একৱীসতিম পৰিচ্ছেদ

ৱঞ্চ ৰাজকো

১. উত্তিযস্স কনিট্ঠো তু, মহাসিৱো তদচ্চযে;

দস ৱস্সানি কাৰেসি, ৰজ্জং সুজন সেৱকো.

২. ভদ্দসালম্হি সো থেৰে, পসীদিত্ৱা মনোৰমং;

কাৰেসি পুৰিমাযন্তু, ৱিহাৰং নগৰঙ্গণং.

৩. মহাসিৱকনিট্ঠো তু, সুৰতিস্সো তদচ্চযে;

দসৱস্সানি কাৰেসি, ৰজ্জং পুঞ্ঞেসু সাদৰো.

৪. দক্খিণায দিসাযং সো, ৱিহাৰং নগৰং গণং;

পুৰিমায হত্থিক্খন্ধঞ্চ, গোকণ্ণগিৰিমেৱ চ.

৫. ৱঙ্গুত্তৰে পব্বতম্হি, পাচিন পব্বতৱ্হযং;

ৰহেণকসমীপম্হি, তথা কোড়ম্বকাড়কং.

৬. অৰিট্ঠপাদে মং গুলকং, পুৰিমায’চ্ছ গল্লকং;

গিৰিনেলপনাযকণ্ডং, নগৰস্সুত্থৰায তু.

৭. পঞ্চসতা নেৱ মাদি-ৱিহাৰে পুথৱী পতি;

গঙ্গায ওৰপাৰঞ্হি, লংকাদীপে তহিং তহিং.

৮. পুৰে ৰজ্জা চ ৰজ্জে চ, সট্ঠীৱস্সানি সাধুকং;

কাৰেসি ৰম্মে ধম্মেন, ৰতনত্তয গাৰৱো.

৯. সুৱণ্ণপিণ্ডতিস্সোতি, নামং ৰজ্জা তস্সা অহু;

সুৰতিস্সোতি নামন্তু, তস্সা’পুৰজ্জপত্তিযা.

১০. অস্সনাৱিকপুত্তা দ্ৱে, দমিড়া সেনগুত্তিকা;

সুৰতিস্সমহীপালং, তং গহেত্ৱা মহব্বলা.

১১. দুৱে ৱীসতিৱস্সানি, ৰজ্জং ধম্মেন কাৰযুং;

তে গহেত্ৱা অসেলো তু, মুটসিৱস্স অত্ৰজো.

১২. সোদৰিযানং ভাতূনং, নৱমো ভতুকো ততো;

অনুৰাধপুৰে ৰজ্জং, দসৱস্সানি কাৰযি.

১৩. চোড়ৰট্ঠা ইধ গম্ম, ৰজ্জত্থং উজুজাতিকো;

এড়াৰো নাম দমিড়ো, গহেত্ৱা’সেলভূপতিং.

১৪. ৱস্সানি চত্তাৰীসঞ্চ, চত্তাৰি চ অকাৰযি;

ৰজ্জং ৱোহাৰসমযে, মজ্ঝত্তো মিত্তসত্তুসু.

১৫. সযনস্স সিৰোপস্সে, ঘণ্টং সুদীঘযোত্তকং;

লম্বাপেসি ৱীৰাৱেতুং, ইচ্ছন্তেহি ৱিনিচ্ছযং.

১৬. একো পুত্তো চ ধীতা চ, অহেসুং তস্স ৰাজিনো;

ৰথেন তিস্সৱাপিং সো, গচ্ছন্তো ভূমিপালজো.

১৭. তৰুণং ৱচ্ছকং মগ্গে, নিপন্নং সহধেনুকং;

গীৱং অক্কম্মচক্কেন, অসঞ্চিচ্চ অঘাতযি.

১৮. গন্ত্ৱান ধেনুঘণ্টং তং, ঘট্টেসি ঘট্টিতাসযা;

ৰাজা তেনেৱ চক্কেন, সীসং পুত্তস্স ছেদযি.

১৯. দিজপোতং তালৰুক্খে, একো সপ্পো অভক্খযি;

তম্পোতমাতা সকুণী, গন্ত্ৱা ঘণ্টমঘট্টযি.

২০. আণাপেত্ৱান তং ৰাজা, কুচ্ছিং তস্স ৱিদাড়িয;

পোতং তং নীহৰাপেত্ৱা, তালে সপ্পমসপ্পযি.

২১. ৰতনগ্গস্স ৰতন-ত্তযস্স গুণসাৰতং;

অজানন্তোপি সো ৰাজা, চাৰিত্তমনুপালযং.

২২. চেতিযদব্বতং গন্ত্ৱা, ভিক্খুসঙ্ঘং পৱাৰিয;

আগচ্ছন্তো ৰথগতো, ৰথস্স যুগকোটিযা.

২৩. অকাসি জিনথূপস্স,

একদেসস্স ভঞ্জনং;

অমচ্চা ‘‘দেৱ থূপোনো,

তযা ভিন্নো’তি আহু তং.

২৪. অসঞ্চিচ্চ কতে‘পে’স, ৰাজা ওৰুয্হ সন্দনা;

‘‘চক্কেন মম সীসম্পি, ছিন্দথা’তি পথেসযি.

২৫. ‘‘পৰহিংসং মহাৰাজ, সত্থা নো নেৱ ইচ্ছতি;

থূপং পাকতিকং কত্ৱা, খমাপেহী’’তি আহু তং.

২৬. তে ঠপেতুং পঞ্চদস, পাসাণে পতিতে তহিং;

কহাপণ সহস্সানি, অদা পঞ্চদসে ৱসো.

২৭. অকা মহল্লিকা ৱীহিং, সো সেতুং আতপে খিপি;

দেৱো অকালে ৱস্সিত্ৱা, তস্সা ৱিহিং অতেমযি.

২৮. ৱীহিং গহেত্ৱা গন্ত্ৱা সা, ঘণ্টং তং সমঘট্টযি;

অকালৱস্সং সুত্ৱা তং, ৱিস্সজ্জেত্ৱা তমত্তিকং.

২৯. ৰাজা ধম্মম্হি ৱত্তন্তো, ‘‘কালে ৱস্সং লভে’’ইতি;

তস্সা ৱিনিচ্ছযত্থায, উপৱাসং নিপজ্জি সো.

৩০. বলিগ্গাহী দেৱপুত্তো, ৰঞ্ঞো তেজেন ওত্থটো;

গন্ত্ৱা চাতুমহাৰাজ-সন্তিকং তং নিৱেদযি.

৩১. তে তমাদায গন্ত্ৱান, সক্কস্স পটিৱেদযুং;

সক্কো পজ্জুন্নমাহুয, কালে ৱস্সং উপাদিযি.

৩২. বলিগ্গাহী দেৱপুত্তো, ৰাজিনো তং নিৱেদযি;

ততোপ্পভুতি তং ৰজ্জে, দিৱা দেৱো ন ৱস্সথ.

৩৩. ৰত্তিং দেৱো’নু সত্তাহং, ৱস্সিযামম্হি মজ্ঝিমে;

পুণ্ণান’হেসুং সব্বত্থ, খুদ্দকা ৱাটকানিপি.

৩৪. অগতিগমনদোসো মুত্তমত্তেন এসো,

অনুপহত কুদিট্ঠিপীদিসিং পাপুণী’দ্ধিং;

অগতিগমনদোসং সুদ্ধদিট্ঠিসমানো,

কথমিধহি মনুস্সো বুদ্ধিমা নো জহেয্যাতি.

সুজনপ্পসাদসংৱেগত্থায কতে মহাৱংসে

পঞ্চৰাজকো নাম

একৱীসতিমো পৰিচ্ছেদো.