দুতিযপৰিচ্ছেদ

মহাসম্মতৱংস

১. মহাসম্মত ৰাজস্স, ৱংসজো হি মহামুনি;

কপ্পস্সাদিম্হি ৰাজা’সি, মহাসম্মতনামকো.

২. ৰোজো চ ৱৰৰোজো চ, তথা কল্যাণকা দুৱে;

উপোসথো চ মন্ধাতা, চৰকো’পচৰা দুৱে.

৩. চেতীযো মুচলো চেৱ, মহামূচলনামকো;

মুচলিন্দো সাগৰো চেৱ, সাগৰো দেৱ ৱনামকো.

৪. ভৰতো ভগীৰথো চেৱ, ৰুচি চ সুৰুচি পিচ;

পতাপো মহাপতাপো, পনাদা চ তথা দুৱে.

৫. সুদস্সনো চ নেৰু চ, তথা এৱ দুৱে দুৱে;

পচ্ছিমা চা’তি ৰাজানো, তস্স পুত্তপপুত্তকা.

৬. অসংখিযাযুকা এতে, অট্ঠৱীসতি ভূমিপা;

কুসাৱতিং ৰাজগহং, মিথিলঞ্চাপি আৱসুং.

৭. ততো সতঞ্চ ৰাজনো, ছপ্পঞ্ঞাস চ সট্ঠি চ;

চতুৰাসীতি সহস্সানি, ছত্তিংসা চ ততো পৰে.

৮. দ্ৱত্তিংস অট্ঠৱীসা চ, দ্ৱাৱীসতি ততো পৰে;

অট্ঠাৰস সত্তৰস, পঞ্চদস চতুদ্দস.

৯. নৱ সত্ত দ্ৱাদস চ, পঞ্চৱীস ততোপৰে;

পঞ্চৱীসং দ্ৱাদস চ, দ্ৱাদসঞ্চ নৱা পিচ.

১০. চতুৰাসীতিসহস্সানি, মখাদেৱাদিকাপি চ;

চতুৰাসীতিসহস্সানি, কড়াৰাজনকাদযো.

১১. সোড়স যাৱ ওক্কাতং, পপুত্তা ৰাসিতো ইমে;

ৱিসুং ৱিসুং পুৰে ৰজ্জং, কমতো অনুসাসিসুং.

১২. ওক্কামুখো জেট্ঠপুত্তো, ওক্কাকসা’সি ভূপতি;

নিপুৰো চন্দীমা চন্দং-মুখো চ সিৱি সঞ্জযো.

১৩. ৱেস্সন্তৰ মহাৰাজা, জালী চ সীহৱাহনো;

সীহস্সৰো চ ইচ্চেতে, তস্স পুত্ত প পুত্তকা.

১৪. দ্ৱেঅসীতি সহস্সানি, সীহস্সৰস্স ৰাজিনো;

পুত্ত প পুত্ত ৰাজানো, জযসেনো তদন্তিমো.

১৫. এতে কপিলৱত্থুস্মিং, সক্যৰাজাতি ৱিস্সুতা;

সীহহনু মহাৰাজা, জযসেনস্স অত্ৰজো.

১৬. জযসেনস্স ধীতা চ, নামেনা’সি যসোধৰা;

দেৱদযে দেৱদহ-সক্কো নামা’সি ভূপতি.

১৭. অঞ্জনো চা’থ কচ্চানা, আসুং তস্স সুতা দুৱে;

মহেসীচা’সি কচ্চানা, ৰঞ্ঞো সীহহনুস্স সা.

১৮. আসী অঞ্জনসক্কস্স, মহেসী সা যসোধৰা;

অঞ্জনস্স দুৱে ধীতা, মাযা চাথ পজাপতি.

১৯. পুত্তা দুৱে দণ্ডপাণী, সুপ্পবুদ্ধো চ সাকিযো;

পঞ্চ পুত্তা দুৱে ধীতা, আসুং সীহহনুস্সৰে.

২০. সুদ্ধোদনো ধোতোদনো, সক্কসুক্কমিতোদনো;

অমিতা পমিতাচা’তি, ইমে পঞ্চ ইমা দুৱে.

২১. সুপ্পবুদ্ধস্স সক্কস্স, মহেসী অমিতা অহু;

তস্সা’সুং ভদ্দকচ্চানা, দেৱদত্তো দুৱে সুতা.

২২. মাযা মহাপজাপতি চেৱ, সুদ্ধোদন মহেসীযো;

সুদ্ধোদন মহাৰঞ্ঞো, পুত্তো মাযায সো জিনো.

২৩. মহা সম্মতৱংসম্হি, অসম্ভিন্নে মহামুনি;

এৱং পৱত্তে সঞ্জাতো, সব্ব খত্থিয মুদ্ধনি.

২৪. সিদ্ধত্থস্স কুমাৰস্স, বোধিসত্তস্স সা অহু;

মহেসী ভদ্দকচ্চানা, পুত্তো তস্সা’সি ৰাহুলো.

২৫. বিম্বিসাৰো চ সিদ্ধত্থ-কুমাৰো চ সহাযকা;

উভিন্নং পিতৰো চাপি, সহাযাএৱ তে অহুং.

২৬. বোধিসত্তো বিম্বিসাৰা, পঞ্চৱস্সাধিকো অহু;

একূনতিংসো ৱযসা, বোধিসত্তো’ভিনিক্খমি.

২৭. পদহিত্ৱান ছব্বস্সং, বোধিং পত্ৱা কমেন চ;

পঞ্চতিংসো থ ৱযসা, বিম্বিসাৰমুপাগমি.

২৮. বিম্বিসাৰো পন্নৰস-ৱস্সো’থ পীতৰং সযং;

অভিসিত্তো মহাপঞ্ঞো, পত্তো ৰজ্জস্স তস্স তু.

২৯. পত্তে সোড়সমে ৱস্সে, সত্থা ধম্মমদেসযি;

দ্ৱাপঞ্ঞাসেৱ ৱস্সানি, ৰজ্জং কাৰেসি সো পন.

৩০. ৰজ্জে সমা পন্নৰস, পুব্বে জিনসমাগমা;

সত্ততিংস সমা তস্স, ধৰমানে তথাগতে.

৩১. বিম্বিসাৰসুতো’জাত-সত্তুতং ঘাতীযা’মতি;

ৰজ্জং দ্ৱত্তিংসৱস্সানি, মহামিত্তদ্দুকাৰযী.

৩২. অজাতসত্তুনো ৱস্সে, অট্ঠমে মুনি নিব্বুতো;

পচ্ছা সো কাৰযী ৰজ্জং, ৱস্সানি চতুৱীসতি.

৩৩. তথাগতো সকললোকগ্গতং গতো;

অনিচ্চতাৱ সমৱসো উপাগতো;

ইতি’ধ যো ভযজননিং অনিচ্চতং,

অৱেক্খতে স ভৱতি দুক্খপাৰগূতি.

সুজনপ্পসাদসংৱেগত্থায কতে মহাৱংসে

মহাসম্মতৱংসো নাম

দুতিযো পৰিচ্ছেদো.