একচত্তালীসতিম পৰিচ্ছেদ

দ্ৱিৰাজকো

১. মহানাগনৰিন্দস্স, ভাগিনেয্যো সুভাগিযো;

সো অগ্গবোধিৰাজাসি, অগ্গবোধিগতাসযো.

২. তেজেন বাহুং সোম্মেন, চন্দং সম্পুণ্ণমণ্ডলং;

সুমেৰুমচলন্তেন, গম্ভিৰেন মহোদধিং.

৩. ৱসুন্ধৰা পকম্পেন, মাৰুতং সম্পৱুত্তিযা;

বুদ্ধিযামৰমন্তাৰং, সুদ্ধিযা সৰদম্বৰং.

৪. কামভোগেন দেৱিন্দ, মত্থেন চ নৰিস্সৰং;

ধম্মেন সুদ্ধৱাসেট্ঠং, ৱিক্কমেন মিগাধিপং.

৫. ৰাজধম্মেহি ৰজ্জেহি, চক্কৱত্তিনৰিস্সৰং;

ৱেস্সন্তৰঞ্চ দানেন, অনুগন্ত্ৱা জনে সুতো.

৬. মাতুলং উপৰাজৱ্হে, ভাতৰং যুৱৰাজকে;

ভাগিনেয্যঞ্চ মলয-ৰাজঠানে ঠপেসি সো.

৭. ঠানন্তৰে যথাযোগং-সেট্ঠামচ্চে ঠপেসি চ;

জনং সঙ্গহৱত্থূহী, ৰাজধম্মেহি চগ্গহি.

৮. দেসং সযোগ্গং পাদাসি, যুৱৰাজস্স দক্খিণং;

ৱসং তত্থ সিৰীৱড্ঢ-মানৱাপিং সগাহযি.

৯. কত্ৱা গিৰিৱিহাৰঞ্চ, সঙ্ঘিকং তস্স দাপযি;

খেত্তানং দ্ৱিসতং সঙ্ঘ-ভোগত্থায মহামতি.

১০. অদা মলযৰাজস্স, দাঠানামং সধীতৰং;

পৰিৱেণং সীৰিসঙ্ঘ-বোধিনামঞ্চ কাৰযি.

১১. মহাসিৱস্স কাৰেসি, পৰিৱেণং সনামকং;

পৰিৱাৰো’পি তস্সাসি, এৱং পুঞ্ঞপৰাযনো.

১২. কত্ৱা সাধুপচাৰেন, পোৰাণং সঙ্গহং ৱিধিং;

অন্তৰাযং ৱিসোধেতুং, জিণ্ণঞ্চ পটিসঙ্খৰি.

১৩. কৱযো তস্স ৰজ্জম্হি, সীহড়ায নিৰুত্তিযা;

কাৱেয্যে বহুকে’কাসুং, ৱিচিত্ৰনযাসালিনো.

১৪. ৱিহাৰে দক্খিণে কাসি, পাসাদং সুমনোহৰং;

অকা নৱহি ৱস্সেহি, দিপে কণ্টকসোধনং.

১৫. কুৰুন্দনামং কাৰেত্ৱা, ৱিহাৰং সব্বসঙ্ঘিকং;

ৱাপিং তন্নামকং নাড়ি-কেৰাৰামং তিযোজনং.

১৬. মহাসিৱৱ্হযে চেৱ, সস্সং কাৰযিতুং অদা;

লাভসক্কাৰসম্মান-মাৰামিকসতং তদা.

১৭. ৱিহাৰং তং সমীপম্হি, কত্ৱা অম্বিলপস্সৱং;

গামং তন্নামকং চাদা, থেৰিযানং তপস্সীনং.

১৮. উত্তৰৱল্লিৱিহাৰস্স, ৰতনং দীঘৱণ্ণিতং;

দত্ৱা গামং পতিট্ঠেসি, সত্থুবিম্বং সিলামযং.

১৯. কেড়িৱাতে চ কাৰেসি, সুমনং নাম পব্বতং;

মহাতেলৱটংবোধি-ঘৰে পাসাণৱেদিকং.

২০. কাৰেত্ৱা লোহপাসাদং, পাসাদমহনে অদা;

ছত্তিংসানং সহস্সানং, ভিক্খূনং সো তিচীৱৰং.

২১. গামং দত্ৱা নিযোজেসি, আৰক্খং ধীতু নামকং;

হত্থিকুচ্ছিৱিহাৰেপি, পাসাদং কাসি বুদ্ধিমা.

২২. দাঠা সিৱস্স ঠত্ৱান, ওৱাদে সাধু ভিক্খুনো;

সমাচৰন্তো ধম্মেন, সক্কচ্চং তমুপট্ঠহি.

২৩. মূগসেনাপতিং চাকা, ৱিহাৰং সো ৱিসালকং;

গামং লজ্জিকমেতস্স, দাস ভোগায’দাসি চ.

২৪. মহানাগস্স পুঞ্ঞত্থং, ৰঞ্ঞো তংনামকং অকা;

মহাথেৰস্স তঞ্চা’দা, ৰাজা তেপিটকস্স সো.

২৫. অত্তনো সদিসানঞ্চ, যোগীনং ৱিগতালযো;

ভিক্খূনং চতুসট্ঠীনং, ৱিহাৰং তং তদা অদা.

২৬. কত্ৱা তস্সেৱ মহা-পৰিৱেণনিৱাসিনো;

ভিন্নোৰুদীপং দত্ৱান, ৱট্টকাকাৰপিট্ঠিতো.

২৭. দক্খিণগীৰিদড়্হৱ্হে, মহানাগে চ পব্বতে;

কাড়ৱাপাদিকে চা’কা, ৱিহাৰে পোসথালযে.

২৮. ৱিহাৰে অভযে’কাসি, মহাপোক্খৰণিং তথা;

চেতিযপব্বতে চাকা, নাগসোণ্ডিং থিৰোদিকং.

২৯. মহিন্দতটৱাৱিঞ্চ, কাৰাপেত্ৱান সাধুকং;

এতিস্সা মৰিযাদায, থেৰং নেতুং নিযোজযি.

৩০. মহামহিন্দ থেৰম্হি, তংঠানসমুপাগতো;

তৰচ্ছা এৱ নেতুন্তি, কতিকঞ্চেৱ কাৰযি.

৩১. ছত্তং সোণ্ণঞ্চ কাৰেসি, নিকাযেসুপি তীসু সো;

সত্তাট্ঠনৱ ৱাৰেসু, মহগ্ঘৰতনেহি চ.

৩২. মহাতূপে চতুব্বীস-ভাৰং ছত্তং সুৱণ্ণযং;

তত্থ তত্থ চ পূজেসি, মহগ্ঘং ৰতনুত্তমং.

৩৩. দাঠাধাতুঘৰং কত্ৱা, ৱিচিত্ৰৰতনুজ্জলং;

কাসি হেমকৰণ্ডঞ্চ, লোহনাৱঞ্চ পাড়িযং.

৩৪. মণিমেখলনামঞ্চ, বন্ধাপেসি সবন্ধনং;

মহামাতিঞ্চ গণ্হেসি, মণিহীৰকৱাপিযং.

৩৫. তদা একো মহাথেৰো, জোতিপালকনামকো;

পৰাজেসি ৱিৱাদেন, দীপে ৱেতুল্লৱাদিনো.

৩৬. দাঠাপভুতিনামো’থ, আদিপাদো’তিলজ্জিতো;

হত্থমুক্খিপ্পি তং হন্তুং, গণ্ডো সঞ্জাযি তংখণে.

৩৭. ৰাজা তস্মিং পসীদিত্ৱা, ৱিহাৰেযেৱ ৱাসযি;

মানেন তং অনাগম্ম, দাঠাপভূমতো কিৰ.

৩৮. দত্ৱা মহাদিপাদত্তং, ভাগিনেয্যগ্গবোধিনো;

ৰক্খিতুং তং নিযোজেসি, থেৰং সোপি তমাচৰি.

৩৯. নীলগেহপৰিচ্ছেদং, কত্ৱা তস্সেৱ সো অদা;

কত্ৱেৱং বহুধা পুঞ্ঞং, চতুত্তিংসে সমে মতো.

৪০. অগ্গবোধি ততো আসি, ৰাজা পুব্বস্স ৰাজিনো;

মহল্লকত্তানং খুদ্দ-নামেন পৰিদীপযুং.

৪১. সো দীপং পৰিপালেসি, পুব্বচাৰিত্তকোৱিদো;

অকাসি চ মহেসিং সো, মাতুলধীতুমত্তনো.

৪২. সঙ্ঘভদ্দং অসিগ্গাহং, কাসি বন্ধুং মহেসিযা;

যথাৰহমদা চেৱ, ঠানন্তৰমনালযো.

৪৩. কত্ৱা ৱেড়ুৱনং ৰাজা, সাগলীনং নিযোজযী;

জম্বুৰন্তৰগল্লঞ্চ, কাসি মাতিকপিট্ঠিকং.

৪৪. ৰঞ্ঞো তস্সে’ৱ ৰজ্জম্হি, কালিঙ্গেসু মহীপতি;

সত্তানং মৰণং যুদ্ধে, দিস্ৱা সংৱিগ্গমানসো.

৪৫. ইমং দীপমুপাগম্ম, পব্বজ্জা কতনিচ্ছযো;

জোতিপালম্হি পব্বজি, ৰাজা সক্কাসি তং চিৰং.

৪৬. পধানঠানং তস্স’কা, ৱিহাৰে মত্তপব্বতে;

তস্সামচ্চো মহেসী চ, তথেৱা’গম্ম পব্বজুং.

৪৭. ৰঞ্ঞো মহেসী সুত্ৱান, তস্স পব্বজ্জমুত্তমং;

সক্কচ্চং তমুপট্ঠাসি, ৰতনৱ্হঞ্চ কাৰযি.

৪৮. অদা ৰাজা অমচ্চস্স, পাচীনকণ্ডৰাজিযং;

ৱেত্তৱাসৱিহাৰঞ্চ, সো’দা সঙ্ঘস্স তং যতি.

৪৯. ৰাজত্থেৰেমতে ৰাজা, সোচিত্ৱা পৰিদেৱিয;

পধানঠানং কাৰেসি, চূড়গল্লৱিহাৰকে.

৫০. পলংনগৰগঞ্চেৱ, তস্স ঠানঞ্হি কাৰযি;

এৱং তদত্থং পুঞ্ঞানি, বহূনি’পি মহীপতি.

৫১. জোতিপালিত থেৰম্হি, তূপাৰামম্হি চেতিযং;

ৱন্দমানে পভিজ্জিত্ৱা, ভাগো তং পুৰতো পতি.

৫২. পক্কোসিত্ৱান ৰাজানং, থেৰো দস্সেসি দুক্খিতো;

ৰাজা দিস্ৱাৱ সংৱিগ্গো, কম্মং পট্ঠপি তংখণে.

৫৩. দক্খিণক্খকধাতুং সো, লোহপাসাদকুচ্ছিযং;

সাৰক্খং ঠপযিত্ৱান, ৰত্তিন্দিৱমপূজযি.

৫৪. নৱকম্মে চিৰাযন্তে, থূপাৰামম্হি দেৱতা;

সুপিনং তস্স দস্সেসুং, ৰত্তিমাৰামিকা ৱিয.

৫৫. সচে ৰাজা পপঞ্চেতি, কাতুং ধাতুঘৰং মযং;

ধাতুং গহেত্ৱা গচ্ছাম, যত্থতত্থা’তি তংখণে.

৫৬. ৰাজা পবুদ্ধো সংৱিগ্গো, ন চিৰেনেৱ কাৰযি;

কম্মং ধাতুঘৰেসব্বং, চিত্তকম্মাদিসঞ্ঞুত্তং.

৫৭. চতস্সো পটিমাযো চ, পল্লঙ্কে চ সিলামযে;

হেমচ্ছত্তং সিলাদন্ত-কম্মং গেহম্হি সব্বসো.

৫৮. মহামচ্চাদযো’কংসু, কৰণ্ডানং সতং নৱ;

দেৱানংপিযতিস্সস্স, কম্মঞ্চ নিখিলং নৱং.

৫৯. সব্বুস্সাহেন কাৰেত্ৱা, মহাপূজং যথাৰহং;

আনেত্ৱা লোহপাসাদা, ধাতুং সব্বাদৰেন সো.

৬০. জোতিপালং মহাথেৰং, সসঙ্ঘং পৰিৱাৰিয;

পৰিহাৰেন ৱড্ঢেসি, ধাতুং ধাতুকৰণ্ডকে.

৬১. ধাতুগেহস্স পাদাসি, লঙ্কাদীপং সহত্তনা;

লাভগ্গাম-মদা তস্সা, ৰক্খকানং মহেসিযা.

৬২. নাগদীপম্হি গেহঞ্চ, ৰাজাযতনধাতুযা;

উণ্ণলোমঘৰঞ্চেৱ, ছত্তমামলচেতিযে.

৬৩. তত্থ গামং ৱিহাৰস্স, যাগুদানায’দাসি চ;

ৱিহাৰস্স’ভযস্সা’দা, গামমঙ্গণসালকং.

৬৪. নামং কত্ৱান সো’কাসি, অত্তনো চ মহেসিযা;

দাঠগ্গবোধিমাৱাসং, ৱিহাৰে অতযুত্তৰে.

৬৫. দেৱী কপালনাগং সা, ৱিহাৰং সাধুকাৰিয;

তস্সে’ৱাদা ৱিহাৰস্স, সম্পন্নচতুপচ্চযং.

৬৬. গেহং জেতৱনে কাসি, ৰাজা ৰাজতচুম্বটং;

উদপানং মণাপেসি, সোৱ বোধিঘৰন্তিকে.

৬৭. গঙ্গাতটং ৱলাহস্সং, ৱাপিং গিৰিতটঞ্চকা;

মহাপাড়িংপি ৱড্ঢেসি, ভতনাৱঞ্চ কাৰযি.

৬৮. ভিক্খূনীনং মহেসী চ, ভত্তৱংসং সমাদিসি;

এৱং পুঞ্ঞানি কত্ৱা সো, দিৱং’গা দসমে সমে.

৬৯. এৱং পুঞ্ঞৰতা নৰাধিপতযো সম্পন্নভোগা গমুং;

মচ্চুস্সেৱ ৱসং ততোহি মতিমা সম্মা ভৱস্সীদিসং;

পস্সন্তো নিযমং ৱিহায ৱিধিনা সব্বং ভৱে সঙ্গতিং;

নিব্বানাভিমুখো চৰেয্য ধিতিমা পব্বজ্জমজ্ঝূপগো.

সুজনপ্পসাদসংৱেগত্থায কতে মহাৱংসে

দ্ৱিৰাজকো নাম

একচত্তালীসতিমো পৰিচ্ছেদো.