ততিয পৰিচ্ছেদ

পঠমধম্মসংগীতি

১. পঞ্চনেত্তো জিনো পঞ্চ-চত্তালীসসমা’সমো;

ঠত্ৱা সব্বানি কিচ্চানি, কত্ৱা লোকস্স সব্বথা.

২. কুসিনাৰাযযমক-সালানমন্তৰে ৱৰে;

ৱেসাখপুণ্ণমাযং সো, দীপো লোকস্স নিব্বুতো.

৩. সঙ্খ্যাপথমতিক্কন্তা, ভিক্খূ তত্থ সমাগতা;

খত্তিযা ব্ৰাহ্মণা ৱস্সা, সুদ্ধা দেৱা তথেৱ চ.

৪. সত্তসতসহস্সানি, তেসু পামোক্খভিক্খৱো;

থেৰো মহাকস্সপোৱ, সঙ্ঘত্থেৰো তদা অহু.

৫. সত্থুসৰীৰসাৰীৰ-ধাতুকিচ্চানি কাৰিয;

ইচ্ছন্তো সো মহাথেৰো, সত্থু ধম্মচিৰট্ঠিতিং.

৬. লোকনাথে দসবলে, সত্তাহপৰিনিব্বুতে;

দুব্ভাসিতং সুভদ্দস্স, বুদ্ধস্স ৱচনং সৰং.

৭. সৰং চীৱৰদানঞ্চ, সমত্তে ঠপনং তথা;

সদ্ধম্মঠপনত্থায, মুনিনা’নুগ্গহং কতং.

৮. কাতুং সদ্ধম্মসংগীতিং, সম্বুদ্ধানমতে যতি;

নৱঙ্গসাসনধৰে, সব্বঙ্গসমুপাগতে.

৯. ভিক্খূ পঞ্চসতেযেৱ, মহাখীণাসৱে ৱৰে;

সম্মন্নি একেনূনে তু, আনন্দত্থেৰকাৰণা.

১০. পুন আনন্দত্থেৰা’পি, ভিক্খূহি অভিযাচিতো;

সম্মন্নি কাতুং সংগীতিং, সা ন সক্কা হি তং ৱিনা.

১১. সাধুকীড়নসত্তাহং, সত্তাহং ধাতুভাজনং;

ইচ্চদ্ধমাসং খেপেত্ৱা, সব্বলোকানুকম্পকা.

১২. ৱস্সং ৱসং ৰাজগহে, কস্সাম ধম্মসঙ্গহং;

নাঞ্ঞেহি তত্ত ৱত্থব্ব-মিতি কত্ৱান নিচ্ছযং.

১৩. সোকাতুৰং তত্থ তত্থ, অস্সাসেন্তো মহাজনং;

জম্বুদীপম্হি তে থেৰা, ৱিচৰিত্ৱান চাৰিকং.

১৪. আসড়্হিসুক্কপক্খম্হি, সুক্কপক্খঠিতত্থিকা;

উপাগমুং ৰাজগহং, সম্পন্নচতুপচ্চযং.

১৫. তত্থেৱ ৱস্সূপগতা, তে মহাকস্সপাদযো;

থেৰা থিৰগুণূপেতা, সম্বুদ্ধমতকোৱিদা.

১৬. ৱস্সানং পঠমং মাসং, সব্বসেনাসনেসু’পি;

কাৰেসুং পটিসঙ্খাৰং, ৱত্ৱানা’জাতসত্তুনো.

১৭. ৱিহাৰপটিসঙ্খাৰে, নিট্ঠিতে অহু ভূপতি;

ইদানি ধম্মসংগীতিং, কৰিস্সামি মযং ইতি.

১৮. কত্তব্বং কিন্তিপুট্ঠস্স, নিসজ্জঠানমাদিসুং;

ৰাজা কত্থাতি পুচ্ছিত্ৱা, ৱুত্তঠানম্হি তেহি সো.

১৯. সীঘং ৱেভাৰসেলস্স, পস্সে কাৰেসি মণ্ডপং;

সত্তপণ্ণিগুহাদ্ৱাৰে, ৰম্মং দেৱসভোপমং.

২০. সব্বথা মণ্ডযিত্ৱা তং, অত্থৰাপেসি তত্থ সো;

ভিক্খূনং গণনাযেৱ, অনগ্ঘত্থৰণানি চ.

২১. নিস্সায দক্খিণং ভাগং, উত্তৰামুখমুত্তমং;

থেৰাসনং সুপঞ্ঞত্তং, আসি তত্থ মহাৰহং.

২২. তস্মিং মণ্ডপমজ্ঝস্মিং, পুৰত্থমুখমুত্তমং;

ধম্মাসনং সুপঞ্ঞত্তং, অহোসি সুগতাৰহং.

২৩. ৰাজা’ৰোচযি থেৰানং, কম্মং নো নিট্ঠিতং ইতি;

তে থেৰা থেৰমানন্দ-মানন্দকৰমব্ৰৱুং.

২৪. স্ৱে সন্নিপাতো আনন্দ, সেখেন গমনং তহিং;

ন যুত্তন্তে সদত্থে ত্ৱং, অপ্পমত্তো ততো ভৱ.

২৫. ইচ্চেৱং চোদিতো থেৰো, কত্ৱান ৱীৰিযং সমং;

ইৰিযাপথতো মুত্তং, অৰহত্তমপাপুণি.

২৬. ৱস্সানং দুতিযে মাসে, দুতিযে দিৱসে পন;

ৰুচিৰে মণ্ডপে তস্মিং, থেৰা সন্নিপতিংসু তে.

২৭. ঠপেত্ৱা’নন্দত্থেৰস্স, অনুচ্ছৱিকমাসনং;

আসনেসু নিসীদিংসু, অৰহন্তো যথাৰহং.

২৮. থেৰো’ৰহত্তপত্তিং সো, ঞাপেতুং তেহি নাগমা;

কুহিং আনন্দত্থেৰো’তি, ৱুচ্চমানে তু কেহিচি.

২৯. নিম্মুজ্জিত্ৱা পথৱিযা, গন্ত্ৱা জোতিপথেন ৱা;

নিসীদি থেৰো আনন্দো, অত্তনো ঠপিতাসনে.

৩০. উপালিথেৰো ৱিনযে, সেসধম্মে অসেসকে;

আনন্দত্থেৰমকৰুং, সব্বে থেৰা ধুৰন্ধৰে.

৩১. মহাথেৰো সকত্তানং, ৱিনযং পুচ্ছিতুং সযং;

সম্মন্নু’পালিথেৰো চ, ৱিস্সজ্জেতুং তমেৱ তু.

৩২. থেৰাসনে নিসীদিত্ৱা, ৱিনযং তমপুচ্ছি সো;

ধম্মাসনে নিসীদিত্ৱা, ৱিস্সজ্জেসি তমেৱ সো.

৩৩. ৱিনযঞ্ঞূনমগ্গেন, ৱিস্সজ্জিতকমেন তে;

সব্বে সজ্ঝাযমকৰুং, ৱিনযং নযকোৱিদা.

৩৪. অগ্গং বহুস্সুতাদীনং, কোসাৰক্খং মহেসিনো;

সম্মন্নিত্ৱান অত্তানং, থেৰো ধম্মমপুচ্ছি সো.

৩৫. তথা সম্মন্নিয’ত্তানং, ধম্মাসনাগতো সযং;

ৱিস্সজ্জেসি তমানন্দ-ত্থেৰো ধম্মমসেসতো.

৩৬. ৱেদেহমুনিনা তেন, ৱিস্সজ্জিতকমেন তে;

সব্বে সজ্ঝাযমকৰুং, ধম্মং ধম্মত্থকোৱিদা.

৩৭. এৱং সত্তহি মাসেহি, ধম্মসংগীতি নিট্ঠিতা;

সব্বলোকহিতত্থায, সব্বলোকহি তেহি সা.

৩৮. মহাকস্সপথেৰেন, ইদং সুগতসাসনং;

পঞ্চৱস্সসহস্সানি, সমত্থং ৱত্তনে কতং.

৩৯. অতীৱ জাতপামোজ্জা, সন্ধাৰকজলন্তিকা;

সংগীতিপৰিযোসানে, ছদ্ধাকম্পি মহামহী.

৪০. অচ্ছৰিযানি চা’হেসুং, লোকেনেকানিনেকধা;

থেৰেহেৱ কতত্তা চ, থেৰিযাযং পৰম্পৰা.

৪১. পঠমং সঙ্গহং কত্ৱা, সব্বলোকহিতং বহুং;

তে যাৱতাযুকং ঠত্ৱা, থেৰা সব্বেপি নিব্বুতা.

৪২. থেৰা’পি তে মতিপদীপহতন্ধকাৰা,

লোকন্ধকাৰহননম্হি মহাপদীপা;

নিব্বাপিতা মৰণঘোৰমহানিলেন,

তেনাপি জীৱিতমদং মতিমা জহেয্যাতি.

সুজনপ্পসাদংসংৱেগত্থায কতে মহাৱংসে

পঠমধম্মসংগীতিনাম

ততিযো পৰিচ্ছেদো.