তেৱীসতিম পৰিচ্ছেদ

যোধলাভো

১. বললক্খণৰূপেতি,

তেজোজৱগুণেহি চ;

অগ্গো হুত্ৱা মহাকাযো,

সো চ কণ্ডূলৱাৰণো.

২. নন্দীমিত্তো সুৰনিমিলো, মহাসোণো গোট্ঠযিম্বৰো;

থেৰপুত্তাভযো ভৰণো, ৱেড়ুসুমনো তথেৱ চ.

৩. খঞ্জদেৱো ফুস্সদেৱো, লভিয্য ৱসভোপি চ;

এতে দস মহাযোধা, তস্সা’হেসুং মহব্বলা.

৪. অহু এড়াৰৰাজস্স, মিত্তো নাম চমূপতি;

তস্স কম্মন্তগামম্হি, পাচীনখণ্ডৰাজিযা.

৫. চিত্তপব্বতসামন্তা, অহু ভগিনিযা সুতো;

কোসোহিতৱত্থগুয্হো, মাতুলস্সেৱ নামতো.

৬. দূৰম্পি পৰিসপ্পন্তং, দহৰং তং কুমাৰকং;

আবজ্ঝ নন্দিযা কট্যং, নিসদম্হি অবন্ধিসু.

৭. নিসদং কড্ঢতো তস্স, ভূমিযং পৰিসপ্পতো;

উম্মাৰাতিক্কমে নন্দি, সা ছজ্জতি যতো ততো.

৮. নন্দিমিত্তোতি ঞাযিত্থ, দসনাগবলো অহু;

ৱুদ্ধো নগৰমাগম্ম, সো উপট্ঠাসি মাতুলং.

৯. থূপাদীসু অসক্কাৰং, কৰোন্তো দমিড়ে তদা;

ঊৰুং অক্কম্মপাদেন, হত্থেন ইতৰং তুসো.

১০. গহেত্ৱা সম্পদালেত্ৱা, বহিক্খপতিং থামৱা;

দেৱা অন্তৰধাপেন্তি, তেন খিত্তং কড়েৱৰং.

১১. দমিড়ানং খযং দিস্ৱা, ৰঞ্ঞো আৰোচযিং সুতং;

‘‘সহোট্টং গণ্হথেতং’’তি, ৱুত্তং কাতুং ন সক্খিসুং.

১২. চিন্তেসি নন্দিমিত্তো সো, ‘‘এৱম্পি কৰতো মম;

জনক্খযো কেৱলঞ্হি, নত্থি সাসনজোতনং.

১৩. ৰোহণে খত্তিযা সন্তি, পসন্নং ৰতনত্তযে;

তত্থ কত্ৱা ৰাজসেৱং, গণ্হিত্ৱা দমিড়ে’খিলে.

১৪. ৰজ্জং দত্ৱা খত্তিযানং, জোতেস্সং বুদ্ধসাসনং’’;

ইতি গন্ত্ৱা গামণিস্স, তং কুমাৰস্স সাৱযি.

১৫. মাতুযা মন্তযিত্ৱা সো, সক্কাৰং তস্স কাৰযি;

সক্কতো নন্দিমিত্তো সো, যোধো ৱসি তদন্তিকে.

১৬. কাকৱণ্ণো তিস্সৰাজা, ৱাৰেতুং দমিড়িসদা;

মহাগঙ্গায তিত্থেসু, ৰক্খং সব্বেসু কাৰযি.

১৭. অহু দীঘাভযো নাম, ৰঞ্ঞো’ঞ্ঞ ভৰিযা সুতো;

কচ্ছকতিত্থে গঙ্গায, তেন ৰক্খমকাৰযি.

১৮. সো ৰক্খাকৰণত্থায, সমন্তা যোজনদ্ৱযে;

মহাকুলম্হা একেকং, পুত্তং আণাপযি তহিং.

১৯. কোট্ঠিৱালে জনপদে, গামে খণ্ডকৱিট্ঠিকে;

সত্তপুত্তো কুলপতি, সঙ্ঘো নামা’সি ইস্সৰো.

২০. তস্সাপি ধূতং পাহেসি, ৰাজপুত্তো সুতত্থিকো;

সত্তমো নিমিলো নাম, দসহত্থিবলো সুতো.

২১. তস্স অকম্মসীলত্তা, খীযন্তা ছপি ভাতৰো;

ৰোচযুং তস্স গমনং, ন তু মাতা পিতা পন.

২২. কুজ্ঝিত্ৱা সেসভাতূনং, পাতোযেৱ তিযোজনং;

গন্ত্ৱা সুৰগ্গমেযেৱ, ৰাজপুত্তং অপস্সিসো.

২৩. সো তং ৱিমংসনত্থায, দূৰে কিচ্চে নিযোজযি;

চেতিয পব্বতা সন্নে, দ্ৱাৰ মণ্ডলগামকে.

২৪. ব্ৰাহ্মণো কুণ্ডলো নাম, ৱিজ্জ তে মে সহাযকো;

সমুদ্দপাৰে ভণ্ডানি, তস্স ৱিজ্জন্তি সন্তিকে.

২৫. গন্ত্ৱা তং তেন দিন্নানি, ভণ্ডকানি ইধা’হৰ;

ইতি ৱত্ৱান ভোজেত্ৱা, লেখং দত্ৱা ৱিস্সজ্জযি.

২৬. ততো নৱ যোজনঞ্হি, অনুৰাধপুৰং ইদং;

পুব্বণ্হেযেৱ গন্ত্ৱান, সো তং ব্ৰাহ্মণ মদ্দস.

২৭. ‘‘ন্হত্ৱা ৱাপিযং তাত, এহী’’তি আহ ব্ৰাহ্মণো;

ইধা’নাগত পুব্বত্তা, ন্হত্ৱান তিস্সৱাপিযং.

২৮. মহাবোধিঞ্চ পূজেত্ৱা, থূপাৰামে চ চেতিযং;

নগৰং পৱিসিত্ৱান, পস্সিত্ৱা সকলং পুৰং.

২৯. আপণা গন্ধমাদায, উত্তৰ দ্ৱাৰতো ততো;

নিক্খম্মুপ্পল খেত্তম্হা, গহেত্ৱা উপ্পলানি চ.

৩০. উপাগমি ব্ৰাহ্মণং তং, পুট্ঠো তেনা’হ সো গতিং;

সুত্ৱা সো ব্ৰাহ্মণো তস্স, পুব্বাগমমিধাগমং.

৩১. ৱিম্হিতো চিন্তযী এৱং, ‘‘পুৰিসা জানীযো অযং;

সচে জানেয্য এড়াৰো, ইমং হত্থে কৰিস্সতি.

৩২. তস্মা’যং দমিড়া’সন্নে, ৱাসেতুং নেৱ অৰহতি;

ৰাজপুত্তস্স পিতুনো, সন্তিকে ৱাসমৰহতি’’.

৩৩. এৱ মেৱং লিখিত্ৱান, লেখং তস্স সমপ্পযি;

পুণ্ণৱড্ঢন ৱত্থানি, পণ্ণাকাৰে বহূপি চ.

৩৪. দত্ৱা তং ভোজযিত্ৱা চ, পেসেসী সখিসন্তিকং;

সো ৱড্ঢমানচ্ছাযাযং, গত্ৱা ৰাজসুতন্তি কং.

৩৫. লেখঞ্চ পণ্ণাকাৰে চ, ৰাজপুত্তস্স অপ্পযি;

তুট্ঠো আহ ‘‘সহস্সেন, পসাদেথ ইম’’ন্তি সো.

৩৬. ইস্সং কৰিংসু তস্স’ঞ্ঞে, ৰাজপুত্তস্স সেৱকা;

সো তং দসসহস্সেন, পসাদাপেসি দাৰকং.

৩৭. তস্স কেসং লিখাপেত্ৱা, গঙ্গাযেৱ নহাপিয;

পুণ্ণৱড্ঢন ৱত্থযুগং, গন্ধমালঞ্চ সুন্দৰং;

অচ্ছাদেত্ৱা ৱিলিম্পেত্ৱা, মণ্ডযিত্ৱা সুৰূপকং.

৩৮. সীসং দুকূলপট্টেন, ৱেঠযিত্ৱা উপানযুং;

অত্তনো পৰিহাৰেন, ভত্তং তস্স অদাপযি.

৩৯. অত্তনো দসসহস্স-অগ্ঘনসযনং সুভং;

সযনত্থং অদাপেসি, তস্স যোধস্স খত্তিযো.

৪০. সো সব্বং একতো কত্ৱা, নেত্ৱা মাতাপিতন্তিকং;

মাতুযা দসসহস্সং, সযনং পিতুনো অদা.

৪১. তংযেৱ ৰত্তিং আগন্ত্ৱা, ৰক্খঠানে অদ্দস্সযি;

পভাতে ৰাজপুত্তো তং, সুত্ৱা তুট্ঠমনো অহু.

৪২. দত্ৱা পৰিচ্ছদং তস্স, পৰিৱাৰজনং তথা;

দত্ৱা দসসহস্সানী, পেসেসি পিতুসন্তিকং.

৪৩. যোধো দসসহস্সানি, নেত্ৱা মাতাপিতন্তিকং;

তেসং দত্ৱা কাকৱণ্ণ-তিস্সো ৰাজা মুপাগমি.

৪৪. সো গামণিকুমাৰস্স, তমপ্পেসি মহীপতি;

সক্কতো সুৰনিমিলো, যোধো ৱসি তদন্তিকে.

৪৫. কুটুম্বৰিকণ্ণিকাযং,

হুন্দৰীৱাপি গামকে;

তিসস্স অট্ঠমো পুত্তো,

অহোসি সোণ নামকো.

৪৬. সত্তৱস্সিককালেপি, তালগচ্ছে অলুঞ্চি সো;

দস ৱস্সিককালম্হি, তালে লুঞ্চিমহব্বলো.

৪৭. কালে ন সো মহাসোণো,

দস হত্থি বলো অহু;

ৰাজা তং তাদিসং সুত্ৱা,

গহেত্ৱা পিতুসন্তিকা.

৪৮. গামণিস্স কুমাৰস্স, অদাসি পোসনত্থিকো;

তেন সো লদ্ধসক্কাৰো, যোধো ৱসি তদন্তিকে.

৪৯. গিৰিনামে জনপদে, গামে নিচ্ছেলৱিট্ঠিকে;

দসহত্থিবলো আসি, মহানাগস্স অত্ৰজো.

৫০. লকুণ্টকসৰীৰত্তা, অহু গোট্ঠক নামকো;

কৰোন্তি কেড়িপৰিহাসং, তস্স জেট্ঠা ছ ভাতৰো.

৫১. তে গন্ত্ৱা মাসখেত্তত্থং, কোট্টযিত্ৱা মহাৱনং;

তস্স ভাগং ঠপেত্ৱান, গন্ত্ৱা তস্স নিৱেদযুং.

৫২. সো গন্ত্ৱা তং খণংযেৱ, ৰুক্খে ইম্বৰসঞ্ঞিতে;

লুঞ্চিত্ৱান সমং কত্ৱা, ভূমিং গন্ত্ৱা নিৱেদযি.

৫৩. গন্ত্ৱান ভাতৰো তস্স, দিস্ৱা কম্মন্ত মব্ভুতং;

তস্স কম্মং কিত্তযন্তা, আগচ্ছিংসু তদন্তিকং.

৫৪. তদুপাদায সো আসি, গোট্ঠযিম্বৰনামকো;

তথেৱ ৰাজা পাহেসি, তম্বি গামণিসন্তিকং.

৫৫. কোটিপব্বতসামন্তা, কিত্তিগামম্হি ইস্সৰো;

ৰোহণো নাম গহপতি, জাতং পুত্তকমত্তনো.

৫৬. সমান নামং কাৰেসি, গোট্ঠকাহযৰাজিনো;

দাৰকো সো বলী আসি, দসদ্ৱাদসৱস্সিকো.

৫৭. অসক্কুণেয্যপাসাণে, উদ্ধত্তুং চতুপঞ্চহি;

কীড়মানো খিপি তদা, সো কীড়াগুড়কে ৱিয.

৫৮. তস্স সোড়সৱস্সস্স, পিতা গদমকাৰযি;

অট্ঠতিংসঙ্গুলৱট্টং, সোড়সহত্থদীঘকং.

৫৯. কালানং নাড়িকেৰানং,

খন্ধে আহচ্চ তায সো;

তে পাতযিত্ৱা তেনেৱ,

যো ধো সো পাকটো অহু.

৬০. তথেৱ ৰাজা পাহেসি, তম্পি গামণিসন্তিকে;

উপট্ঠাকো মহাসুম্ম-থেৰস্সা’সি পিতা পন.

৬১. সো মহাসুম্মথেৰস্স, ধম্মং সুত্ৱা কুটুম্বিকো;

সোতাপত্তিফলং পত্তো, ৱিহাৰে কোড়পব্বতে.

৬২. সোতু সঞ্জাতসংৱেগো, আৰোচেত্ৱান ৰাজিনো;

দত্ৱা কুটুম্বং পুত্তস্স, পব্বজি থেৰসন্তিকে.

৬৩. ভাৱনং অনুযুঞ্জিত্ৱা, অৰহত্তমপাপুণি;

পুত্তো তেন’স্স পঞ্ঞাযি, থেৰপুত্তাভযো ইতি.

৬৪. কপ্পকন্দৰগামম্হি, কুমাৰস্স সুতো অহু;

ভৰণো নাম সো কালে, দসদ্ৱাদসৱস্সিকে.

৬৫. দাৰকেহি ৱনং গন্ত্ৱা’-নুবন্ধিত্ৱা সসে বহূ;

পাদেন পহৰিত্ৱান, দ্ৱিখণ্ডং ভূমিযং খিপি.

৬৬. গামিকেহি ৱনং গন্ত্ৱা, সোড়সৱস্সিকো পন;

তথেৱ পাতেসি লহুং, মিগ গোকণ্ণসূকৰে.

৬৭. ভৰণো সো মহাযোধো,

তেনেৱ পাকটো অহু;

তথেৱ ৰাজা ৱাসেসি,

তম্পি গামণিসন্তিকে.

৬৮. গিৰিগামে জনপদে, কুটুম্বিযঙ্গণগামকে;

কুটুম্পিৱসভো নাম, অহোসি তত্থ সম্মতো.

৬৯. ৱেড়ো জনপদো তস্স, সুমনো গিৰিভোজকো;