চতুৱীসতিম পৰিচ্ছেদ

দ্ৱেভাতিকযুদ্ধং

১. হত্থস্স থৰুকম্মস্স, কুসলো কতুপাসনো;

সো গামণিৰাজসুতো, মহাগামে ৱসী তদা.

২. ৰাজা ৰাজসুতং তিস্সং, দীঘৱাপিম্হি ৱাসযি;

আৰক্খিতুং জনপদং, সম্পন্ন বলৱাহনং.

৩. কুমাৰো গামণিকালে, সম্পস্সন্তো বলং সকং;

‘‘যুজ্ঝিস্সং দমিড়েহী’’তি, পিতুৰঞ্ঞো কথাপযী.

৪. ৰাজা তং অনুৰক্খন্তো, ‘‘ওৰগঙ্গং অলং’’ ইতি;

ৱাৰেসি যাৱততিযং, সো তথেৱ কথাপযী.

৫. পিতা মে পুৰিসো হোন্তো, নে’ৱং ৱক্খতি তেনি’দং;

পিলন্ধতূতি পেসেসি, ইত্থালঙ্কাৰমস্স সো.

৬. ৰাজা’হ তস্স কুজ্ঝিত্ৱা, ‘‘কৰোথ হেমসঙ্খলিং;

তায তং বন্ধযিস্সামি, না’ঞ্ঞথা ৰক্খিযো হি সো.

৭. পলাযিত্ৱান মলযং, কুজ্ঝিত্ৱা পিতুনো অগা;

দুট্ঠত্তাযেৱ পিতৰি, আহু তং দুট্ঠগামণি.

৮. ৰাজা’থ আৰভী কাতুং, মহামঙ্গলচেতিযং;

নিট্ঠিতে চেতিযে সঙ্ঘং, সন্নিপাতযি ভূপতি.

৯. দ্ৱাদসা’সুং সহস্সানি, ভিক্খূ চিত্তলপব্বতা;

ততো ততো দ্ৱাদসেৱ, সহস্সানি সমাগমুং.

১০. কত্ৱান চেতিযমহং, ৰাজা সঙ্ঘস্স সম্মুখা;

সব্বে যোধে সমানেত্ৱা, কাৰেসি সপথং তদা.

১১. ‘‘পুত্তানং কলহট্ঠানং, ন গচ্ছিস্সাম নো’’ইতি;

অকংসু সপথং সব্বে, তং যুদ্ধং তেন নাগমুং.

১২. চতুসট্ঠি ৱিহাৰে সো, কাৰাপেত্ৱা মহীপতি;

তত্তকানেৱ ৱস্সানি, ঠত্ৱা মৰিতহিং তদা.

১৩. ৰঞ্ঞো সৰীৰং গাহেত্ৱা, ছন্নযানেন ৰাজিনি;

নেত্ৱা তিস্স মহাৰামং, তং সঙ্ঘস্স নিৱেদযি.

১৪. সুত্ৱা তিস্সকুমাৰো তং, আগন্ত্ৱা দীঘৱাপিতো;

সৰীৰকিচ্চং কাৰেত্ৱা, সক্কচ্চং পিতুনো সযং.

১৫. মাতৰং কণ্ডুলং হত্থিং, আদিযিত্ৱা মহব্বলো;

ভাতুভযা দীঘৱাপিং, অগমাসি লহুং ততো.

১৬. তং পৱত্তিং নিৱেদেতুং, দুট্ঠগামণি সন্তিকং;

লেখং দত্ৱা ৱিসজ্জেসুং, সচ্চেমচ্চা সমাগতা.

১৭. সো গুত্তহালমাগন্ত্ৱা, তত্থ চাৰে ৱিসজ্জিয;

মহাগামমুপগন্ত্ৱা, সযং ৰজ্জে’ভিসেচযি.

১৮. মাতত্থং কণ্ডূলত্থঞ্চ, ভাতুলেখং ৱিসজ্জযি;

অলদ্ধা যাৱততিযং, যুদ্ধায সমুপাগমি.

১৯. অহু দ্ৱিন্নং মহাযুদ্ধং, চূড়ঙ্গণিযপিট্ঠিযং;

তত্থ নেকসহস্সানি, পতিংসু ৰাজিনো নৰা.

২০. ৰাজা চ তিস্সামচ্চো চ, ৱড়ৱাদীঘুতুনিকা;

তযোযেৱ পলাযিংসু, কুমাৰো অনুবন্ধিতে.

২১. উভিন্নমন্তৰে ভিক্খূ, মন্তযিংসু মহীধৰং;

তং দিস্ৱা ‘‘ভিক্খুসঙ্ঘস্স, কম্মং’’ ইতি নিৱত্তি সো.

২২. কপ্পকন্দৰনজ্জাসো, জৱমালিতিত্থমাগতো;

ৰাজা’হ তিস্সমচ্চং তং, ‘‘ছাতজ্ঝত্তা মযং’’ইতি.

২৩. সুৱণ্ণসৰকে খিত্ত-ভত্তং নীহৰিতস্স সো;

সঙ্ঘে দত্ৱা ভুঞ্জনতো, কাৰেত্ৱা চতুভাগকং.

২৪. ‘‘ঘোসেহি কাল’’মিচ্চা’হ,

তিস্সো কালমঘোসযি;

সুণিত্ৱা দিব্বসোতেন,

ৰঞ্ঞো সক্খায দাযকো.

২৫. থেৰো পিযঙ্গু দীপট্ঠো, থেৰং তত্থ নিযোজযি;

তিস্সং কুটুম্বিকসুতং, সো তত্থ নভসা’গমা.

২৬. তস্স তিস্সো কৰাপত্ত-আদাযা’দাসি ৰাজিনো;

সঙ্ঘস্স ভাগং সম্ভাগং, ৰাজা পত্তে খিপাপযি.

২৭. সম্ভাগং খিপি তিস্সো চ, সম্ভাগং ৱড়ৱাপি চ;

ন ইচ্ছিতস্সাভাগঞ্চ, তিস্সো পত্তম্হি পক্খিপি.

২৮. ভত্তস্স পুণ্ণপত্তং তং, অদাথেৰস্স ভূপতি;

অদা গোতমথেৰস্স, সো গন্ত্ৱা নভসা লহুং.

২৯. ভিক্খূনং ভুঞ্জমানানং, দত্ৱা আলোপভাগসো;

পঞ্চসতানং সো থেৰো, লদ্ধেহি তু তদন্তিকা.

৩০. ভাগেহি পত্তং পূৰেত্ৱা, আকাসে খিপি ৰাজিনো;

দিস্ৱা’ গতং গহেত্ৱা তং, তিস্সো ভোজিসি ভূপতিং.

৩১. ভুঞ্জিত্ৱান সযঞ্জাপি, ৱড়ৱঞ্চ অভোজযি;

সত্তাহং চুম্বটং কত্ৱা, ৰাজা পত্তং ৱিসজ্জযি.

৩২. গন্ত্ৱান সো মহাগামং, সমাদায বলং পুন;

সট্ঠিসহস্সং যুদ্ধায, গন্ত্ৱা যুজ্ঝি সভাতৰা.

৩৩. ৰাজা ৱড়ৱমাৰুয্হ, তিস্সো কণ্ডূল হত্থিনং;

দ্ৱে ভাতৰো সমাগঞ্ছুং, যুজ্ঝমানা ৰণে তদা.

৩৪. ৰাজা কৰিং কৰিত্ৱ’ন্তো, ৱড়ৱামণ্ডলং অকা;

তথাপি ছিদ্দং নো দিস্ৱা, লঙ্ঘা পেতুং মতিংঅকা.

৩৫. ৱড়ৱং লঙ্ঘযিত্ৱান, হত্থিনং ভাতিকো’পৰি;

তোমৰং খিপি চম্মংৱ, যথা ছিজ্জতি পিট্ঠিযং.

৩৬. অনেকানি সহস্সানি, কুমাৰস্স নৰাতহিং;

পতিংসু যুদ্ধে যুজ্ঝন্তা, ভিজ্জ চেৱ মহব্বলং.

৩৭. ‘‘আৰোহকস্স ৱেকল্লা, ইত্থী মং লঙ্ঘযী’’ইতি;

কুদ্ধোকৰী তং চালেন্তো, ৰুক্খমেক মুপাগমি.

৩৮. কুমাৰো আৰুহী ৰুক্খং, হত্থী সামিমুপাগমি;

তমাৰুয্হ পলাযন্তং, কুমাৰো মনুবন্ধি সো.

৩৯. পৱিসিত্ৱা ৱিহাৰং সো, মহাথেৰ ঘৰংগতো;

নিপজ্জহেট্ঠা মঞ্চস্স, কুমাৰো ভাতুনোভযা.

৪০. পসাৰযি মহাথেৰো, চীৱৰং তত্থ মঞ্চকে;

ৰাজা অনুপদং গন্ত্ৱা, ‘‘কুহিং তিস্সো’’তি পুচ্ছথ.

৪১. ‘‘মঞ্চে তত্থ মহাৰাজ’’, ইতি থেৰো অৱোচ তং;

হেট্ঠা মঞ্চেতি জানিত্ৱা, ততো নিক্খম্ম ভূপতি.

৪২. সমন্ততো ৱিহাৰস্স, ৰক্খং কাৰযি তং পন;

পঞ্চকম্হি নিপজ্জেত্ৱা, দত্ৱা উপৰি চীৱৰং.

৪৩. মঞ্চপাদেসু গণ্হিত্ৱা, চত্তাৰো দহৰা যতী;

মতভিক্খুনিযামেন, কুমাৰং বহি নীহৰুং.

৪৪. নীযমানন্তু তং ঞত্ৱা, ইধ মাহ মহীপতি;

‘‘তিস্স ত্ৱং কুলদেৱতানং, সীসে হুত্ৱান নিয্যাসি.

৪৫. বলক্কাৰেন গহণং, কুলদেৱেহি নত্থি মে;

গুণং ত্ৱং কুলদেৱানং, সৰেয্যাসি কদাচিপি’’.

৪৬. ততোযেৱ মহাগামং, অগমাসি মহীপতি;

আণাপেসি চ তত্থেৱ, মাতৰং মাতুগাৰৱো.

৪৭. [ৱস্সানি অট্ঠসট্ঠিংসো, অট্ঠা ধম্মট্ঠমানসো;

অট্ঠসট্ঠিৱিহাৰে চ, কাৰাপেসি মহীপতি.]

৪৮. নিক্খামিতো সো ভিক্খূহি, তিস্সোৰাজ সুতো পন;

দীঘৱাপিং ততোযেৱ, অগম’ঞ্ঞতৰো ৱিয.

৪৯. কুমাৰো গোধগত্তস্স, তিস্সথেৰস্স আহ সো;

‘‘সাপৰাধো অহং ভন্তে, খমাপেস্সামি ভাতৰং.

৫০. ৱেয্যাৱচ্চকৰা কাৰং, তিস্সং পঞ্চসতানি চ;

ভিক্খুনমাদিযিত্ৱা সো, থেৰো ৰাজ মুপাগমি.

৫১. ৰাজপুত্তং ঠপেত্ৱান, থেৰো সোপান মত্থকে;

সসঙ্ঘো পাৱিসি সদ্ধো, নিসীদাৱিয ভূমিপো.

৫২. উপানযী যাগুআদিং, থেৰো পত্তং ৱিধেসিসো;

‘‘কিন্তি ৱুত্তো’ব্ৰৱি তিস্সং, আদায অগতা’’ইতি.

৫৩. ‘‘কুহিং চোৰো’’তি ৱুত্তো চ, ঠিতঠানং নিৱেদযি;

ৱিহাৰদেৱী গন্ত্ৱান, ছাদিযঠাসি পুত্তক.

৫৪. ৰাজা’হ থেৰং ‘‘ঞাতো ৱো,

দাসভাৱো ইদানি নো;

সামণেৰং পেসযেথ,

তুম্হে মে সত্তৱস্সিকং.

৫৫. জনক্খযং ৱিনাযেৱ, কলহো ন ভৱেয্য নো;

ৰাজা সঙ্ঘস্স দোসেসো, ভংঘে দণ্ডং কৰিস্সতি.

৫৬. হেস্সতা’গতকিচ্চা ৱো,

যাগাদিং গণ্হাথাতি সো;

দত্ৱা তং ভিক্খুসঙ্ঘস্স,

পক্কোসিত্ৱান ভাতৰং.

৫৭. তত্থেৱ সঙ্ঘমজ্ঝম্হি, নিসিন্নো ভাতৰা সহ;

ভুঞ্জিত্ৱা একতোযেৱ, ভিক্খু সঙ্ঘং ৱিসজ্জযি.

৫৮. সস্সকম্মানি কাৰেতুং, তিস্সং তত্থেৱ পাহিণি;

সযম্পি ভেৰিং চাৰেত্ৱা, সস্সকম্মানি কাৰযি.

৫৯. ইতি ৱেৰমনেকৱিকপ্পচিতং,

সমযন্তি বহুং অপি সপ্পুৰিসং;

ইতি চিন্তিয কোহি নৰো মতিমা,

ন ভৱেয্য পৰেসু সুসন্ত মনোতি.

সুজনপ্পসাদসংৱেগত্থায কতে মহাৱংসে

দ্ৱেভাতিকযুদ্ধং নাম

চতুৱীসতিমো পৰিচ্ছেদো.