একূনচত্তালীসতিম পৰিচ্ছেদ

ৰাজদ্ৱযদীপনো

১. ততো কস্সপনামো সো, পাপকো নৰপালকো;

অস্স গো পঞ্চসূদঞ্চ, পেসযিত্ৱান ভাতিকং.

২. মাৰাপেতুং অসক্কোন্তো, ভীতো সীহগিৰিং গতো;

দুৰাৰোহং মনুস্সেহি, সোধাপেত্ৱা সমন্ততো.

৩. পাকাৰেন পৰিক্খিপ্প, সীহাকাৰেন কাৰযি;

তত্থ নিস্সেণি গেহানি, তেন তং নামকো অহূ.

৪. সংহৰিত্ৱা ধনং তত্থ, নিদহিত্ৱা সুগোপিতং;

অত্তনো নিহিতানং সো, ৰক্খং দত্ৱা তহিং তহিং.

৫. কত্ৱা ৰাজঘৰং তত্থ, দস্সনেয্যং মনোৰমং;

দুতিযালকমন্দংৱ, কুৱেৰোৱ তহিং ৱসি.

৬. মিগাৰো নাম কাৰেসি, সেনাপতি সনামকং;

পৰিৱেণং তথাগেহ-মভিসেকজিনিস্স চ.

৭. তস্সাভিসেকং যাচিত্ৱা, সিলাসম্বুদ্ধতো’ধিৰং;

অলদ্ধাসামি নো ৰজ্জে, জানিস্সামীতি সণ্ঠহি.

৮. হুত্ৱা ৱিপ্পটিসাৰী সো, অত্তনা কতকম্মনা;

মুচ্চিস্সামি কতং নু’তি, পুঞ্ঞং কাসি অনপ্পকং.

৯. মহা ৱত্থুনি কাৰেসি, দ্ৱাৰেসু নগৰস্স সো;

অম্বুয্যানে চ কাৰেসি, দীপে যোজন যোজনে.

১০. ইস্সৰসমণাৰামং, কাৰেত্ৱা পুব্বৱত্থুতো;

অধিকং ভোগগামে চ, অধিকং তস্স দাপযি.

১১. বোধি উপ্পলৱণ্ণা চ, তস্সাসুং ধীতৰো দুৱে;

ৱিহাৰস্স’স্স কাৰেসি, নামং তাসঞ্চ অত্তনো.

১২. দেন্তে তস্মিং ন ইচ্ছিংসু, সমণা থেৰৱাদিনো;

‘‘পিতুঘাতিস্স কম্ম’’ন্তি, লোকগাৰয্হ ভীৰুনো.

১৩. দাতুকামোস তেসং’ৱ, সম্বুদ্ধ পটিমায’দা;

ভিক্খৱে অধিৱাসেসুং, ভোগো নো সত্থুনো ইতি.

১৪. কথা নিয্যন্তি উয্যানে, সমীপে পব্বতস্স সো;

কাৰাপেসি ৱিহাৰং সো, তেসং নামো ততো অহু.

১৫. অদা ধম্মৰুচিনং তং, সম্পত্ত চতুপচ্চযং;

ৱিহাৰঞ্চেৱ উয্যানং, দিসাভাগম্হি উত্তৰে.

১৬. ভত্তং সনীৰপক্কং সো, ভুঞ্জিত্ৱা দিন্নমিত্থিযা;

সপ্পিযুত্তং মনুঞ্ঞেহি, সূপেহি অভিসঙ্খতং.

১৭. মনুঞ্ঞমিদময্যানং, দস্সমেৱন্তি তাদিসং;

ভত্তং পাদাসি ভিক্খূনং, সব্বেসঞ্চ সচীৱৰং.

১৮. উপোসথমধিট্ঠাসি, অপ্পমঞ্ঞঞ্চ ভাৱযি,

সমাদিযি ধুতঙ্গে চ, লিখাপেসি চ পোত্থকে.

১৯. পটিমাদান সালাদিং, কাৰাপেসি অনপ্পকং;

ভিতো সো পৰলোকম্হা, মোগ্গল্লানা চ ৱত্ততি.

২০. ততো অট্ঠাৰসে ৱস্সে, মোগ্গল্লানো মহাভটো;

আদেসেন নিগণ্ঠানং, দ্ৱাদসগ্গসহায ৱা.

২১. জম্বুদীপা ইধাগম্ম, দেসে অম্বট্ঠকোলকে;

কুড়াৰী নামে বন্ধিত্থ, ৱিহাৰে বলসঞ্চযং.

২২. ৰাজা সুত্ৱা গহেত্ৱা তং, ভঞ্জিস্সামিতি নিক্খমি;

নেমিত্তেহি ন সক্কাতি, ৱদন্তেপি মহাবলো.

২৩. মোগ্গল্লানোপি সন্নদ্ধ বলো সূৰসহায ৱা;

গচ্ছন্তো সুৰসঙ্গামং, দেৱো ৱিয সুজম্পতি.

২৪. অঞ্ঞমঞ্ঞং উপাগম্ম, ভিন্নৱেলাৱ সাগৰা;

আৰভিংসু মহাযুদ্ধং, বলকাযা উভোপি তে.

২৫. কস্সপো পুৰতো দিস্ৱা, মহন্তং কদ্দমাসযং;

গন্তুমঞ্ঞেন মগ্গেন, পৰিৱত্তেসি দন্তিনং.

২৬. দিস্ৱা তং সামিকোনো’যং, পলাযতি ভণে ইতি;

বলকাযো পভিজ্জিত্থ, ‘‘দিট্ঠং পিঠ’’ন্তি ঘোসযুং.

২৭. মোগ্গলান বলাৰাজা, ছেত্ৱা নিকৰণেন সো;

সীসং উক্খিপিযা’কাসং, ছুৰিকং কোসিযং খিপি.

২৮. কত্ৱা’ড়াহন কিচ্চং সো, তস্স কম্মে পসীদিয;

সব্বংসো ধনমাদায, আগঞ্ছি নগৰং ৱৰং.

২৯. ভিক্খূ সুত্ৱা পৱত্তিং তং, সুনিৱত্থা সুপাৰুতা;

সম্মজ্জিত্ৱা ৱিহাৰঞ্চ, অট্ঠংসু পটিপাটিযা.

৩০. মহামেঘৱনং পত্ৱা, দেৱৰাজাৱ নন্দনং;

মহাসেন নিৱত্তেত্ৱা, হত্থিপাকাৰতো বহি.

৩১. উপসঙ্কম্ম ৱন্দিত্ৱা, সঙ্ঘে তস্মিং পসীদিয;

ছত্তত্তেন সঙ্ঘং পূজেসি, সঙ্ঘো তস্সেৱ তং অদা.

৩২. তং ঠানং ছত্তৱড্ঢীতি, ৱোহৰিংসু তহিং কতং;

পৰিৱেণম্পি তং নামং, অহোসি পুৰমাগতো.

৩৩. ৱিহাৰে দ্ৱেপি গন্ত্ৱান, সঙ্ঘং তত্থা’ভিৱন্দিয;

পাপুণিত্ৱা মহাৰজ্জং, লোকং ধম্মেন পালযি.

৩৪. কুদ্ধো নীহৰি দাঠংসো, ঘাতকং পিতুনো মম;

অনুৱত্তিত্ৱা মচ্চাতি, তেন ৰক্খস নাম ৱা.

৩৫. অতিৰেকসহস্সং সো, অমচ্চানং ৱিনাসযি;

কণ্ণনাসাদি ছেদেসি, পব্বাজেসি তথা বহূ.

৩৬. ততো সুত্ৱান সদ্ধম্ম-মুপসন্নো সুমানসো;

মহাদানং পৱত্তেসি, মেঘো ৱিয মহীতলে.

৩৭. ফুস্সপুণ্ণমীযং দান-মনুৱস্সং পৱত্তযি;

ততো পট্ঠায তং দানং, দীপে অজ্জাপি ৱত্ততি.

৩৮. সোপি সাৰথিকো লাজ-দাযকো পিতুৰাজিনো;

আনেত্ৱা পিতুসন্দে সং, মোগ্গল্লানস্স দস্সযি.

৩৯. তং দিস্ৱা পৰিদেৱিত্ৱা, পিতুনো পেম মত্তনী;

ৱণ্ণেত্ৱা তস্স পাদাসি, দ্ৱাৰনাযকতং ৱিভূ.

৪০. সেনাপতি মিগাৰোহি, নিৱেদেত্ৱা যথা ৱিধিং;

অভিসেক জিনস্সা’কা, অভিসেকং যথাৰুচিং.

৪১. সীহা’চলে দড়্হনামং, দাঠা কোণ্ডঞ্ঞকম্পি চ;

ৱিহাৰং ধম্মৰুচিনং, সাগলিনঞ্চ দাপযি.

৪২. পব্বতন্তু ৱিহাৰংসো, কত্ৱা থেৰস্স দাপযি;

মহানামসনামস্স, দীঘসণ্ড ৱিহাৰকে.

৪৩. ৰাজিনিনামকঞ্চেৱ, কত্ৱা ভিক্খুনুপস্সযং;

অদা সাগলিকানং সো, ভিক্খুনীনং মহামতি.

৪৪. লম্বকণ্ণকগোত্তোপি, দাঠা পভুতি নামকো;

কস্সপস্স উপঠানে, কোচি নিব্বিন্ন মানসো.

৪৫. গন্তা মে ৰেলিযং ৱগ্গং,

ৱাসং তত্থেৱ কপ্পযি;

অহোসি পুত্তো তস্সেকো,

সিলাকা লোতি পিস্সুতো.

৪৬. সোপি কস্সপতো ভীতো, ঞাতকেন সহ’ত্তনো;

মোগ্গল্লানেন গন্ত্ৱান, জম্বুদীপতলং ইতো.

৪৭. বোধিপণ্ডৱিহাৰম্পি, পব্বজ্জং সমুপাগতো;

কৰোন্তো সঙ্ঘকিচ্চানি, সাদৰো সো সুপেসলো.

৪৮. অম্মং সঙ্ঘস্স পাদাসি, সঙ্ঘো তস্মিং পসীদিয;

আহ’ম্ব সামণেৰো’তি, তেন তং নামকো অহু.

৪৯. সো কেসধাতুৱংসম্হি, ৱুত্তেন ৱিধিনা ততো;

কেসধাতুং লভিত্ৱান, তস্স ৰজ্জে ইধা’নযি.

৫০. তস্স কত্ৱান সক্কাৰং, গহেত্ৱা কেস ধাতুযো;

মহগ্ঘে নিদহিত্ৱান, কৰণ্ডে ফলিকুম্ভৱ্হে.

৫১. দীপঙ্কৰস্স নাথস্স, পটিমায ঘৰে ৱৰে;

ৱড্ঢেত্ৱা পৰিহাৰেন, মহাপূজং পৱত্তযি.

৫২. মাতুলং ভৰিযঞ্চ’স্স, কত্ৱা সোৱণ্ণযং তহিং;

ঠপেসি পটিমাযো চ, অস্স বিম্বঞ্চ চাৰুকং.

৫৩. কেসধাতুকৰণ্ডঞ্চ, ছত্তং ৰতনমণ্ডপং;

সাৱকগ্গযুংগং ৱাড়-বীজনিঞ্চ সকাৰযি.

৫৪. পৰিহাৰঞ্চ তস্স’দা, ৰাজা অধিকমত্তনো;

সিলাকাড় মসিগ্গাহং, কত্ৱা ৰক্খায যোজযি.

৫৫. অসিগ্গাহসিলাকাড়ো, ইতি তেনা’সি ৱিস্সুতো;

ভগিনিঞ্চ’স্স পাদাসি, সদ্ধিং ভোগেন ভূমিপো.

৫৬. ৱুত্তো’যমতি সঙ্খেপো, ৱিত্থাৰো পন সব্বসো;

কেসধাতুকৱংসম্হা, গহেতব্বো ৱিভাৱিনা.

৫৭. বন্ধিত্ৱা সাগৰা ৰক্খং, দীপঞ্চ কাসিনিব্ভযং;

ধম্মকম্মন সোধেসি, সধম্মং জিনসাসনং.

৫৮. সেনাপতিস নামং’কা, পধানঘৰ মুত্তৰো;

কত্ৱা’ট্ঠাৰসমে ৱস্সে, সো পুঞ্ঞানি খযং গতো.

৫৯. কস্সপতো জিতো অতিবলি পুঞ্ঞক্খযে সঙ্খতে;

জেতুং নো ৱিসহিত্থ মচ্চুমুপগং সো যেৱদাসোৱিয;

তস্মা মচ্চুবলং নিহচ্চ সুখিনো হেস্সন্তি মেধাৱিনো;

নিব্বানং পৰমচ্চুতং সিৱপদং পত্তব্বমত্তঞ্ঞুনা.

সুজনপ্পসাদ সংৱেগত্থায কতে মহাৱংসে

ৰাজদ্ৱযদীপনো নাম

একূনচত্তালীসতিমো পৰিচ্ছেদো.