সত্ততিংসতিম পৰিচ্ছেদ

পঞ্চৰাজকো

১. জেট্ঠতিস্সচ্চযে তস্স, মহাসেনো কনিট্ঠকো;

সত্তৱীসতিৱস্সানি, ৰাজা ৰজ্জমকাৰযি.

২. তস্স ৰজ্জাভিসেকং তং,

কাৰেতুং পৰতীৰতো;

সো সঙ্ঘমিত্তত্থেৰো তু,

কালং ঞত্ৱা ইধাগতো.

৩. তস্সাভিসেকং কাৰেত্ৱা, অঞ্ঞং কিচ্চঞ্চনেকধা;

মহাৱিহাৰ ৱিদ্ধংসং, কাতুকামো অসঞ্ঞতো.

৪. অৱিনযৱাদিনো এতে, মহাৱিহাৰৱাসিনো;

ৱিনযৱাদী মযং ৰাজ, ইতি গাহিয ভূপভিং.

৫. মহাৱিহাৰৱাসিস্স, আহাৰং দেতি ভিক্খুনো;

যো সো সতং দণ্ডিযো’তি, ৰঞ্ঞা দণ্ডং ঠপাপযি.

৬. উপদ্দুতা তেহি ভিক্খূ, মহাৱিহাৰৱাসিনো;

মহাৱিহাৰং ছড্ডেত্ৱা, মলযং ৰোহণং অগুং.

৭. তেন মহাৱিহাৰো’যং, নৱৱস্সানি ছড্ডিতো;

মহাৱিহাৰৱাসীহি, ভিক্খূহি আসি সুঞ্ঞকো.

৮. ‘‘হোতি অস্সামিকং ৱত্থু, পুতুৱিসামিনো’’ইতি;

ৰাজানং সঞ্ঞাপেত্ৱা সো, থেৰো দুম্মতি দুম্মতিং.

৯. মহাৱিহাৰং নাসেতুং, লদ্ধানুমতি ৰাজতো;

তথা কাতুং মনুস্সে সো, যোজেসি দুট্ঠমানসো.

১০. সঙ্ঘমিত্তস্স থেৰস্স, সেৱকো ৰাজৱল্লভো;

সোণামচ্চো দাৰণো চ, ভিক্খৱো চ অলজ্জিনো.

১১. ভিন্দিত্ৱা লোহপাসাদং, সত্তভূমক মুত্তমং;

ঘৰে নানপ্পকাৰে চ, ইতো’ভযগিৰিং নযুং.

১২. মহাৱিহাৰা নীতেহি, পাসাদেহি বহূহি চ;

অভযগিৰিৱিহাৰোযং, বহুপাসাদকো অহু.

১৩. সঙ্ঘমিত্তং পাপমিত্তং, থেৰং সোণঞ্চ সেৱকং;

আগম্ম সুবহুং পাপং, অকাসি সো মহীপতি.

১৪. মহাসিলাপটিমং সো, পাচিনতিস্সপব্বতা;

আনেত্ৱা’ভযগিৰিম্হি, পতিট্ঠাপেসি ভূপতি.

১৫. পটিমাঘৰং বোধিঘৰং, ধাতুসালং মনোৰমং;

চতুসালঞ্চ কাৰেসী, সঙ্খৰী কুক্কুটৱ্হযং.

১৬. সঙ্ঘমিত্তেন থেৰেন, তেন দাৰুণকম্মুনা;

ৱিহাৰো সো’ভযগিৰি, দস্সনেয্যো অহু তদা.

১৭. মেঘৱণ্ণাভযো নাম, ৰঞ্ঞো সব্বত্থ সাখকো;

সখা অমচ্চো কুজ্ঝিত্ৱা, মহাৱিহাৰনাসনে.

১৮. চোৰো হুত্ৱান মলযং, গন্ত্ৱা লদ্ধমহব্বলো;

খন্ধাৱাৰং নিৱেসেসি, দুৰতিস্সকৱাপিযং.

১৯. তত্ৰা’গতং তং সুত্ৱা, সহাযং সো মহীপতি;

যুদ্ধাহ পচ্চুগ্গন্ত্ৱান, খন্ধাৱাৰং নিৱেসযি.

২০. সাধুং পানঞ্চ মংসঞ্চ, লভিত্ৱা মলযাগতং;

‘‘ন সেৱিস্সং সহাযেন, ৱিনা ৰঞ্ঞা’’তি চিন্তিয.

২১. আদায তং সযংযেৱ, ৰত্তিং নিক্খম্ম এককো;

ৰঞ্ঞো সন্তিকমাগম্ম, তমত্থং পটিৱেদযি.

২২. তেনা’ভতং তেন সহ, ৱিস্সত্থো পৰিভুঞ্জিয;

‘‘কস্মা চোৰো অহু মে ত্ৱং, ‘‘ইতি ৰাজা অপুচ্ছিতং.

২৩. ‘‘তযা মহাৱিহাৰস্স, নাসিতত্তা’’তি অব্ৰুৱি;

‘‘ৱিহাৰং ৱাসযিস্সামি, খেমমেতং মমচ্চযং.

২৪. ইচ্ছেৱ মব্ৰৱী ৰাজা, ৰাজানং সো খমাপযি;

তেন সঞ্ঞাপিতো ৰাজা, নগৰংযেৱ আগমি.

২৫. ৰাজানং সঞ্ঞপেত্ৱা সো, মেঘৱণ্ণাভযো পন;

ৰঞ্ঞা সহ ন আগঞ্ছি, দব্বসম্ভাৰকাৰণা.

২৬. ৱলভা ভৰিযা ৰঞ্ঞো, একং লেখকধীতিকা;

মহাৱিহাৰনাসম্হি, দুক্খিতং তং ৱিনাসকং.

২৭. থেৰং মাৰাপযি কুদ্ধা, সংগহেত্ৱান ৱড্ঢকিং;

থূপাৰামং ৱিনাসেতুং, আগতং দুট্ঠমানসং.

২৮. মাৰাপেত্ৱা সঙ্ঘমিত্ত-ত্থেৰং দাৰুণকাৰকং;

সোণামচ্চদাৰণঞ্চ, ঘাতযিংসু অসঞ্ঞকা.

২৯. আনেত্ৱা দব্বসম্ভাৰং, মেঘৱণ্ণাভযো তু সো;

মহাৱিহাৰেনেকানি, পৰিৱেণানি কাৰযি.

৩০. অভযেনভযো তস্মিং, ৱূপসন্তে তু ভিক্খৱো;

মহাৱিহাৰং ৱাসেসুং, আগন্ত্ৱান ততো ততো.

৩১. ৰাজা মহাবোধিঘৰে, পচ্ছিমায দিসায তু;

কাৰেত্ৱা লোহৰূপানি, ঠপাপেসি দুৱে তু সো.

৩২. দক্খিণাৰামৱাসিম্হি, কুহকে জিম্হমানসে;

পসীদিত্ৱা পাপমিত্তে, তিস্সত্থেৰে অসঞ্ঞতে.

৩৩. মহাৱিহাৰসীমন্তে, উয্যানে জোতিনামকে;

জেতৱনৱিহাৰং সো, ৱাৰযন্তোপি কাৰযি.

৩৪. ততো সীমং সমুগ্ঘাতুং, ভিক্খুসঙ্ঘমযাচিসো;

অদাতুকামা তং ভিক্খূ, ৱিহাৰম্হা অপক্কমুং.

৩৫. ইধ সীমাসমুগ্ঘাতং, পৰেহি কৰিযমানকং;

কোপেতুং ভিক্খৱো কেচি, নিলীযিংসু তহিং তহিং.

৩৬. মহাৱিহাৰো নৱমাসে, এৱং ভিক্খূহি ৱজ্জিতো;

‘‘সমুগ্ঘাতং কৰিম্হা’’তি-পৰে ভিক্খূ অমঞ্ঞিসুং.

৩৭. ততো সীমাসমুগ্ঘাতে, ব্যাপাৰে পৰিনিট্ঠিতে;

মহাৱিহাৰং ৱাসেসুং, ইধাগন্ত্ৱান ভিক্খৱো.

৩৮. তস্স ৱিহাৰগাহিস্স, তিস্সত্থেৰস্স চোদনা;

অন্তিমৱত্থুনা আসি, ভূতত্থং সঙ্ঘমজ্ঝগা.

৩৯. ৱিনিচ্ছিয মহামচ্চো, তথা ধম্মিকসম্মতো;

উপ্পব্বাজেসি ধম্মেন, তং অনিচ্ছায ৰাজিনো.

৪০. সোযেৱ ৰাজা কাৰেসি, ৱিহাৰং মণিহীৰকং;

তযো ৱিহাৰে কাৰেসি, দেৱালযং ৱিনাসিয.

৪১. গোকণ্ণং এৰকাপিল্লং, কলন্দব্ৰাহ্মণগামকে;

মিগগামৱিহাৰঞ্চ, গঙ্গসেনকপব্বতং.

৪২. পচ্ছিমায দিসাযাথ, ধাতুসেনঞ্চ পব্বতং;

ৰাজা মহাৱিহাৰঞ্চ, কোকৱাতম্হি কাৰযি.

৪৩. ৰূপাৰম্মৱিহাৰঞ্চ, চূড়ৱিট্টঞ্চ কাৰযি;

উত্তৰাভযসৱ্হে চ, দুৱে ভিক্খূনুপস্সযে.

৪৪. কালৱেড়কযক্খস্স, ঠানে থূপঞ্চ কাৰযি;

দীপম্হি জিণ্ণকাৱাসে, বহূ চ পটিসঙ্খৰি.

৪৫. সঙ্ঘত্থেৰসহস্সস্স, সহস্সগ্ঘমদাসি সো;

থেৰদানঞ্চ সব্বেসং, অনুৱস্সঞ্চ চীৱৰং.

৪৬. অন্নপানাদিদানস্স, পৰিচ্ছেদো ন ৱিজ্জতি;

সুভিক্খত্থায কাৰেসি, সো’ৱ সোড়স ৱাপিযো.

৪৭. মণিহীৰমহাৱাপিং, জল্লুৰং খাণুনামকং;

মহামণিং কোকৱাতং, মোৰকপৰকৱাপিকং.

৪৮. কুব্বাহকং ৱাহকঞ্চ, ৰত্তমালকণ্ডকম্পি চ;

তিস্সৱড্ঢমানকঞ্চ, ৱেড়ঙ্গৱিট্ঠিকম্পি চ.

৪৯. মহাগল্লচীৰৱাপিং, মহাদাৰগল্লকম্পি চ;

কাড়পাসাণৱাপিঞ্চ, ইমা সোড়স ৱাপিযো.

৫০. গঙ্গায পব্বৱৱ্হংসো, মহামাতিঞ্চ কাৰযি;

এৱং পুঞ্ঞমপুঞ্ঞঞ্চ, সুবহুং সো উপাচিনীতি.

৫১. অসাধুসঙ্গমেনেৱং, যাৱজীৱং সুভাসুভং;

কত্ৱা গতো যথাকম্মং, সো মহাসেনভূপতি.

৫২. তস্মা অসাধুসংসগ্গং, আৰকা পৰিৱজ্জিয;

অহিং ৱা’সি ৱিসং খিপ্পং, কৰেয্য’ত্থহিতং বুধো.

৫৩. অহু ৰাজা সিৰিমেঘ-ৱণ্ণো তস্স সুতো ততো;

ৱন্ধাতা ৱিয লোকস্স, সব্বসম্পত্তিদাযকো.

৫৪. মহাসেনেন পাপানং, ৱসগেন ৱিনাসিতে;

মহাৱিহাৰে সব্বেপি, সন্নিপাতিয ভিক্খৱো.

৫৫. উপসঙ্কম্ম ৱন্দিত্ৱা, নিসিন্নো পুচ্ছি সাদৰো;

‘‘পিতৰা সঙ্ঘমিত্তস্স, সহাযেন ৱিনাসিতং.

৫৬. কিং কিমেৱা’’তি আহংসু, ভিক্খৱো তং নৰিস্সৰং;

‘‘সীমাযুগ্ঘাটনং কাতুং, ৱাযমিত্ৱাপি তে পিতা.

৫৭. নাসক্খি অন্তোসীমাযং, ভিক্খূনং ৱিজ্জমানতো;

ভূমিগব্ভনিলীনাহি, সত্তাসুং এত্থ ভিক্খৱো.

৫৮. অমচ্চো সোণামচ্চো চ, সঙ্ঘমিত্তো চ পাপিযো;

ৰাজানং সঞ্ঞাপেত্ৱান, অপুঞ্ঞং তেন কাৰযুং.

৫৯. ভিন্দিত্ৱা লোহপাসাদং, সত্তভূমকমুত্তমং;

ঘৰে নানপ্পকাৰে চ, ইতো’ভযগিৰিং নযুং.

৬০. মাসকে চতুবুদ্ধেহি, নিৱুত্থে চেতিযঙ্গণে;

ৱপাপেসুঞ্চ দুপ্পঞ্ঞা, পস্স বালসমাগমং’’.

৬১. তং সুত্ৱা পিতুকম্মং সো, নিব্বিন্নো বালসঙ্গমে;

পিতৰা নাসিতং তত্থ, সব্বং পাকতিকং অকা.

৬২. লোহপাসাদমগদো’ৱ, কাসি পাসাদমুত্তমং;

ৰঞ্ঞো মহাপনাদস্স, দস্সেন্তো ৱিয ভূতলে.

৬৩. পৰিৱেণানি সব্বানি, নাসিতানি নিৱেসযি;

ভোগে আৰামিকানঞ্চ, যথাঠানে ঠপেসি সো.

৬৪. পিতৰা পচ্চযানঞ্চ, পচ্ছিন্নত্তা ৱিবুদ্ধিনা;

ছিদ্দাৱাসং ঘনাৱাসং, ৱিহাৰং’কাসি বুদ্ধিমা.

৬৫. কাৰিতে পিতৰা জোতি ৱনেচে’সো ৱিহাৰকে;

কম্মং ৱিপ্পকতং সব্বং, নিট্ঠাপেসি নৰিস্সৰো.

৬৬. থেৰস্সা’থ মহিন্দস্স, সমণিন্দস্স সুনুনো;

সুত্ৱান মনুজিন্দো সো, পৱত্তিং সব্বমাদিতো.

৬৭. পসীদিত্ৱা গুণে তস্স, ৰাজা দিপ্পপসাদকে;

‘‘ইস্সৰো ৱত দীপস্স, থেৰো’’ ইতি ৱিচিন্তিয.

৬৮. পটিবিম্বং সুৱণ্ণস্স, কত্ৱা তম্মাণ নিস্সিতং;

পুব্বকত্তিকমাসস্স, পব্বপক্খে তু সত্তমে.

৬৯. দিনে নেত্ৱা চেতিযম্ব-থলে থেৰম্বসঞ্ঞিতে;

তত্ৰট্ঠমে নিৱাসেত্ৱা, ততো তু নৱমে পন.

৭০. মহাসেনং গহেত্ৱা সো, দেৱসেনা সমূপমং;

ওৰোধে নগৰে চেৱ, গেহৰক্খণকে ৱিনা.

৭১. লংকাদীপে চ সকলে, সব্বে আদায ভিক্খৱো;

ৱিস্সজ্জেত্ৱা মনুস্সে চ, নগৰে চাৰকট্ঠিতে.

৭২. পট্ঠপেত্ৱা মহাদানং, অযঞ্চাখিলপাণিনং;

পূজং সব্বোপহাৰেহি, কৰোন্তো চ অনূপমং.

৭৩. পচ্চুগ্গমনমেতস্স, দীপসত্থুস্স সত্থুনো;

ৱৰপুত্তস্স সো কত্ৱা, দেৱৰাজা’ৱ সত্থুনো.