বাৱীসতিম পৰিচ্ছেদ

গামণিকুমাৰ সুতি

১. এড়াৰং ঘাতযিত্ৱান, ৰাজা’হু দুট্ঠগামণি;

তদত্থ দীপনত্থায, অনুপুব্বকথা অযং.

২. দেৱানং পিযতিস্সস্স, ৰঞ্ঞো দুতিযভাতিকো;

উপৰাজা মহানাগো, নামানু ভাতুনো পিযো.

৩. ৰঞ্ঞো দেৱী সপুত্তস্স, বালা ৰজ্জাভিকামিনি;

উপৰাজৱধত্থায, জাতচিত্তা নিৰন্তৰং.

৪. ৱাপিং তৰচ্ছনামং সা, কাৰাপেন্তস্স পাহিণি;

অম্বং ৱিসেন যোজেত্ৱা, ঠপেত্ৱা অম্বমত্থকে.

৫. তস্সা পুত্তো সহগতো, উপৰাজেন বালকো;

ভাজনে ৱিৱটেযেৱ, তং অম্বং খাদিযা’মৰি.

৬. উপৰাজা ততোযেৱ, সদাৰ বল ৱাহনো;

ৰক্খিহুং সকমত্তানং, ৰোহণা’ভিমুখো অগা.

৭. যট্ঠালয ৱিহাৰস্মিং, মহেসী তস্স গব্ভিনী;

পুত্তং জনেসি সো তস্স, ভাতু নাম মকাৰযি.

৮. ততো গন্ত্ৱা ৰোহণং সো,

ইস্সৰো ৰোহণে’খিলো;

মহা ভাগো মহা গামে,

ৰজ্জং কাৰেসি খত্তিযো.

৯. কাৰেসি সো নাগমহা-ৱিহাৰং সকনামকং;

উদ্ধকন্দৰকাদী চ, পিহাৰে কাৰযী বহূ.

১০. যট্ঠালয কতিস্সো সো, তস্স পুত্তো তদচ্চযে;

হত্থেৱ ৰজ্জং কাৰেসি, তস্স পুত্তো’ভযো তথা.

১১. গোট্ঠাভযসুতো কাক-ৱণ্ণতিস্সোতি ৱিস্সুহো;

তদচ্চযে তত্থ ৰজ্জং, সো অকাৰেসি খত্তিযো.

১২. ৱিহাৰদেৱি নামা’সি, মহেসী তস্স ৰাজিনো;

সদ্ধস্স সদ্ধাসম্পন্না, ধীতা কল্যাণি ৰাজিনো.

১৩. কল্যাণিযং নৰিন্দো হি, তিস্সো নামাসি খত্তিযো;

দেৱিসঞ্ঞোগজনিত-কো পোতস্স কনিট্ঠকো.

১৪. ভীতো ততো পলাযিত্ৱা, অয্যউত্তিয নামকো;

অঞ্ঞত্থ ৱসি সো দেসো, তেন তং নামকো অহু.

১৫. দত্ৱা ৰহস্সলেখং সো, ভিক্খুৱেসধৰং নৰং;

পাহেসি দেৱিযা গন্ত্ৱা, ৰাজদ্ৱাৰে ঠিতো তুসো.

১৬. ৰাজ গেহে অৰহতা, ভুঞ্জমানেন সব্বদা;

অঞ্ঞাযমানো থেৰেন, ৰঞ্ঞো ঘৰমুপাগমি.

১৭. থেৰেন সদ্ধিং ভুঞ্জিত্ৱা, ৰঞ্ঞো সহ ৱিনিগ্গমে;

পাতেসি ভূমিযং লেখং, পেক্খমানায দেৱিযা.

১৮. সদ্দেন তেন ৰাজানং, নিৱত্তিত্ৱা ৱিলোকযং;

ঞত্ৱান লেখসন্দেসং, কুদ্ধো থেৰস্স দুম্মতি.

১৯. থেৰং তং পুৰিসং তঞ্চ, মাৰাপেত্ৱান কোধসা;

সমুদ্দস্মিং খিপাপেসি, কুজ্ঝিত্ৱা তেন দেৱতা.

২০. সমুদ্দেনো’ত্থৰা পেসুং, তং দেসং সোতুভূপতি;

অত্তনো ধীতৰং যুদ্ধং, দেৱিং নাম সুৰুপিনিং.

২১. লিখিত্ৱা ৰাজধীতাতি, সোৱণ্ণক্খলিযা লহুং;

নিসীদাপিয তত্থেৱ, সমুদ্দস্মিং ৱিস্সজ্জযি.

২২. ওক্কন্তং তং ততো লংকে-কাকৱণ্ণো মহীপতি;

অভিসেচযি তেনা’সি, ৱিহাৰোপপদৱ্হযা.

২৩. তিস্স মহাৱিহাৰঞ্চ, তথা চিত্তলপব্বতং;

গমিত্থৱালিং কুটালিং, ৱিহাৰে এৱমাদিকে.

২৪. কাৰেত্ৱা সুপসন্নেন, মনসাৰতনত্তযে;

উপট্ঠহি তদা সঙ্ঘং, পচ্চযেহি চতূহি সো.

২৫. কোটিপব্বত নামম্হি, ৱিহাৰে সীলৱত্তিমা;

তদা অহু সামণেৰো, নানাপুঞ্ঞকৰো সদা.

২৬. সুখেনাৰোহণত্থায, অকাস চেতিযঙ্গণে;

ঠপেসি তীণি পাসাণে, পাসাণ ফলকানি সো.

২৭. অদা পানীয দানঞ্চ, ৱত্তং সঙ্ঘস্স চা’কৰি;

সদা কিলন্তকাযস্স, তস্সা’বোধো মহা অহু.

২৮. সিৱিকায কমানেত্ৱা, ভিক্খৱো কতৱেদিনো;

সিলাপস্সয পৰিৱেণে, তিস্সাৰামে উপট্ঠহুং.

২৯. সদা ৱিহাৰদেৱীসা, ৰাজগেহে সুসঙ্খতে;

পুৰেভত্তং মহাদানং, দত্ৱা সঙ্ঘস্স সঞ্ঞতা.

৩০. পচ্ছাভত্তং গন্ধমালং, ভেসজ্জৱসনানি চ;

গাহযিত্ৱা গতা’ৰামং, সক্কৰোতি যথাৰহং.

৩১. তদা তথেৱ কত্ৱা সা, সঙ্ঘত্থেৰস্স সন্তিকে;

নিসীদি ধম্মং দেসেন্তো, থেৰো তং ইধ মব্ৰৱি.

৩২. ‘‘মহাসম্পত্তি তুম্হেহি, লদ্ধা’যং পুঞ্ঞকম্মুনা;

অপ্পমাদো’ৱ কাতব্বো, পুঞ্ঞকম্মে ইদানিপি’’.

৩৩. এৱং ৱুত্তে তু সা আহ, ‘‘কিং সম্পত্তি অযং ইধ;

যেসং নো দাৰকা নত্থি, ৱঞ্ঝাসম্পত্তি তেন নো’’.

৩৪. ছড়ভিঞ্ঞো মহাথেৰো, পুত্তলাভমৱেক্খিয;

‘‘গিলানং সামণেৰং তং, পস্সদেৱী’’তি অব্ৰৱি.

৩৫. সা গন্ত্ৱা’সন্ন মৰণং, সামণেৰমৱোচ তং;

‘‘পত্থেহি মম পুত্তত্তং, সম্পত্তী মহতী হি নো’’.

৩৬. ন ইচ্ছতীতি ঞত্ৱান, তদত্থং মহতিং সুভং;

পুপ্ফপূজং কাৰযিত্ৱা, পুন যাচি সুমেধসা.

৩৭. এৱম্প’নিচ্ছমানস্স, অত্থাযু’পাযকোৱিদা;

নানা ভেসজ্জ ৱত্থানি, সঙ্ঘে দত্ৱা’থ যাচিতং.

৩৮. পত্থেসি সো ৰাজকুলং, সা তং ঠানং অনেকধা;

অলঙ্কৰিত্ৱা ৱন্দিত্ৱা, যানমাৰুয্হ পক্কমি.

৩৯. ততো চুতো সামণেৰো, গচ্ছমানায দেৱিযা;

তস্সা কুচ্ছিম্হি নিব্বত্তি, তং জানিয নিৱত্তিসা.

৪০. ৰঞ্ঞো তং সাসনং দত্ৱা, ৰঞ্ঞা সহ পুনা’গমা;

সৰীৰকিচ্চং কাৰেত্ৱা, সামণেৰস্সু’ভোপিতে.

৪১. তস্মিংযেৱ পৰিৱেণে, ৱসন্তা সন্তমানসা;

মহাদানং পৱত্তেসুং, ভিক্খুসঙ্ঘস্স সব্বদা.

৪২. তস্সে’ৱং দোহড়ো আহি, মহা পুঞ্ঞায মাতুযা;

‘‘উসভমত্তং মধুগণ্ডং, কত্ৱা উস্সীসকে সযং.

৪৩. ৱামেতৰেন পস্সেন, নিপন্নাসযনে সুভে;

দ্ৱাদসন্নং সহস্সানং, ভিক্খূনং দিন্নসেসকং.

৪৪. মধুং ভুঞ্জিতুকামা’সি, অথ এড়াৰ ৰাজিনো;

যোধান মগ্গযোধস্স, সীসচ্ছিন্নাসিদেৱনং.

৪৫. তস্সেৱ সীসে ঠত্ৱান, পাতুঞ্চেৱ অকামযি;

অনুৰাধ পুৰস্সেৱ, উপ্পলক্খেত্ততো পন.

৪৬. আনীতুপ্পলমালঞ্চ, অমিলা তং পিলন্ধিতুং;

তং দেৱী ৰাজিনো আহ, নেমিত্তে পুচ্ছি ভূপতি.

৪৭. তং সুত্ৱা আহু নেমিত্তা, ‘‘দেৱিপুত্তো নিঘাতিয;

দমিড়ে কত্ৱে’কৰজ্জং, সাসনং জোতযিস্সতি’’.

৪৮. এদিসং মধুগণ্ডং সো, দস্সেতি তস্স ঈদিসিং;

সম্পত্তিং দেতি ৰাজা’’তি, ঘোসাপেসি মহীপতি.

৪৯. গোট্ঠসমুদ্দৱেলন্তে, মধুপুণ্ণং নিকুজ্জিতং;

নাৱং ঞত্ৱান আচিক্খি, ৰঞ্ঞো জনপদে নৰো.

৫০. ৰাজা দেৱিং তহিং নেত্ৱা, মণ্ডপম্হি সুসঙ্খতে;

যথিচ্ছিথং তায মধুং, পৰিভোগমকাৰযি.

৫১. ইতৰে দোহড়ে তস্সা, সম্পাদেতুং মহীপতি;

ৱেড়ুসুমন নামং তং, যোধং তত্থ নিযোজযি.

৫২. সো’নুৰাধপুৰং গন্ত্ৱা, ৰঞ্ঞো মঙ্গলৱাজিনো;

গোপকেন অকা মেত্তিং, তস্স কিচ্চঞ্চ সব্বদা.

৫৩. তস্স ৱিস্সত্থ তং ঞত্ৱা, পাতোৱ উপ্পলান’সিং;

কদম্বনদিযা তীৰে, ঠপেত্ৱান অসঙ্কিতো.

৫৪. অস্সং নেত্ৱা তমাৰুয্হ, গণ্হিত্ৱান উপ্পলান’সিং;

নিৱেদযিত্ৱান অত্তানং, অস্সৱেগেন পক্কমি.

৫৫. সুত্ৱা ৰাজা গহেতুং তং, মহা যোধানপেসযি;

দুতিযং সম্মথং অস্সং, আৰুয্হ সোনুধাপিতং.

৫৬. সো গুম্বনিস্সিতো অস্স-পিট্ঠেযেৱ নিসীদিয;

এন্তস্স পিট্ঠিতো তস্স, উব্বয্হা’সিং পসাৰযি.

৫৭. অস্সৱেগেনযন্তস্স, সীসং ছিজ্জ উভোহযে;

সীসঞ্চা’দায সাযং সো, মহাগামমুপাগমি.

৫৮. দোহড়ে তে চ সা দেৱী, পৰিভুঞ্জি যথাৰুচি;

ৰাজা যোধস্স সক্কাৰং, কাৰাপেসি যথাৰহং.

৫৯. সা দেৱী সমযে ধঞ্ঞং, জনযী পুত্তমুত্তমং;

মহাৰাজকুলে তস্মিং, আনন্দো চ মহা অহু.

৬০. তস্স পুঞ্ঞানুভাৱেন, তদহেৱ উপাগমুং;

নানাৰতনসম্পুণ্ণা, সত্তনাৱা ততো ততো.

৬১. তস্সেৱ পুঞ্ঞতেজেন, ছদ্দন্তকুলতো কৰী;

হত্থিচ্ছাপং আহৰিত্ৱা, ঠপেত্ৱা ইধ পক্কমি.

৬২. তং তিত্থসৰতীৰম্হি, দিস্ৱা গুম্বন্তৰে ঠিতং;

কণ্ডুলৱ্হো বালিসিকো, ৰঞ্ঞো আচিক্খি তাৱদে.

৬৩. পেসেত্ৱা’চৰিযে ৰাজা, তমাণাপিয পোসযি;

কণ্ডুলো ইতি ঞাযিত্থ, দিট্ঠত্তা কণ্ডুলেন সো.

৬৪. ‘‘সুৱণ্ণভাজনাদীনং, পুণ্ণা নাৱা ইধাগতা’’;

ইতি ৰঞ্ঞো নিৱেদসুং, ৰাজা তানা’হৰাপযি.

৬৫. পুত্তস্স নামকৰণে, মঙ্গলম্হি মহীপতি;

দ্ৱাদস সহস্সসঙ্খং, ভিক্খুসঙ্ঘং নিমন্তিয.

৬৬. এৱং চিন্তেসি ‘‘যদিমে, পুত্তো লংকাতলে’খিলে;

ৰজ্জং গহেত্ৱা সম্বুদ্ধ-সাসনং জোতযিস্সতি.

৬৭. অট্ঠুত্তৰসহস্সঞ্চ, ভিক্খৱো পৱিসন্তু চ;

সব্বে তে উদ্ধপত্তঞ্চ, চীৱৰং পাৰপন্তু চ.

৬৮. পঠমং দক্খিণং পাদং, উম্মাৰন্তো ঠপেন্তু চ;

একচ্ছত্তযুতং ধম্ম-কৰণং নীহৰন্তু চ.

৬৯. গোতমো নাম থেৰো চ, পতিগ্গণ্হাতু পুত্তকং;

সো চ সৰণসিক্খা যো, দেতু’’ সব্বং তথা অহু.

৭০. সব্বং নিমিত্তং দিস্ৱান, তুট্ঠচিত্তো মহীপতি;

দত্ৱা সঙ্ঘস্স পাযাসং, নামং পুত্তস্স কাৰযি.

৭১. মহাগামে নাযকত্তং, পিতুনামঞ্চ একতো;

উভো কত্ৱান একজ্ঝং, গামণিঅভযো ইতি.

৭২. মহাগামং পৱিসিত্ৱা, নৱমে দিৱসে ততো;

সঙ্গমং দেৱিযা কাসি, তেন গব্ভমগণ্হি সা.

৭৩. কালে জাতং সুতং ৰাজা, তিস্সনামং অকাৰযি;

মহতা পৰিহাৰেন, উভতো ৱড্ঢিংসু দাৰকা.