসেন, কুদ্ধোমলযৰাজিনো;

সৰিত্ৱা পুব্বৰাজস্স, কতং তেন ৱিৰূপকং.

৫৪. উপাযেন গহেত্ৱান, হত্থপাদঞ্চ ছেদযি;

তং সুত্ৱা সো অসিগ্গাহো, সপুত্তো ৰোহণংগতো.

৫৫. ৱসন্তো তত্থ সো কত্ৱা, হত্থে জনপদং লহুং;

জেট্ঠসিস্সমুপগঞ্ছি, নিলীনং মলযে ঠিতং.

৫৬. সদ্ধিং তেনসঘাতেন্তো, ৰট্ঠং জনপদং খণে;

দোড়পব্বতমাগম্ম, খন্ধাৱাৰং নিৱেসযি.

৫৭. ৰাজা সুত্ৱান তং সব্বং, সন্নদ্ধবলৱাহনো;

খন্ধাৱাৰং নিৱেসেসি, গন্ত্ৱা তস্সেৱ সন্তিকং.

৫৮. তদা পজ্জৰৰোগেন, মনুস্সাৰাজিনো বহূ;

উপদ্দুতা মতা আসুং, তং সুত্ৱা সো অসিগ্গহো.

৫৯. যুদ্ধমাৰভিৱেগেন, ৰঞ্ঞো সেনাতিদুব্বলা;

পভিজ্জিত্ৱা পলাযিত্থ, ৰাজাপচ্ছা পলাযি সো.

৬০. দিস্ৱা একাকিনং যন্তং, সীহপব্বতসন্তিকে;

অসিগ্গাহো মহাৰাজং, মাৰযিত্থ সপৰিসং.

৬১. ওহীনং পচ্ছতো জেট্ঠ-তিস্সম্পি পন মাৰিতুং;

সাসনং তস্স পেসেসি, এহি ৰাজা ভৱাহীতি.

৬২. সো তঞ্ঞত্ৱা পলাযিত্ৱা, নিৱত্তো মলযং অগা;

কথঞ্হি লদ্ধং কিচ্ছেন, ৰজ্জংসো দেতি মে ইতি.

৬৩. এৱং খো দল্লনামং সো, মোগ্গল্লানং নৰিস্সৰং;

মাৰেত্ৱা ছহি ৱস্সেহি, সম্পত্তবলৱাহনো.

৬৪. অথা’গন্ত্ৱা অসিগ্গাহো, অনুৰাধপুৰং ৱৰং;

ৰাজা হুত্ৱা পৱত্তেসি, আণাচক্কং মহীতলে.

৬৫. স সিলামেঘৱণ্ণৱ্হো, সঙ্ঘং বোধিঞ্চ ৱন্দিয;

থূপত্তযঞ্চ সক্কাসি, মহাপাড়িঞ্চ ৱড্ঢযি.

৬৬. পাযাসং’দাসি সঙ্ঘস্স, সপ্পিফাণিতসঙ্খতং;

ছাতকে অতিকিচ্ছম্হি, পৰিস্সাৱনমেৱ চ.

৬৭. সব্বদানেন সঙ্গণ্হী, কপণদ্ধিৱণিব্বকে;

পূৱমূলধনংচা’দা, কুমাৰানং মহাদযো.

৬৮. ৱিহাৰে অভযে বুদ্ধং, পূজযিত্থ সীলামযং;

জিণ্ণঞ্চ গেহং তস্সা’কা, নানাৰতনচিত্তিকং.

৬৯. কোলৱাপিঞ্চ দত্ৱান, আৰক্খত্থং জিনস্স সো;

পূজং সব্বোপহাৰেহি, সব্বকালং পৱত্তযি.

৭০. এৱং তস্মিং মহীপালে, ৱসন্তে পুঞ্ঞভাজনে;

নাযকো সিৰিনাগৱ্হো, জেট্ঠতিস্সস্স মাতুলো.

৭১. গন্ত্ৱান পৰতীৰং সো, আদায দমিড়ে বহূ;

আগন্ত্ৱা উত্তৰং দেসং, গণ্হিতুং তমুপক্কমি.

৭২. ৰাজাপি সুত্ৱা তং গন্ত্ৱা, যুজ্ঝিত্ৱা ৰাজমিত্তকে;

গামে হন্ত্ৱান তং তেন, দমিড়ে সদ্ধিমাগতে.

৭৩. হতসেসে গহেত্ৱান, কত্ৱা পৰিভৱং বহুং;

অদাসি দাসে কত্ৱান, ৱিহাৰেসু তহিং তহিং.

৭৪. এৱংসম্পত্তৱিজযে, পুৰমাগম্মভূমিপে;

সব্বং ৰট্ঠং ৱিসোধেত্ৱা, ৱসন্তে অকুতো ভযে.