পঞ্চতিংসতিমপৰিচ্ছেদ

দ্ৱাদসৰাজকো

১. আমণ্ডগামণ্যভযো, মহাদাঠিকঅচ্চযে;

নৱৱস্সনট্ঠমাসে, ৰজ্জং কাৰেসি তং সুতো.

২. ছত্তাতি ছত্তং কাৰেসি, মহাথূপে মনোৰমে;

তথেৱ পাদৱেদিঞ্চ, মুদ্ধৱেদিঞ্চ কাৰযি.

৩. তথেৱ লোহপাসাদ, থূপৱ্হে পোসথৱ্হযে;

কাৰেসি কুচ্ছিআজিৰং, কুচ্ছিআড়িন্দমেৱ চ.

৪. উভযত্থাপি কাৰেসি, চাৰুং ৰতনপণ্ডপং;

ৰজতলেণ ৱিহাৰঞ্চ, কাৰাপেসি নৰাধিপে.

৫. মহাগামেণ্ডৱাপিংসো, পস্সে কাৰিয দক্খিণে;

দক্খিণস্স ৱিহাৰস্স, অদাসি পুঞ্ঞদক্খিণো.

৬. মাঘাতং সকলে দীপে, কাৰেসি মনুজাধিপো;

ৱল্লিফলানি সব্বানি, ৰোপাপেত্ৱা তহিং তহিং.

৭. মং সকুভণ্ডকং নাম, আমণ্ডিয মহীপতি;

পত্তং পূৰাপযিত্ৱান, কাৰেত্ৱা ৱত্থচুম্বটং.

৮. দাপেসি সব্বসঙ্ঘস্স, ৱিপ্পসন্নেন চেতসা;

পত্তে পূৰাপযিত্ৱা সো, আমণ্ড গামণিৱিদূ.

৯. তঙ্কনিট্ঠোকণিৰাজা-তিস্সো ঘাতিয তাতৰং;

তীণি ৱস্সানি নগৰে, ৰজ্জং কাৰেসি খত্তিযো.

১০. উপোসথঘৰট্টং এসা, নিচ্ছিনি চেকিযৱ্হযে;

ৰাজাপৰাধকম্মম্হি, পুত্তে সট্ঠিতু ভিক্খৱো.

১১. সহোড্ডে গাহযিত্ৱান, ৰাজা চেতিয পব্বতে;

খিপাপেসি কণিৰৱ্হে, পব্ভাৰম্হি অসীলকে.

১২. কণিৰাজা অচ্চযেন, আমণ্ডগামণি সুতো;

চূড়াভযো ৱস্সমেকং, ৰজ্জং কাৰেসি খত্তিযো.

১৩. সো গোণকনদীতীৰে, পুৰপস্সম্হি দক্খিণে;

কাৰাপেসি মহীপালো, ৱিহাৰে চূড়গল্লকং.

১৪. চূড়াভযস্স’চ্চ যেন, সীৱলি তং কনিট্ঠিকা;

আমণ্ডধীতা চতুৰো, মাসে ৰজ্জমকাৰযি.

১৫. আমণ্ড ভাগিনেয্যা তু, সীৱলিং অপনীযতং;

ইড়নাগোতি নামেন, ছত্তং উস্সাপযি পুৰে.

১৬. তিস্সৱাপিং গতে তস্মিং, আদিৱস্সে নৰাধিপে;

তং হিত্ৱা পুৰমাগঞ্ছুং, বহৱোলম্বকণ্ণকা.

১৭. তহিং অদিস্ৱা তে ৰাজা, কুদ্ধো তেহি অকাৰযি;

মদ্দযং ৱাপিযা পস্সে, মহাথূপঞ্জসংসযং.

১৮. তেসং ৱিচাৰকে কত্ৱা, চণ্ডালে চ ঠপাপযি;

তেন কুদ্ধালম্বকণ্ণা, সব্বে হুত্ৱান একতো.

১৯. ৰাজানং তং গহেত্ৱান, ৰুন্ধিত্ৱান সকে ঘৰে;

সযং ৰজ্জং ৱিচাৰেসুং, ৰঞ্ঞো দেৱী তদা সকং.

২০. পুত্তং চন্দমুখসিৱং, মণ্ডযিত্ৱা কুমাৰকং;

দত্ৱান হত্থে ধাতীনং, মঙ্গলহত্থি সন্তিকে.

২১. পেসেসি ৱত্ৱা সন্দেসং, নেত্ৱা তং ধাতিযো তহিং;

ৱদিংসু দেৱিসন্দেসং, সব্বং মঙ্গল হত্থিনো.

২২. ‘‘অযং তে সাধিনো পুত্তো,

সামিকো চাৰকে ঠিতো;

অৰিহি ঘাততো সেসো,

তযা ঘাতো ইমস্স তু.

২৩. ত্ৱমেনং কিৰ ঘাতেহি, ইদং দেৱিৱচো’’ইতি;

ৱত্ৱা তু সযাপেসুং, পাদমূলম্হি হত্থিনো.

২৪. দুক্খিতো সো ৰুদিত্ৱান, নাগো ভেত্ৱান আড়কং;

পৱিসিত্ৱা মহাৱত্থুং, দ্ৱাৰং পাতিয থামসা.

২৫. ৰঞ্ঞো নিসিন্নঙ্গণম্হি, উগ্ঘাটেত্ৱা কৱাটকং;

নিসীদাপিয তং খন্ধে, মহাতিত্থমুপাগমি.

২৬. নাৱং আৰো পযিত্ৱান, ৰাজানং তত্থ কুঞ্জৰো;

পচ্ছিমো দধিতীৰেন, সযং মলয মাৰুহী.

২৭. পৰতীৰে ৱসিত্ৱা সো, তীণিৱস্সানি খত্তিযো;

বলকাযং গহেত্ৱান, আগা নাৱাতি ৰোহণং.

২৮. তিত্থে সক্খৰসোব্ভম্হি, ওতৰিত্ৱান ভূপতি;

অকাসি ৰোহণে তত্থ, মহন্তং বলসঙ্গহং.

২৯. ৰঞ্ঞো মঙ্গলহত্থিসো, দক্খিণং মলযং ততো;

ৰোহণংযে’ৱুপাগঞ্ছি, তস্স কম্মানি কাতৱে.

৩০. মহাপদুমনামস্স, তত্থ জাতকভাণিনো;

তুলাধাৰৱ্হৱাসিস্স, মহাথেৰস্স সন্তিকে.

৩১. কপিজাতকং সুত্ৱান, বোধিসত্তে পসাদৱা;

নাগমহাৱিহাৰং সো, জিযামুত্তধনুস্সতং.

৩২. কত্ৱা কাৰেসি থূপঞ্চ, ৱড্ঢাপেসি যথাঠিতং;

তিস্সৱাপিঞ্চ কাৰেসি, তথা দুৰৱ্হৱাপিকং.

৩৩. সো গহেত্ৱা বলং ৰাজা, যুদ্ধায অভিনিক্খমি;

তং সুত্ৱা লম্বকণ্ণা চ, যুদ্ধায অভিসংযুতা.

৩৪. পপল্লক্খন্ধদ্ৱাৰম্হি, খেত্তে হিঙ্কৰৱাপিকে;

যুদ্ধং উভিন্নং ৱত্তিত্থ, অঞ্ঞমঞ্ঞৱিহেসনং.

৩৫. নাৱাকিলন্তদেহত্তা, পোসা সীদন্তি ৰাজিনো;

ৰাজা নামং সাৱযিত্ৱা, সযং পাৱিসি তেন সো.

৩৬. তেন ভীতালম্বকণ্ণা, সযিংসু উদৰেন সো;

তেসং সীসানি ছিন্দিত্ৱা, ৰতনাভিসমংকৰি.

৩৭. তিক্খত্তুমেৱন্তুকতে, কৰুণায মহীপতি;

‘‘অমাৰেত্ৱা’ৱ গণ্হাথ, জীৱগ্গাহ’ন্তি অব্ৰুৱি.

৩৮. ততো ৱিজিতসঙ্গামো, পুৰং আগম্ম ভূপতি;

ছত্তং উস্সাপযিত্ৱান তিস্সৱাপি ছণং অগা.

৩৯. জলকীড়ায উগ্গন্ত্ৱা, সুমণ্ডিতপসাধিতো;

অত্তনো সিৰিসম্পত্তিং, দিস্ৱা তস্সন্তৰাযিকে.

৪০. লম্বকণ্ণে সৰিত্ৱান, কুদ্ধো সো যোজযীৰথে;

যুগপৰম্পৰা তেসং, পুৰতো পাৱিসী পুৰং.

৪১. মহাৱত্থুস্স উম্মাৰে, ঠত্ৱা ৰাজাণপেসি সো;

‘‘ইমেসং সীসমুম্মাৰে, অস্মিং ছিন্দথ ভো’’ইতি.

৪২. গোণা এতেৰথে যুত্তা, তৱ হোন্তি ৰথেসভ;

সিঙ্গংখুৰঞ্চ এতেসং, ছেদাপযত ভো’’ইতি.

৪৩. মাতুযা অথ সঞ্ঞত্তো, সীসচ্ছেদং নিৱাৰিয;

নাসঞ্চ পাদঙ্গুট্ঠঞ্চ, তেসং ৰাজা অছেদযি.

৪৪. হত্থিৱুত্থং জনপদং, অদা হত্থিস্স খত্তিযো;

হত্থিভোগো জনপদো, ইতি তেনাসি নামতো.

৪৫. এৱং অনুৰাধপুৰে, ইড়ানাগো মহীপতি;

ছব্বস্সানি অনুনানি, ৰজ্জং কাৰেসি খত্তিযো.

৪৬. ইড়নাগচ্চযে তস্স, পুত্তো চন্দমুখোসিৱো;

অট্ঠৱস্সং সত্তমাসং, ৰাজা ৰজ্জমকাৰযি.

৪৭. মণিকাৰগামে ৱাপি, কাৰাপেত্ৱা মহীপতি;

ইস্সৰসমণৱ্হস্স, ৱিহাৰস্স অদাসি সো.

৪৮. তস্স ৰঞ্ঞো মহেসী চ, সঙ্গামে পত্তিমত্তনো;

তস্সেৱা’দা ৱিহাৰস্স, দমিড়দেৱীতি ৱিস্সুতা.

৪৯. তং তিস্সৱাপী কীড়ায, হন্ত্ৱা চন্দমুখং সিৱং;

যসড়ালকতিস্সো’তি, ৱিস্সুতো তঙ্কনিট্ঠকো.

৫০. অনুৰাধপুৰে ৰম্মে, লঙ্কাভুৱদনে সুভে;

সত্তৱস্সানট্ঠমাসে, ৰাজা ৰজ্জমকাৰযি.

৫১. দোৱিৰিকস্স দত্তস্স, পুত্থো দোৱাৰিকো সযং;

ৰঞ্ঞো সদিসৰূপেন, অহোসি সুভনামৱা.

৫২. সুভং বলত্থং তং ৰাজা, ৰাজভূসায ভূসিয;

নিসিদাপিয পল্লঙ্কে, হাসত্থং যসড়ালকো.

৫৩. সীসচোড়ং বলত্থস্স, সসীসে পটিমুঞ্চিয;

যট্ঠিং গহেত্ৱা হত্থেন, দ্ৱাৰমূলে ঠিতো সযং.

৫৪. ৱন্দন্তেসু অমচ্চেসু, নিসিন্নং আসনম্হি তং;

ৰাজা হসতি এৱং সো, কুৰুতে অন্তৰন্তৰা.

৫৫. ‘‘বলত্থো একদিৱসং, ৰাজানং হসমানকং;

অযং বলত্থো কস্মা মে, সম্মুখাহসতী’’তি সো.

৫৬. মাৰাপযিত্ৱা ৰাজানং, বলত্থো সো সুভো ইধ;

ৰজ্জং কাৰেসি ছব্বস্সং, সুভৰাজাতি ৱিস্সুতো.

৫৭. দ্ৱিসু মহাৱিহাৰেসু, সুভৰাজা মনোৰমং;

পৰিৱেণপন্তিং সুভ-নামকংযেৱ কাৰযি.

৫৮. উৰুৱেলসমীপম্হি, তথা ৱেল্লিৱিহাৰকং;

পুৰত্থিমে একদ্ৱাৰং, গঙ্গন্তে নন্দিগামকং.

৫৯. লম্বকণ্ণসুতো একো, উত্তৰপস্সৱাসিকো;

সেনাপতিমুপট্ঠাসি, ৱসভো নাম মাতুলং.

৬০. হেস্সতি ৱসভো নাম, ৰাজা’তি সুতিযাসদা;

ঘাতেতি ৰাজাদীপম্হি, সব্বে ৱসভনামকে.

৬১. ‘‘ৰঞ্ঞো দস্সাম ৱসতং, ইম’’ন্তি ভৰিযায সো;

সেনাপতিমন্তযিত্ৱা, পাতো ৰাজকুলং অগা.

৬২. গচ্ছতো তেন সহসা, তম্বুলং চুণ্ণৱজ্জিতং;

হত্থম্হি ৱসভস্সা’দা, তং সাধু পৰিৰক্খিতুং.

৬৩. ৰাজগেহস্স দ্ৱাৰম্হি, তম্বুলং চুণ্ণৱজ্জিতং;

সেনাপতি উদিক্খিত্ৱা, তং চুণ্ণত্থং ৱিসজ্জযি.

৬৪. সেনাপতিস্স ভৰিযা, চুণ্ণত্থং ৱসভং গতং;

ৱত্ৱা ৰহস্সং দত্ৱা চ, সহস্সং তং পলাপযি.

৬৫. মহাৱিহাৰঠানং সো, গন্ত্ৱান ৱসভো পন;

তত্থ থেৰেহি খিৰন্ন-ৱত্থেহি কতসঙ্গহো.

৬৬. ততো পৰং কুট্ঠিনো চ, ৰাজভাৱায নিচ্ছিতং;

সুত্ৱান ৱচনংহট্ঠো, ‘‘চোৰো হেস্স’’ন্তি নিচ্ছিতো.

৬৭. লদ্ধসমত্থপুৰিসে, গামঘাতং ততো পৰং;

কৰোন্তো ৰোহণং গন্ত্ৱা, কপল্লপুৱোপদেসতো.

৬৮. কমেন ৰট্ঠং কণ্হন্থো, সম্পত্তবলৱাহনো;

সো ৰাজা দ্ৱীহি ৱস্সেহি, আগম্ম পুৰসন্তিকং.

৬৯. সুভৰাজং ৰণে হন্ত্ৱা, ৱসভো সো মহব্বলো;

উস্সাপযি পুৰেভত্তং, মাতুলো’পি ৰণে পতি.

৭০. তং মাতুলস্স সৰিৰং, পুব্বভূতোপকাৰিকং;

অকাসি ৱসভো ৰাজা, মহেসিং মেত্তনামিকং.

৭১. সোহোৰপাঠকং পুচ্ছি, আযুপ্পমাণমত্তনো;

‘‘আহ দ্ৱাদসৱস্সানি’’, ৰহোযেৱস্স সোপি চ.

৭২. ৰহস্সং ৰক্খণত্থায, সহস্সং তস্সা দাপিয;

সঙ্ঘং সো সন্নিপাতেত্ৱা, ৱন্দিত্ৱা পুচ্ছি ভূপতি.

৭৩. ‘‘সিযানু ভন্তে আযুস্স, ৱড্ঢনকাৰণং’’ইতি;

‘‘অত্থী’’তি সঙ্ঘো আচিক্খি, অন্তৰাযৱিমোচনং.