তিংসতিম পৰিচ্ছেদ

ধাতুগব্ভৰচনো

১. ৱন্দিত্ৱান মহাৰাজা, সব্বং সঙ্ঘং নিমন্তযি;

‘‘যাৱচেতিযনিট্ঠানা, ভিক্খং গণ্হথ মে’’ইতি.

২. সঙ্ঘো তং নাধিৱাসেসি, অনুপুব্বেন সো পন;

যাৱন্তো যাৱ সত্তাহং, সত্তাহমধিৱাসনং.

৩. অলত্থো’পড্ঢভিক্খূহি, তে লদ্ধা সুমনো’ৱ সো;

অট্ঠাৰসসু ঠানেসু, থূপঠানসমন্ততো.

৪. মণ্ডপে কাৰযিত্ৱান, মহাদানং পৱত্তযি;

সত্থাহং তত্থ সঙ্ঘস্স, ততো সঙ্ঘং ৱিস্সজ্জযি.

৫. ততো ভেৰিং চৰাপেত্ৱা, ইট্ঠকা ৱড্ঢকী লহুং;

সন্নিপাতেসি তে আসুং, পঞ্চমত্তসতানি হি.

৬. কথং কৰিস্সসি নে’কো, পুচ্ছিতো আহ ভূপতি;

‘‘পেস্সিযানং সতং লদ্ধা, পংসূনং সকটং অহং.

৭. খেপযিস্সামি এক্কা’হং, তং ৰাজা পটিবাহযি;

ততো উপড্ঢুপড্ঢঞ্চ, পংসূ দ্ৱে অম্মণানি চ.

৮. আহংসু ৰাজা পটিবাহি, চতুৰো তেপি ৱড্ঢকী;

অথেকো পণ্ডিতো ব্যত্তো, ৱড্ঢকী আহ ভূপতিং.

৯. ‘‘উদুক্খলে কোট্টযিত্ৱা, অহং সুপ্পেহি ৱট্টিতং;

পিংসাপযিত্ৱা নিসদে, এতং পংসূনমম্মণং.

১০. ইতি ৱুত্তো অনুঞ্ঞাসি, তিণাদিনেত্থনো সিযুং;

চেতিযম্হীতি ভূমিন্দো, ইন্দতুল্যপৰক্কমো.

১১. ‘‘কং সণ্ঠানং চেতিযং তং, কৰিস্সসি তুৱং ইতি;

পুচ্ছিতং তংখণংযেৱ, ৱিস্সকম্মো তমাৱিসি.

১২. সোৱণ্ণপাতিং তো যস্স, পুৰাপেত্ৱাৱ ৱড্ঢকী;

পাণিনা ৱাৰিমাদায, ৱাৰিপিট্ঠিযমাহনী.

১৩. ফলিক লোলসদিসং, মহাফুব্বুড়মুট্ঠহি;

আহী’দিসং কৰিস্সতি, তুস্সিত্ৱান’স্স ভূপতি.

১৪. সহস্সগ্ঘং ৱত্থযুগং, তথা’লঙ্কাৰ পাদুকা;

কহাপনানি দ্ৱাদস-সহস্সানি চ দাপপি.

১৫. ‘‘ইট্ঠকা আহাৰাপেস্সং, অপীড়েন্তো কথং নৰে’’;

ইতি ৰাজা ৱিচিন্তেসি, ৰত্তিংঞত্ৱান তং মৰূ.

১৬. চেতিযস্স চতুদ্ধাৰে, আহৰিত্ৱান ইট্ঠকা;

ৰত্তিং ৰত্তিং ঠপযিংসু, একেকাহপহোনকা.

১৭. তং সুত্ৱা সুমনোৰাজা, চেতিযে কম্মমাৰভি;

অমূলমেত্থ কম্মঞ্চ, ন কাতব্বন্তি ঞাপযি.

১৮. একেকস্মিং দুৱাৰস্মিং, ঠপাপেসি কহাপণে;

সোড়সসতসহস্সানি, ৱত্থানিসু বহূনি চ.

১৯. ৱিৱিধঞ্চ অলঙ্কাৰং, খজ্জংভোজ্জং সপানকং;

গন্ধমালাগুড়াদিচ, মুখৱাসকপঞ্চকং.

২০. ‘‘যথাৰুচিতং গণ্হন্তু, কম্মং কত্ৱা যথাৰুচিং;

তে তথেৱ অপেক্খিত্ৱা, অদংসু ৰাজকম্মিকা.

২১. থূপকম্মসহাযত্তং, একো ভিক্খুনিকামযং;

মত্তিকাপিণ্ডমাদায, অত্তনা অভিসঙ্খতং.

২২. গন্ত্ৱান চেতিযট্ঠানং, ৱড্ঢেত্ৱা ৰাজকম্মিকে;

অদাসি তং ৱড্ঢকিস্স, গণ্হন্তোযেৱ জানিসো.

২৩. তস্সা কাৰং ৱিদিত্ৱান, তত্থাহোসি কুতূহলং;

কমেন ৰাজা সুত্ৱান, আগতো পুচ্ছি ৱড্ঢকী.

২৪. দেৱ একেন হত্থেন, পুপ্ফানা’দায ভিক্খৱো;

একেন মত্তিকাপিণ্ডং, দেন্তি ময্হং অহং পন.

২৫. অযং আগন্তুকো ভিক্খু, অযং নেৱাসিকো ইতি;

জানামিনেৱা’তি ৱচো, সুত্ৱা ৰাজাসমপ্পযি.

২৬. একোবলত্থং দস্সেতুং, মত্তিকা দাযকং যতিং;

সো বলতস্স দস্সেসি, সো তং ৰঞ্ঞো নিৱেদযি.

২৭. জাতিমকুলকুম্ভেসো, মহাবোধঙ্গণে তযো;

ঠপাপেত্ৱা বলত্থেন, ৰাজা দাপেসি ভিক্খুনো.

২৮. অজানিত্ৱা পূজযিত্ৱা, ঠিতস্সে’তস্স ভিক্খুনো;

বলত্থো তং নিৱেদেসি, তদা তং জানি সো যতি.

২৯. কেলিৱাতে জনপদে, পিযঙ্গল্লনিৱাসিকো;

থেৰো চেতিযকম্মস্মিং, সহাযত্তং নিকামযং.

৩০. তস্সিত্থিকাৱড্ঢকিস্স, ঞাতকো ইধ আগতো;

তস্সিট্ঠিকা সমত্তেন, ঞাতো কত্ৱান ইট্ঠকং.

৩১. কম্মিযেৱড্ঢযিত্ৱান, ৱড্ঢকিস্স অদাসিতং;

সো তং তত্থ নিযোজেসি, কোলাহলমহোসি চ.

৩২. ৰাজা সুত্ৱাৱ’ তং আহ, ‘‘ঞাতুং সক্কা তমিট্ঠিকং’’;

জানন্তোপি ন সক্কাতি, ৰাজানং আহ ৱড্ঢকী.

৩৩. ‘‘জানাসি তং ত্ৱং থেৰংতি’’,

ৱুত্তো আমা’’তি ভাসিতো;

তং ঞাপনত্থং অপ্পেসি,

বলত্থং তস্স তূপতি.

৩৪. বলত্থো তেন তং ঞত্ৱা, ৰাজানুঞ্ঞাযুপাগতো;

কট্ঠহালপৰিৱেণে, থেৰং পস্সিয মন্তিয.

৩৫. থেৰস্স মগমনাহঞ্চ, গতিঠানঞ্চ জানিয;

‘‘তুম্হেহি সহ গচ্ছামি, সকং গামং’’ন্তি ভাসিয.

৩৬. ৰঞ্ঞো সব্বং নিৱেদেসি, ৰাজা তস্স অদাপযি;

ৱত্থযুগং সহস্সগ্ঘং, মহগ্ঘং ৰত্তকম্বলং.

৩৭. সামণকে পৰিক্খাৰে, বহুকে সক্খৰম্পি চ;

সুগন্ধ তেলনাড়িঞ্চ, দাপেত্ৱা অনুসাসিতং.

৩৮. থেৰেন সহ গন্ত্ৱা সো, দিস্সন্তে পিযগল্লকে;

থেৰং সীতায ছাযায, সোদকায নিসীদিয.

৩৯. সক্খৰপাণকং দত্ৱা, পাদে তেলেন মক্খিয;

উপাহনানি যোজেত্ৱা, পৰিক্খাৰে উপানযি.

৪০. কুলূপগস্স থেৰস্স, গহিতা মে ইমে মযা;

ৱত্থযুগংতু পুত্তস্স, সব্বে তানি দদামি ৱো.

৪১. ইতি ৱত্ৱান দত্ৱা তে, গহেত্ৱা গচ্ছতো পন;

ৱন্দিত্ৱা ৰাজৱচসা, ৰঞ্ঞো সন্দেসমাহ সো.

৪২. মহাথূপে কযিৰমানে, সতিযাকম্মকাৰকা;

অনেকসঙ্খাহি জনা, পসন্না সুগতিং গতা.

৪৩. চিত্তপ্পসাদমত্তেন, সুগতে গতিউত্তমা;

লব্ভতীতি ৱিদিত্ৱান, থূপপূজং কৰে বুধো.

৪৪. এত্থেৱ ভতিযা কম্মং, কৰিত্ৱা ইত্থিযো দুৱে;

তাৱতিংসম্হি নিব্বত্তা, মহাথূপম্হি নিট্ঠিতে.

৪৫. আৱজ্জিত্ৱা পুব্বকম্মং, দিট্ঠকম্মফলা উভো;

গন্ধমালা’দিযিত্ৱান, থূপং পূজেতুমাগতা.

৪৬. গন্ধমালাহি পূজেত্ৱা, চেতিযং অভিৱন্দিসুং;

তস্মিং খণে ভাতিৱঙ্ক-ৱাসী থেৰো মহাসিৱো.

৪৭. ৰত্তিভাগে মহাথূপং, ৱন্দিস্সামীতি আগতো;

তাদিস্ৱান মহাসত্ত-পণ্ণিৰুক্খম পস্সিতো.

৪৮. অদস্সযিত্ৱা অত্তানং, পস্সং সম্পত্তিমব্ভুতং;

ঠত্ৱা তাসং ৱন্দনায, পৰিযোসানে অপুচ্ছিতং.

৪৯. ‘‘ভাসতে সকলো দীপো,

দেহোভাসেন ৱো ইধ;

কিন্নুকম্মং কৰিত্ৱান,

দেৱলোকং ইতো গতা.

৫০. মহাথূপে কতং কম্মং, তস্স আহংসু দেৱতা;

এৱং তথাগতে হেৱ, পসাদো হি মহপ্ফলো.

৫১. পুপ্ফধানত্তযং থূপে, ইট্ঠিকাহি চিতং চিতং;

সমং পথৱিযা কত্ৱা, ইদ্ধিমন্তো’ৱ সীদযুং.

৫২. নৱ ৱাৰে চিতং সব্বং, এৱং ওসীদযিংসু তে;

অথ ৰাজা ভিক্খুসঙ্ঘ-সন্নিপাত মকাৰযি.

৫৩. তত্থাসীতিসহস্সানি, সন্নিপাতম্হি ভিক্খৱো;

ৰাজা সঙ্ঘমুপাগম্ম, পূজেত্ৱা অভিৱন্দিয.

৫৪. ইট্ঠকোসিদনেহেতুং, পুচ্ছি সঙ্ঘো ৱিযাকৰি;

‘‘নো সীদনত্থং থূপস্স, ইদ্ধিমন্তেহি ভিক্খূহি.

৫৫. কতং এতং মহাৰাজ, ন ইদানি কৰিস্সতে;

অঞ্ঞথত্তমকত্ৱা তং, মহাথূপং সমাপয.

৫৬. তং সুত্ৱা সুমনো ৰাজা, থূপকম্মমকাৰযি;

পুপ্ফাধানেসু দসসু, ইট্ঠিকা দসকোটিযো.

৫৭. ভিক্খুসঙ্ঘো সামণেৰে, উত্তৰং সুমনম্পি চ;

‘‘চেভিয ধাতুগব্ভত্থং, পাসাণে মেঘৱণ্ণকে.

৫৮. আহৰথা’’তি যোজেসি, তে গন্ত্ৱা উত্তৰং কুৰুং;

অসীতি ৰতনাযাম, ৱিত্থাৰে ৰৱিভাসুৰে.

৫৯. অট্ঠঙ্গুলানি বহলে, গণ্ঠিপুপ্ফনিভে সুভে;

ছমেঘৱণ্ণপাসাণে, আহৰিংসু খণেততো.

৬০. পুপ্ফধানস্স উপৰি, মজ্ঝে একং নিপাতিয;

চতুপস্সম্হি চতুৰো, মঞ্জূসং ৱিয যোজিয.

৬১. একং পিধানকত্থায, দিসাভাগে পুৰত্থিমে;

অদস্সনং কৰিত্ৱা তে, ঠপযিংসু মহিদ্ধিকা.

৬২. মজ্ঝম্হি ধাতুগব্ভস্স, তস্স ৰাজা অকাৰযি;

ৰতনমযং বোধিৰুক্খং, সব্বাকাৰমনোৰমং.

৬৩. অট্ঠাৰস ৰতনিকো, খন্ধো সাখাস্স পঞ্চ চ;

পৱালমযমূলো সো, ইন্দনীলে পতিট্ঠিতো.

৬৪. সুসুদ্ধৰজতক্খন্ধো, মণিপত্তেহি সোভিতো;

হেমমযপণ্ডুপত্ত, ফলো পৱাড়অঙ্কুৰো.

৬৫. অথ মঙ্গলিকা তস্স, খন্ধে পুপ্ফলতাপি চ;

চতুপ্পদানং পন্তীধ, হংসপন্তি চ সোভনা.

৬৬. উদ্ধং চাৰুৱিতানন্তে, মুত্তা কিং কিণিজালকা;

সুৱণ্ণ ঘণ্টাপন্তীধ, দামানি চ তহিং তহিং.

৬৭. ৱিতান চতুকোণম্হি, মুত্তাদামকলাপকো;

নৱসত সহস্সগ্ঘো, একে কো অসিলম্বিতো.

৬৮. ৰৱিচন্দতাৰ ৰূপানি, নানাপদুমকানি চ;

ৰতনেহি কতানেৱ, ধিতানে অপ্পিতান’যুং.

৬৯. অট্ঠুত্তৰসহস্সানি, ৱত্তানি ৱিৱিধানি চ;

মহগ্ঘনানাৰঙ্গানি, ৱিতানে লম্বিতান’যুং.

৭০. বোধিং পৰিক্খিপিত্ৱান, নানাৰতনৱেদিকা;

মহামলক মুত্তাহি, সন্থাৰেতু তদন্তৰে.

৭১. নানাৰতন পুপ্ফানং, চতুগন্ধূদকস্স চ;

পুণ্ণা পুণ্ণঘটপন্তি, বোধিমূলে কতান’যুং.

৭২. বোধি পাচিন পঞ্ঞত্তে, পল্লঙ্কেকোটিঅগ্ঘকে;

সোৱণ্ণ বুদ্ধপটিমং, নিসীদাপেসি ভাসুৰং.