ছত্তিংসতিম পৰিচ্ছেদ

তযোদস ৰাজকো

১. মহল্লনাগচ্চযেন, পুত্তো ভাতিকতিস্সকো;

চতুৱীসতিৱস্সানি, লংকাৰজ্জমকাৰযি.

২. মহাৱিহাৰে পাকাৰং, কাৰাপেসি সমন্ততো;

গৱৰতিস্সৱিহাৰং, সো কাৰযিত্ৱা মহীপতি.

৩. মহাগামণিকং ৱাপিং, ৱিহাৰস্স’স্স’দাসি চ;

ৱিহাৰঞ্চ অকাৰেসি, ভাতিযতিস্স নামকং.

৪. কাৰেসুপোসথাগাৰং, থূপাৰামে মনোৰমে;

ৰন্ধকণ্ডকৱাপিঞ্চ, কাৰাপেসি মহীপতি.

৫. সত্তেসু মুদুচিত্তোসো, সঙ্ঘম্হি তিব্বগাৰৱো;

উভতোসঙ্ঘে মহীপালো, মহাদানং পৱত্তযি.

৬. ভাতিকতিস্সচ্চযেন, তস্স কনিট্ঠতিস্সকো;

অট্ঠৱীসসমাৰজ্জং, লংকাদীপে অকাৰযি.

৭. ভূতাৰাম মহানাগ, থেৰস্মিং সো পসীদিয;

কাৰেসি ৰতনপাসাদং, অভযগিৰিম্হি সাধুকং.

৮. অভযগিৰিম্হি পাকাৰং, মহাপৰিৱেণমেৱ চ;

কাৰেসি মণিসোমৱ্হে, মহাপৰিৱেণমেৱ চ.

৯. তত্থেৱ চেতিযঘৰং, অম্বত্থলে তথেৱ চ;

কাৰেসি পটিসঙ্খাৰং, নাগদীপে ঘৰে পন.

১০. মহাৱিহাৰসীমংসো, মদ্দিত্ৱা তত্থ কাৰযি;

কুক্কুটগিৰি পৰিৱেণ, পন্তিং সক্কচ্চ ভূপতি.

১১. মহাৱিহাৰে কাৰেসি, দ্ৱাদস মনুজাধিপো;

মহাচতুৰস্সপাসাদে, দস্সনেয্যেমনোৰমে.

১২. দক্খিণৱিহাৰ থূপম্হি, কঞ্চুকঞ্চ অকাৰযি;

ভত্তসালং মহামেঘ, ৱনাসিমঞ্চ মদ্দিয.

১৩. মহাৱিহাৰপাকাৰং, পস্সতো অপনীযসো;

মগ্গং দক্খিণৱিহাৰ, গামিঞ্চাপি অকাৰযি.

১৪. ভূতাৰাম ৱিহাৰঞ্চ, ৰামগোণকমেৱ চ;

তথেৱ নন্দতিস্সস্স, আৰামঞ্চ অকাৰযি.

১৫. পাচিনতো অনুড়াতিস্স, পব্বতং গঙ্গৰাজিযং;

নিযেলতিস্সাৰামঞ্চ, পিড় পিট্ঠি ৱিহাৰকং.

১৬. ৰাজমহাৱিহাৰঞ্চ, কাৰেসি মনুজাধিপো;

সোযেৱ তীসু ঠানেসু, কাৰেসু’পোসথালযং.

১৭. কল্যাণীক ৱিহাৰে চ, মণ্ডলগিৰিকে তথা;

দুব্বলৱাপিতিস্সৱ্হে, ৱিহাৰেসু ইমেসু হি.

১৮. কনিট্ঠতিস্সচ্চযেন, তস্স পুত্তো অকাৰযি;

ৰজ্জং দ্ৱেযেৱ ৱস্সানি, চূড়নাগোতি ৱিস্সুতো.

১৯. চূড়নাগকনিট্ঠোতু, ৰাজাঘাতিয ভাতিকং;

একৱস্সং কুড্ডনাগো, ৰজ্জং লংকায কাৰযি.

২০. মহাপেড়ঞ্চ ৱড্ঢেসি, একনাড়িকছাতকে;

ভিক্খুসতানং পঞ্চন্নং, অব্ভোচ্ছিন্নং মহীপতি.

২১. কুড্ডনাগস্স ৰঞ্ঞো তু, দেৱীযা ভাতুকো তদা;

সেনাপতি সিৰিনাগো, চোৰো হুত্ৱান ৰাজিনো.

২২. বলৱাহন সম্পন্নো, আগম্ম নগৰন্তিকং;

ৰাজবলেন যুজ্ঝন্তো, কুড্ডনাগং মহীপতিং.

২৩. পলাপেত্ৱা লদ্ধজযো, অনুৰাধ পুৰে ৱৰে;

লংকাৰজ্জমকাৰেসি, ৱস্সানেকূনৱীসতি.

২৪. মহাথূপৱৰে ছত্তং, কাৰাপেত্ৱান ভূপতি;

সুৱণ্ণকম্মং কাৰেসি, দস্সনেয্যং মনোৰমং.

২৫. কাৰেসি লোহপাসাদং, সংখিত্তং পঞ্চভূমকং;

মহাবোধি চতুদ্ৱাৰে, সোপানং পুনকাৰযি.

২৬. কাৰেত্ৱা ছত্তপাসাদং, মহে পূজমকাৰযি;

কুলম্বণঞ্চ দীপস্মিং, ৱিস্সজ্জেসি দযাপৰো.

২৭. সিৰিনাগচ্চযে তস্স, পুত্তো তিস্সো অকাৰযি;

ৰজ্জং দ্ৱাৱীসৱস্সানি, ধম্মৱোহাৰ কোৱিদো.

২৮. ঠপেসি সো হি ৱোহাৰং, হিংসা মুত্তং যতোইধ;

ৱোহাৰক তিস্সৰাজা, ইতি নামং ততো অহু.

২৯. কম্বুগামকৱাসিস্স, দেৱত্থেৰস্স সন্তিকে;

ধম্মং সুত্ৱা পটিকম্মং, পঞ্চাৱাসে অকাৰযি.

৩০. মহাতিস্সস্স থেৰস্স, অনুৰা ৰামৱাসিনো;

পসন্নো মুচেলপট্টনে, দান ৱট্টমকাৰযি.

৩১. তিস্সৰাজ মণ্ডপঞ্চ, মহাৱিহাৰদ্ৱযেপি সো;

মহাবোধিঘৰে পাচি, লোহৰূপদ্ধযম্পি চ.

৩২. সত্তপণ্ণিকপাসাদং, কাৰেত্ৱা সুখৱাসকং;

মাসে মাসে সহস্সং সো, মহাৱিহাৰস্স দাপযি.

৩৩. অভযগিৰিৱিহাৰে, দক্খিণমূলসৱ্হযে;

মৰিচৱট্টি ৱিহাৰম্হি, কুলালিতিস্সসৱ্হযে.

৩৪. মহিযঙ্গণ ৱিহাৰম্হি, মহাগামকসৱ্হযে;

মহানাগতিস্সৱ্হম্হি, তথা কল্যাণীকৱ্হযে.

৩৫. ইতি অট্ঠসু থূপেসু, ছত্তকম্মমকাৰযি;

মূকনাগসেনাপতি, ৱিহাৰে দক্খিণে তথা.

৩৬. মৰিচ ৱট্টি ৱিহাৰম্হি, পুত্তভাগৱ্হযে তথা;

ইস্সৰসমণৱ্হম্হি, তিস্সৱ্হে নাগদীপকে.

৩৭. ইতি ছসু ৱিহাৰেসু, পাকাৰঞ্চ অকাৰযি;

কাৰেসু’ পোসথাগাৰং, অনুৰাৰামসৱ্হযে.

৩৮. অৰিযৱংসকথাঠানে, লংকাদীপেখিলেপি চ;

দান ৱট্টং ঠপাপেসি, সদ্ধম্মে গাৰৱেন সো.

৩৯. তিণী সতসহস্সানি, দত্ৱান মনুজাধিপো;

ইণতো সযিকে ভিক্খূ, মোচেসি সাসনপ্পিযো.

৪০. মহা ৱেসাখ পূজং সো, কাৰেত্ৱা দীপৱাসিনং;

সব্বে সংযেৱ ভিক্খূনং, তিচীৱৰমদাপযি.

৪১. ৱেতুল্লৱাদং মদ্দিত্ৱা, কাৰেত্ৱা পাপনিগ্গহং;

কপিলেন অমচ্চেন, সাসনং জোতযীচ সো.

৪২. ৱিস্সুতো’ভযনাগো’তি, কনিট্ঠো তস্সৰাজিনো;

দেৱিযা তস্স সংসট্ঠো, ঞাতো ভীতো সভাতৰা.

৪৩. পলাযিত্ৱা হল্লতিত্থং, গন্ত্ৱান সহসেৱকো;

কুদ্ধো ৱিয মাতুলস্স, হত্থপাদঞ্চ ছেদযি.

৪৪. ৰাজিনো ৰট্ঠতেদত্থং, ঠপেত্ৱান ইধেৱ তং;

সুনখোপমং দস্সযিত্ৱা, গহেত্ৱা’তি সিনিদ্ধকে.

৪৫. তত্থেৱ নাৱং আৰুয্হ, পৰতীৰমগাসযং;

সুভৱো মাতুলো তু, উপগম্ম মহীপতি.

৪৬. সুহদো ৱিয হুত্ৱান, তস্মিং ৰট্ঠমভিন্দিসো;

অভযো তং জাননত্থং, দূতং ইধ ৱিসজ্জযি.

৪৭. তং দিস্ৱা পূগৰুক্খং সো, সমন্তা কুন্তনাড়িযা;

পৰিব্ভমন্তো মদ্দিত্ৱা, কত্ৱা দুব্বলমূলকং.

৪৮. বাহুনাযেৱ পাতেত্ৱা, তজ্জেত্ৱা তং পলাপযি;

দূতো গন্ত্ৱা অভযস্স, তং পৱত্তিং পৱেদযি.

৪৯. ঞত্ৱা’ভযো তং দমিড়ে, আদায বসুকে ততো;

নগৰন্তিকমাগঞ্ছি, ভাতৰা সহ যুজ্ঝিতুং.

৫০. তং ঞত্ৱান পলাযিত্ৱা, অস্সমাৰুয্হদেৱিযা;

মলযং আগমা ৰাজা, তংকনিট্ঠো’নু বন্ধিয.

৫১. ৰাজানং মলযে হন্ত্ৱা, দেৱীমাদায আগতো;

কাৰেসি নগৰে ৰজ্জং, অট্ঠৱস্সানি ভূপতি.

৫২. পাসাণৱেদিং কাৰেসি, মহাবোধিসমন্ততো;

লোহপাসাদঙ্গণম্হি, ৰাজা মণ্ডপমেৱ চ.

৫৩. দ্ৱিহি সতসহস্সেহি, নেকৱত্থানি ভাগিয;

দীপম্হি ভিক্খুসঙ্ঘস্স, ৱত্থদানমদাসি সো.

৫৪. অভযস্স’চ্চযে ভাতু, তস্সস্স তস্স অত্ৰজো;

দ্ৱেৱস্সানি সিৰিনাগো, লংকাৰজ্জ মকাৰযি.

৫৫. পটিসঙ্খৰিয পাকাৰং, মহাবোধিসমন্ততো;

মহাবোধিঘৰস্সেৱ, সোযেৱ ৱালিকাতলে.

৫৬. মূচেলৰুক্খপৰতো, হংসৱট্টং মনোৰমং;

মহন্তং মণ্ডপঞ্চেৱ, কাৰাপেসি মহীপতি.

৫৭. ৱিজযকুমাৰকো নাম, সিৰিনাগস্স অত্ৰজো;

পিতুনো অচ্চযে ৰজ্জং, একৱস্সমকাৰযি.

৫৮. লম্বকণ্ণা তযো আসুং, সহাতা মহিযঙ্গণে;

সঙ্ঘতিস্সো সঙ্ঘবোধি, ততিযো গোট্ঠকাভযো.

৫৯. তে তিস্সৱাপিমৰিযাদ-গতো অন্ধো ৱিচক্খণো;

ৰাজুপট্ঠানমাযন্তে, পদসদ্দেন অব্ৰৱি.

৬০. ‘‘পথৱীসামিনো এতে, তযো ৱহতিভূ’ইতি;

তং সুত্ৱা অভযো পচ্ছা, যন্তো পুচ্ছি পুনাহসো.

৬১. তস্স ৱংসো ঠস্সতীতি,

পুন পুচ্ছিতমেৱ সো;

‘‘পচ্ছিমস্সা’’তি সো আহ,

তং সুত্ৱা দ্ৱীহিসোঅগা.

৬২. তে পুৰং পৱিসিত্ৱান, তযো ৰঞ্ঞো’তি ৱল্লভো;

ৰাজকিচ্চানি সাধেন্তা, ৱসন্তা ৰাজসন্তিকে.

৬৩. হন্ত্ৱা ৱিজযৰাজানং, ৰাজগেহম্হি একতো;

সেনাপতিংসঙ্ঘতিস্সং, দুৱেৰজ্জে’ভিসেচযুং.

৬৪. এৱং সো অভিসিত্তোৱ, অনুৰাধপুৰুত্তমে;

ৰজ্জং চত্তাৰি ৱস্সানি, সঙ্ঘতিস্সো অকাৰযি.

৬৫. মহাথূপম্হি ছত্তঞ্চ, হেমকম্মঞ্চ কাৰযি;

ৱিসুং সতসহস্সগ্ঘে, চতুৰো চ মহামণি.

৬৬. মজ্ঝে চতুন্নং সূৰিযানং, ঠপাপেসি মহীপতি;

থূপস্স মুদ্ধনি তথা-নগ্ঘৱজিৰচুম্বটং.

৬৭. সো ছত্তমহপূজায, সঙ্ঘস্স মনুজাধিপো;

চত্তালীসসহস্সস্স, ছ চীৱৰমদাপযি.

৬৮. তং মহাদেৱথেৰেন, দামগল্লক ৱাসিনো;

দেসিতং খন্ধকে সুত্তং, যাগানিসংস দীপনং.

৬৯. সুত্ৱা পসন্নো সঙ্ঘস্স, যাগুদানমদাপযি;

নগৰস্স চতুদ্ৱাৰে, সক্কচ্চঞ্চেৱ সাধু চ.

৭০. সো অন্তৰন্তৰে ৰাজা, জম্বুপক্কানি খাদিতুং;

সহোৰোধো সহামচ্চো, অগাপাচিন দীপকং.

৭১. উপদ্দুতং’স্স গমনে, মনুস্সা পাচি ৱাসিনো;

ৱিসং ফলেসু যো জেসুং, ৰাজভোজ্জায জম্বুযা.

৭২. খাদিত্ৱা জম্বুপক্কানি, তানি তত্থেৱ সো মতো;

সেনাপতি সঙ্ঘধবাধীং-ভযো ৰজ্জে’ভিসেচযি.

৭৩. ৰাজাসিৰি সঙ্ঘ বোধি, ৱিস্সুতো পঞ্চসীলৱা;

অনুৰাধপুৰে ৰজ্জং, দুৱে ৱস্সানি কাৰযি.