ৱীসতিম পৰিচ্ছেদ

থেৰপৰিনিব্বানং

১. অট্ঠাৰসম্হি ৱস্সম্হি, ধম্মাসোকস্স ৰাজিনো;

মহামেঘৱনাৰামে, মহাবোধি পতিট্ঠতি.

২. ততো দ্ৱাদসমে ৱস্সে, মহেসী তস্স ৰাজিনো;

পিযা অসন্ধীমিত্তা সা, মতা সম্বুদ্ধমামকা.

৩. ততো চতুত্থে ৱস্সম্হি, ধম্মাসোকো মহীপতি;

তিস্সৰক্খ মহেসিত্তে, ঠপেসি ৱিসমাসযং.

৪. ততো তু ততিযে ৱস্সে, সাবালা ৰূপমানিনী;

‘‘মযাপি চ অযং ৰাজা, মহাবোধিং ম মাযতি’’.

৫. ইতি কোধৱসং গন্ত্ৱা, অত্তনো’নত্থ কাৰিকা;

মণ্ডুকণ্টকযোগেন, মহাবোধি মঘা তযি.

৬. ততো চ তুত্থেৱস্সম্হি, ধম্মা সোকো মহাযসো;

অনিচ্চ তাৱ সংপত্তো, সত্ততিংসসমা ইমে.

৭. দেৱানং পিযতিস্সো তু, ৰাজা ধম্মগুণে ৰতো;

মহাৱিহাৰে নৱকম্মং, তথা চেতিযপব্বতে.

৮. থূপাৰামে নৱকম্মং, নিট্ঠাপেত্ৱা যথাৰহং;

দীপপ্পসাদকং থেৰং, পুচ্ছি পুচ্ছিতকোৱিদং.

৯. কাৰাপেস্সমহং ভন্তে, ৱিহাৰেসু বহূ ইধ;

পতিট্ঠাপেতুং থূপেসু, কথং লচ্ছাম ধাতুযো.

১০. সম্বুদ্ধপত্তং পূৰেত্ৱা, সুমনেনা’হটা ইধ;

চেতিযপব্বতে ৰাজ, ঠপিতা অত্থি ধাতুযো.

১১. হত্থিক্খন্ধে ঠপেত্ৱা তা, ধাতুযো ইধ আহৰ;

ইতি ৱুত্তো সথেৰেন, তথা আহৰি ধাতুযো.

১২. ৱিহাৰে কাৰযিত্ৱান, ঠানে যোজনযোজনে;

ধাতুযো তত্থ থূপেসু, নিধাপেসি যথাৰহং.

১৩. সম্বুদ্ধভুত্তপত্তং তু, ৰাজৱত্থুঘৰে সুভে;

ঠপযিত্ৱান পূজেসি, নানাপূজাহি সব্বদা.

১৪. পঞ্চসতেহি’স্সৰেতি, মহাথেৰস্স সন্তিকে;

পব্বজ্জৱসিতঠানে, ইস্সৰসমণকো অহু.

১৫. পঞ্চসতেহি ৱস্সেহি, মহাথেৰস্স সন্তিকে;

পব্বজ্জৱসিতঠানে, তথা ৱস্সগিৰি অহু.

১৬. যা যা মহামহিন্দেন, থেৰেন ৱসিতা গুহা;

সপব্বতৱিহাৰেসু, সা মহিন্দগুহা অহু.

১৭. মহাৱিহাৰং পঠমং, দুতিযং চেতিযৱ্হযং;

থূপাৰামং তু ততিযং, থূপপুব্বঙ্গমং সুভং.

১৮. চতুত্থং তু মহাবোধি-পতিট্ঠাপনমেৱ চ;

থূপঠানীযভূতস্স, পঞ্চমং পন সাধুকং.

১৯. মহাচেতিযঠানম্হি, সিলাথূপস্স চাৰুনো;

সম্বুদ্ধগীৱাধাতুস্স, পতিট্ঠাপনমেৱ চ.

২০. ইস্সৰসমণং ছট্ঠং, তিস্সৱাপিন্তুসত্তমং;

অট্ঠমং পঠমং থূপং, নৱমং ৱস্সগিৰিৱ্হযং.

২১. উপাসিকাৱ্হযং ৰম্মং, তথা হত্থাড়্হকৱ্হযং;

ভিক্খুনুপস্সকে দ্ৱে’মে, ভিক্খুনী ফাসুকাৰণা.

২২. হত্থাড়্হকে ওসৰিত্ৱা, ভিক্খুনীনং উপস্সযে;

গন্ত্ৱান ভিক্খুসঙ্ঘেন, ভত্তগ্গহণকাৰণা.

২৩. হত্তসালং সূপহাৰং, মহাপাড়িকনামকং;

সব্বুপকৰণূপেতং, সম্পত্তপৰিচাৰিকং.

২৪. তথা ভিক্খুসহস্সস্স, সপৰিক্খাৰমুত্তমং;

পৱাৰণায দানঞ্চ, অনুৱস্সকমেৱ চ.

২৫. নাগদীপে জম্বুকোল-ৱিহাৰং ত ম্হিপট্টনে;

তিস্সমহাৱিহাৰঞ্চ, পাচীনাৰাম মেৱ চ.

২৬. ইতি এতানি কম্মানি, লংকাজনহিতত্থিকো;

দেৱানংপিযতিস্সো সো, লংকিন্দো পুঞ্ঞপঞ্ঞৱা.

২৭. পঠমেযেৱ ৱস্সম্হি, কাৰাপেসি গুণপ্পিযো;

যাৱ জীৱন্তুনেকানি, পুঞ্ঞকম্মানি আচিনি.

২৮. অযং দীপো অহু ঠিতো, ৱিজিতে তস্স ৰাজিনো;

ৱস্সানি চত্তালীসং সো, ৰাজা ৰজ্জমকাৰযি.

২৯. তস্স’চ্চ যে তং কনিট্ঠো, উত্তিযো ইতি ৱিস্সুতো;

ৰাজপুত্তো অপুত্তং তং, ৰজ্জং কাৰেসি সাধুকং.

৩০. মহামহিন্দত্থেৰো তু, জিনসাসনমুত্তমং;

পৰিযত্তিং পটিপত্তিং, পটিৱেধঞ্চ সাধুকং.

৩১. লংকাদীপম্হি দীপেত্ৱা, লংকাদীপো মহাগণি;

লংকাযসো সত্থু কপ্পো, কত্ৱা লংকাহিতং বহুং.

৩২. তস্স উত্তিযৰাজস্স, জযৱস্সম্হি অট্ঠমে;

অন্তোৱস্সং সট্ঠিৱস্সো, চেতিযপব্বতে ৱসং.

৩৩. অস্সযুজস্স মাসস্স, সুক্কপক্খঠমে দিনে;

পৰিনিব্বাযিতে নেতং, দিনং তন্নামকং অহু.

৩৪. [নিব্বুতস্স মহিন্দস্স, অট্ঠমিযং দিনে পন,

তেন তং দিৱসং নাম, অট্ঠমিযাতি সম্মতং.]

৩৫. তং সুত্ৱা উত্তিযো ৰাজা, সোকসল্লসমপ্পিতো;

গন্ত্ৱান থেৰং ৱন্দিত্ৱা কন্দিত্ৱা বহুধা বহুং.

৩৬. আসিত্তগন্ধতেলায, বহুং সোৱণ্ণদোণিযা;

থেৰদেভং খিপাপেত্ৱা, তং দোণিং সাধুফুস্সিতং.

৩৭. সোৱণ্ণকূটাগাৰম্হি, ঠপাপেত্ৱা অলঙ্কতে;

কূটাগাৰং গাহযিত্ৱা, কাৰেন্তো সাধুকীড়িতং.

৩৮. মহতা চ জনোঘেন, আগতেনততো ততো;

মহতা চ বলোঘেন, কাৰেন্তো পূজনাৱিধিং.

৩৯. অলঙ্কতেন মগ্গেন, বহুধা’লঙ্কতং পুৰং;

আনযিত্ৱান নগৰে, চাৰেত্ৱা ৰাজৱীথিযো.

৪০. মহাৱিহাৰং আনেত্ৱা, এত্থ পঞ্হম্বমাড়কে;

কুটাগাৰং ঠপাপেত্ৱা, সত্তাহং সো মহীপতি.

৪১. তোৰণদ্ধজপুপ্ফেহি, গন্ধপুণ্ণঘটেহি চ;

ৱিহাৰঞ্চ সমন্তা চ, মণ্ডিহং যোজনত্তযং.

৪২. অহু ৰাজানুভাৱেন, দীপন্তু সকলং পন;

আনুভাৱেন দেৱানং, তথেৱা’লঙ্কতং অহু.

৪৩. নানাপূজং কাৰযিত্ৱা, সত্তাহং সো মহীপতি;

পুৰত্থিমদিসাভাগে, থেৰানং বদ্ধমাড়কে.

৪৪. কাৰেত্ৱা গন্ধচিতকং, মহাথূপং পদক্খিণং;

কৰোন্তো তত্থ নেত্ৱা তং, কূটাগাৰং মনোৰমং.

৪৫. চিতকম্হি ঠপাপেত্ৱা, সক্কাৰং অন্তিমং অকা;

চেতিযঞ্চেত্থ কাৰেসি, গাহা পেত্ৱান ধাতুযো.

৪৬. উপড্ঢধাতুং গাহেত্ৱা, চেতিযে পব্বতেপি চ;

সব্বেসু চ ৱিহাৰেসু, থূপে কাৰেসি খত্তিযো.

৪৭. ইসিনো দেহনিক্খেপ-কতঠানঞ্হি তস্স তং;

ৱুচ্চতে বহুমানেন, ইসিভূমঙ্গনং ইতি.

৪৮. ততো পভুত্য’ৰিযানং, সমন্তা যোজনত্তযে;

সৰীৰং আহৰিত্ৱান, তম্হি দেসম্হি ডয্হতি.

৪৯. সঙ্ঘমিত্তা মহাথেৰী, মহা’ভিঞ্ঞা মহামতী;

কত্ৱা সাসনকিচ্চানি, তথা লোকহিতং বহুং.

৫০. একূনসট্ঠিৱস্সা সা, উত্তিযস্সে’ৱ ৰাজিনো;

ৱস্সম্হি নৱমে খেমে, হত্থাড়্হকউপস্সযে.

৫১. ৱসন্তী পৰিনিব্বাযী, ৰাজা তস্সাপি কাৰযি;

থেৰস্স ৱিয সত্তাহং, পূজাসক্কাৰ মুত্তমং.

৫২. সব্বা অলঙ্কতা লংকা, থেৰস্স ৱিয আসি চ;

কূটাগাৰগতং থেৰি-দেহং সত্তদিনচ্চযে.

৫৩. নিক্খামেত্ৱান নগৰং, থূপৰাম পুৰত্থতো;

চিত্তসালা সমীপম্হি, মহাবোধিপ দস্সযে.

৫৪. থেৰিযা ৱুট্ঠঠানম্হি, অগ্গিকিচ্চ মকাৰযি;

থূপঞ্চ তত্থ কাৰেসি, উত্তিযো সো মহীপতি.

৫৫. পঞ্চাপি তে মহাথেৰা, থেৰাৰিট্ঠাদযোপি চ;

তথা’নেক সহস্সানি, ভিক্খু খীণাসৱাপি চ.

৫৬. সঙ্ঘমিত্তা পভুতিযো, তা চ দ্ৱাদসথেৰিযো;

খীণাসৱা ভিক্খুনিযো, সহস্সানি বহূনি চ.

৫৭. বহুস্সুতা মহাপঞ্ঞা, ৱিনযাদিজানাগমং;

জোতযিত্ৱান কালেন, পযাতা’নিচ্চতাৱসং.

৫৮. দসৱস্সানি সো ৰাজা, ৰজ্জং কাৰেসি উত্তিযো;

এৱং অনিচ্চতা এসা, সব্বলোকৱিনাসিনী.

৫৯. তং এতং অতিসাহসং অতিবলং ন ৱাৰিযং নৰো;

জানন্তোপি অনিচ্চতং ভৱগতে নিব্বিন্দতেনেৱ চ;

নিব্বিন্দো ৱিৰতিং ৰতিং ন কুৰুতে পাপেহি পুঞ্ঞেহি চ;

তস্সে’সাঅতিমোহজালবলতাজানম্পি সম্মুয্হতীতি.

সুজনপ্পসাদসংৱেগত্থায কতে মহাৱংসে

থেৰপৰিনিব্বানং নাম

ৱীসতিমো পৰিচ্ছেদো.