অট্ঠতিংসতিম পৰিচ্ছেদ

দসৰাজকো

১. মহানাম সুতো আসি, দমিড়ী কুচ্ছিসম্ভৱো;

সোত্থিসেনো, তথাসঙ্ঘো-ধীতা চা’সি মহেসিযা.

২. সোত্থিসেনো তদা ৰজ্জং, পত্ৱা সঙ্ঘযনাসিতো;

তস্মিংযেৱ দিনে ভেৰিং, চৰাপেত্ৱা তদা তু সা.

৩. অত্তনো সামিকস্সদা, ছত্তগ্গাহকজন্তুনো;

ছত্তগ্গাহকৱাপিং সো, কত্ৱা সংৱচ্ছৰে মতো.

৪. অথ মচ্চো মহাপঞ্ঞো, সহাযো তস্স তং মতং;

অন্তোৱত্থুম্হি ঝাপেত্ৱা, ৱীহিচোৰং মহাবলং.

৫. ৰজ্জযোগ্গোতি চিন্তেত্ৱা, কত্ৱা তং ভূপতিং ৰহো;

অন্তোযেৱ নিৱাসেত্ৱা, ৰাজা ৰোগাতুৰো ইতি.

৬. যসং ৰজ্জং ৱিচাৰেসি, ছণে পত্তে মহাজনা;

ৰাজা চে অত্থি অম্হেহি, সদ্ধিং মেতূতি ঘোসযুং.

৭. তং সুত্ৱা নৰপালো সো, সব্বলঙ্কাৰমণ্ডিতো;

সমানংতে মহানাগে, নেসযোগ্গা মমা’তিসো.

৮. দাট্ঠাধাতুঘৰঠানে, সুৱা নাগং সমাদিসি;

ৰঞ্ঞো আণাতি ৱুত্তে সো, অগা আৰুয্হ তং পুৰং.

৯. কত্ৱা পদক্খিণং গন্ত্ৱা, পাচিনদ্ৱাৰতো বহি;

পঠমে চেতিযঠানে, ধাতুনাগং সমপ্পযি.

১০. মহাচেতিত্তযে হত্থি-পাকাৰে’কাসি তোৰণং;

মিত্তসেনো বহুং পুঞ্ঞং, কত্ৱা ৱস্সেন সো চুতো.

১১. মিত্তসেনং ৰণে হন্ত্ৱা, দমিড়ো পণ্ডুনামকো;

আগতো পৰতীৰম্হা, লঙ্কাৰজ্জমকাৰযি.

১২. জনা কুলীনা সব্বেপি, ৰোহণং সমুপাগতা;

ওৰগঙ্গায ইস্সেৰং, দমিড়া এৱ কপ্পযুং.

১৩. যে সুভস্স বলট্ঠস্স, ভীতামোৰিযৱংসজা;

বলাযিত্ৱা নৰাৱাসং, কপ্পযিংসু তহিং তহিং.

১৪. তেসমঞ্ঞতমো নন্দি-ৱাপি গামে কুটিম্বকো;

ধাতুসেনৱ্হযো আসি, দাঠানামো চ তং সুতো.

১৫. গামে অম্বিলযাগুম্হি, ৱসং পুত্তে দুৱে লভি;

ধাতুসেনং সিলাতিস্স-বোধিংচ সম্পজাতিকে.

১৬. মাতুসো দৰিযো তেসং, সদ্ধো পব্বজ্জ ৱত্ততি;

দীঘসন্দকতাৱাসে, ধাতুসেনাপি মাণৱো.

১৭. সন্তিকে তস্স পব্বজ্জ-ৰুক্খমূলম্হি একদা;

সজ্ঝাযতি পৱিস্সিত্থ, মেঘো নাগোতুপস্সিয.

১৮. পৰিক্খিপিত্ৱা ভোগেহি, ছাদযিত্ৱা ফণেন চ;

পোত্থকঞ্চ কুমাৰঞ্চ, ৰক্খিতং পস্সি মাতুলো.

১৯. সীসে আকিৰি সঙ্কাৰং, তস্স ৰুট্ঠো পৰোযতি;

তস্মিং চিত্তং ন দূসেসি, তম্পি দিস্ৱান মাতুলো.

২০. উত্তমো ৱত’যং সত্তো, ৰাজা হেস্সতি নিচ্ছযং;

ৰক্খিতব্বো’তি আদায, তং ৱিহাৰমুপাগতো.

২১. গোণিসাদি ৱিহাৰে’যং, কত্তব্বো নীতিমা ইতি;

সিক্খাপেসি কুমাৰং তং, পণ্ডুকো তং ৱিজানিয.

২২. গণ্হথেতন্তিপেসেসি, সেৱকে তস্সাৰত্তিযং;

দিস্ৱান সুপিনং থেৰো, নীহৰিত্থ কুমাৰকং.

২৩. তস্মিং নিক্খন্তমত্তম্হি, সেৱকং পৰিৱাৰিয;

পৰিৱেণে ন পস্সিংসু, ততো নিক্খম্ম তে উভো.

২৪. দক্খিণস্মিং দিসাভাগে, গোণ নামং মহানদিং;

পত্ৱা সম্পুণ্ণমট্ঠংসু, গন্তুকামাপি ৱেগসা.

২৫. যথা নদিযং ৱাৰেতি, অম্হে তং ত্ৱম্পি ৱাৰয;

ৱাপিংগহেত্ৱা এত্থে’তি, ৱত্ৱা থেৰো তদা নদিং.

২৬. ওতৰিত্থকুমাৰেন, সদ্ধিং দিস্ৱান তে উভো;

নাগৰাজা তদা একো, পিট্ঠিং পাদাসি তেন সো.

২৭. উত্তৰিত্ৱা কুমাৰং তং, নেত্ৱা পচ্চন্তমাৱসং;

লদ্ধা খীৰোদনং সুত্ৱা, সেসং পত্তেন তস্স’দা.

২৮. চিত্তকাৰেন থেৰম্হি, ভত্তং পক্খিপ্প ভূমিযং;

ভুঞ্জি থেৰোপি তং জানি, ভুঞ্জ তে যং মহিং ইতি.

২৯. পণ্ডুৰাজাপি কত্ৱান, ৰজ্জং ৱস্সম্হি পঞ্চমে;

চুতো পুত্তো পিপাৰিন্দো, ততিযো তস্স ভাতুকো.

৩০. কণিট্ঠো খুদ্দপাৰিন্দো, কুব্বং ৰজ্জং মহামহিং;

ধাতুসেনানুগে সব্বে, ৱিহেঠেসি মহাজনে.

৩১. সঙ্গহেত্ৱা জনে সাধু-সেনো যুজ্জিত্থ ৰাজিনা;

সো সোড়সহি ৱস্সেহি, পুঞ্ঞপাপকৰোমতো.

৩২. নিৰিতৰো ততো আসি, ৰাজামাসদ্ৱযেন তং;

ধাতুসেনো ৱিনাসেসি, তেন কত্ৱা মহাহৱং.

৩৩. হতে তস্মিং মহীপালে, দাঠিযো দমিড়ো ততো;

ৰাজা ৱস্সত্থ যে হুত্ৱা, ধাতুসেনহতোততো.

৩৪. পিট্ঠিযো দমিড়ো সত্ত-মাসেন নিধনং গতো;

ধাতুসেনেন যুজ্ঝিত্ৱা, ৱংসো পচ্ছিজ্জি দামিড়ো.

৩৫. অথা’সি ৰাজালঙ্কাযং, ধাতুসেনো ইৰাধিপো;

ভাতৰা সহ দীপম্হি, দমিড়ে দীপঘাতকে.

৩৬. উপাযেহি অনেকেযি, একৱীসপ্পমাণকে;

খন্ধৱাৰে নিৱেসেত্ৱা, কত্ৱা যুদ্ধমসেসতো.

৩৭. সোধেত্ৱা মেদিনিং সাধু, কত্ৱা চ সুখিতংজনং;

সাসনঞ্চ যথাঠানে, ঠপেসি পৰনাসিতং.

৩৮. দমিড়ে যে’নুৱত্তিংসু, কুলীনা কুলগামৱা;

তে মং ৱা সাসনং ৱা নো, ৰক্খিংসূ’তি পকুপ্পিয.

৩৯. তেসং গামে গহেত্ৱান, গামে স্ৱাকাসিৰক্খকে;

ৰোহণা’গম্ম তে সব্বে, কুলীনা তমুপট্ঠহুং.

৪০. তেসং সক্কাৰসম্মানং, যথাযোগমকাসি সো;

অমচ্চে অত্তনো দুক্খ-সহাযেচা’ভি তোসযি.

৪১. বন্ধাপেত্ৱা মহাগঙ্গং, কেদাৰে’কা থিৰোদকে;

মহাপাড়ম্হি ভিক্খূনং, সালিভত্তঞ্চ দাপযি.

৪২. পঙ্গুৰোগা তুৰট্টানং, সালাযোকাসি বুদ্ধিমা;

কাড়ৱাপিংচ গণ্হিত্ৱা, বন্ধি গোণং মহানদিং.

৪৩. মহাৱিহাৰং কত্ৱান, পন্তিযুত্তমনাকুলং;

তথা বোধিঘৰঞ্চেৱ, দস্সনেয্য মকাৰযি.

৪৪. ভিক্খৱো পৰিতোসেত্ৱা, পচ্চযেহি চতূহিপি;

ধম্মাসোকো’ৱ সোকাসি, সঙ্গহং পিটকত্তযে.

৪৫. অট্ঠাৰসৱিহাৰে চ, থেৰিযান মকাৰযি;

সম্পন্নভোগে দীপম্হি, অট্ঠাৰস চ ৱাপিযো.

৪৬. কাড়ৱাপী ৱিহাৰো চ, কোটিপস্সাৱনামকো;

দক্খিণ গিৰিনামো চ, ৱিহাৰো ৱড্ঢমানকো.

৪৭. পণ্ণৱল্লকভূতো চ, ভল্লাতকসনামকো;

পাসাণসিন্নে দেসম্হি, ধাতুসেনো চ পব্বতো.

৪৮. মং গনো থূপৱিট্ঠি চ, ধাতুসেনোপি উত্তৰে;

পাচিন কম্বৱিট্ঠি চ, তথা অন্তৰমে গিৰি.

৪৯. অন্তাড়ি ধাতুসেনো চ, কস্সপিট্ঠিক পুব্বকো;

ৰোহণেদাযগামো চ, সালৱাণো ৱিভীসনো.

৫০. ৱিহাৰো ভল্লিৱাণো চ, অট্ঠাৰসনৰুত্তমো;

পাদূলকং হম্বলট্ঠি, মহাদত্থাদিৱাপি যো.

৫১. খুদ্দকে চ ৱিহাৰেসো, অট্ঠাৰসনৰুত্তমো;

ৱাপীযো চ তথাকত্ৱা, তেসমেৱ তু দাপযি.

৫২. পঞ্চৱীসতি হত্থঞ্চ, মযূৰপৰিৱেণকং;

হৰিত্ৱা’কাসিপাসাদ-মেকৱীসতি হত্থকং.

৫৩. কুমাৰসেনস্স’পেত্ৱা, পুব্বভোগং ৱিসোধযি;

কাড়ৱাপিম্মিভাগদ্ধং, খেত্তানঞ্চ সতদ্ৱযং.

৫৪. লোহ পাসদকে জিণ্ণে, নৱকম্মমকাৰযি;

মহাথূপেসু ছত্তানি, তীসু জিণ্ণানি কাৰযি.

৫৫. দেৱানংপিযতিস্সেন, কতং বোধিমহং ৱিয;

সিন্হানপূজং বোধিস্স, ৱৰবোধিস্স কাৰযি.

৫৬. ধাৱনা লোভনাৱাযো, তত্থ পূজেসি সোড়স;

অলঙ্কাৰং মুনিন্দস্স, অভিসেকঞ্চ কাৰযি.

৫৭. মহাবোধি পতিট্ঠানা, ওৰং লঙ্কায ভূমিপা;

যাৱ দ্ৱাদসমং ৱস্সং, বোধিপূজমকাৰযুং.

৫৮. মহামহিন্দত্থেৰস্স, কাৰেত্ৱা পটিবিম্বকং;

থেৰস্সা’লাহনং নেত্ৱা, কাতুং পূজং মহাৰহং.

৫৯. দত্ৱা সহস্সং দীপেতুং, দীপৱংসং সমাদিসি;

ঠিতানং তত্থ ভিক্খূনং, দাতুঞ্চাণাপযিগুড়ং.

৬০. ভিক্খুস্স অত্তনো সীসে, সঙ্কাৰোকিৰণং সৰং;

লাভং নাদাসি ৱুত্থস্স, পৰিৱেণস্স অত্তনো.

৬১. ফাতিকম্মং বহুং’কাসি, ৱিহাৰে অভযুত্তৰে;

সিলাসত্থুস্স কাৰেসি, মন্দিৰঞ্চ সমণ্ডপং.

৬২. বুদ্ধ দাসকতেনেত্তে, নট্ঠে’নগ্ঘমণি দ্ৱযং;

অকাসি নেত্তং সত্থুস্স, ৰংসি চূড়ামণিংতথা.

৬৩. মণিহি ঘননীলেহি, কেসা ৱত্তং সুমুত্তমং;

হেমপট্টং তথেৱুণ্ণ-লোমং সোৱণ্ণ চীৱৰং.

৬৪. পাদজালং সুৱণ্ণস্স, পদুমং দীপমুত্তমং;

নানাৰাগম্বৰং তত্থ, পূজযিত্থ অসংখিযং.

৬৫. অকাসি পটিমা গেহে, বহুমঙ্গলচেতিযে;

বোধিসত্তে তথা’কাসি, কাড়সেলস্স সত্থুনো.

৬৬. উপসুম্ভৱ্হযস্সাপি, লোকনাথস্স কাৰযি;

ৰংসীচূড়ামণিঞ্চেৱ, অভিসেকৱ্হযস্স চ.

৬৭. বুদ্ধবিম্বস্স কাৰেসি, পুব্বে ৱুত্তং পিড়ন্ধনং;

ৱামপস্সম্হি বোধিস্স, বোধিসত্তঘৰং তথা.

৬৮. মেত্তেয্যস্স চ কাৰেসি, সব্বং ৰাজপিড়ন্ধনং;

সমন্তা যোজনে তস্স, তদা ৰক্খঞ্চ যোজযি.

৬৯. কাৰাপেসি ৱিহাৰেসু, ধাতুৰাজৱ্হপন্তিযো;

তথা সতসহস্সেন, মহাবোধিঘৰং ৱৰং.

৭০. থূপাৰমম্হি থূপস্স, পূজং জিণ্ণৱিসোধনং;

দাঠা ধাতুঘৰেচাপি, জিণ্ণস্স পটিসঙ্খৰং.

৭১. দাঠাধাতুকৰুণ্ডঞ্চ, ৰংসিঞ্চ ঘনকোট্টিমং;

মহগ্ঘমনিসংকিণ্ণং, সুৱণ্ণ পদুমানি চ.

৭২. দাঠাধাতুম্হি পূজেসি, পূজাচাকা অসঙ্খিযা;

চীৱৰাদীনি দাপেসি, ভিক্খূনং দীপৱাসিনং.

৭৩. কাৰাপেত্ৱা ৱিহাৰেসু, নৱকম্মং তহিং তহিং;

পাকাৰে চ ঘৰেত্ৱা’কা, সুধাকম্মং মনোহৰং.

৭৪. মহাচেতিত্তযে কত্ৱা, সুধাকম্মং মহাৰহং;

সুৱণ্ণছত্তং কাৰেসি, তথা ৱজিৰচুম্বটং.