তেত্তিংসতিম পৰিচ্ছেদ

দসৰাজকো

১. দুট্ঠগামণিৰঞ্ঞো তু, ৰজ্জেঠিতা জনা অহূ;

সালিৰাজকুমাৰোতি, হস্সাসি ৱিস্সুতো সুতো.

২. অতীৱ ধঞ্ঞো সো আসি, পুঞ্ঞকম্মৰতো সদা;

অতীৱ চাৰুৰুপায, সত্তো চণ্ডালিযা অহু.

৩. অসোকমালাদেৱিংতং, সম্বন্ধং পুব্বজাতিযা;

ৰূপেনা’তি পিযাযন্তো, সো ৰজ্জং নেৱকামযি.

৪. দুট্ঠগামণিভাতা’সো, সদ্ধাতিস্সো তদচ্ছযে;

ৰজ্জং কাৰেস্সা’ভিসিত্তো, অট্ঠাৰস্স সমা’সমো.

৫. ছক্ককম্মং সুধাকম্মং, হত্থিপাকাৰমেৱ চ;

মহাথূপস্স কাৰেসি, সো সদ্ধাকতনামকো.

৬. দীপেন লোহপাসাদো, উড্ডিয্হিত্থ সুসঙ্খতো;

কাৰেসি লোহপাসাদং, পুন সো সত্তভূমকং.

৭. নৱুতিসতসহস্সগ্ঘো, পাসাদো আসি সো তদা;

দক্খিণগীৰিৱিহাৰং, কল্লকলেণ মেৱ চ.

৮. কুড়ুম্বালৱিহাৰঞ্চ, তথাপেত্তঙ্গ ৱালিকং;

ৱেলঙ্গৱট্টিকঞ্চেৱ, দুব্বলৱাপিতিস্সতং.

৯. দুৰতিস্সকৱাপিঞ্চ, তথামাতুৱিহাৰকং;

কাৰেসি আদীঘৱাপিং, ৱিহাৰংযোজন যোজনে.

১০. দীঘৱাপিৱিহাৰঞ্চ, কাৰেসি সহচেতিযং;

নানাৰতনকচ্ছন্নং, তত্থ কাৰেসি চেতিযে.

১১. সন্ধিযং সন্ধিযং তত্থ, ৰথচক্কপ্পমাণকং;

সোৱণ্ণমালং কাৰেত্ৱা, লগ্গাপেসি মনোৰমং.

১২. চতুৰাসীতিসহস্সানং, ধম্মক্খন্ধানমিস্সৰো;

চতুৰাসীতিসহস্সানি, পূজাচাপি অকাৰযি.

১৩. এৱং পুঞ্ঞানি কত্ৱা সো, অনেকানি মহীপতি;

কাযস্সভেদা দেৱেসু, তুসিতেসু’পপজ্জথ.

১৪. সদ্ধাতিস্সপকাৰাজে, ৱসন্তে দীঘৱাপিযং;

লজ্জীতিস্সো জেট্ঠসুতো, গিৰিকুম্ভিমনামকং.

১৫. ৱিহাৰং কাৰযি ৰম্মং, তংকনিট্ঠসুতো পন;

থুল্লত্থনো অকাৰেসি, ৱিহাৰং কন্দৰৱ্হযং.

১৬. পিতৰা থুল্লত্থনকো, ভাতুসন্তিকমাযতা;

সহেৱা’হ ৱিহাৰস্স, সঙ্ঘভোগত্থমত্তনো.

১৭. সদ্ধাতিস্সেউপৰতে, সব্বে’মচ্চা সমাগতা;

থূপাৰামে ভিক্খুসঙ্ঘং, সকলং সন্নিপাতিয.

১৮. সঙ্ঘানুঞ্ঞাযৰট্ঠস্স, ৰক্খণত্থং কুমাৰকং;

অভিসিঞ্চুং থুল্লত্থনং, তং সুত্ৱা লজ্জীতিস্সতো.

১৯. ইধাগন্ত্ৱা গহেত্ৱা তং, সযং ৰজ্জমকাৰযি;

মাসঞ্চেৱ দসাহঞ্চ, ৰাজা থুল্লত্থনো পন.

২০. তিস্সোসমং লজ্জীতিস্সো, সঙ্ঘো হুত্ৱা অনাদৰো;

‘‘ন জানিংসু যথাৱুড্ঢং’’ মীতি তং পৰিভাসযি.

২১. পচ্ছা সঙ্ঘং খমাপেত্ৱা, দণ্ডকম্মত্থমিস্সৰো;

তীণি সতসহস্সানি, দত্ৱান উৰুচেতিযে.

২২. সিলামযানি কাৰেসি, পুপ্ফযানানি তীণিসো;

অথো সতসহস্সেন, চিতাপেসি চ অন্তৰা.

২৩. মহাথূপথূপাৰামানং, ভূমিংভূমিস্সৰো সমং;

থূপাৰামে চ থূপস্স, সিলাকঞ্চুক মুত্তমং.

২৪. থূপাৰামস্স পুৰতো, সিলাথূপকমেৱ চ;

লজ্জীকাসনসালঞ্চ, ভিক্খুসঙ্ঘস্স কাৰযি.

২৫. কঞ্চুকং কণ্টকে থূপে, কাৰাপেসি সিলামযং;

দত্ৱান সতসহস্সং, ৱিহাৰে চেতিযৱ্হযে.

২৬. গিৰিকুম্ভিলনামস্স, ৱিহাৰস্স মহম্হি সো;

সট্ঠিভিক্খুসহস্সানং, তিচীৱৰমদাপযি.

২৭. অৰিট্ঠৱিহাৰং কাৰেসি, তথাকন্দৰহিনকং;

গামিকানঞ্চ ভিক্খূনং, ভেসজ্জানি অদাপযি.

২৮. কিমিচ্ছকং তণ্ডুলঞ্চ, ভিক্খুনীনমদাপযি;

সমানৱ’ঠমাসঞ্চ, ৰজ্জং সো কাৰযী ইধ.

২৯. মতে লজ্জিকতিস্সম্হি, কনিট্ঠো তস্স কাৰযি;

ৰজ্জং ছড়েৱ ৱস্সানি, খল্লাটনাগনামকো.

৩০. লোহপাসাদপৰিৱাৰে, পাসাদে’তি মনোৰমে;

লোহপাসাদসোভত্থং, এসো দ্ৱত্তিংসকাৰযি.

৩১. মহাথূপস্স পৰিতো, চাৰুনো হেমমালিনো;

ৱালিকঙ্গণমৰিযাদং, পাকাৰঞ্চ অকাৰযি.

৩২. সোৱকুৰুন্দপাসকং, ৱিহাৰঞ্চ অকাৰযি;

পুঞ্ঞকম্মানিচঞ্ঞানি, কাৰাপেসি মহীপতি.

৩৩. তং মহাৰত্ততোনাম, সেনাপতি মহীপতিং;

খল্লাটনাগৰাজানং, নগৰেযেৱ অগ্গহি.

৩৪. তস্স ৰঞ্ঞো কনিট্ঠোতু, ৱট্টগামণিনামকো;

তং দুট্ঠসেনাপতিকং, হন্ত্ৱা ৰজ্জমকাৰযি.

৩৫. খল্লাটনাগৰঞ্ঞোসো, পুত্তকং সকভাতুনো;

মহাচূলিকনামানং, পুত্তঠানে ঠপেসি চ.

৩৬. তম্মাতৰং নুড়াদেৱিং, মহেসিঞ্চ অকাসিসো;

পীতিঠানে ঠিততা’স্স, পীতিৰাজাতি অব্ৰৱুং.

৩৭. এৱং ৰজ্জে’ভিসিত্তস্স, তস্স মাসম্হি পঞ্চমে;

ৰোহণে নকুলনগৰে, একো ব্ৰাহ্মণচেটতো.

৩৮. তিযো নাম ব্ৰাহ্মণস্স, ৱচো সুত্ৱা অপণ্ডিতো;

চোৰো অসু মহাতস্স, পৰিৱাৰো অহোসি চ.

৩৯. সগণাসত্তদমিড়া, মহাতিত্থম্হি ওতৰুং;

তদা ব্ৰাহ্মণতিযো চ, তে সত্তদমিড়াপিচ.

৪০. ছক্কত্থায ৱিসজ্জেসুং, লেখং ভূপতিসন্তিকং;

ৰাজা ব্ৰাহ্মণতিযস্স, লেখং পেসেসি নীতিমা.

৪১. ‘‘ৰজ্জং তৱ ইদানেৱ, গণ্হ ত্ৱং দমিড়ে’’ ইতি;

সাধূতি সো দমিড়েহি, যুজ্ঝি গণ্হিংসু তে তু তং.

৪২. ততো তে দমিড়া যুদ্ধং, ৰঞ্ঞা সহ পৱত্তযুং;

কোড়ম্বালকসামন্তা, যুদ্ধে ৰাজা পৰাজিতো.

৪৩. তিত্থাৰামদুৱাৰেন, ৰথাৰুড়্হো পলাযতি;

পণ্ডুকাভযৰাজেন, তিত্থাৰামোহি কাৰিতো;

ৱাসিতো চ তদা আসি, একৱীসতি ৰাজুসূ.

৪৪. তং দিস্ৱা পলাযন্তং, নিগণ্ঠোগিৰিনামকো;

‘‘পলাযতি মহাকাড়-সীহড়ো’’তি ভুসং ৰৱি.

৪৫. তং সুত্ৱান মহাৰাজা, ‘‘সিদ্ধে মম মনোৰথে;

ৱিহাৰং এত্থ কাৰেস্সং’’, ইচ্চেৱং চিন্তযী তদা.

৪৬. সগব্ভং অনুলাদেৱিং, অগ্গহী ৰক্খিযা ইতি;

মহাচূড় মহানাগ-কুমাৰেচাপী ৰক্খিযে.

৪৭. ৰথস্স লহুভাৱত্থং, ডত্ৱা চূড়ামণিংসুভং;

ওতাৰেসি সোমদেৱিং, তস্স’নুঞ্ঞায ভূপতি.

৪৮. যুদ্ধাযগমনেযেৱ, পুত্তকে দ্ৱে চ দেৱিযো;

গাহযিত্ৱান নিক্খন্তো, সঙ্কিতো সো পৰাজযে.

৪৯. অসক্কুণিত্ৱা গাহেতুং, পত্তং ভুত্তং জিনেন তং;

পলাযিত্ৱা ৱেস্সগীৰি-ৱনে অভিনিযিযিসো.

৫০. কুত্থিক্কুলমহাতিস্স-থেৰো দিস্ৱা তহং তু তং;

ভত্তং পাদা অনামট্ঠং, পিণ্ডদানং ৱিৱজ্জিয.

৫১. অথ কেতকিপত্তম্হি, লিখিত্ৱা হট্ঠমানসো;

সঙ্ঘভোগং ৱিহাৰস্স, তস্স পাদামহীপতি.

৫২. ততো গন্ত্ৱা সিলাসোব্ভ-কণ্ডকম্হি ৱসী ততো;

গন্ত্ৱান মাতুৱেলঙ্গে, সালগলসমীপগো.

৫৩. তত্থদ্দস দিট্ঠপুব্বং, থেৰং থেৰো মহীপতিং;

উপট্ঠাকস্স অপ্পেসি, তনসিৱস্স সাধুকং.

৫৪. তস্স সো তনসিৱস্স, ৰট্ঠিকস্স’ন্তিকে তহিং;

ৰাজা চুদ্দসৱস্সানি, ৱসী তেন উপট্ঠিতো.

৫৫. সত্তসু দমীড়েস্ৱে’কো, সোমাদেৱিং মদাৱহং;

ৰাগৰত্তো গহেত্ৱান, পৰতীৰমগালহুং.

৫৬. একোপত্তং দসবলস্স, অনুৰাধপুৰে ঠিতং;

আদায তেন সন্তুট্ঠো, পৰতীৰমগালহুং.

৫৭. পুড়হত্থো তু দমিড়ো, তীণিৱস্সানি কাৰযি;

ৰজ্জং সেনাপতিং কত্ৱা, দমিড়ং বাহিযৱ্হযং.

৫৮. পুড়হত্থং গহেত্ৱা তং, দূৰে ৱস্সানি বাহীযো;

ৰজ্জং কাৰেসি তস্সা’সি, পণযমাৰো চমূপতি.

৫৯. বাহীযং তং গহেত্ৱান, ৰাজা’সি পণযমাৰকো;

সত্তৱস্সানি তস্সা’সি, পিড়যমাৰো চমূপতি.

৬০. পণযমাৰং গহেত্ৱা সো, ৰাজাসি পীড়যমাৰকো;

সত্তমাসানি তস্সাসি, দাঠিযো তু চমূপতি.

৬১. পীড়যমাৰং গহেত্ৱা সো, দাঠিযো দমিড়ো পন;

ৰজ্জং’নুৰাধনগৰে, দুৱে ৱস্সানি কাৰযি.

৬২. এৱং দমিড়ৰাজূনং, তেসং পঞ্চন্নমেৱহি;

হোন্তি চুদ্দসৱস্সানী, সত্তমাসা চ উত্তৰিং.

৬৩. গতায তু নিৱাসত্থং, মলযে’নুলদেৱিযা;

ভৰিযাকনসিৱস্স, পাদাপহৰি পচ্ছিযং.

৬৪. কুজ্ঝিত্ৱা ৰোদমানাসা, ৰাজানং উপসকিমি;

তং সুত্ৱা তনসিৱোসো, মনুমাদায নিক্খমি.

৬৫. দেৱিযা ৱচনং সুত্ৱা, তস্স আগমনা পুৰা;

দ্ৱিপুত্তং দেৱিমাদায, ততো ৰাজা’পি নিক্খমি.

৬৬. ধনুং সন্ধায আযন্তং, সীৱং ৱিজ্ঝি মহাসীৱো;

ৰাজা নামং ভাৱযিত্ৱা, অকাসি জিনসঙ্গহং.

৬৭. অলত্থ অট্ঠামচ্চেচ, মহন্তে যোধসম্মতে;

পৰিৱাৰো মহাআসী, পৰিহাৰো চ ৰাজিনো.

৬৮. কুম্ভীলকমহাতিস্স-থেৰ দিস্ৱা মহাযসো;

অচ্ছগল্লৱিহাৰম্হি, বুদ্ধপূজমকাৰযি.

৬৯. ৱত্থুং সোধেতুমাৰুড়্হো, অকাসচেতিযঙ্গণং;

কৱিসীসে অমচ্চম্হি, ওৰোহন্তোমহীপতি.

৭০. আৰোহন্তো সদেৱিকো, দিস্ৱা মগ্গে নিসিন্নকং;

‘‘ন নিপন্নো’’তি কুজ্ঝিত্ৱা, কৱিসীসং অঘাতযি.

৭১. সেসা সত্তঅমচ্চাৱি, নিব্বিন্না তেন ৰাজিনা;

তস্স’ন্তিকা পলাযিত্ৱা, পক্কমন্তা যথাৰুচি.

৭২. মগ্গে ৱিলুত্তা চোৰেহি, ৱিহাৰং হম্বুগল্লকং;

পৱিসিত্ৱান অদ্দক্খুং, তিস্সত্থেৰং বহুস্সুতং.

৭৩. চতুনেকাযিকো থেৰো, যথালদ্ধানি দাপযি;

ৱত্থফাণিততেলানি, তণ্ডুলা পাহুণা তথা.

৭৪. অস্সত্থকালে থেৰো সো,