একূনতিংসতিম পৰিচ্ছেদ

থূপাৰম্ভো

১. এৱং সমত্তে সম্ভাৰে, ৱেসাখপুণ্ণমাসীযং;

পত্তে ৱিসাখনক্খত্তে, মহাথূপত্থমাৰভি.

২. হাৰেত্ৱান তহিং থূপং, থূপঠানমখাণযি;

সত্থহত্থো মহীপালো, থিৰী কাতুং মনেকধা.

৩. যোধেহি আহৰাপেত্ৱা, গুড়পাসাণকে তহিং;

কূটেহি আহনাপেত্ৱা, পাসাণে চুণ্ণিতে অথ.

৪. চম্মৱনদ্ধ পাদেহি, মহাহত্থীহি মদ্দযি;

ভূমিযা থিৰীভাৱত্থং, অত্থানত্থৱিচক্খণো.

৫. আকাস গঙ্গাপতিত-ট্ঠানে সতততিন্তকে;

মত্তিকা সুখুমা তত্থ, সমন্তা তিং সযোজনে.

৬. নৱনীত মত্তিকা’তেসা, সুখুমত্তা পপুচ্চতি;

খীণাসৱা সামণেৰা, মত্তিকা আহৰুং ততো.

৭. মত্তিকা অত্থৰাপেসি, তত্থ পাসাণকোট্টিমে;

ইট্ঠকা অত্থৰাপেসি, মত্তিকো পৰিইস্সৰো.

৮. তস্সো পৰিখৰসুধং, কুৰুৱিন্দং ততোপৰি;

তস্সো পৰিঅযোজালং, মৰুম্বন্তু ততোপৰং.

৯. আহটং সামণেৰেহি, হিমৱন্তা সুগন্ধকং;

সন্থৰাপেসি ভূমিন্দো, ফড়িকন্তু ততোপৰি.

১০. সীলাযো সন্থৰাপেসিচ্ছ ফড়িকসন্থৰো পৰি;

সব্বত্থ মত্তিকাকিচ্চে, নৱনীতৱ্হযা অহু.

১১. নিয্যাসেন কপিট্ঠস্স, সন্নিতেন ৰসোদকে;

অট্ঠঙ্গুলং বহলএতা, লোহপট্টং সীলোপৰি.

১২. মনোসিলাযতিলতে-লসন্নিতায ততো পৰি;

সত্তঙ্গুলং সজ্জুপট্টং, সন্থৰেসি ৰথেসভো.

১৩. মহাথূপ পতিট্ঠান-ঠানে এৱং মহীপতি;

কাৰেত্ৱা পৰিকম্মানি, ৱিপ্পসন্নেন চেতসা.

১৪. আসড়্হী সুক্কপক্খস্স, দিৱসম্হি চতুদ্দসে;

কাৰেত্ৱা ভিক্খুসঙ্ঘস্স, সন্নিপাতমিদং ৱদি.

১৫. মহাচেতিয মত্থায, ভদন্তামঙ্গলিট্ঠকং;

পতিট্ঠাপেস্সং স্ৱে এত্থ, সব্বো সঙ্ঘো সমেতুনো.

১৬. বুদ্ধ পূজা পযোগেন, মহাজনহীতত্থিকো;

‘‘মহাজনো’ পোসথিকো, গন্ধমালাদিগণ্হিয.

১৭. মহাথূপ পতিট্ঠান-ঠানং যাতু সুৱে’’ইতি;

চেতিয ঠান ভূসায, অমচ্চে চ নিযোজযি.

১৮. আণাপিতা নৰিন্দেন, মুনিনো পিযগাৰৱা;

অনেকেহি পকাৰেহি, তে তং ঠানমলঙ্কৰুং.

১৯. নগৰং সকলঞ্চেৱ, মগ্গঞ্চেৱ ইধাগতং;

অনেকেহি পকাৰেহি, অলঙ্কাৰযি ভূপতি.

২০. পভাতে চ চতুদ্ৱাৰে, নগৰস্স ঠপাপযি;

নহাপিতে নহাপকে চ, অপ্পকে চ বহূতথা.

২১. ৱত্থানি গন্ধমালা চ, অন্নানি মধুৰানি চ;

মহাজনত্থং ভূমিন্দো, মহাজনহিতে ৰতো.

২২. পটিযত্তানি এতানি, সাদিযিত্ৱা যথাৰুচি;

পোৰাজানপদাচেৱ থূপঠানমুপাগমুং.

২৩. সুমণ্ডিতেহি নেকেহি, ঠানন্তৰ ৱিধানতো;

আৰক্খিতো অমচ্চেহি, যথাঠানং মহীপতি.

২৪. সুমণ্ডিতাহি নেকাহি, দেৱকঞ্ঞূপমাহি চ;

নাটকীহি পৰিব্বুড়্হো, সুমণ্ডিত পস্সাধিতো.

২৫. চত্তালীস সহস্সেহি, নৰেহি পৰিৱাৰিতো;

নানা তূৰিয সঙ্ঘুট্ঠো, দেৱৰাজ ৱিলাসৱা.

২৬. মহাথূপ পতিট্ঠানং, ঠানাঠান ৱিচক্খণো;

অপৰণ্হে উপাগঞ্ছি, নন্দযন্তো মহাজনং.

২৭. অট্ঠুত্তৰসহস্সং সো, সাটকানিট্ঠপাপিয;

পুটবদ্ধানি মজ্ঝম্হি, চতুপস্সে ততো পন.

২৮. ৱত্থানি ৰাসীংকাৰেসি, অনেকানি মহীপতি;

মধুসপ্পি গুড়াদীহি চ, মঙ্গলত্থং ঠপাপযি.

২৯. নানাদেসেহিপা’গঞ্ছুং, বহৱো ভিক্খৱো ইধ;

ইধ দীপট্ঠসঙ্ঘস্স, কা কথাৱ ইধাগমে.

৩০. থেৰো’ সীতি সহস্সানি, ভিক্খূ আদায আগমা;

ৰাজগহস্স সামন্তা, ইন্দগুত্তো মহাগণী.

৩১. সহস্সানি’সিপতনা, ভিক্খূনং দ্ৱাদসা’দিয;

ধম্মসেনো মহাথেৰো, চেতিযঠানমাগমা.

৩২. সট্ঠিভিক্খুসহস্সানি, আদায ইধমাগমা;

পীযদস্সী মহাথেৰো, জেতাৰাম ৱিহাৰতো.

৩৩. ৱেসালী মহাৱনতো, থেৰোৰু বুদ্ধৰক্খিতো;

অট্ঠাৰস সহস্সানি, ভিক্খূ আদায আগমা.

৩৪. কোসম্বী ঘোসিতাৰামা, থেৰোৰু ধম্মৰক্খিতো;

তিংসভিক্খুসহস্সানি, আদায ইধ আগমা.

৩৫. আদাযুজ্জেনীযং থেৰো, দক্খিণ গিৰিতো যতি;

চত্তাৰীস সহস্সানি, অগোৰু সঙ্ঘৰক্খিতো.

৩৬. ভিক্খূনং সতসহস্সং, সট্ঠসহস্সানি চা’দিয;

পুপ্ফপুৰে’সোকৰামা, থেৰো মিত্তিণ্ণ নামকো.

৩৭. দুৱে সতসহস্সানি, সহস্সানি অসীতি চ;

ভিক্খূ গহেত্ৱানু’ত্তিণ্ণো, থেৰো কস্মিৰমণ্ডলা.

৩৮. চত্তাৰীসত সহস্সানি, সহস্সানি চ সট্ঠি চ;

ভিক্খূ পল্লৱভোগম্হা, মহাদেৱো মহামতী.

৩৯. যোননগৰা’লসন্দাসো, যোন মহাধম্মৰক্খিতো;

থেৰো তিংস সহস্সানি, ভিক্খূ আদায আগমা.

৪০. ৱঞ্ঝাটৱিৱত্তনিযা, সেনাসনা তু উত্তৰো;

থেৰো সট্ঠিসহস্সানি, ভিক্খূ আদায আগমা.

৪১. চিত্তগুত্তো মহাথেৰো, বোধিমণ্ডৱিহাৰতো;

তিংস ভিক্খুসহস্সানি, আদিযিত্ৱা ইধাগমা.

৪২. চন্দগুত্তো মহাথেৰো, ৱনৱাসপদেসতো;

আগাসীতি সহস্সানি, আদিযিত্ৱা যতী ইধ.

৪৩. সূৰিযগুত্তোমহাথেৰো, কেলাসম্হা ৱিহাৰতো;

ছন্নৱুতি সহস্সানি, ভিক্খূআদায আগমা.

৪৪. ভিক্খূনং দীপৱাসিনং, আগতানঞ্চ সব্বসো;

গণনায পৰিচ্ছেদো, পোৰাণেহি ন ভাসিতো.

৪৫. সমাগতানং সব্বেসং, ভিক্খুনং তং সমাগমে;

ৱুত্তা খীণাসৱাযেৱ, তে ছন্নৱুতিকোটিযো.

৪৬. তে মহাচেতিযঠানং, পৰিৱাৰেত্ৱা যথাৰহং;

মজ্ঝে ঠপেত্ৱা ওকাসং, ৰঞ্ঞো অট্ঠংসু ভিক্খৱো.

৪৭. পৱিসিত্ৱা তহিং ৰাজা, ভিক্খুসঙ্ঘং তথা ঠিতং;

দিস্ৱা পসন্নচিত্তেন, ৱন্দিত্ৱা হট্ঠমানসো.

৪৮. গন্ধমালাহি পূজেত্ৱা, কত্ৱান তিপদক্খিণং;

মজ্ঝে পুণ্ণঘটঠানং, পৱিসিত্ৱা সমঙ্গলং.

৪৯. সুৱণ্ণখীলে পটিমুক্কং, পৰিব্ভমনদণ্ডকং;

ৰাজতেন কতং সুদ্ধং, সুদ্ধপীতি বলোদযো.

৫০. গাহযিত্ৱা অমচ্চেন, মণ্ডিতেন সুজাতিনা;

অভিমঙ্গলভূতেন, ভূতভূতিপৰাযণো.

৫১. মহন্তং চেতিযাৱট্টং, কাৰেতুং কতনিচ্ছযো;

ভমাপযিতু মাৰদ্ধো, পৰিকম্মিত ভূমিযং.

৫২. সিদ্ধত্থো নাম নামেন, মহাথেৰো মহিদ্ধিকো;

তথাকৰোন্তং ৰাজানং, দীঘদস্সী নিৱাৰযি.

৫৩. ‘‘এৱং মহন্তং থূপঞ্চ, অযং ৰাজা’ৰভিস্সতি;

থূপে অনিট্ঠিতেযেৱ, মৰণং অস্স হেস্সতি.

৫৪. ভৱিস্সতি মহন্তো চ, থূপোদুপ্পটিসঙ্খৰো;

ইতি সো নাগতং পস্সং, মহন্তত্তং নিৱাৰযি.

৫৫. সঙ্ঘস্স চ অনুঞ্ঞায, থেৰো সম্ভাৱনাযচ;

মহন্তং কত্তুকামো’পি, গণ্হিত্ৱা থেৰভাসিতং.

৫৬. থেৰস্স উপদেসেন, তস্স ৰাজা অকাৰযি;

মজ্ঝিমং চেতিযাৱট্টং, পতিট্ঠাপেতুমিট্ঠিকা.

৫৭. সোৱণ্ণৰজতে চেৱ, ঘটে মজ্ঝেট্ঠপাপযি;

অট্ঠট্ঠ অট্ঠিতুস্সাহো, পৰিৱাৰিয তে পন.

৫৮. অট্ঠুত্তৰসহস্সঞ্চ, ঠপাপেসি নৱে ঘটে;

অট্ঠুত্তৰে অট্ঠুত্তৰে, ৱত্থানং তু সতে পন.

৫৯. ইট্ঠিকাপৱৰা অট্ঠ, ঠপাপেসি ৱিসুং ৱিসুং;

সম্মতেন অমচ্চেন, ভূসিতেন অনেকধা.

৬০. ততো একং গাহযিত্ৱা, নানামঙ্গলসঙ্খতে;

পুৰিত্থিমদিসাভাগে, পঠমং মঙ্গলিত্থিকং.

৬১. পতিট্ঠাপেসি সক্কচ্চং, মনুঞ্ঞে গন্ধকদ্দমে;

জাতিসুমন পুপ্ফেসু, পূজিতেসু তহিং পন.

৬২. অহোসি পুথৱীকম্পো, সেসা সত্তাপি সত্তহি;

পত্তিট্ঠাপেস’ মচ্চেহি, মঙ্গলানি চ কাৰযি.

৬৩. এৱং অসাড়্হমাসস্স, সুক্কপক্খে’ভিসম্মতে;

উপোসথে পন্নৰসে, পতিট্ঠাপেসি ইট্ঠিকা.

৬৪. চতুদ্দিসং ঠিতে তত্থ, মহাথেৰে অনাসৱে;

ৱন্দিত্ৱা পূজযিত্ৱা চ, সুপ্পতিতো কমেন সো.

৬৫. পুব্বুত্তৰং দিসং গন্ত্ৱা, পিযদস্সিং অনাসৱং;

ৱন্দিত্ৱান মহাথেৰং, অট্ঠাসি তস্স সন্তিকে.

৬৬. মঙ্গলং তত্থ ৱড্ঢেন্তো, তস্স ধম্মমভাসিসো;

থেৰস্স দেসনা তস্স, জনস্সা’হোসি সাত্থিকা.

৬৭. চত্তালীসসহস্সানং, ধম্মাভিসমযো অহু;

চত্তালীসসহস্সানং, সোতাপত্তিফলং অহু.

৬৮. সহস্সং সকদাগামি, অনাগামি চ তত্তকা;

সহস্সংযেৱ অৰহন্তো, তত্থ’হেসুং গিহীজনা.

৬৯. অট্ঠাৰসসহস্সানি, ভিক্খূভিক্খুনিযো পন;

চুদ্দসেৱ সহস্সানি, অৰহত্তে পতিট্ঠযুং.

৭০. এৱম্পপসন্নমতিমা ৰতনত্তযম্হি,

চাগামিমুত্তমনসাজনতাহি তেন;

লোকত্থসিদ্ধি পৰমা ভৱতীতি ঞত্ৱা,

সদ্ধাদিনেকগুণযোগ ৰতিং কৰেয্যাতি.

সুজনপ্পসাদসং ৱেগত্থায কতে মহাৱংসে

থূপাৰম্ভো নাম

একূনতিংসতিমো পৰিচ্ছেদো.