একতিংসতিম পৰিচ্ছেদ

ধাতুনিধানং

১. ধাতুগব্ভম্হি কম্মানি, নিট্ঠাপেত্ৱা অৰিন্দমো;

সন্নিপাতং কাৰযিত্ৱা, সঙ্ঘস্স ইধমব্ৰৱি.

২. ধাতুগব্ভম্হি কম্মানি, মযা নিট্ঠাপি তানি হি;

সুৱে ধাতুং নিধেস্সামি, ভন্তে জানাথ ধাতুযো’’.

৩. ইদং ৱত্ৱা মহাৰাজা, নগৰং পাৱিসী ততো;

ধাতু আহৰকং ভিক্খুং, ভিক্খুসঙ্ঘো ৱিচিন্তিয.

৪. সোণুত্তৰং নামযতিং, পূজাপৰিৱেণৱাসি কং;

ধাতাহৰণ কম্মম্হি, ছড়ভিঞ্ঞং নিযোজযি.

৫. চাৰিকং চৰমানম্হি, নাথে লোকহিতাযহি;

নন্দুত্তৰো’তি নামেন, গঙ্গাতীৰম্হি মাণৱো.

৬. নিমন্তেত্ৱা’ভিসম্বুদ্ধং, সহ সঙ্ঘং অভোজযি;

সত্থাপযোগপট্ঠানে, সসঙ্ঘোনাৱমাৰুহি.

৭. তত্থ ভদ্দজিথেৰো তু, ছড়ভিঞ্ঞো মহিদ্ধিকো;

জলপক্খলিতট্ঠানং, দিস্ৱা ভিক্খূ ইদং ৱদী.

৮. ‘‘মহা পনাদভূতেন, মযা ৱুত্তো সুৱণ্ণযো;

পাসাদো পতিতো এত্থ, পঞ্চৱীসতিযোজকো.

৯. তং পাপুণিত্ৱা গঙ্গায, জলং পক্খিলি তং ইধ;

ভিক্খূ অসদ্দহন্তা তং, সত্থুনো তং নিৱেদযুং.

১০. সত্থা’হ ‘‘কঙ্খং ভিক্খুনং, ৱিনোদেহী’’তিসোততো;

ঞাপেতুং ব্ৰহ্মলোকে’পি, ৱসৱত্তিসমত্থ তং.

১১. ইদ্ধিযা নভমুগ্গন্ত্ৱা, সত্ততালসমে ঠিতো;

দূস্সথূপং ব্ৰহ্মলোকে, ঠপেত্ৱা ৱড্ঢিতে কৰে.

১২. ইধা’নেত্ৱা দস্সযিত্ৱা, জনস্স পুন তং তহিং;

ঠপযিত্ৱা যথাঠানে, ইদ্ধিযা গঙ্গামাগতো.

১৩. পাদঙ্গুট্ঠেন পাসাদং, গহেত্ৱা থুপিকাযসো;

উস্সাপেত্ৱান দস্সেত্ৱা, জনস্স খিপি তং তহিং.

১৪. নন্দুত্তৰো মাণৱকো, দিস্ৱা তং পাটিহাৰিযং;

পৰাযত্তমহং ধাতুং, পহুআনযিতুং সিযং.

১৫. ইতি পত্থযি তেনেতং, সঙ্ঘো সোণুত্তৰং যতিং;

তস্মিং কম্মে নিযোজেসি, সোড়সৱস্সিকং অপি.

১৬. ‘‘আহৰামি কুতো ধাতুং’’, ইতি সঙ্ঘমপুচ্ছিসো;

কথেসি সঙ্ঘো থেৰস্স, তস্স তা ধাতুযো ইতি.

১৭. ‘‘পৰিনিব্বান মঞ্চম্হি, নিপন্নো লোক নাযকো;

ধাতূহিপিলোকহি তং, কাতুং দেৱিন্দ মব্ৰুৱি.

১৮. দেৱিন্দ’ট্ঠসু দোণেসু, মম সাৰিৰধাথুসু;

একং দোণং ৰামগামে, কোড়িযেহি চ সক্কতং.

১৯. নাগলোকং ততো নিতং, ততো নাগেহি সক্কতং;

লংকাদিপে মহাথূপে, নিধানায ভৱিস্সতি.

২০. মহাকস্সপত্থেৰোপি, দীঘদস্সী মহাযতি;

ধম্মাসোক নৰিন্দেন, ধাতুৱিত্থাৰকাৰকো.

২১. ৰাজগহস্স সামন্তে, ৰঞ্ঞা অজাতসত্তুনা;

কাৰাপেন্তো মহাধাতুং, নিধানং সাধু সঙ্খতং.

২২. সত্ত দোণানি ধাতূনং, আহৰিত্ৱান কাৰযি;

ৰামগামম্হি দোণন্তু, সত্তুচিত্তঞ্ঞুন’গ্গহি.

২৩. মহাধাতুনিধানং তং, ধম্মাসোকোপি ভূপতি;

পস্সিত্ৱা অট্ঠমং দোণং, আণাপেতুংমকিং অকা.

২৪. মহাথূপে নিধানত্থং, ৱিহিতং তং জিনেনি’তি;

ধম্মাসোকং নিৱাৰেসুং, তত্থ খিণাসৱাযতি.

২৫. ৰামগামম্হি থূপোতু, গঙ্গাতীৰে কতো ততো;

ভিজ্জিগঙ্গায ওঘেন, সোতু ধাতু কৰণ্ডকো.

২৬. সমুদ্দং পৱিসিত্ৱান, দ্ৱিধা ভিন্নে জলে তহিং;

নানাৰতনপিট্ঠম্হি, অট্ঠাৰস্মিং সমাকুলো.

২৭. নাগা দিস্ৱা কৰণ্ডং তং, কাড়নাগস্স ৰাজিনো;

মঞ্জেৰিকনাগভৱনং, উপগম্ম নিৱেদযুং.

২৮. দসকোটিসহস্সেহি, গন্ত্ৱা নাগেহি সো তহিং;

ধাতূ তা অভিপূজেন্তো, নেত্ৱান ভৱনং সকং.

২৯. সব্বৰতনমযং থূপং, তস্সোপৰিঘৰং তথা;

মাপেত্ৱা সহ নাগেহি, সদা পূজেসি সাদৰো.

৩০. আৰক্খামহতী তত্থ, গন্ত্ৱা ধাতুইধানয;

সুৱে ধাতুনিধানঞ্হি, ভূমিপালো কৰিস্সতি’’.

৩১. ইচ্চেৱং সঙ্ঘৱচনং, সুত্ৱা সাধূতি সো পন;

পত্তব্বকালং পেক্খন্তো, পৰিৱেণ মগাসকং.

৩২. ভৱিস্সতি সুৱে ধাতু, নিধানন্তি মহীপতি;

চাৰেসি নগৰে ভেৰিং, সব্ব কিচ্চং ৱিধায তং.

৩৩. নগৰং সকলঞ্চেৱ, ইধাগামিঞ্চ অঞ্জসং;

অলঙ্কাৰযি সক্কচ্চং, নগৰে চ ৱিভূসযি.

৩৪. সক্কো দেৱানমিন্দো চ, লংকাদীপমসেসকং;

আমন্তেত্ৱা ৱিস্সকম্মং, অলঙ্কাৰযিনেকধা.

৩৫. নগৰস্স চতুদ্ৱাৰে, ৱত্তভত্তংহি নেকধা;

মহাজনোপভোগত্থং, ঠপাপেসি নৰাধিপো.

৩৬. উপোসথে পন্নৰসে, অপৰন্হে সুমানসো;

পণ্ডিতো ৰাজকিচ্চেসু, সব্বালঙ্কাৰ মণ্ডিতো.

৩৭. সব্বাহি নাটকত্থীহি, যোধেহি সাযুধেহি চ;

মহতা চ বলোঘেন, হত্থিৱা জিৰথেহি চ.

৩৮. নানাৱিধৱিভূসেহি, সব্বতো পৰিৱাৰিতো;

আৰুয্হ সুৰথং অট্ঠা, সুসেত চ সুসিন্ধৱং.

৩৯. ভূসিতং কণ্ডূলং হত্থিং, কাৰেত্ৱা পুৰতোসুভং;

সুৱণ্ণচঙ্গোটধৰো, সোতচ্ছত্তস্স হেট্ঠাতো.

৪০. অট্ঠুত্তৰ সহস্সানি, নাগৰনাৰিযো সুভা;

সুপুণ্ণঘটভূসাযো, তং ৰট্ঠং পৰিৱাৰযুং.

৪১. নানাপুপ্ফসমুগ্গানি, তথেৱ দণ্ডদীপিকা;

তত্তকা তত্তকা এৱ, ধাৰযিত্ৱান ইত্থিযো.

৪২. অট্ঠুত্তৰ সহস্সানি, দাৰকা সমলঙ্কতা;

গহেত্ৱা পৰিৱাৰেসুং, নানাৱণ্ণধজে সুভে.

৪৩. নানাতূৰিযঘোসেহি, অনেকেহি তহিং তহিং;

হত্থসৰথসদ্দেহি, ভিজ্জন্তে ৱিয ভূতলে.

৪৪. যন্তো মহামেঘৱনং, সিৰিযা সো মহাযসো;

যন্তে’ৱ নন্দনৱনং, দেৱৰাজা অসোভথ.

৪৫. ৰঞ্ঞো নিগ্গমনাৰম্ভে, মহাতূৰিয ৰৱংপুৰে;

পৰিৱেণে নিসিন্নো’ৱ, সুত্ৱা সোণুত্তৰো যতি.

৪৬. নিমুজ্জিত্ৱা পুথুৱিযা, গন্ত্ৱান নাগমন্দিৰং;

নাগৰাজস্স পুৰতো, তত্থ পাতূৰহুলহুং.

৪৭. ৱুট্ঠায অভিৱাদেত্ৱা, পল্লঙ্কে তং নিৱেসীল;

সক্কৰিত্ৱান নাগিন্দো, পুচ্ছি আগত দেসকং.

৪৮. তস্মিং ৱুত্তে অথোপুচ্ছি, থেৰাগমনকাৰণং;

পত্ৱা’ধিকাৰং সব্বং সো, সঙ্ঘ সন্দেস মব্ৰুৱি.

৪৯. মহাথূপে নিধানত্থং, বুদ্ধেন ৱিহিতা ইধ;

তৱ হত্থগতা ধাতু, দেহিতা কিৰ মে তুৱং.

৫০. তং সুত্ৱা নাগৰাজাসো, অতীৱ দোমনস্সি তো;

‘‘পহূ অযঞ্হি সমণো, বলক্কাৰেন গণ্হিতুং.

৫১. তস্মা অঞ্ঞত্থ নেতব্বা, ধাতুযো’’ইতি চিন্তিয;

তত্থ ঠিতং ভাগিনেয্যং, আকাৰেন নিৱেদযি.

৫২. নামেন ৱাসুলদত্তো, জানিত্ৱা তস্স ইঙ্গিতং;

গন্ত্ৱা তং চেতিযঘৰং, গিলিত্ৱান কৰণ্ডকং.

৫৩. সিনেৰুপাদং গন্ত্ৱান, কুণ্ডলাৱট্টকোসযি;

তিযোজনসতং দীঘো, ভোগোযোজনৱট্টৱা.

৫৪. অনেকানি সহস্সানি, মাপেত্ৱান ফণানি চ;

ধূপাযতি পজ্জলতি, সযিত্ৱা সো মহিদ্ধিকো.

৫৫. অনেকানি সহস্সানি, অত্তনা সদিসে অহি;

মাপযিত্ৱা সযাপেসি, সমন্তা পৰিৱাৰিতে.

৫৬. বহূ দেৱা চ নাগা চ, ওসৰিংসু তহিং তদা;

‘‘যুদ্ধং উভিন্নং নাগানং, পসিস্সাম মযং’’ইতি.

৫৭. মাতুলো ভাগিনেয্যেন, হটাতা ধাতুযো ইতি;

ঞত্ৱা’নহ থেৰং তং, ধাতুনত্থি মে সন্তিকে ইতি.

৫৮. আদিতোপ্পভুতিথেৰো, তাসং ধাতূনমাগমং;

ৱত্ৱান নাগৰাজং তং, ‘‘দেহি ধাতূ’’তি অব্ৰুৱি.

৫৯. অঞ্ঞথা সঞ্ঞাপেতুং তং, থেৰং সো উৰগাধিপো;

আদায চেতিয ঘৰং, গন্ত্ৱা তং তস্স ৱণ্ণযি.

৬০. অনেকধা অনেকেহি, ৰতনেহি সুসঙ্খতং;

চেতিযং চেতিযঘৰং, পস্স ভিক্খু সুনিম্মিতং.

৬১. লংকাদীপম্হি সকলে, সব্বানি ৰতনানিপি;

সোপানন্তে পাটিকম্পি, নাগ্ঘন্ত’ঞ্ঞেসু কা কথা.

৬২. মহাসক্কাৰঠানম্হা, অপ্পসক্কাৰঠান কং;

ধাতূনং নযনং নাম, নযুত্তং ভিক্খুৱো ইদং.

৬৩. ‘‘সচ্চাভিসমযো নাম, তুম্হাকং হীন ৱিজ্জতি;

সচ্চাভিসমযঠানং, নেতুং যুত্তঞ্হি ধাতুযো’’.

৬৪. ‘‘সংসাৰ দুক্খ মোক্খায, উপ্পজ্জন্তি তথাগতা;

বুদ্ধস্সাযমধিপ্পাযো, তেননেস্সাম ধাতুযো.

৬৫. ধাতুনিধানং অজ্জে’ৱ, সো হি ৰাজা কৰিস্সতি;

তস্মা পপঞ্চমকৰিত্ৱা, লহুং মে দেহি ধাতুযো’’.

৬৬. নাগোআহসচে ভন্তে, তুৱং পস্সসি ধাতুযো;

গহেত্ৱা যাহি তং থেৰো, তিক্খত্তুং তং ভণাপিয.

৬৭. সুখুমং কৰং মাপযিত্ৱা, থেৰো তত্ৰঠিতো’ৱসো;

ভাগিনেয্যস্স ৱদনে, হত্থং পক্খিপ্প তাৱদে.

৬৮. ধাতুকৰণ্ডং আদায, ‘‘তিট্ঠ নাগা’’তি ভাসিয;

নিমুজ্জিত্ৱা পথৱিযং, পৰিৱেণম্হি উট্ঠহি.

৬৯. নাগৰাজা গতো ভিক্খু, অম্হেহি ৱঞ্চিতো’’ইতি;

ধাতু আনযনত্থায, ভাগিনেয্যস্স পাহিণি.

৭০. ভাগিনেয্যো’থ কুচ্ছিম্হি, অপস্সিত্ৱা কৰণ্ডকং;

পৰিদেৱমানো আগন্ত্ৱা, মাতুলস্স নিৱেদযি.

৭১. তদা সো নাগৰাজাপি, ‘‘ৱঞ্চিতম্হ মযং’’ইতি;

পৰিদেৱি নাগা সব্বেপি, পৰিদেৱিংসু পীড়িতা.

৭২. ভিক্খু নাগস্স ৱিজযে, তুট্ঠা দেৱা সমাগতা;

ধাতুযো পূজযন্তাতা, তেনেৱ সহ আগমুং.

৭৩. পৰিদেৱমানা আগন্ত্ৱা, নাগা সঙ্ঘস্স সন্তিকে;

বহুধা পৰিদেৱিংসু, ধাতাহৰণ দুক্খিতা.

৭৪. তেসং সঙ্ঘো’নুকম্পায, থোকং ধাতুমদাপযি;

তে তেন তুট্ঠা গন্ত্ৱান, পূজা ভণ্ডানি আহৰুং.