চতুত্থ পৰিচ্ছেদ

দুতিয সংগীতি

১. অজাতসত্তু পুত্তো তং, ঘাতেত্ৱা’দাযি ভদ্দকো;

ৰজ্জং সোড়সৱস্সানি, কাৰেসি মিত্তদূভিকো.

২. উদযভদ্দ পুত্তো তং, ঘাতেত্ৱা অনুৰুদ্ধকো;

অনুৰুদ্ধস্স পুত্তো তং, ঘাতেত্ৱা মুণ্ডনামকো.

৩. মিত্তদ্দুনো দুম্মতিনো, তে’পি ৰজ্জমকাৰযুং;

তেসং উভিন্নং ৰজ্জেসু, অট্ঠৱস্সান’তিক্কমুং.

৪. মুণ্ডস্স পুত্তো পিতৰং, ঘাতেত্ৱা নাগদাসকো;

চতুৱীসতিৱস্সানি, ৰজ্জং কাৰেসি পাপকো.

৫. পিতুঘাতকৱংসো’য, মীতিকুদ্ধা’থ নাগৰা;

নাগদাসক ৰাজানং, অপনেত্ৱা সমাগতা.

৬. সুসুনাগোতি পঞ্ঞাতং, অমচ্চং সাধুসম্মতং;

ৰজ্জে সমভিসিঞ্জিংসু, সব্বেসং হিতমানসা.

৭. সো অট্ঠাৰসৱস্সানি, ৰাজা ৰজ্জমকাৰযি;

কাড়াসো কো তস্স পুত্তো, অট্ঠৱীসতি কাৰযি.

৮. অতীতে দসমে ৱস্সে, কাড়াসোকস্স ৰাজিনো;

সম্বুদ্ধপৰিনিব্বানা, এৱং ৱস্সসতং অহু.

৯. তদা ৱেসালিযা ভিক্খূ, অনেকা ৱজ্জিপুত্তকা;

সিঙ্গীলোণং দ্ৱঙ্গুলঞ্চ, তথা গামন্তৰম্মি চ.

১০. আৱাসা’নুমতা’চিণ্ণং, অমথিতং জলোগি চ;

নিসীদনং অদসকং, জাতৰূপাদিকং ইতি.

১১. দসৱত্থূনি দীপেসুং, কপ্পন্তীতি অলজ্জীনো;

তং সুত্ৱান যসত্থেৰো, এৱং ৱজ্জীসু চাৰিকং.

১২. ছড়ভিঞ্ঞো বলপ্পত্তো, যসো কাকণ্ডকত্ৰজো;

তং সমেতুং সউস্সাহো, তত্থাগমি’মহাৱনং.

১৩. ঠপেত্ৱা’পোসথগ্গে তে, কংসপাতিং সহোধকং;

কহাপণাদিং সঙ্ঘস্স, দেথ’না’হু উপাসকে.

১৪. ন কপ্পতে তং মা দেথ, ইতি থেৰো সৱাৰযি;

পটিসাৰণীযং কম্মং, যসত্থেৰস্স তে কৰুং.

১৫. যাচিত্ৱা অনুদূতং সো, সহ তেন পুৰং গতো;

অত্তনো ধম্মৱাদিত্তং, সঞ্ঞাপেত্ৱা’গ সাগৰে.

১৬. অনুদূতৱচো সুত্ৱা, তমুক্খিপিতুমাগতা;

পৰিক্খিপিয অট্ঠংসু, সৰং থেৰস্স ভিক্খৱো.

১৭. থেৰো উগ্গম্ম নভসা, গন্ত্ৱা কোসম্বিযং ততো;

পাৱেয্যকা ৱন্তিকানং, ভিক্খূনং সন্তিকং লহুং.

১৮. ৱেসেসি দূতেতু সযং, গন্ত্ৱা’হো গঙ্গপব্বতং;

আহ সম্ভূতত্থেৰস্স, তং সব্বং সাণৱাসিনো.

১৯. পাৱেয্যকা সট্ঠিথেৰা, অসিতা’ৱন্তিকাপি চ;

মহাখীণাসৱা সব্বে, অহোগঙ্গম্হি ওতৰুং.

২০. ভিক্খৱো সন্নিপতিতা, সব্বে তত্থ ততো ততো;

আসুং নৱুতিসহস্সানি, মন্তেত্ৱা অখিলা’পি তে.

২১. সোৰেয্য ৰেৱতত্থেৰং, বহুস্সুত মনাসৱং;

তং কালপমুখং ঞত্ৱা, পস্সিতুং নিক্খমিংসু তং.

২২. থেৰো তম্মন্তনং সুত্ৱা, ৱেসালিং গন্তুমেৱ সো;

ইচ্ছন্তো ফাসুগমনং, ততো নিক্খমি তঙ্খণং.

২৩. পাতো পাতোৱ নিক্খন্ত-ট্ঠানং তেন মহত্তনা;

সাযং সাযমুপেন্তানং, সহজোতিযমদ্দসুং.

২৪. তত্থ সম্ভূতত্থেৰেন, যসত্থেৰো নিযোজিতো;

সদ্ধম্মসৱনন্তে তং, ৰেৱতথেৰ মুত্তমং.

২৫. উপেচ্চ দসৱত্থূনি, পুচ্ছি থেৰো পটিক্খিপি;

সুত্ৱা’ধিকৰণং তঞ্চ, নিসেধেমাতি অব্ৰৱি.

২৬. পাপাপি পক্খং পেক্খন্তা, ৰেৱতত্থেৰ মুত্তমং;

সামণকং পৰিক্খাৰং, পটিযাদিয তে বহুং.

২৭. সীঘং নাৱায গন্ত্ৱান, সহজাতিসমীপগা;

কৰোন্তি ভত্তৱিস্সগ্গং, ভত্তকালে উপট্ঠিতে.

২৮. সহজাতিং আৱসন্তো, সাড়থেৰো ৱিচিন্তিযা;

পাৱেয্যকা ধম্মৱাদী, ইতি পস্সি অনাসৱো.

২৯. উপেচ্চ তং মহাব্ৰহ্মা, ধম্মে নিট্ঠাতি অব্ৰৱি;

নিচ্চং ধম্মে ঠিতত্তং সো, অত্তনো তস্স অব্ৰৱি.

৩০. তে পৰিক্খাৰমাদায, ৰেৱতত্থেৰমদ্দসুং;

থেৰো ন গণ্হি তপ্পক্খ-গাহী সিস্সং পণামযী.

৩১. ৱেসালিং তে ততো গন্ত্ৱা, ততো পুপ্ফপুৰং গতা;

ৱদিংসু কাড়াসোকস্স, নৰিন্দস্স অলজ্জীনো.

৩২. সত্থুস্স নো গন্ধকুটিং, গোপযন্তো মযং তহিং;

মহাৱনৱিহাৰস্মিং, ৱসাম ৱজ্জীভূমিযং.

৩৩. গণ্হিস্সাম ৱিহাৰ’ন্তি, গামৱাসিকসিক্খৱো;

আগচ্ছন্তি মহাৰাজ, মটিসেধয তে ইতি.

৩৪. ৰাজানং দুগ্গহিতং তে, কত্ৱা ৱেসালিমাগমুং;

ৰেৱতত্থেৰ মূলম্হি, সহজাতিযমেত্থ তু.

৩৫. ভিক্খূ সতসহস্সানি, একাদস সমাগতা;

নৱুতিঞ্চ সহস্সানি, অহু তং ৱত্থু সন্তিযা.

৩৬. মূলট্ঠেহি ৱিনা ৱত্থু-সমনং নেৱ ৰোচযি;

থেৰো সব্বেপি ভিক্খূ তে, ৱেসালিমাগমুং ততো.

৩৭. দুগ্গহিতোৱ সো ৰাজা, তত্থামচ্চে অপেসযি;

মূড়া দেৱানুভাৱেন, অঞ্ঞত্থ অগমিংসু তে.

৩৮. পেসেত্ৱা তে মহীপালো, তং ৰত্তিং সুপিনেনসো;

অপস্সি সকমত্তানং, পক্খিত্তং লোহকুম্ভিযং.

৩৯. অতিভীতো অহু ৰাজা, তমস্সা সেতু মাগমা;

ভগিনী নন্দথেৰী তু, আকাসেন অনাসৱা.

৪০. ভাৰিযং তে কতং কম্মং, ধম্মিকে’য্যে খমাপয;

পক্খো তেসং ভৱিত্ৱা ত্ৱং, কুৰু সাসনপগ্গহং.

৪১. এৱং কতে সোত্থি তুয্হং, হেস্সতীতি অপক্কমি;

পসাতেযেৱ ৱেসালিং, গন্তুং নিক্খমি ভূপতি.

৪২. গন্ত্ৱা মহাৱনং ভিক্খূ-সঙ্ঘং সো সন্নিপাতিয;

সুত্ৱা উভিন্নং ৱাদঞ্চ, ধম্মপক্খঞ্চ ৰোচিয.

৪৩. খমাপেত্ৱা ধম্মিকে তে, ভিক্খূ সব্বে মহীপতি;

অত্তনো ধম্মপক্খত্তং, ৱত্ৱা তুম্হে যথাৰুচি.

৪৪. সম্পগ্গহং সাসনস্স, কৰোথাতি চ ভাসিয;

দত্ৱা চ তেসং আৰক্খং, অগমাসি সকং পুৰং.

৪৫. নিচ্ছেতুং তানি ৱত্থূনি, সঙ্ঘো সন্নিপতী তদা;

অনগ্গানি তত্থ ভস্সানি, সঙ্ঘমজ্ঝে অজাযিসুং.

৪৬. ততো সো ৰেৱতত্থেৰো, সাৱেত্ৱা সঙ্ঘমজ্ঝগো;

উব্ভাহিকায তং ৱত্থুং, সমেতুং নিচ্ছযং অকা.

৪৭. পাচিনকেচ চতুৰো, চতুৰো পাৱেয্যকেপি চ;

উব্ভাহিকায সম্মন্নি, ভিক্খূ তং ৱত্থু সন্তিযা.

৪৮. সব্বকামী চ সাড়্হো চ, খুজ্জসোভিতনামকো;

ৱাসভগামিকো চাতি, থেৰো পাচিনকা ইমে.

৪৯. ৰেৱতো সাণসম্ভূতো,

যসো কাকোণ্ডকত্ৰজো;

সুমনো চাতি চত্তাৰো,

থেৰা পাৱেয্যকা ইমে.

৫০. সমেতুং তানি ৱত্থূনি, অপ্পসদ্দং অনাকুলং;

অগমুং ৱালুকাৰামং, অট্ঠত্থেৰা অনাসৱা.

৫১. দহৰেনা’জি তে নেত্থ, পঞ্ঞত্তে আসনে সুভে;

নিসীদিংসু মহাথেৰা, মহামুনি মতঞ্ঞুনো.

৫২. তেসু ৱত্থূসু একেকং, কমতো ৰেৱতো মহা;

থেৰো থেৰং সব্বকামিং, পুচ্ছি পুচ্ছাসু কোৱিদো.

৫৩. সব্বকামী মহাথেৰো, তেন পুট্ঠো’থ ব্যাকৰি;

সব্বানি তানি ৱত্থূনি, ন কপ্পন্তীতি সুত্ততো.

৫৪. নিহনিত্ৱা’ধিকৰণং, তং তে তত্থ যথাক্কমং;

তথেৱ সঙ্ঘমজ্ঝেপি, পুচ্ছাৱিস্সজ্জনং কৰুং.

৫৫. নিগ্গহং পাপভিক্খূনং, দসৱত্থুকদীপনং;

তেসং দসসহস্সানং, মহাথেৰো অকংসু তে.

৫৬. সব্বকামী পুথৱিযা, সঙ্ঘত্থেৰো তদা অহু;

সো ৱীসং ৱস্সসতিকো, তদা’সি উপসম্পদা.

৫৭. সব্বকামী চ সাড়্হো চ,

ৰেৱতো খুজ্জসোভিতো;

যসো কাকোণ্ডকসুতো,

সম্ভূতো সাণৱাসিকো.

৫৮. থেৰা আনন্দত্থেৰস্স, এতে সদ্ধিৱিহাৰিনো;

ৱাসভগামিকো চেৱ, সুমনো চ দুৱে পন.

৫৯. থেৰা’নুৰুদ্ধত্থেৰস্স, এতে সদ্ধিৱিহাৰিনো;

অট্ঠ থেৰা’পি ধঞ্ঞা তে, দিট্ঠপুব্বা তথাগতং.

৬০. ভিক্খূ সতসহস্সানি, দ্ৱাদসাসুং সমাগতা;

সব্বেসং ৰেৱতত্থেৰো, ভিক্খূনংপমুখোতদা.

৬১. ততো সো ৰেৱতত্থেৰো, সদ্ধম্মট্ঠিতিযা চিৰং;

কাৰেতুং ধম্মসংগীতিং, সব্বভিক্খুসমূহতো.

৬২. পভিন্নত্থাদিঞাণানং, পিটকত্তযধাৰিনং;

সতানি সত্তভিক্খূনং, অৰহন্তানমুচ্চিনি.

৬৩. তে সব্বে ৱালুকাৰামে, কাড়াসোকেন ৰক্খিতা;

ৰেৱতত্থেৰপামোক্খা, অকৰুং ধম্মসঙ্গহং.

৬৪. পুব্বে কতং তথা এৱ, ধম্মং পচ্ছা চ ভাসিতং;

আদায নিট্ঠপেসুং তং, এতং মাসেহি অট্ঠহি.

৬৫. এৱং দুতিযসংগীতিং, কত্ৱা তেপি মহাযসা;

থেৰা দোসক্খযং পত্তা, পত্তাকালেন নিব্বুতিং.

৬৬. ইতি পৰমমতীনং পত্তিপত্তব্বকানং,

তিভৱহিতকৰানং লোকনাথেৰসানং;

সুমৰিযমৰণং তং সঙ্খতা সাৰকত্তং,

পৰিগণিযমসেসং অপ্পমত্তো ভৱেয্যাতি.

সুজনপ্পসাদসংৱেগত্থায কতে

মহাৱংসে দুতিযসংগীতি নাম

চতুত্থো পৰিচ্ছেদো.