দ্ৱত্তিংসতিম পৰিচ্ছেদ

তুসিতপুৰগমনং

১. অনিট্ঠিতে ছত্তকম্মে, সুধাকম্মে চ চেতিযে;

মাৰণন্তিকৰোগেন, ৰাজা আসি গিলানকো.

২. তিস্সং পক্কোসযিত্ৱা সো, কনিট্ঠং দীঘৱাপিতো;

‘‘থূপে অনিট্ঠিতং কম্মং, নিট্ঠাপেহীতি অব্ৰৱি.

৩. ভাতুনো দুব্বলত্তাসো, তুন্নৱাযেহি কাৰিয;

কঞ্চুকং সুদ্ধৱত্থেহি, তেন ছাদিয চেতিযং.

৪. চিত্তকাৰেহি কাৰেসি, ৱেদিকং তত্থ সাধুকং;

পন্তিপুণ্ণঘটানঞ্চ, পঞ্চঙ্গুলকপন্তিকং.

৫. ছত্তাকাৰেহি কাৰেসি, ছত্তং ৱেড়ুমযং তথা;

খৰপত্তমযে চন্দ-সূৰিযে মুদ্ধৱেদিযং.

৬. লাখাকুঙ্কুমকেহে’তং, চিত্তযিত্ৱা সুচিত্তিতং;

ৰঞ্ঞো নিৱেদযি’’থূপে, কত্তব্বং নিট্ঠিতং’’ইতি.

৭. সিৱিকায নিপজ্জিত্ৱা, ইধাগন্ত্ৱা মহীপতি;

পদক্খিণং কৰিত্ৱান, সিৱিকাযে’ৱ চেতিযং.

৮. ৱন্দিত্ৱা দক্খিণদ্ৱাৰে, সযনে ভূমিসন্থতে;

সযিত্ৱা দক্খিণপস্সেন, সো মহাথূপ মুত্তমং.

৯. সযিত্ৱা ৱামপস্সেস, লোহপাসাদ মুত্তমং;

পস্সন্তো সুমনো আসি, ভিক্খুসঙ্ঘপুৰেক্খতো.

১০. গিলানপুচ্ছনত্থায, আগতাহি ততো ততো;

ছন্নৱুতিকোটিযো ভিক্খূ, তস্মিং আসুং সমাগমে.

১১. গণসজ্ঝাযমকৰুং, ৱগ্গবন্ধেন ভিক্খৱো;

থেৰপুত্তাভযং থেৰং, তত্থা’দিস্ৱা মহীপতি.

১২. অট্ঠৱীস মহাযুদ্ধং, যুজ্ঝন্তো অপৰাজযং;

যো সো ন পচ্চুদাৱত্তো, মহাযোধো ৱসী মম.

১৩. মচ্চুযুদ্ধম্হি সম্পত্তে, দিস্ৱা মঞ্ঞে পৰাজযং;

ইদানি সো মং নো পেতি, থেৰো থেৰপুত্তভযো.

১৪. ইতি চিন্তযি সোথেৰো, জানিত্ৱা তস্স চিন্তিতং;

কৰিন্দনদিযা সিসে, ৱসং পঞ্জলিপব্বতে.

১৫. পঞ্চখীণাসৱসত-পৰিৱাৰেন ইদ্ধিযা;

নভসাগম্ম ৰাজানং, অট্ঠাসি পৰিৱাৰিয.

১৬. ৰাজা দিস্ৱা পসন্নো তং, পুৰতো চ নিসীদিয;

তুম্হে দসমহাযোধে, গণ্হিত্ৱান পুৰে অহং.

১৭. যুজ্ঝিং ইদানি একো’ৱ, মচ্চুনা যুদ্ধমাৰভিং;

মচ্চুসত্তুং পৰাজেতুং, ন সক্কোমী’’তি আহ চ.

১৮. আহ থেৰো ‘‘মহাৰাজ-মা ভাযি মনুজাধিপ;

কিলেসসত্তুং অজিত্ৱা, অজেয্যো মচ্চুসত্তুকো.

১৯. সব্বম্পি সঙ্খাৰগতং, অৱস্সংযেৱ ভিজ্জতি;

‘‘অনিচ্চা সব্বসঙ্খাৰা’’, ইতি ৱুত্তংহি সত্থুনা.

২০. লজ্জা সাৰজ্জৰহিতা, বুদ্ধেপে’তি অনিচ্চতা;

তস্মা অনিচ্চা সঙ্খাৰা, দুক্খা’নত্তাতি চিন্তয.

২১. দুতিযে অত্তাভাৱেপি, ধম্মচ্ছন্দো মহাহিতে;

উপট্ঠিতে দেৱলোকে, হিত্ৱা দিব্বং সুখং তুৱং.

২২. ইধাগম্ম বহুং পুঞ্ঞং, অকাসি চ অনেকধা;

কৰণম্পেকৰজ্জস্স, সাসনুজ্জোতনাযতে.

২৩. মহাপুঞ্ঞকতং পুঞ্ঞং, যাৱজ্জদিৱসা তযা;

সব্বংনুস্সৰমেৱং তে, সুখং সজ্জু ভৱিস্সতি.

২৪. থেৰস্সৱচনং সুত্ৱা, ৰাজা অত্তমনো অহু;

‘‘অৱস্সযো মচ্চুযুদ্ধেপি, ত্ৱং মে সী’’তি অভাসিতং.

২৫. তদা চ আহৰাপেত্ৱা, পহট্ঠো পুঞ্ঞ পোত্থকং;

ৱাচেতুং লেখকং আহ, সো তং ৱাচেসি পোত্থকং.

২৬. একূনসতৱিহাৰা, মহাৰাজেন কাৰিতা;

একূনৱীসকোটীহি, ৱিহাৰো মৰিচ ৱট্টি চ.

২৭. উত্তমো লোহপাসাদো,

তিংসকোটীহি কাৰিতো;

মহাথূপে অনগ্ঘানি,

কাৰিতা চতুৱীসতি.

২৮. মহাথূপম্হি সেসানি, কাৰিতানি সুবুদ্ধিনা;

কোটিসহস্সং অগ্ঘন্তি, মহাৰাজা’’তি ৱাচযি.

২৯. ‘‘কোট্ঠনামম্হি মলযে, অক্খক্খাযিক ছাতকে;

কুণ্ডলানি মহগ্ঘানি, দুৱে দত্ৱান গণ্হিয.

৩০. খীণাসৱানং পঞ্চন্নং, মহাথেৰান মুত্তমো;

দিন্নো পসন্নচিত্তেন, কঙ্গুঅম্বিলপিণ্ডকো.

৩১. চূড়ঙ্গনিয যুদ্ধম্হি, পৰাজিত্ৱা পলাযতা;

কালং ঘোসাপযিত্ৱান, আগতস্স ৱিহাযসা.

৩২. খীণাসৱস্স যতিনো, অত্তানমনপেক্খিয;

দিন্নং সৰকভত্ত’ন্তি, ৱুত্তে আহ মহীপতি.

৩৩. ৱিহাৰমহসত্তাহে, পাসাদস্স মহেতথা;

থূপাৰম্ভে তু সত্তাহে, তথা ধাতুনিধানকে.

৩৪. চাতুদ্দিসস্স উভতো, সঙ্ঘস্স উভতো মযা;

মহাৰহং মহাদানং, অৱিসেসং পৱত্তিতং.

৩৫. মহাৱেসাখপূজা চ, চতুৱীসতি কাৰযি;

দীপে সঙ্ঘস্স তিক্খত্তুং, তিচীৱৰমদাপযি.

৩৬. সত্তসত্ত দিনানেৱ, দীপে ৰজ্জমহং ইমং;

পঞ্চক্খত্তুং সাসনম্হি, অদাসিং হট্ঠমানসো.

৩৭. সততং দ্ৱাদসঠানে, সপ্পিনা সুদ্ধৱট্টিযা;

দীপসহস্সং জালেসিং, পূজেন্তো সুগতং অহং.

৩৮. নিচ্চং অট্ঠাৰসঠানে, ৱজ্জেহি ৱিহিতং অহং;

গিলান ভত্তভেসজ্জং, গিলানানমদাপযিং.

৩৯. চতুত্তালীসঠানম্হি, সঙ্খতং মধুপাযসং;

তত্তকেস্ৱেৱ ঠানেসু, তেলুল্লোপকমেৱ চ.

৪০. ঘতে পক্কে মহাজাল, পূৱে ঠানম্হি তত্তকে;

তথেৱ সহ ভত্তেহি, নিচ্চ এমৱ অদাপযিং.

৪১. উপোসথেসু দিৱসেসু, মাসে মাসে চ অট্ঠসু;

লংকাদীপে ৱিহাৰেসু, দীপ তেলমদাপযিং.

৪২. ধম্মদানং মহন্তন্তি, সুত্ৱা অমিসদানতো;

লোহ পাসাদতো হেট্ঠা, সঙ্ঘমজ্ঝম্হি আসনে.

৪৩. ‘‘ওসাৰেস্সামি সঙ্ঘস্স, মঙ্গলসুত্ত’’মিচ্চহং;

নিসিন্নো ওসাৰযিতুং, নাসক্খিং সঙ্ঘগাৰৱা.

৪৪. ততোপ্পভুতি লংকায, ৱিহাৰেসু তহিং তহিং;

ধম্মকথং কথাপেসিং, সক্কৰিত্ৱান দেসকে.

৪৫. ধম্মকথিক স্সেকস্স, সপ্পিফাণিতসক্খৰং;

নাড়িং নাড়িমদাপেসিং, দাপেসিং চতুৰঙ্গুলং.

৪৬. মুট্ঠিকং যট্ঠিমধুকং, দাপেসিং সাটকদ্ৱযং;

সব্বংপিস্সৰিযে দানং, নমে হাসেসি মানসং.

৪৭. জীৱিতং অনপেক্খিত্ৱা, দুগ্গতেন সতা মযা;

দিন্ন দান দ্ৱযংযেৱ, তং মে হাসেসি মানসং.

৪৮. তং সুত্ৱা অভযো থেৰো, তং দানদ্ৱযমেৱ সো;

ৰঞ্ঞো চিত্তপ্পসাদত্থং, সং ৱণ্ণেসি অনেকধা.

৪৯. তেসু পঞ্চসু থেৰেসু, কঙ্গুঅম্বিলগাহকো;

মলিয দেৱ মহাথেৰো, সুমনকূটম্হি পব্বতে.

৫০. নৱন্নং ভিক্খুসতানং, দত্ৱা তং পৰিভুঞ্জি সো;

পথৱীচালকো ধম্ম, সুত্তথেৰো তু তং পন.

৫১. কল্যাণিকৱিহাৰম্হি, ভিক্খূনং সংৱিভাজিয;

দসদ্ধস তসঙ্খানং, পৰিভোগ মকাসযং.

৫২. তলঙ্গৰ ৱাসিকো ধম্ম, দিন্নত্থেৰো পিযঙ্গুকে;

দীপে দসসহস্সানং, দত্ৱান পৰিভুঞ্জিতং.

৫৩. মঙ্গণৱাসিকো খুদ্দ, তিস্সত্থেৰো মহিদ্ধিকো;

কেলাসে সট্ঠিসহস্সানং, দত্ৱান পৰিভুঞ্জি তং.

৫৪. মহাব্যগ্ঘো চ থেৰো তং, উক্কনগৰৱিহাৰকে;

দত্ৱা সতানং সত্তানং, পৰিভোগমকাসযং.

৫৫. সৰকভত্তগাহী তু, থেৰো পিযঙ্গুদীপকে;

দ্ৱাদস ভিক্খুসহস্সানং, দত্ৱান পৰিভুঞ্জিতং.

৫৬. ইতি ৱত্ৱা’ভযত্থেৰো, ৰঞ্ঞো হাসেসি মানসং;

ৰাজা চিত্তং পসাদেত্ৱা, তং থেৰং ইধ মব্ৰুৱি.

৫৭. ‘‘চতুৱীসতিৱস্সানি, সঙ্ঘস্স উপকাৰকো;

অহ মেৱং হোতু কাযো’পি, সঙ্ঘস্স উপকাৰকো.

৫৮. মহাথূপ দস্সনঠানে, সঙ্ঘস্স কম্মমাড়কে;

সৰীৰং সঙ্ঘদাসস্স, তুম্হে ঝাপেথ মে’’ইতি.

৫৯. কনিট্ঠং আহ ‘‘ভো তিস্স, মহাথূপে অনিট্ঠিতং;

নিট্ঠাপেহি তুৱং সব্বং, কম্মং সক্কচ্চ সাধুকং.

৬০. সাযং পাতো চ পুপ্ফানি, মহাথূপম্হি পূজয;

তিক্খত্তুং উপহাৰঞ্চ, মহাথূপস্স কাৰয.

৬১. পটিযাদিতঞ্চ যং ৱত্তং, মযা সুগত সাসনে;

সব্বং অপৰিহাপেত্ৱা, তাত ৱত্তয তং তুৱং.

৬২. সঙ্ঘস্স তাত কিচ্চেসু, মা পমজ্জিত্থ সব্বদা’’;

ইতং তং অনুসাসিত্ৱা, তুণ্হী আসি মহীপতি.

৬৩. তঙ্খণং গণসজ্ঝাযং, ভিক্খুসঙ্ঘো অকাসি চ;

দেৱতা ছ ৰথে চেৱ, ছহি দেৱেহি আনযুং.

৬৪. যাচুং ৱিসুং ৱিসুং দেৱা, ৰাজানং তে ৰথে ঠিতা;

‘‘অম্হাকং দেৱলোকং ত্ৱং, এহি ৰাজমনোৰমং’’.

৬৫. ৰাজা তেসং ৱচো সুত্ৱা, ‘‘যাৱ ধম্মং সুণোমহং;

অধিৱাসেথ তাৱা’’তি, হত্থাকাৰেন ৱাৰযি.

৬৬. ৱাৰেতি গণসজ্ঝায, মীভি মন্ত্ৱান ভিক্খৱো;

সজ্ঝাযং ঠপযুং ৰাজা, পুচ্ছিতং ঠানকাৰণং.

৬৭. ‘‘আগমেথা’’তি সঞ্ঞায, দিন্নত্তা’তি ৱদিংসু তে;

ৰাজা ‘‘নেতং তথা ভন্তে’’, ইতি ৱত্ৱান তং ৱদি.

৬৮. তং সুত্ৱান জনা কেচি, ‘‘ভীতো মচ্চুভযা অযং;

লালপ্পতী’’তি মঞ্ঞিংসু, তেসং কঙ্খাৱিনোদনং.

৬৯. কাৰেতুং অভযত্থেৰো, ৰাজানং এৱমাহ সো;

‘‘জানাপেতুং কথং সক্কা, আনীতা তে ৰথা’’ইতি.

৭০. পুপ্ফদানং খিপাপেসি, ৰাজ নভসি পণ্ডিতো;

তানি লগ্গানি লম্বিংসু, ৰথীসাসু ৱিসুং ৱিসুং.

৭১. আকাসে লম্বমানানি, তানি দিস্ৱা মহাজনো;

কঙ্খং পটিৱিনোদেসি, ৰাজা থেৰমভাসিতং.

৭২. ‘‘কতমো দেৱলোকো হি,

ৰম্মো ভন্তে’’তি সো ব্ৰুৱি;

‘‘তুসিনানং পুৰং ৰাজ,

ৰম্মং’’ইতি সতং মতং.