সত্তৱীসতিম পৰিচ্ছেদ

লোহপাসাদমহো

১. ততো ৰাজা ৱিচিন্তেসি, ৱিস্সুতং সুস্সুতং সুতং;

মহাপঞ্ঞো সদা পুঞ্ঞো, পঞ্ঞায কতনিচ্ছযো.

২. ‘‘দীপপ্পসাদকো থেৰো, ৰাজিনো অয্যকস্স মে;

এৱং কিৰাহনত্তা তে, দুট্ঠগামণিভূপতি.

৩. মহাপুঞ্ঞো মহাথূপং, সোণ্ণমালিং মনোৰমং;

ৱীসংহত্থসতং উচ্চং, কাৰেস্সতি অনাগতে.

৪. পুনো উপোসথাগাৰং, নানাৰতনমণ্ডিতং;

নৱভূমং কৰিত্ৱান, লোহপাসাদ মেৱ চ.

৫. ইতি চিন্তিয ভূমিন্দো, লিখিত্ৱেৱং ঠপাপিতং;

পেক্খাপেন্তো ৰাজগেহে, ঠিতং এৱ কৰণ্ডকে.

৬. সোৱণ্ণপট্টং লদ্ধান, লেখং তত্থ অৱাচযি;

‘‘চত্তালীসসতং ৱস্সং, অতিক্কম্ম অনাগতে.

৭. কাকৱণ্ণসুতো দুট্ঠ-গামণিমনুজাধিপো;

ইদঞ্চিদঞ্চ এৱঞ্চ, কাৰেস্সতী’’তি ৱাচিতং.

৮. সুত্ৱা হট্ঠো উদানেত্ৱা, অপ্পোট্ঠেসি মহীপতি;

ততো পাতো’ৱ গন্ত্ৱান, মহামেঘৱনং সুভং.

৯. সন্নিপাতং কাৰযিত্ৱা, ভিক্খুসঙ্ঘস্স অব্ৰৱি;

‘‘ৱিমানতুল্যং পাসাদং, কাৰযিস্সামি ৱো অহং.

১০. দিব্বং ৱিমানং পেসেত্ৱা, তদা লেখং অদাথ মে’’;

ভিক্খুসঙ্ঘো ৱিসজ্জেসি, অট্ঠ খীণাসৱে তহিং.

১১. কস্সপমুনিনো কালে, অসোকো নাম ব্ৰাহ্মণো;

অট্ঠ সলাকভত্তানি, সঙ্ঘস্স পৰিণামিয.

১২. ভৰণিং নাম দাসিং সো, ‘‘নিচ্চং দেহী’’তি অব্ৰৱি;

দত্ৱা সা তানি সক্কচ্চং, যাৱজীৱং ততো চুতা.

১৩. আকাসট্ঠৱিমানম্হি, নিব্বত্তিৰুচিৰে সুভে;

অচ্ছৰানং সহস্সেন, সদা’সি পৰিৱাৰিতা.

১৪. তস্সা ৰতনপাসাদো, দ্ৱাদসযোজনুগ্গতো;

যোজনানং পৰিক্খেপো, চত্তালীসঞ্চ অট্ঠ চ.

১৫. কূটাগাৰসহস্সেন, মণ্ডিতো নৱভূমিকো;

সহস্সগব্ভসম্পন্নো, ৰাজমানো চতুম্মুখো.

১৬. সহস্সসঙ্খসংৱুত্তি, সীহপঞ্জৰ নেত্তৱা;

সকিঙ্কণিকজালায, সজ্জিতো ৱেদিকায চ.

১৭. অম্বলট্ঠিকপাসাদো, তস্স মজ্ঝে ঠিতো অহু;

সন্তমতো দিস্সমানো, পগ্গহিতধজাকুলো.

১৮. তাৱতিংসঞ্চ গচ্ছন্তা, দিস্ৱা থেৰং তমেৱ তে;

হিঙ্গুলেন তদা লেখং, লেখযিত্ৱা পটে ততো.

১৯. নিৱত্তিত্ৱান আগন্ত্ৱা, পটং সঙ্ঘস্স দস্সযুং;

সঙ্ঘো পটং গহেত্ৱা তং, পাহেসি ৰাজসন্তিকং.

২০. তং দিস্ৱা সুমনো ৰাজা, আগম্মাৰাম মুত্তমং;

আলেখতুল্যং কাৰেসি, লোহপাসাদ মুত্তমং.

২১. কম্মাৰম্ভনকালেৱ, চতুদ্ৱাৰম্হি ভোগৱা;

অট্ঠসতসহস্সানি, হিৰঞ্ঞানি ঠপাপযি.

২২. পুটসহস্স ৱত্থানি, দ্ৱাৰে দ্ৱাৰে ঠপাপযি;

গুড় তেলসক্খৰমধু-পুৰা চানেক চাটিযো.

২৩. ‘‘অমূলককম্ম মেত্থ, ন কাতব্ব’’ন্তি ভাসিয;

অগ্ঘাপেত্ৱা কতং কম্মং, তেসং মূলমদাপযি.

২৪. হত্থসতং হত্থসতং, আসি একেক পস্সতো;

উচ্চতো তত্তকোযেৱ, পাসাদো হি চতুম্মুখো.

২৫. তস্মিং পাসাদ সেট্ঠস্মিং, অহেসুং নৱভূমিযো;

একেকিস্সা ভূমিযা চ, কূটাগাৰসতানি চ.

২৬. কূটাগাৰানি সব্বানি, সজ্ঝুনা খচিতা ন’যুং;

পৱালৱেদিকা তেসং, নানাৰতন ভূসিতা.

২৭. নানাৰতন চিত্তানি, তাসং পদুমকানি চ;

সজ্ঝকিংকিণিকাপন্তি-পৰিক্খিত্তাৱ তা অহু.

২৮. সহস্সং তত্থ পাসাদো, গব্ভা আসুং সুসঙ্খতা;

নানাৰতন খচিতা, সীহপঞ্জৰনেত্তৱা.

২৯. নাৰিৱাহনযানন্তু, সুত্ৱা ৱেস্সৱণস্স সো;

তদা কাৰমকাৰেসি, মজ্ঝে ৰতনমণ্ডপং.

৩০. সীহব্যগ্ঘাদিৰূপেহি, দেৱতা ৰূপকেহি চ;

অহু ৰতনমযোহে’স, থম্ভেহি চ ৱিভূসিতো.

৩১. মুত্তাজালপৰিক্খেপো, মণ্ডপন্তে সমন্ততো;

পৱালৱেদিকা চেত্থ, পুব্বে ৱুত্তৱিধা অহু.

৩২. সত্তৰতন চিত্তস্স, ৱেমজ্ঝে মণ্ডপস্স তু;

ৰুচিৰো দন্তপল্লঙ্কো, ৰম্মো ফলিকসন্থৰো.

৩৩. দন্তমযাপস্সযে’ত্থ, সুৱণ্ণময সূৰিযো;

সজ্ঝুমযে চন্দিমা চ, তাৰা চ মুত্তকা মযা.

৩৪. নানাৰতন পদুমানি, তত্থ তত্থ যথাৰহং;

জাতকানি চ তত্থেৱ, আসুং সোণ্ণলতন্তৰে.

৩৫. মহগ্ঘপচ্চত্থৰণে, পল্লঙ্কে’তি মনোৰমে;

মনোহৰা’সিট্ঠপিতা, ৰুচিৰং দন্তবীজনী.

৩৬. পৱালপাদুকা তত্থ, ফলিকম্হি পতিট্ঠিতা;

সেতচ্ছত্তং সজ্ঝুদণ্ডং, পল্লঙ্কো’পৰিসোভথ.

৩৭. সত্তৰতন মযানেত্থ, অট্ঠমঙ্গলিকানি চ;

চতুপ্পদানং পন্তী চ, মণিমুত্তন্তৰা অহুং.

৩৮. ৰজতানঞ্চ ঘণ্টানং, পন্তী ভত্তন্তলম্বিতা;

পাসাদছত্তপল্লঙ্ক-মণ্ডপা’সুং অনগ্ঘিকা.

৩৯. মহগ্ঘ পঞ্ঞপাপেসি, মঞ্চপীঠং যথাৰহং;

তথেৱ ভূমত্থৰণং, কম্বলঞ্চ মহাৰহং.

৪০. আচাম কুম্ভিসোৱণ্ণা, উলুঙ্কো চ অহু তহিং;

পাসাদ পৰিভোগেসু, সেসেসু চ কথা’ ৱকা.

৪১. চাৰুপাকাৰ পৰিৱাৰো,

সো চতুদ্ৱাৰকোট্ঠকো;

পাসাদো’লঙ্কতো সোভি,

তাৱতিংস সভা ৱিয.

৪২. তম্ব লোহিট্ঠকাহে’সো,

পাসাদো ছাদিতো অহু;

লোহ পাসাদ ৱোহাৰো,

তেন তস্স অজাযথ.

৪৩. নট্ঠিতে লোহপাসাদে, সো সঙ্ঘং সন্নিপাতযি;

ৰাজা সঙ্ঘো সন্নিপতি, মৰিচৱট্টিমহে ৱিয.

৪৪. পুথুজ্জনা’ৱ অট্ঠংসু, ভিক্খূ পঠমভূমিযং;

তেপিটকা দুতিযায, সোতাপন্নাদযো পন.

৪৫. একে কেযেৱ অট্ঠংসু, ততিযাদীসু ভূমিসু;

অৰহন্তো চ অট্ঠংসু, উদ্ধং চতূসু ভূমিসু.

৪৬. সঙ্ঘস্স দত্ৱা পাসাদং, দক্খিণম্বুপুৰস্সৰং;

ৰাজা’দত্থ মহাদানং, সত্তাহং পুব্বকং পিয.

৪৭. পাসাদ মহচত্তানি, মহাচাগেন ৰাজিনা;

অনগ্ঘানি ঠপেত্ৱান, অহেসুং তিংসকোটিযো.

৪৮. নিস্সাৰে ধননিচযে ৱিসেসসাৰং,

যে দানং পৰিগণযন্তি সাধুপঞ্ঞা;

তে দানং ৱিপুলমপেত চিত্তসঙ্গা,

সত্তানং হিতপৰমা দদন্তি এৱংতি.

সুজনপ্পসাদসংৱেগত্থায কতে মহাৱংসে

লোকহপাসাদমহো নাম

সত্তৱীসতিমো পৰিচ্ছেদো.