ছব্বীসতিম পৰিচ্ছেদ

মৰিচৱট্টিকৱিহাৰমহো

১. একচ্ছত্তং কৰিত্ৱান, লংকাৰজ্জং মহাযসো;

নানন্তৰং সংৱিদহি, যোধানং সো যথাৰহং.

২. থেৰপুত্তাভযো যোধো, দিয্যমানং ন ইচ্ছিতং;

পুচ্ছিতোৱ কিমত্থন্তি, যুদ্ধমত্থীতি অব্ৰৱি.

৩. একৰজ্জে কতে যুদ্ধং, কিনামত্তীতি পুচ্ছিতো;

যুদ্ধং কিলেস চোৰেহি, কৰিস্সামি সুদুজ্জযং.

৪. ইচ্চেৱ মাহ তং ৰাজা, পুনপ্পুনং নিসেধযি;

পুনপ্পুনং সোযাচিত্ৱা, ৰঞ্ঞোনুঞ্ঞায পব্বজি.

৫. পব্বজিত্ৱা চ কালেন, অৰহত্তমপাপুণি;

পঞ্চখীণাসৱসত-পৰিৱাএৰা অহোসি চ.

৬. ছত্তমঙ্গল সত্তাহে, গতে গতভযো’ ভযো;

ৰাজা কতা ভিসেকোৱ, মহতা ৱিভৱেন সো.

৭. তিস্সৱাপি’মগা কীড়-ৱিধিনা সমলঙ্ক তং;

কীড়িতুং অভিসিত্তানং, চাৰিত্তঞ্চা নুৰক্খিতুং.

৮. ৰঞ্ঞো পৰিচ্ছদং সব্বং, উপাযনসতানি চ;

মৰিচৱট্টিৱিহাৰস্স, ঠানম্হি ঠপযিংসু চ.

৯. তত্থেৱ থূপঠানম্হি, সধাতুং কুন্তমুত্তমং;

ঠপেসুং কুন্তধৰকা, উজুকং ৰাজমানুসা.

১০. সহোৰোধো মহাৰাজা, কীড়িত্ৱা সলিলে দিৱা;

সাযমাহং গমিস্সাম, কুন্তং ৱড্ঢেথ ভো’’ইতি.

১১. চালেতুং তং ন সক্খিংসু, কুন্তং ৰাজাধিকাৰিকা;

গন্ধামালাহি পূজেসুং, ৰাজসেনাসমাগতা.

১২. ৰাজা মহন্তং অচ্ছেৰং, দিস্ৱা তং হট্ঠমানসো;

ৱিধায তত্থ আৰক্খং, পৱিসিত্ৱা পুৰং ততো.

১৩. কুন্তং পৰিক্খিপাপেত্ৱা, চেতিযং তত্থ কাৰযি;

থূপং পৰিক্খিপাপেত্ৱা, ৱিহাৰঞ্চ অকাৰযি.

১৪. তীহি ৱস্সেহি নিঠাসি, ৱিহাৰো সো নৰিস্সৰো;

সঙ্ঘং সসন্নিপাতেসি, ৱিহৰমহাকাৰণা.

১৫. ভিক্খুনং সতসহস্সানি, তদা ভিক্খুনিযো পন;

নৱুতি চ সহস্সানি, অভৱিংসু সমাগতা.

১৬. তস্মিং সমাগমে সঙ্ঘং, ইদমাক মহীপতি;

‘‘সঙ্ঘং ভন্তে ৱিসৰিত্ৱা, ভুঞ্জিং মৰিচৱট্টিকং.

১৭. হস্সে’তং দণ্ডকম্মং মে, ভৱতূতি অকাৰযি;

সচেতিযং মৰিচৱট্টি-ৱিহাৰং সুমনোহৰং.

১৮. পতিগ্গণ্হাতু তং সঙ্ঘো, ইতি সো দক্খিণোদকং;

পাতিত্ৱা ভিক্খুসঙ্ঘস্স, ৱিহাৰং সুমনো অদা.

১৯. ৱিহাৰে তং সমন্তাপি, মহন্তং মণ্ডপং সুভং;

কাৰেত্ৱা তত্থ সঙ্ঘস্স, মহাদানং পৱত্তযি.

২০. পাদে পতিট্ঠাপেত্ৱাপি,

জলে অভযৱাপিযা;

কতো সো মণ্ডপো আসি,

সেসো কাসে কথাৱকা.

২১. সত্তাহং অন্নপানাদিং, দত্ৱান মনুজাধিপো;

অদা সামণকং সব্বং, পৰিক্খাৰং মহাৰহং.

২২. অহু সতসহস্সগ্ঘো, পৰিক্খাৰো স আদিকো;

অন্তে সহস্সগ্ঘনকো, সব্ব সঙ্ঘো চ তংলভি.

২৩. যুদ্ধে দানে চ সূৰেন, সূৰিনা ৰতনত্তযে;

পসন্নামলচিত্তেন, সাসনুজোত নত্থিনা.

২৪. ৰঞ্ঞা কতঞ্ঞুনা তেন, থূপকাৰাপনাদিতো;

ৱিহাৰ মহনন্তানি, পূজেতুং ৰতনত্তযং.

২৫. পৰিচ্চত্তধনানে’ত্থ, অনগ্ঘানি ৱিমুঞ্চিয;

সেসানি হোন্তি একায, ঊনৱীসতিকোটিযো.

২৬. তোগা দসদ্ধৱিধ দোসৱিদূসিতাপি,

পঞ্ঞাৱিসেস সহিতেহি জনেহি পত্তা;

হোন্তেৱ পঞ্চগুণযোগ গহিতসাৰং,

ইচ্চস্স সাৰগহণে মতিমাযতেয্যাতি.

সুজনপ্পসাদসংৱেগত্থায কতে মহাৱংসে

মৰিচৱট্টিকৱিহাৰমহোনাম

ছব্বীসতিমো পৰিচ্ছেদো.