পঞ্চম পৰিচ্ছেদ

ততিযধম্মসংগীতি

১. যা মহাকস্সপাদীহি, মহাথেৰেহি আদিতো;

কতা সদ্ধম্ম সংগীতি, থেৰিযা’তি পৱুচ্চতি.

২. একো’ৱ থেৰৱাদো সো, আদিৱস্সসতে অহু;

অঞ্ঞাচৰিযৱাদাতু, ততো ওৰং অজাযিসুং.

৩. তেহি সংগীতিকাৰেহি, থেৰেহি দুতিযেহি তে;

নিগ্গহিতা পাপভিক্খূ, সব্বে দসসহস্সকা.

৪. অকংসা’চৰিযৱাদং তে, মহাসংগীতিনামকা;

ততো গোকুলিকা জাতা, একব্বোহাৰিকাপি চ.

৫. গোকুলিকেহি পণ্ণত্তি-ৱাদা বাহুলিকাপি চ;

চেতিযৱাদা তেস্ৱেৱ, সমতাসঙ্ঘিকা ছ তে.

৬. পুনাপি থেৰৱাদেহি, মহিংসাসকভিক্খৱো;

ৱজ্জীপুত্তকভিক্খূ চ, দুৱে জাতা ইমে খলু.

৭. জাতা’থ ধম্মুত্তৰিযা, ভদ্ৰযানিকভিক্খৱো;

ছন্নাগাৰা সম্মিতিযা, ৱজ্জীপুত্তিযভিক্খূতি.

৮. মহিংসাসকভিক্খূহি, ভিক্খূ সব্বত্থ ৱাদিনো;

ধম্মগুত্তিযভিক্খূ চ, জাতা খলু ইমে দুৱে.

৯. জাতা সব্বত্থিৱাদীহি, কস্সপিযা ততো পন;

জাতা সঙ্কন্তিকা ভিক্খূ, সুত্তৱাদা ততো পন.

১০. থেৰৱাদেন সহ তে, হোন্তি দ্ৱাদসি’মেপি চ;

পুব্বে ৱুত্তছৱাদা চ, ইতি অট্ঠাৰসা খিলা.

১১. সত্তৰসাপি দুতিযে, জাতা ৱসস্সতে ইতি;

অঞ্ঞাচৰিযৱাদা তু, ততো ওৰমজাযিসুং.

১২. হেমতা ৰাজগিৰিযা, তথা সিদ্ধত্থিকাপি চ;

পুব্বসেলিযভিক্খূ চ, তথা অপৰসেলিযা.

১৩. ৱাজিৰিযা ছ এতেহি, জম্বুদীপম্হি ভিন্নকা;

ধম্মৰুচি চ সাগলিযা, লংকাদীপম্হি ভিন্নকা.

আচৰিযকুলৱাদকথা নিট্ঠিতা.

ধম্মাসোকাভিসেক

১৪. কাড়াসোকস্স পুত্তা তু, অহেসুং দসভাতিকা;

বাৱীসতিং তে ৱস্সানি, ৰজ্জং সমনুসাসিসুং.

১৫. নৱ নন্দা ততো আসুং, কমেনেৱ নৰাধিপা;

তে’পি বাৱীসৱস্সানি, ৰজ্জং সমনুসাসিসুং.

১৬. মোৰিযানং খত্তিযানং, ৱংসে জাতং সিৰিধৰং;

চন্দগুত্তোতি পঞ্ঞাতং, চাণক্কো ব্ৰাহ্মণো ততো.

১৭. নৱমং ধননন্দং তং, ঘাতেত্ৱা চণ্ডকোধসা;

সকলে জম্বুদীপস্মিং, ৰজ্জে সমভিসিঞ্চী সো.

১৮. সো চতুৱীসৱস্সানিং, ৰাজা ৰজ্জমকাৰযি;

তস্স পুত্তো বিন্দুসাৰো, অট্ঠৱীসতি কাৰযি.

১৯. বিন্দুসাৰসুতা আসুং, সতং একো চ ৱিস্সুতা;

অসোকো আসি তেসং তু, পুঞ্ঞতেজোবলিদ্ধিকো.

২০. ৱেমাতিকে ভাতৰো সো, হন্ত্ৱা একূনকং সতং;

সকলে জম্বুদীপস্মিং, একৰজ্জমপাপুণি.

২১. জিননিব্বানতো পচ্ছা, পুৰে তস্সাভিসেকতো;

সাট্ঠাৰসং ৱস্সসত-দ্ৱযমেৱং ৱিজানিয.

২২. পত্ৱা চতূহি ৱস্সেহি, একৰজ্জং মহাযসো;

পুৰে পাটলিপুত্তস্মিং, অত্তানমভিসেচযি.

২৩. তস্সা’ভিসেকেন সমং, আকাসে ভূমিযং তথা;

যোজনে যোজনে আণা, নিচ্চং পৱত্তিতা অহু.

২৪. অনোতত্তো দকাকাজে, অট্ঠনেসুং দিনে দিনে;

দেৱা দেৱো অকা তেহি, সংৱিভাগং জনস্সচ.

২৫. নাগলতাদন্তকট্ঠং, আনেসুং হিমৱন্ততো;

অনেকেসং সহস্সানং, দেৱা এৱ পহোনকং.

২৬. অগদা’মলকঞ্চেৱ, তথাগদ হৰিতকং;

ততো’ৱ অমপক্কঞ্চ, ৱণ্ণগন্ধৰসুত্তমং.

২৭. পঞ্চৱণ্ণানি ৱত্থানি, তত্থপুঞ্জনপট্টকং;

পীতঞ্চ দিব্বপানঞ্চ, ছদ্দন্তদহতো মৰু.

২৮. মৰন্তা নগৰে তস্মিং, মিগসূকৰপক্খিনো;

আগন্ত্ৱান মহানসং, সযমেৱ মৰন্তি চ.

২৯. গাৱো তত্থ চৰাপেত্ৱা, ৱজমানেন্তি দীপিনো;

খেত্ত ৱত্থুতড়াকাদিং, পালেন্তি মিগসূকৰা.

৩০. সুমনং পুপ্ফপটকং, অভুত্তং দিব্বমুপ্পলং;

ৱিলেপনং অঞ্জনঞ্চ, নাগানাগাৱিমানতো.

৩১. সালিৱাহসহস্সানি, নৱুতিং তু সুৱা পন;

ছদ্দন্তদহতোযেৱ, আহৰিংসু দিনে দিনে.

৩২. তে সালিনিত্থুসকণে, অখণ্ডেত্ৱান তণ্ডুলে;

অকংসু মূসিকা তেহি, ভত্তং ৰাজকুলে অহু.

৩৩. অকংসু সস্সতং তস্স, মধূনি মধুমক্খিকা;

তথা কম্মাৰসালাসু, অচ্ছাকূটানি পাতযুং.

৩৪. কৰৱিকা সকুণিকা, মনুঞ্ঞমধুৰস্সৰা;

অকংসু তস্সা’গন্ত্ৱান, ৰঞ্ঞো মধুৰৱস্সিতং.

৩৫. ৰাজা’ভিসিত্তো সো’সোকো,

কুমাৰং তিস্সসৱ্হযং;

কণিট্ঠং সংসোদৰিযং, উপৰজ্জে’ভিসেচযি.

ধম্মাসোকাভিসেকো নিট্ঠিতো

নিগ্ৰোধসামণেৰ দস্সন

৩৬. পিতা সট্ঠিসহস্সানি, ব্ৰাহ্মণে ব্ৰহ্মপক্খিকে;

ভোজেসি সোপি তেযেৱ, তীণি ৱস্সানি ভোজযি.

৩৭. দিস্ৱা’নুপসমং তেসং, অসোকো পৰিৱেসনে;

ৱিচেয্য দানং দস্সন্তি, অমচ্চে সন্নিযোজিয.

৩৮. আণাপযিত্ৱা মতিমা, নানাপাসণ্ডিকে ৱিসুং;

ৱীমংসিত্ৱা নিসজ্জায, ভোজাপেত্ৱা ৱিসজ্জযি.

৩৯. কালে ৱাতাযনগতো, সন্তং ৰচ্ছাগতং যতিং;

নিগ্ৰোধসামণেৰং সো, দিস্ৱা চিত্তং পসাদযি.

৪০. বিন্দুসাৰস্স পুত্তানং, সব্বেসং জেট্ঠভাতুনো;

সুমনস্স কুমাৰস্স, পুত্তো সো হি কুমাৰকো.

৪১. অসোকো পিতৰা দিন্নং, ৰজ্জমুজ্জেনিযঞ্হি সো;

হিত্ৱা’গতো পুপ্ফপুৰং, বিন্দুসাৰে গিলানকে.

৪২. কত্ৱা পুৰং সকাযত্তং, মতে পিতৰি ভাতৰং;

ঘাতেত্ৱা জেট্ঠকং ৰজ্জং, অগ্গহেসি পুৰে ৱৰে.

৪৩. সুমনস্স কুমাৰস্স, দেৱী তন্নামিকা ততো;

গব্ভিনী নিক্খমিত্ৱান, পাচিনদ্ৱাৰতো বহি.

৪৪. চণ্ডালগাম মগমা, তত্থ নিগ্ৰোধদেৱতা;

তমালপিযনামেন, মা পত্ৱা ঘৰকং অদা.

৪৫. তদহে’ৱ ৱৰং পুত্তং, ৱিজাযিত্ৱা সুতস্স সা;

নিগ্ৰোধোতি অকা নামং, দেৱতা নুগ্গহানুগা.

৪৬. দিস্ৱা তং জেট্ঠচণ্ডালো, অত্তনো সামিনিং ৱিয;

মঞ্ঞন্তো তং উপট্ঠাসি, সত্তৱস্সানি সাধুকং.

৪৭. তং মহাৱৰুণো থেৰো, তদা দিস্ৱা কুমাৰকং;

উপনিস্সয সম্পন্নং, অৰহা পুচ্ছি মাতৰং.

৪৮. পব্বাজেসি খুৰগ্গে সো, অৰহত্তমপাপুণি;

দস্সনাযো’প গচ্ছন্তো, সো ততো মাতুদেৱিযা.

৪৯. দক্খিণেন চ দ্ৱাৰেন, পৱিসিত্ৱা পুৰুত্তমং;

তং গামগামিমগ্গেন, যাতি ৰাজঙ্গণে তদা.

৫০. সন্তায ইৰিযা যস্মিং, পসীদি সমহীপতি;

পুব্বে’ৱ সন্নিৱাসেন, পেমং তস্মিং অজাযথ.

৫১. পুব্বে কিৰ তযো আসুং, ভাতৰো মধু ৱাণিজা;

একো মধুং ৱিক্কিণাতি, আহৰন্তি মধুং দুৱে.

৫২. একো পচ্চেকসম্বুদ্ধো, ৱণৰোগাতুৰো অহু;

অঞ্ঞো পচ্চেকসম্বুদ্ধো, তদত্থং মধুৱত্থিকো.

৫৩. পিণ্ডচাৰিকৱত্তেন, নগৰং পাৱিসী তদা;

তিত্থং জলত্থং গচ্ছন্তি, একা চেটী তমদ্দস.

৫৪. পুচ্ছিত্ৱা মধুকামত্তং, ঞত্ৱা হত্থেন আদিসি;

এসো মধ্ৱাপণো ভন্তে, তত্থ গচ্ছা’তি অব্ৰৱি.

৫৫. তত্থ পত্তস্স বুদ্ধস্স, ৱাণিজো সো পসাদৱা;

ৱিস্সন্দযন্তো মুখতো, পত্তপুৰং মধুং অদা.

৫৬. পুণ্ণঞ্চ উপ্পতন্তঞ্চ, পতিতঞ্চ মহীতলে;

দিস্ৱা মধুং পসন্নো সো, এৱং পণিদহী তদা.

৫৭. জম্বুদীপে একৰজ্জং, দানেনা’নেন হোতু মে;

আকাসে যোজনে আণা, ভূমিযং যোজনেতি চ.

৫৮. ভাতৰে আগতে আহ, এদিসস্স মধুং অদং;

অনুমোদথ তুম্হে তং, তুম্হাকঞ্চ যতো মধু.

৫৯. জেট্ঠো আহ অতুট্ঠো সো,

চণ্ডালো নূন সোসিযং;

নিৱাসেন্তীতি চণ্ডালা,

কাসাযানি সদা ইতি.

৬০. মজ্ঝো পচ্চেকবুদ্ধং তং, খিপপাৰণ্ণৱে ইতি;

পত্তিদানৱচো তস্স, সুত্ৱা তে চানুমোদিসুং.

৬১. আপণা দেসিকং যাতু, দেৱিত্তং তস্স পত্থযি;

আদিস্সমানসন্ধি চ, ৰূপং অতিমনোৰমং.

৬২. অসোকো মধুদো’সন্ধি-মিত্তাদেৱী তু চেটিকা;

চণ্ডালৱাদী নিগ্ৰোধো, তিস্সো সো পাৰৱাদিকো.

৬৩. চণ্ডালৱাদী চণ্ডাল-গামে আসি যতো তু সো;

পত্থেসি মোক্খং মোক্খঞ্চ, সত্ত ৱস্সোৱ পাপুণি.

৬৪. নিৱিট্ঠপেমো তস্মিং সো, ৰাজা’তি তুৰিতো ততো;

পক্কোসাপেসি তং সো তু, সন্তৱুত্তী উপাগমি.

৬৫. নিসিদ তাতা’নুৰূপে, আসনে তা’হ ভূপতি;

অদিস্ৱা ভিক্খুমঞ্ঞং সো, সীহাসনমুপাগমি.

৬৬. তস্মিং পল্লঙ্কমাযাতে, ৰাজাইতি ৱিচিন্তযি;

অজ্জা’যং সামণেৰো মে, ঘৰে হেস্সতি সামিকো.

৬৭. আলম্বিত্ৱা কৰং ৰঞ্ঞো, সো পল্লঙ্কে সমাৰুহি;

নিসীদি ৰাজপল্লঙ্কে, সেতচ্ছত্তস্স হেট্ঠতো.

৬৮. দিস্ৱা তথা নিসিন্নং তং, অসোকো সো মহীপতি;

সম্ভাৱেত্ৱান গুণতো, তুট্ঠো’তীৱ তদা অহু.

৬৯. অত্তনো পটিযত্তেন, খজ্জভোজ্জেন তপ্পিয;

সম্বুদ্ধদেসিতং ধম্মং, সামণেৰমপুচ্ছিতং.

৭০. তস্স’প্পমাদৱগ্গং সো, সামণেৰো অভাসথ;

তং সুত্ৱা ভূমিপালো সো, পসন্নো জিনসাসনে.

৭১. অট্ঠ তে নিচ্চভত্তানি, দম্মি তাতা’তি আহ তং;