পঞ্চৱীসতিম পৰিচ্ছেদ

দুট্ঠগামণি ৱিজযো

১. দুট্ঠগামণিৰাজা’থ, কত্ৱান জনসঙ্গহং;

কুন্তে ধাতুং নিধাপেত্ৱা, সযোগ্গবলৱাহনো.

২. গন্ত্ৱা তিস্সমহাৰামং, ৱন্দিত্ৱা সঙ্ঘমব্ৰৱি;

‘‘পাৰগঙ্গং গমিস্সামি, জোতেতুং সাসনং অহং.

৩. সক্কাতুং ভিক্খৱো দেথ, অম্হেহি সহগামিনো;

মঙ্গলঞ্চেৱ ৰক্খা চ, ভিক্খূনং দস্সনং হিনো.

৪. অদাসি দণ্ডকম্মত্থং, সঙ্ঘো পঞ্চসতং যতী;

ভিক্খুসঙ্ঘতমাদায, ততো নিক্খম্ম ভূপতি.

৫. সোধাপেত্ৱান মলযে, ইধাগমনমঞ্জসং;

কণ্ডুলং হত্থিমাৰুয্হ, যোধেহি পৰিৱাৰিতো.

৬. মহতা বলকাযেন, যুদ্ধায অভিনিক্খমি;

মহাগামেন সম্বদ্ধা, সেনাগা’গুত্তহালকং.

৭. মহিযঙ্গণমাগম্ম, ছত্তং দমিড়মগ্গহী;

ঘাতেত্ৱা দমিড়ে তত্থ, আগন্ত্ৱা অম্বতিত্থকং.

৮. গঙ্গা পৰিখাসম্পন্নং, তিত্থম্বদমিড়ং পন;

যুজ্ঝং চতূহি মা সেহি, কতহত্থং মহব্বলং.

৯. মাতৰং দস্সযিত্ৱান, তেন লেসেন অগ্গহি;

ততোওৰুয্হ দমিড়ে, সত্তৰাজে মহব্বলে.

১০. একাহেনেৱ গণ্হিত্ৱা, খেমং কত্ৱা মহব্বলো;

বলস্সা’দা ধনং তেন, খেমাৰামোতি ৱুচ্চতি.

১১. মহাকোট্ঠন্তৰে সোব্ভে, দোণো গৱৰমগ্গহী;

হালকোলে ইস্সৰিযং, নাড়িসোব্ভম্হি নাড়িকং.

১২. দীঘাভযগল্লকম্হি, গণ্হি দীঘাভযম্পি চ;

কচ্ছিপিট্ঠে কপিসীসং, চতুমাসেন অগ্গহি.

১৩. কোটনগৰে কোটঞ্চ, ততো হালৱহাণকং;

ৱহিট্ঠে ৱহিট্ঠদমিড়ং, গামণিম্হি চ গামণিং.

১৪. কুম্ভগামম্হি কুম্ভঞ্চ, নন্দিগামম্হি নন্দিকং;

গণ্হি খাণুং খাণুগামে, দ্ৱে তু তম্বুণ্ণমে পন.

১৫. মাতুলং ভাগিনেয্যঞ্চ, তম্বউণ্ণমনামকে;

জম্বুচগ্গহী সোসো চ, গামো’হু তং তদৱ্হযো.

১৬. ‘‘অজানিত্ৱা সকংসেনং, ঘাতেন্তি সজনা’’ ইতি;

সুত্ৱান সচ্চকিৰিযং, অকৰী তত্থ ভূপতি.

১৭. ৰজ্জসুখায ৱাযামো, নাযং মম কদাচিপি;

সম্বুদ্ধ সাসনস্সেৱ, ঠপনায অযং মম.

১৮. তেন সচ্চেন মেসেনা-কাযোপগতভণ্ডিকং;

জালৱণ্ণংৱ হোতূতি, তং তথেৱতদা অহু.

১৯. গঙ্গাতীৰম্হি দমিড়া, সব্বে ঘাতিতসেসকা;

ৱিজিতং নগৰং নাম, সৰণত্থায পাৱিসুং.

২০. ফাসুকে অঙ্গণঠানে, খন্ধাৱাৰং নিৱেসযি;

তং খন্ধাৱাৰ… ঠীতি, নামেনা’হোসি পাকটং.

২১. ৱিজিতনগৰগাহত্থং, ৱীমংসন্তো নৰাধিপো;

দিস্ৱা’যন্তং নন্দিমিত্তং, ৱিসজ্জাপেসি কণ্ডুলং.

২২. গণ্হিতুং আগতং হত্থিং, নন্দীমিত্তো কৰেহিতং;

উভো দন্তে পীড়যিত্ৱা, উক্কুটিকং নিসীদযি.

২৩. হত্থিনা নন্দিমিত্তো তু, যস্মা যত্থ অযুজ্ঝি সো;

তস্মা তত্থ ততো গামো, হত্থিপোৰোতি ৱুচ্চতি.

২৪. ৱীমংসিত্ৱা উভো ৰাজা, ৱিজিতং নগৰং অগা;

যোধানং দক্খিণদ্ৱাৰে, সঙ্গামো আসি ভিংসনো.

২৫. পুৰত্থিমম্হি দ্ৱাৰম্হি, সো ৱেড়ুসুমনো পন;

অনেক সঙ্খে দমিড়ে, অস্সাৰুড়্হে অঘাতযি.

২৬. দ্ৱাৰং থকেসুং দমিড়া, ৰাজা যোধে ৱিসজ্জযি;

কণ্ণুলো নন্দিমিত্তো চ, সুৰনিমিলো চ দক্খিণে.

২৭. মহাসোণো চ গোট্ঠো চ,

থেৰ পুত্তো চ তে তযো;

দ্ৱাৰেসু তীসু কম্মানি,

ইতৰেসু তদা কৰুং.

২৮. নগৰং তং তিপৰিখং, উচ্চপাকাৰ গোপিতং;

অযোকম্মকতদ্ৱাৰং, অৰীহি দুপ্পধংসিযং.

২৯. জাণূহি ঠত্ৱা দাঠাহি, ভিন্দিত্ৱান সিলাযুধা;

ইট্ঠকা চেৱ হত্থি সো, অযোদ্ৱাৰমুপাগমি.

৩০. গোপুৰট্ঠা তু দমিড়া, খিপিংসু ৱিৱিধা’যুধে;

পক্কং অযোগুড়ঞ্চেৱ, কথিকঞ্চ সিলেসিকং.

৩১. পিট্ঠিং খিত্তে সিলেসম্হি, ধূপাযন্তে’থ কণ্ডুলো;

ৱেদনট্টো’দকঠানং, গন্ত্ৱান তত্থ ওগহী.

৩২. ন ইদং সুৰাপাণং তে, অযোদ্ৱাৰ ৱিঘাটনং;

গচ্ছ দ্ৱাৰং ৱিঘাটেহি, ইচ্চাহগোট্ঠযিম্বৰো.

৩৩. সো মানং জনযিত্ৱান, কোঞ্চং কত্ৱা গজুত্তমো;

উদকা উট্ঠহিত্ৱান, থলে অট্ঠাসি দপ্পৱা.

৩৪. হত্থিৱজ্জে ৱিযোজেত্ৱা, সিলেসং ওসধং অকা;

ৰাজা আৰুয্হ হত্থিং তং, কুম্ভে ফুসিযপাণিনা.

৩৫. ‘‘লংকাদীপম্হি সকলে, ৰজ্জং তে তাত কণ্ডুল;

দম্মী’’তি তং তোসযিত্ৱা, ভোজেত্ৱা ৱৰভোজনং.

৩৬. ৱেঠযিত্ৱা সাটকেন, কাৰযিত্ৱা সুৱম্মিতং;

সত্তগুণং মাহিসচম্মং, বন্ধেত্ৱা চম্মপিট্ঠিযং.

৩৭. তস্সো’ পৰিতেলচম্মং, দাপেত্ৱা তং ৱিসজ্জযি;

অসনীৱিয গজ্জন্তো, সো গহেত্ৱা’পদ্দৱে সহ.

৩৮. পদৰং ৱিজ্ঝি দাঠাহি, উম্মাৰং পদসা’হনি;

সদ্ধাৰবাহং তং দ্ৱাৰং, ভূমিযং সৰৱং পতি.

৩৯. গোপুৰে দব্বসম্ভাৰং, পতন্তং হত্তিপিট্ঠিযং;

বাহাহি পৰিহৰিত্ৱান, নন্দীমিত্তো পৱট্টযি.

৪০. দিস্ৱান তস্স কিৰিযং, কণ্ডুলো তুট্ঠমানসো;

দাঠাপীঠনৱেৰং তং, ছড্ঢেসি পঠমং কতং.

৪১. অত্থনো পিট্ঠিতোযেৱ, পৱেসত্থায কণ্ডুলো;

নিৱত্তিত্ৱান ওলোকি, যোধং তত্থ গজুত্তমো.

৪২. ‘‘হত্থিনাকতমগ্গেন, নপ্পৱেক্খামহং’’ইতি;

নন্দীমিত্তো ৱিচিন্তেত্ৱা, পাকাৰং হনি বাহুনা.

৪৩. সো অট্ঠাৰসহত্থুচ্চো, পতিঅট্ঠুসভো কিৰ;

ওলোকি সুৰনিমলং, অনিচ্ছং সোপি তং পথং.

৪৪. লঙ্ঘযিত্ৱান পাকাৰং,

নগৰব্ভন্তৰে পতি;

ভিন্দিত্ৱা দ্ৱাৰমেকেকং,

গোট্ঠো সোণোৱ পাৱিসি.

৪৫. হত্তী গহেত্ৱা ৰথচক্কং, মিত্তো সকটপঞ্জৰং;

নাড়িকেৰতৰুং গোট্ঠো, নিম্মলো খগ্গমুত্তমং.

৪৬. তালৰুক্খং মহাসোণো, থেৰপুত্তো মহাগদং;

ৱিসুং ৱিসুং ৱীথিগতা, দমিড়ে তত্থ চুণ্ণযুং.

৪৭. ৱিজিতং নগৰং ভেত্ৱা, চতুমাসেন খত্তিযো;

তথো গিৰিলকং গন্ত্ৱা, গিৰিযং দমিড়ং হনি.

৪৮. গন্ত্ৱা মহেলনগৰং, তিমহাপৰিখং ততো;

কদম্ব পুপ্ফৱল্লীহি, সমন্তা পৰিৱাৰিতং.

৪৯. একদ্ৱাৰং দুপ্পৱেসং, চতুমাসে ৱসং তহিং;

গণ্হি মহেলৰাজানং, মন্তযুদ্ধেন ভূমিপো.

৫০. ততো’নুৰাধনগৰং, আগচ্ছন্তো মহীপতি;

খন্ধাৱাৰং নিৱেসেসি, পৰিতোকাসপব্বতং.

৫১. মাসম্হি জেট্ঠমূলম্হি, তড়াকং তত্থ কাৰিয;

জলং কীড়ি তহিং গামো, পোসোননগৰৱ্হযো.

৫২. তং যুদ্ধাযাগতং সুত্ৱা, ৰাজানং দুট্ঠগামণিং;

অমচ্চে সন্নিপাতেত্ৱা, এড়াৰো আহ ভূমিপো.

৫৩. ‘‘সো ৰাজা চ সযংযোধো,

যোধা চস্স মহূকিৰ;

অমচ্চো কিন্নু কাতব্বং,

কিন্তি মঞ্ঞন্তি নো ইমে.

৫৪. দীঘজত্তুপ্পভুতযো, যোধা এড়াৰৰাজিনো;

‘‘সুৱে যুদ্ধং কৰিস্সামি’’, ইতি তে নিচ্ছযং কৰুং.

৫৫. দুট্ঠগামণিৰাজাপি, মন্তেত্ৱা মাতুযা সহ;

তস্সা মতেন কাৰেসি, দ্ৱত্তিংস বলকোট্ঠকে.

৫৬. ৰাজচ্ছত্তধৰে তত্থ, ঠপেসি ৰাজৰূপকে;

অব্ভন্তৰে কোট্ঠকে তু, সযং অট্ঠাসি ভূপতি.

৫৭. এড়াৰৰাজা সন্নদ্ধো, মহাপব্বত হত্থিনং;

আৰুয্হ অগমা তত্থ, সযোগ্গ বলৱাহনো.

৫৮. সঙ্গামে ৱত্তমানম্হি, দীঘজত্তু মহব্বলো;

আদায খগ্গফলকং, যুজ্ঝমানো ভযানকো.

৫৯. হত্থে অট্ঠৰসু’গ্গন্ত্ৱা, নভং তং ৰাজৰূপকং;

ছিন্দিত্ৱা অসিনা ভিন্দি, পঠমং বলকোট্ঠকং.

৬০. এৱং সেসেপি ভিন্দিত্ৱা, মলকোট্ঠে মহব্বলো;

ঠিতং গামণিৰাজেন, বলকোট্ঠমুপাগমি.

৬১. যোধো সো সুৰনিমলো, গচ্ছন্তং ৰাজিনো’পৰি;

সাৱেত্ৱা অত্তনো নামং, তমক্কোসি মহব্বলো.

৬২. ইতৰো ‘‘তং ৱধিস্স’’ন্তি, কুদ্ধো আকাসমুগ্গমি;

ইতৰো ওতৰন্তস্স, ফলকং উপনামযি.

৬৩. ‘‘ছিন্দা মেতং সফলকং’’, ইতি চিন্তিয সো পন;

ফলকং হনি খগ্গেন, তং মুঞ্চিযি’ তৰোসযি.

৬৪. কপ্পেন্তো মুত্তফলকং, দীঘজত্তু তহিং পতি;

উট্ঠায সূৰনিমিলো, পতিতং সত্তিযা’হনি.

৬৫. সঙ্খং ধমি ফুস্সদেৱো, সেনা ভিজ্জিত্থ দামিড়ি;

এড়ৰোপি নিৱত্তিত্থ, ঘাতেসুং দমিড়ে বহূ.

৬৬. তত্থ ৱাপি জলং আসি, হতানং লোহিতা ৱিলং;

তস্মা কুলত্থৱা পীতি, নামতো ৱিস্সুতং অহু.

৬৭. চৰাপেত্ৱা তহিং ভেৰিং, দুট্ঠগামণি ভূপতি;

‘‘ন হনিস্সতু এড়াৰং, মংমুঞ্চিয পৰো’’ইতি.

৬৮. সন্নদ্ধো সযমাৰুয্হ, সন্নদ্ধং কণ্ডুলং কৰিং;

এড়াৰং অনুবন্ধন্তো, দক্খিণদ্ৱাৰমাগমি.

৬৯. পুৰদক্খিণদ্ৱাৰম্হি, উভো যুজ্ঝিংসু ভূমিপা;

তোমৰং খিপি এড়াৰো, গামণি তমৱঞ্চযি.

৭০. ৱিজ্ঝাপেসি চ দন্তেহি, তং হত্থিং সকহত্থিনা;

তোমৰং খিপি এড়াৰং, সহত্থি তত্থ সো পতি.

৭১. ততো ৱিজিতসঙ্গামো, সযোগ্গবলৱাহনো;

লংকং একাতপত্তং সো, কত্ৱান পাৱিসি পুৰং.