অট্ঠৱীসতিম পৰিচ্ছেদ

মহা থূপসাধন লাভো

১. ততো সতসহস্সং সো, ৱিস্সজ্জেত্ৱা মহীপতি;

কাৰাপেসি মহাবোধি-পূজং সুড়াৰমুত্তমং.

২. ততো পুৰং পৱিসিন্তো, থূপঠানে নিৱেসিতং;

পস্সিত্ৱান সীলাযূপং, সৰিত্ৱা পুব্বকং সুতিং.

৩. ‘‘কাৰেস্সামি মহাথূপং’’, ইতি হট্ঠো মহাতলং;

আৰুয্হ ৰত্তিং ভুঞ্জিত্ৱা, সযিতো ইতি চিন্তযি.

৪. ‘‘দমিড়ে মদ্দমানেন, লোকো’যং পীড়িতো মযা;

ন সক্কা বলিমুদ্ধত্তুং, তং ৱজ্জিয বলিং অহং.

৫. কাৰযন্তো মহাথূপং, কতং ধম্মেন ইট্ঠিকা;

উপ্পাদেস্সামি ‘‘ইচ্চেৱং, চিন্তযন্তস্স চিন্তিতং.

৬. ছত্তম্হি দেৱতাজানী, ততো কোলাহলং অহু;

দেৱেসু ঞত্ৱা তং সক্কো, ৱিস্সকম্মান মব্ৰৱি.

৭. ‘‘ইট্ঠকত্তং চেতিযস্স, ৰাজা চিন্তেসি গামণি;

গন্ত্ৱা পুৰা যোজনম্হি, গম্ভীৰ নদী যন্তিকে.

৮. মাপেহি ইট্ঠিকা তত্তং’, ইতি সক্কে ন ভাসিতো;

ৱিস্সকম্মো ইধাগম্ম, মাপেসি তত্থ ইট্ঠিকা.

৯. পভাতে লুদ্দকো তত্থ, সুনখেহি ৱনং অগা;

ৱোধাৰূপেন দস্সেসি, লুদ্দকং ভুম্মদেৱতা.

১০. লুদ্দকো তং’নুবন্ধন্তো, গন্ত্ৱা দিস্ৱান ইট্ঠকা;

অন্তৰহিতায গোধায, ইতি চিধন্তসি সো তহিং.

১১. ‘‘কাৰেতু কামো কিৰ নো, মহাথূপং মহীপতি;

উপাযনমিদং তস্সং’, ইতি গন্ত্ৱা নিৱেদযি.

১২. তস্স তং ৱচনং সুত্ৱা, পিযং জনহি তপ্পিযো;

ৰাজা কাৰেসি সক্কাৰং, মহন্তং তুট্ঠমানসো.

১৩. পুৰাপুব্বুত্তৰে দেসে, যোজনত্তয মত্থকে;

আচাৰ ৱিট্ঠিগামম্হি, সোড়সকৰীসে কলে.

১৪. সোৱণ্ণ বীজানু’ট্ঠিংসু, ৱিৱিধানি পমাণতো;

ৱিদত্থুক্কট্ঠ মাণানি, অঙ্গুলিমাণা নিহেঠতো.

১৫. সুৱণ্ণ পুণ্ণং তং ভূমিং, দিস্ৱা সঙ্গামৱাসিকা;

সুৱণ্ণ পাহিং আদায, গন্ত্ৱা ৰঞ্ঞো নিৱেদযুং.

১৬. পুৰাপাচিন পস্সম্হি, সত্ত যোজন মত্থকে;

গঙ্গাপাৰে তম্বপিট্ঠে, তম্বলোহং সমুট্ঠহি.

১৭. তঙ্গামিকা তম্বলোহ-বীজমাদায পাতিযা;

ৰাজান মুপসঙ্কম্ম, তমত্থঞ্চ নিৱেদযুং.

১৮. পুব্বদক্খিণদেসম্হি, পুৰতো চতুযোজনে;

সুমন ৱাপি গামম্হি, উট্ঠহিংসু মণীবহূ.

১৯. উপল কুৰুৱিন্দেহি, মিস্সকানেৱ গামিকা;

আদায পাতিযাএৱ, গন্ত্ৱা ৰঞ্ঞো নিৱেদযুং.

২০. পুৰতো দক্খিণে পস্সে, অট্ঠযোজনমত্থকে;

অম্বট্ঠ কোললেণম্হি, ৰজতং উপপজ্জথ.

২১. নগৰে ৱাণিজো একো, আদায সকটে বহূ;

মলযা সিঙ্গীৱেৰাদিং, আনেতুং মলযং গতো.

২২. লেণস্স অৱিদূৰম্হি, সকটানিট্ঠ পাপিয;

পতোদাদাৰুনিচ্ছন্তো, আৰুড়্হো তং মহীধৰং.

২৩. চাটিপ্পমাণ তং তত্থ, পক্কভাৰেন নামি তং;

দিস্ৱা পন সলট্ঠিঞ্চ, পাসাণট্ঠঞ্চ তং ফলং.

২৪. ৱণ্টে তং ৱাসিযা ছেত্ৱা, দস্সাম’গ্গন্তি চিন্তিয;

কালং ঘোসেসি সদ্ধায, চত্তাৰো’নাসৱাগমুং.

২৫. হট্ঠো সো তে’ভিৱাদেত্ৱা, নিসীদাপিয সাদৰো;

ৱাসিযা ৱণ্টসামন্তা, তচং ছেত্ৱা অপস্সযং.

২৬. মুঞ্জিত্ৱা’ৱাট পুণ্ণং তং, যূসং পত্তেহী আদিয;

চত্তাৰো যূস পূৰেতে, পত্তে তেসমদাসিসো.

২৭. তে তং গহেত্ৱা পক্কামুং,

কালং ঘোসেসি সো পুন;

অঞ্ঞে খিণাসৱা থেৰা,

চত্তাৰো তত্থ আগমুং.

২৮. তেসং পত্তে গহেত্ৱা সো, পত্তামিঞ্জহি পূৰিয;

অদাসি তেসং পক্কামুং, তযো একো নপক্কমি.

২৯. ৰজতং তস্স দস্সেতুং, ওৰোহিত্ৱা ততো হি সো;

নিসজ্জ লেণাসন্নম্হি, তামিঞ্জা পৰিভুঞ্জথ.

৩০. সেসামিঞ্জা ৱাণিজো’পি, ভুঞ্জিত্ৱা যাৱদত্থকং;

ভণ্ডিকায গহেত্ৱান, সেসথেৰপদানুগো.

৩১. অঞ্জসা ইমিনা ত্ৱম্পি, গচ্ছ দানী উপাসক;

গন্ত্ৱান থেৰং পস্সিত্ৱা, ৱেয্যাৱচ্চ মহাসি চ.

৩২. থেৰো চ লেণদ্ৱাৰেন, তস্স মগ্গ অমাপযি;

থেৰং ৱন্দিয সো তেন, গচ্ছন্তো লেণমদ্দস.

৩৩. লেণ দ্ৱাৰম্হি ঠত্ৱান, পস্সিত্ৱা ৰজতম্পি সো;

ৱাসিযা আহনিত্ৱান, ৰজততি ৱিজানিয.

৩৪. গহেত্ৱেকং সজ্ঝুপিণ্ডং, গন্ত্ৱান সকটন্তিকং;

সকটানি ঠপাপেত্ৱা, সজ্ঝুপিণ্ডং তমাদিয.

৩৫. লহুং অনুৰাধ পুৰং, আগম্ম ৱৰৱাণিজো;

দস্সেত্ৱা ৰজতং ৰঞ্ঞো, তমত্থম্পি নিৱেদযি.

৩৬. পুৰতো পচ্ছিমে পস্সে, পঞ্চযোজন মত্থকে;

উৰুৱেলপট্টনে মুত্তা, মহামলক মত্তিযো.

৩৭. পৱালন্তৰিকা সদ্ধিং, সমুদ্দাথলমোক্কমুং;

কেৱট্টা তা সমেক্খিত্ৱা, ৰাসিং কত্ৱান একতো.

৩৮. পাতিযা আনযিত্ৱান, মুত্তা সহ পৱালকা;

ৰাজান মুপসঙ্কম্ম, তমত্থম্পি নিৱেদযুং.

৩৯. পুৰতো উত্তৰে পস্সে, সত্ত যোজন মত্থকে;

পেড়িৱাপিক গামস্স, ৱাপিপক্খন্তকন্দৰে.

৪০. জাযিংসু ৱালুকাপিট্ঠে, চত্তাৰো উত্তমা মণী;

নীসদ পোতপ্পমাণা, উম্মাপুপ্ফনিভাসুভা.

৪১. তে দিস্ৱা সুনখো লুদ্দো, অগন্ত্ৱা ৰাজসন্তিকং;

‘‘এৱৰূপা মণীদিট্ঠো, মযা’’ইতি নিৱেদযি.

৪২. ইট্ঠকাদীনি এতানি মহাপুঞ্ঞো মহামতি;

মহাথূপত্থমুপ্পন্না-ন’স্সোসি তদহেৱ সো.

৪৩. যথানুৰূপং সক্কাৰং, তেসং কত্ৱা সুমানতো;

এতে ৱা ৰক্খকে কত্ৱা, সব্বানি আহৰাপযি.

৪৪. খেদম্পি কাযজমসয্হমচিন্তযিত্ৱা,

পুঞ্ঞং পসন্নমনসো পচিত হি এৱং;

সাধেতি সাধন সতানি সুখা কৰানি,

তস্মা পসন্নমনসো’ৱ কৰেয্য পুঞ্ঞন্তি.

সুজনপ্পসাদসংৱেগত্থায কতে মহাৱংসে

মহাথূপসাধনলাভো নাম

অট্ঠৱীসতিমো পৰিচ্ছেদো.