চতুত্তিংসতিম পৰিচ্ছেদ

একাদসৰাজদীপনো

১. তদচ্চযে মহাচূলী-মহাতিস্সো অকাৰযি;

ৰজ্জং চুদ্দসৱস্সানি, ধম্মেন চ সমেন চ.

২. সহত্থেন কতং দানং, সো সুত্ৱান মহপ্ফলং;

পঠমেযেৱ ৱস্সম্হি, গন্ত্ৱা অঞ্ঞাতৱেসৱা.

৩. কত্ৱান সালিলৱনং, লদ্ধায ভতিযা ততো;

পিণ্ডপাতং মহাসুম্ম-থেৰস্সা’দা মহীপতি.

৪. সোণ্ণগিৰিম্হি পুন সো, তীণিৱস্সানি খত্তিযো;

গুড়যন্তম্হি কত্ৱান, ভতিংলদ্ধা গুড়ে ততো.

৫. তে গুড়ে আহৰাপেত্ৱা, পুৰং আগম্ম ভূপতি;

ভিক্খুসঙ্ঘস্স পাদাসি, মহাদানং মহীপতি.

৬. তিংসভিক্খুসহস্সস্স, অদা অচ্ছাদনানি চ;

দ্ৱাদসন্নং সহস্সানং, ভিক্খূনীনং তথেৱ চ.

৭. কাৰযিত্ৱা মহীপালো, ৱিহাৰং সুপ্পতিট্ঠিতং;

সট্ঠিভিক্খু সহস্সস্স, তিচীৱৰমদাপযি.

৮. তিংস সহস্স সঙ্খানং, ভিক্খুনীনঞ্চ দাপযি;

মণ্ডৱাপি ৱিহাৰং সো, তথা অভযগল্লকং.

৯. ৱঙ্গুপট্টঙ্গগল্লঞ্চ, দীঘবাহুকগল্লকং;

ৱালগাম ৱিহাৰঞ্চ, ৰাজা সোযেৱ কাৰযি.

১০. এৱং সদ্ধায সো ৰাজা, কত্ৱা পুঞ্ঞানিনেকধা;

চতুদ্দসন্নং ৱস্সানং, অচ্চযেন দিৱং অগা.

১১. ৱট্টগামণিনো পুত্তো, চোৰনাগোতি ৱিস্সুতো;

মহাচূড়িস্সৰজ্জম্হি, চোৰো হুত্ৱা চৰিতদা.

১২. মহাচূড়ে উপৰতে, ৰজ্জং কাৰযি আগতো;

অত্তনো চোৰকালে সো, নিৱাসং যেসুনালভি.

১৩. অট্ঠৰসৱিহাৰে তে, ৱিদ্ধংসাপেসি দুম্মতি;

ৰজ্জং দ্ৱাদসৱস্সানি, চোৰনাগো অকাৰযি.

১৪. লোকন্তৰিক নিৰযং, পাপোসোউপপজ্জথ;

তদচ্চযে মহাচূড়্হি-ৰঞ্ঞো পুত্তো অকাৰযি.

১৫. ৰজ্জং তীণেৱ ৱস্সানি, ৰাজাতিস্সো’তি ৱিস্সুতো;

চোৰনাগস্স দেৱীতু, ৱীসমং ৱীসমানুলা.

১৬. ৱীসং দত্ৱান মাৰেসি, বলত্থেৰত্তমানসা;

তস্মিংযেৱবলত্থেসা, অনুলাৰত্তমানসা.

১৭. তিস্সং ৱীসেনঘাতেত্ৱা, তস্স ৰজ্জমদাসিসা;

সীৱো নাম বলত্থোসো, জেট্ঠদোৱাৰিকো তহিং.

১৮. কত্ৱা মহেসিং অনুলং, ৱস্সং মাসদ্ৱযা’চিকং;

ৰজ্জং কাৰেসি নগৰে, ৱটুকে দমিড়ে’নুলা.

১৯. ৰত্তা ৱীসেন তং হন্ত্ৱা, ৱটুকে ৰজ্জমপ্পযি;

ৱটুকো দমিড়ো সো হি, পুৰে নগৰৱড্ঢকী.

২০. মহেসিং অনুলং কত্ৱা, ৱস্সং মাসদ্ৱযাধিকং;

ৰজ্জং কাৰেসি নগৰে, অনুলা তত্থ আগতং.

২১. পস্সিত্ৱা দাৰুভতিকং, তস্মিং সাৰত্তমানসা;

হন্ত্ৱা ৱিসেন ৱটুকং, তস্স ৰজ্জং সমপ্পযি.

২২. দাৰুভতিকতিস্সো সো, মহেসিং কৰিযানুলং;

একমাসাধিকং ৱস্সং, পুৰে ৰজ্জমকাৰযি.

২৩. কাৰেসি সো পোক্খৰণিং, মহামেঘৱনে লহুং;

নিলীযে নাম দমিড়ে, সা পুৰোহিতব্ৰাহ্মণে.

২৪. ৰাগেন ৰত্তা অনুলা, তেন সংৱাসকামিনী;

দাৰুভতিকতিস্সংতং, ৱীসং দত্ৱান ঘাতিয.

২৫. নিলীযস্স অদা ৰজ্জং, সোপি নিলীযব্ৰাহ্মণো;

তং মহেসিং কৰিত্ৱান, নিচ্চং তায উপট্ঠিতো.

২৬. ৰজ্জং কাৰেসি ছম্মাসং, অনুৰাধপুৰে ইধ;

দ্ৱত্তিংসায বলত্থেহি, ৱত্থুকামা যথাৰুচিং.

২৭. ৱীসেন তং ঘাতযিত্ৱা, নিলীযং খত্তিযানুলা;

ৰজ্জং সা অনুলাদেৱী, চতুমাসমকাৰযি.

২৮. মহাচূড়িকৰাজস্স, পুত্তো দুতিযকো পন;

কূটকণ্ণতিস্সো নাম, ভীতো সো’নুলদেৱিযা.

২৯. পলাযিত্ৱা পব্বজিত্ৱা, কালে পত্তবলো ইধ;

আগন্ত্ৱা ঘাতযিত্ৱা, তং অনুলং দুট্ঠমানসং.

৩০. ৰজ্জং কাৰেসি দ্ৱাৱীসং, ৱস্সানি মনুজাধিপো;

মহাউপোসথাগাৰং, অকা চেতিযপব্বতে.

৩১. ঘৰস্স তস্স পুৰতো, সিলাথূপমকাৰযি;

বোধিং ৰোপেসি তত্থেৱ, সোৱ চেতিযেপব্বতে.

৩২. পেলগামৱিহাৰঞ্চ, অন্তৰগঙ্গায কাৰযি;

তত্থেৱ ৱণ্ণকং নাম, মহামাতিকমেৱ চ.

৩৩. অম্বদুগ্গমহাৱাপিং, ভযোলুপ্পলমেৱ চ;

সত্তহত্থুচ্চপাকাৰং, পুৰস্স পৰিখং তথা.

৩৪. মহাৱত্থুম্হি অনুলং, ঝাপযিত্ৱা অসঞ্ঞতং;

অপনীয ততো থোকং, মহাৱত্থুমকাৰযি.

৩৫. পদুমস্সৰৱনুয্যানং, নগৰেযেৱ কাৰযি;

মতা’স্স দন্তে ধোৱিত্ৱা, পব্বজি জিনসাসনে.

৩৬. কুলসন্তকে ঘৰট্ঠানে, মাতুভিক্খুনুপস্সযং;

কাৰেসি দন্তগেহন্তি, ৱিস্সতো আসি তেন সো.

৩৭. তদচ্চযে তস্স পুত্তো, নামকো ভাতিকাভযো;

অট্ঠৱীসতিৱস্সানি, ৰজ্জং কাৰেসি খত্তিযো.

৩৮. মহাদাট্ঠিকৰাজস্স, ভাতিকত্তামহীপতি;

দীপে ‘‘ভাতিকৰাজা’’তি, পাকটো আসি ধম্মিকো.

৩৯. কাৰেসি লোহপাসাদে, পটিসঙ্খাৰমেত্থসো;

মহাথূপে ৱেদিকা দ্ৱে, থূপৱ্হে’পোসথৱ্হযং.

৪০. অত্তনো বলিমুজ্ঝিত্ৱা, নগৰস্স সমন্ততো;

ৰোপাপেত্ৱা যোজনম্হি, সুমনান’জ্জুকানি চ.

৪১. পাদৱেচিকতো যাৱ, ধুৰচ্ছত্তানৰাধিপো;

চতুৰঙ্গলবহলেন, গন্ধেন উৰুচেতিযং.

৪২. লিম্পাপেত্ৱান পুপ্ফানি, ৱণ্টেহি তত্থ সাধুকং;

নিৱেসিত্ৱান কোৰেসি, থূপং মালাগুলোপমং.

৪৩. পুনদ্ৱঙ্গুলবহলায, মনোসিলায চেতিযং;

লিম্পাপেত্ৱান কাৰেসি, তথেৱ কুসুমাচিতং.

৪৪. পুন সোপানতো যাৱ, ধুৰচ্ছত্তাৱ চেতিযং;

পুপ্ফেহি ওকিৰাপেত্ৱা, ছাদেসি পুপ্ফৰাসিনো.

৪৫. উট্ঠাপেত্ৱান যন্তেহি, জলং অভযৱাপিতো;

জলেহি থূপং সেৱন্তো, বলপূজমকাৰযি.

৪৬. সকটসতেন মুত্তানং, সদ্ধিং তেলেন সাধুকং;

মদ্দাপেত্ৱা সুধাপিণ্ডং, সুধাকম্মমকাৰযি.

৪৭. পৱালজালং কাৰেত্ৱা, তং খিপাপিয চেতিযে;

সোৱণ্ণানি পদুমানি, চক্কমত্তানি সন্ধিসু.

৪৮. লগ্গাপেত্ৱা ততো মুত্তা-কলাপে যাৱ হেট্ঠিমা;

পদুমা’লম্বযিত্ৱান, মহাথূপমপূজযি.

৪৯. গণসজ্ঝাযসদ্দং সো, ধাতুগব্ভম্হিতাদিনি;

সুত্ৱা ‘‘অদিস্ৱা তংনা’হং, ৱুট্ঠহিস্সন্তি নিচ্ছিতো.

৫০. পাচিনাদিকমূলম্হি, অনাহাৰো নিপজ্জথ;

থেৰা দ্ৱাৰং মাপযিত্ৱা, ধাতুগব্ভং নযিংসু তং.

৫১. ধাতুগব্ভৱিভূতিংসো, সব্বং দিস্ৱা মহীপতি;

নিক্খন্তো তাদিসেহেৱ, পোত্থৰূপেহি পূজযি.

৫২. মধুগন্ধেহি গন্ধেহি, ঘটেহি সৰসেহি চ;

অঞ্জনহৰিতালেহি, তথামনোসিলাহি চ.

৫৩. মনোসিলাসু ৱস্সেন, ভস্সিত্ৱা চেতিযঙ্গণে;

ঠিতাসু গোপ্ফমত্তাসু, ৰচিতে পু’প্পলেহি চ.

৫৪. থূপঙ্গণম্হি সকলে, পুৰিতে গন্ধকদ্দমে;

চিত্তকিলঞ্জছিদ্দেসু, ৰচিতে পু’প্পলেহি চ.

৫৫. ৱাৰযিত্ৱা ৱাৰিমগ্গং, তথেৱ পুৰিতে ঘটে;

দীপৱট্টিহি নেকানি, কতৱট্টিসিখাহি চ.

৫৬. মধুকতেলম্হি তথা, তিলতেলে তথেৱ চ;

তথেৱ পট্টৱট্টীনং, সু বহূহি সিখাহি চ.

৫৭. যথাৱুত্তেহি এতেহি, মহাথূপস্স খত্তিযো;

সত্তক্খত্তুং সত্তক্খত্তুং, পূজা’কাসি ৱিসুং ৱিসুং.

৫৮. অনুৱস্সঞ্চ নিযতং, সুধামঙ্গলমুত্তমং;

বোধিসিনানপূজা চ, তথেৱ উৰুবোধিযা.

৫৯. মহাৱেসাখ পূজা চ, উড়াৰা অট্ঠৱীসতি;

চতুৰাসীতি সহস্সানি, পূজা চ অনুড়াৰিকা.

৬০. ৱিৱিধং নটনচ্চঞ্চ, নানাতূৰিযৱাদিতং;

মহাথূপে মহাপূজং, সদ্ধানুন্নো অকাৰযি.

৬১. দিৱসস্স চ তিক্খত্তুং, বুদ্ধুপ্পট্ঠানমাগমা;

দ্ৱিক্খত্তুং, পুপ্ফভেৰিঞ্চ, নিযতং সো অকাৰযি.

৬২. নিযতঞ্চনদানঞ্চ, পৱাৰণাদানমেৱ চ;

তেলফাণিতৱত্থাদি-পৰিক্খাৰং সমণাৰহং.

৬৩. বহুং পাদাসি সঙ্ঘস্স, চেতিযখেত্তমেৱ চ;

চেতিযে পৰিকম্মত্থং, অদাসি তত্থ খত্তিযো.

৬৪. সদা ভিক্খুসহস্সস্স, ৱিহাৰে চেতিযপব্বতে;

সলাকৱত্তভত্তঞ্চ, সো দাপেসি চ ভূপতি.

৬৫. চিন্তামণিমুচেলৱ্হে, উপট্ঠানত্তযে চ সো;

তথা পদুমঘৰে ছত্ত-পাসাদে চ মনোৰমে.

৬৬. ভোজেন্তো পঞ্চঠানম্হি, ভিক্খূগন্থধুৰে যুতে;

পচ্চযেহি উপট্ঠাসি, সদা ধম্মে সগাৰৱো.

৬৭. পোৰাণৰাজনিযাতং, যংকিঞ্চি সাসনস্সিতং;

অকাসি পুঞ্ঞকম্মংসো, সব্বং ভাতিকভূপতি.

৬৮. তস্স ভাভকৰাজস্স, অচ্চযে তং কনিট্ঠকো;

মহাদাঠিমহানাগ-নামো ৰজ্জমকাৰযি.

৬৯. দ্ৱাদসংযেৱ ৱস্সানি, নানাপুঞ্ঞপৰাযনো;

মহাথূপম্হি কিঞ্জক্খ- পাসাণে অত্থৰাপযি.

৭০. ৱালিকামৰিযাদঞ্চ, কাৰেসি ৱিত্থতঙ্গণং;

দীপে সব্বৱিহাৰেসু, ধম্মাসনমদাপযি.

৭১. অম্বত্থল মহাথূপং, কাৰাপেসি মহীপতি;

চ যেঅনিট্ঠমানম্হি, সৰিত্ৱা মুনিনো গুণং.

৭২. চজিত্ৱান সকং পাণং, নিপজ্জিত্ৱা সযং তহিং;

ঠপযিত্ৱা চযং তস্স, নিট্ঠাপেত্ৱান চেতিযং.

৭৩. চতুদ্ৱাৰে ঠপাপেসি, চতুৰো ৰতনগ্ঘিকে;

সুসিপ্পিকেহি সুৱিভত্তে, নানাৰতনজোতিতে.

৭৪. চেতিযে পটিমোচেত্ৱা, নানাৰতনকঞ্চুকং;

কঞ্চন বুব্বুলঞ্চেত্থ, মুত্তোলম্বঞ্চ দাপযি.