চত্তালীসতিম পৰিচ্ছেদ

অট্ঠৰাজকো

১. তস্সচ্চযে কুমাৰাদি-ধাতুসেনোতি ৱিস্সুতো;

অহু তস্স সুতো ৰাজা, দেৱৰূপো মহাবলো.

২. কাৰিতে পিতৰা’কাসি, ৱিহাৰে নৱকম্মকং;

কাৰেত্ৱা ধম্মসঙ্গীতিং পৰিসোধেতি সাসনং.

৩. সন্তপ্পেসি মহাসঙ্ঘং, পচ্চযেহি চতূহিপি;

কত্ৱা পুঞ্ঞানি’নেকানি, নৱমে হাযনে’তিগা.

৪. তিত্তিসেনো সুতো তস্স, ৰাজা হুত্ৱা অনেকধা;

কত্ৱা পুঞ্ঞানি ৰজ্জং তং, মাসম্পি নৱমে জহি.

৫. সিৱো তং মাতুলো হন্ত্ৱা, হুত্ৱা ৰাজা অনপ্পকং;

পুঞ্ঞং কত্ৱো’পতিস্সেন, পঞ্চৱীস দিনে হতো.

৬. উপতিস্সো ততো আসি, ৰাজা হন্ত্ৱান সীৱকং;

মোগ্গল্লানস্স ভগিনী, সামিকো ধজিনীপতি.

৭. ৰাজা ঠানন্তৰাদীহি, কত্ৱান জনসঙ্গহং;

সীলাকাড়স্স পাদাসি, সহ ভো কনধীৱৰং.

৮. একো পুত্তো অহু ৰঞ্ঞো, উপতিস্সস্স কস্সপো;

সসোড়স সহাযেহি, সূৰো সূপেহি সঞ্ঞুতো.

৯. এক ৱুত্তিসহাযেহি, দানমান মহাধনো;

ধম্মট্ঠো ৱীৰিযাজীৱি, সাধু জেট্ঠপচাযকো.

১০. সিলা কাড়োততো ৰজ্জ-লোভৱঞ্চিত মানসো;

দক্খিণং মলযং গন্ত্ৱা, সঙ্গণ্হিত্ৱা মহা বলং.

১১. ৱিলুম্পমানো পচ্চন্তি, সম্পত্তো নগৰন্তিকং;

তং সুত্ৱা কস্সপো জেট্ঠো, ৱৰমাৰুয্হ কুঞ্জৰং.

১২. অস্সা সেত্ৱান পিতৰং, সমাদায সহাযকে;

নিক্খম্ম নগৰা গচ্ছি, সিলাকালস্স দস্সনং.

১৩. এৱং সত্ত’ট্ঠ ৱাৰেসু, পলাতো লীনৱুত্তিকো;

হত্থে কত্ৱা উপাযেন, দেসে পাচিন পচ্ছিমে.

১৪. যুজ্ঝিতুং পুন পাচিন-তিস্স পব্বতমাগমি;

কস্সপোপি সহাযেহি, সদ্ধিমাৰুয্হ দন্তিনং.

১৫. তত্থ গন্ত্ৱা পলাপেত্ৱা, চোৰং পব্বতমত্থকং;

আৰোপেসি মহানাগং, তেনা’সি গিৰিকস্সপো.

১৬. মানত্থদ্ধো সিলাকাড়ো, ভিয্যো ৰট্ঠং পভিন্দিয;

সব্বং হত্থগতং কত্ৱা, অজেয্য বলৱাহনো.

১৭. আগম্ম নগৰং ৰুন্ধি, সত্থাহং ৰাজসেৱকা;

যুজ্ঝিত্ৱা ৱিৰলা আসুং, ততো চিন্তেসি কস্সপো.

১৮. এতে নগৰৰোধেন, সব্বে ভিজ্জন্তি পাণিনো;

পৰিহীনং বলং ৰাজা, অন্ধকো চ মহল্লকো.

১৯. মেৰুকন্দৰকে কত্ৱা, মাতৰং পিতৰঞ্চ মে;

অঙ্গহেত্ৱা বলং পচ্ছা, চোৰো নিগ্গণ্হি যো ইতি.

২০. ৰত্তিযং সো সহাযে চ, ৰাজসাধনমেৱচ;

আদায পিতৰো চেৱ, মলযং গন্তুমাৰভি.

২১. তদা মগ্গমজানন্তা, সম্মূড়া মগ্গদেসকা;

নগৰস্স সমীপেৱ, সম্ভমিংসু ইতো ততো.

২২. সিলাকাড়ো পৱত্তিং তং, সুত্ৱা সঙ্গম্ম ৱেগসা;

পৰিৱাৰেসি সঙ্গামো, তত্থ ভিংসনকো অহু.

২৩. দেৱাসুৰৰণাকাৰে, ৱত্তমানে মহাহৱে;

পতিতেসু সহাযেসু, সীদমানে মহাগজে.

২৪. হত্থাৰোহস্স দত্ৱা, ছিন্দিত্ৱা সীসমত্তনো;

পুঞ্ছিত্ৱা লোহিতং কত্ৱা, কোসিযং অসি পুত্তিকং.

২৫. হত্থিকুম্ভে উভো হত্থে, ঠপেত্ৱান অৱত্থৰি;

উপতিস্সোপি তং সুত্ৱা, সোকসল্লাহতো মৰি.

২৬. এৱং দিযড্ঢৱস্সেন, উপতিস্সে দিৱংগতে;

ৰাজা’হোসি সিলাকাড়ো, পুব্বনামেন একতো.

২৭. তং অম্বসামণেৰাদি-সিলাকাড়োতি ৱোহৰুং;

তিত্থং তেৰসৱস্সানি, দিপং ধম্মেন পালযি.

২৮. মহাপাড়িম্হি দাপেসি, পচ্চগ্ঘং ৰাজভোজনং;

ৱেজ্জসালাসু ভোগে চ, ৱড্ঢেসি জনতাহিতো.

২৯. অন্ৱহং পূজযি বোধিং, পটিমাযো চ কাৰযি;

সব্বেসং দীপৱাসীনং, ভিক্খূনং’দা তিচীৱৰং.

৩০. মাঘাতং কাৰযিদীপে, সব্বেসংযেৱ পাণিনং;

আনিতং অত্তনা কেস-ধাতুং সম্মা অপূজযি.

৩১. ৰহেৰদকৱাৰঞ্চ, অদাসি অভযুত্তৰে;

পুৰত্থিমা থেৰীযানং, ৱিহাৰকুন্থনাম সো.

৩২. আনেত্ৱা আসনং তত্থ, ঠপেসি দুমৰাজকে;

যাৱজীৱং পৱত্তেসি, পুঞ্ঞকম্মমসঙ্খিযং.

৩৩. মোগ্গল্লানো তথা দাঠা, পভুতি চো’পতিস্সকো;

পুত্তো তস্সা’সুমগ্গস্স, দেসং দত্ৱা পুৰত্থিমং.

৩৪. দত্ৱা ঠানন্তৰঞ্চাদি-পাদসঞ্ঞং ৱিসজ্জযি;

গন্ত্ৱা তত্থ ৱসাহীতি, সোপি গন্ত্ৱা তহিং ৱসি.

৩৫. ঠানং মলযৰাজগ্গং, দেসং দত্ৱান দক্খিণং;

ৰক্খণত্থং সমুদ্দস্স, মজ্ঝিমং তু নিযোজযি.

৩৬. উপতিস্সং তু ৱাসেসি, সন্তিকেযেৱ অত্তনো;

ৱিসেসেন মমাযন্তো, যূনং কল্যানদস্সনং.

৩৭. তস্স দ্ৱাদসমে ৱস্সে, ইতো কাসি পুৰং গতো;

ধম্মাতু মিধা’নেসি, ততো ৱাণিজ মাণৱো.

৩৮. ৰাজা দিস্ৱা’সমত্থো সো, ধম্মাধম্মৱিচাৰণে;

হেমসঞ্ঞায দীপম্হি, পতন্তো সলভো ৱিয.

৩৯. বুদ্ধধম্মোতি সঞ্ঞায, তং গহেত্ৱান সাধুকং;

কত্ৱা সক্কাৰসম্মানং, গেহে ৰাজঘৰন্তিকে.

৪০. ঠপেত্ৱা অনুৱস্সং তু, নেত্ৱা জেতৱনং মহং;

কাতুং কাৰেসি চাৰিত্তং, হিতং মন্ত্ৱান পাণিনং.

৪১. এৱং কত্ৱা সিলাকাড়ো, পুঞ্ঞকম্মমনপ্পকং;

পত্তে তেৰসমে ৱস্সে, যথাকম্মমুপাগমি.

৪২. দাঠপ্পভুতিকো ৰজ্জং, গহেত্ৱা ভাতৰংসকং;

অক্কমোতি নিৱাৰেন্তং, মাৰাপেসি ৱিবুদ্ধিকো.

৪৩. মোগ্গল্লানো’থ তং সুত্ৱা, অপ্পত্তং ৰজ্জমগ্গহি;

অকাৰণে মে মাৰেসি, কণিট্ঠং ধম্মৱাদীনং.

৪৪. কাৰাপেস্সামহম্পজ্জ, ৰজ্জন্তি পৰিকুপ্পিয;

সমাদায মহাসেনং, অগাৰাহেৰ পব্বতং.

৪৫. ৰাজাপি সুত্ৱা সন্নদ্ধ-বলকাযো কৰিন্দকে;

পব্বতে সিৱিৰং বন্ধি, মোগ্গল্লানো নিসম্মতং.

৪৬. সাপৰাধান তে মে ৱা, মনুস্সা দীপৱাসিনো;

একস্মিঞ্চ মতে ৰজ্জ-মুভিন্নংযেৱ নোসিযা.

৪৭. তস্মা অঞ্ঞেন যুজ্ঝন্তু, উভোযেৱ মযং ইধ;

হত্থিযুদ্ধং কৰোমাতি, ৰঞ্ঞো পেসেসি সাসনং.

৪৮. সোপি সাধূতি ৱত্ৱান, বদ্ধপঞ্চাযুধো গজং;

আৰুয্হ মুনিনো মাৰো ৱিয ওত্থৰি তাৱদে.

৪৯. মোগ্গল্লানোপি সন্নদ্ধো, আৰুয্হ কৰীনং ৱৰং;

তত্থা’গো অঞ্ঞমঞ্ঞং তে, পাপুণিংসু মহাগজা.

৫০. সদ্দো সূযিত্থ সঙ্ঘট্টে, অসনিৰাৱ সন্নিভো;

দন্তঘাতেন উট্ঠাসি, জালা ৱিজ্জুল্লতা ৱিয.

৫১. সঞ্ঝাঘনসভাগা’সুং, গজা লোহিতমক্খিতা;

মোগ্গল্লানগজাৱিদ্ধো, ৰঞ্ঞোওসক্কি কুঞ্জৰো.

৫২. ৰাজা আৰভি তং দিস্ৱা, ছিন্দিতুং সীসমত্তনো;

মোগ্গল্লানো’থ ৱন্দন্তো, যাচি’মে’ৱং কিৰীইতি.

৫৩. যাচমানেপি সোমানং, মানেন্তো ছিন্দিকন্ধৰং;

ছড্ডেসি ছহি সো ৰজ্জং, মাসেহি দিৱসেহি চ.

৫৪. মোগ্গল্লানো ততো ৰাজা, আসি দীপে মহাবলো;

মাতুলঞ্চ পটিচ্চেমং, চূলনামেন ৱোহৰুং.

৫৫. আসাধাৰণকাৱেয্যো, ৱত্থুত্তয পৰাযণো;

দানসংযম সোচেয্যো, সোৰচ্চাদিগুণালযো.

৫৬. দানেন পিযৱাচায, অত্থস্স চৰিযায চ;

সমানত্তস্সভাৱেন, সঙ্গহেসি মহাজনং.

৫৭. পিণ্ডপাতৱিহাৰেহি, ভেসজ্জচ্ছাদনেহি চ;

ভিক্খুসঙ্ঘঞ্হি সঙ্গণ্হি, ধম্মিকায চ গুত্তিযা.

৫৮. অতিৰেকায পূজায, পূজেত্ৱা ধম্মভাণকে;

পিটকে তীণি ৱাচেসি, সদ্ধিমট্ঠকথায সো.

৫৯. কুমাৰে উপলালেত্ৱা, নিৱাপেন যথাৰুচিং;

সজ্ঝাপেসি সদা ধম্মং, ধম্মদীপো মহামতি.

৬০. ধম্মদীপঞ্চ সো কত্ৱা, কুঞ্জৰসেখৰেনি সা;

ধম্মাৱাসানে ৱাচেসি, পুৰম্হি পুৰিসুত্তমো.

৬১. বন্ধাপেসি কদম্বঞ্চ, নদিংপব্বতমজ্ঝতো;

পত্তপসাণৱাপিঞ্চ, ধনৱাপিং গৰিতৰং.

৬২. গণ্হাপেসি সদীঘাযু-হেতু কম্মন্তি সাদৰো;

লিখাপেসি চ সদ্ধম্মং, ৱত্থুপূজঞ্চ কাৰযি.

৬৩. লোকং সো অনুকম্পিত্ৱা, মাতাপুত্তংৱ ওৰসং;

দত্ৱা ভুত্ৱা যথাকামং, ৱস্সে ৱীসতিমে মৰি.

৬৪. মহেসী তস্স ঘাতেত্ৱা, ৱিসযোগেন ঞাতকে;

পুত্তং ৰজ্জে’ভিসিঞ্চিত্ৱা, সযং ৰজ্জং ৱিচাৰযি.

৬৫. তথাভিসিত্তো সো কিত্তি-সিৰিমেঘো নৰাধিপো;

তিপুপত্তেহি ছাদেসি, দুমিন্দধৰমাদিতো.

৬৬. কপণদ্ধিৱণিব্বানং, মহাদানং পৱত্তযি;

মগ্গপালো তথাকাৰো, অহু সব্বোপভোগিযো.

৬৭. মহেসী সা সদা আসি, পধানা সব্বকম্মসু;

ৰজ্জং তস্সা’সি তেনেৱ, হেট্ঠুপৰিযৱত্তিকং.

৬৮. ৰাজাপাদা মহামচ্চা’-হেসুং লঞ্চপৰাযনা;

দুব্বলে চ ৱিহেঠেসুং, বলী জানপদা নৰা.

৬৯. সিলাকাড়স্স কালম্হি, গামে সঙ্গিল্লনামকে;

ভযৱসীৱ্হযো পোসো, অহু মোৰিযৱংসজো.

৭০. অহোসি পুত্তো সীৱস্স, অগ্গবোধি সনামকো;

ভাগিনেয্যোপি তস্সাসি, মহানাগোতি ৱিস্সুতো.

৭১. ভাগিনেযো মহানাগো, অগ্গবোধি চ সুন্দৰো;

উড়াৰজ্ঝাসযত্তা সো, মহানাগো মহব্বলো.

৭২. হিত্ৱা কস্সককম্মানি, চোৰকম্মমকা ৱনে;

গোধং লদ্ধান পেসেসি, মাতুলানিয সন্তিকং.

৭৩. গোধং দিস্ৱা’ৱসা ঞত্ৱা, ধঞ্ঞপচ্ছিমপেসযি;

কম্মাৰস্সা’পি পেসেসি, সসং সোপি তথেৱকা.

৭৪. বীজং ভগিনী মাযাচি, বীজগাহঞ্চ তস্স সা;

দাসঞ্চ ঞত্ৱা পেসেসি, অন্নপানাদিনা ৰহো.