একূনৱীসতিম পৰিচ্ছেদ

বোধি আগমনো

১. মহাবোধিৰক্খণত্থং, অট্ঠাৰস ৰথে সভো;

দেৱকুলানি দত্ৱান, অট্ঠামচ্চা কুলানি চ.

২. অট্ঠ ব্ৰাহ্মণকুলানি, অট্ঠ ৱস্সকুলানি চ;

গোপকানং তৰচ্ছানং, কুলিঙ্গানং কুলানি চ.

৩. তথেৱ পেসকাৰানং, কুম্ভকাৰানমেৱ চ;

সব্বে সঞ্চাপি সেনীনং, নাগযক্খানমেৱ চ.

৪. হেমসজ্জুঘটেচেৱ, দত্ৱা অট্ঠট্ঠ মানদো;

আৰোপেত্ৱা মহাবোধিং, নাৱং গঙ্গায ভূসিতং.

৫. সঙ্ঘমিত্ত মহাথেৰী, সহে কদস ভিক্খুনিং;

তথেৱা’ৰোপযিত্ৱান, অৰিট্ঠপমুখেপি চ.

৬. নগৰা নিক্খমিত্ৱান, ৱিঞ্জাটৱিমতিচ্চসো;

তামলিত্থিং অনুপ্পত্তো, সত্তাহেনে’ৱ ভূপতি.

৭. অচ্চুড়া ৰাহি পূজাযি, দেৱানাগানৰাপি চ;

মহাবোধিং পূজযন্তা, সত্তাহেন’ৱুপাগমুং.

৮. মহাসমুদ্দতীৰম্হি, মহাবোধিং মহীপতি;

ঠপাপেত্ৱান পূজেসি, মহাৰজ্জেন সো পুন.

৯. মহাবোধিং মহাৰজ্জে, অভিসিঞ্চীযকামদো;

অগ্গসিৰ সুক্কপক্খে, দিনে পাটিপদে ততো.

১০. উচ্চাৰেতুং মহাবোধিং, তেহিযেৱ’ট্ঠ অট্ঠহি;

সালমূলম্হি দিন্নেহি, ধাতুগ্গতকুলেহি সো.

১১. উক্খিপিত্ৱা মহাবোধিং, গলমত্তং জলং তহিং;

ওগাহেত্ৱা সনাৱায, পতিট্ঠাপযি সাধুকং.

১২. নাৱং আৰোপযিত্ৱা তং, মহাথেৰিং সথেৰিকং;

মহাৰিট্ঠং মহামচ্চং, ইদং ৱচনমব্ৰৱি.

১৩. ‘‘অহং ৰজ্জেন তিক্খত্তুং, মহাবোধিমপূজযিং;

এৱ মেৱা’ভি পূজেতু, ৰাজা ৰজ্জেন মে সখা’’.

১৪. ইদং ৱত্ৱা মহাৰাজা, তীৰে পঞ্জলিকো ঠিতো;

গচ্ছমানং মহাবোধিং, পস্সং অস্সূনিৱত্তযি.

১৫. মহাবোধি ৱিযোগেন,

ধম্মা সোকো সসোকৱা;

কন্নিত্ৱা পৰিদেৱিত্ৱা,

অগমাসি সকং পুৰং.

১৬. মহাবোধি সমাৰুড়্হা, নাৱাপক্খন্ধী তোযধিং;

সমন্তা যোজনে ৱিচী, সন্নিসীদি মহণ্ণৱে.

১৭. পুপ্ফিংসু পঞ্চৱণ্ণানি, পদুমানি সমন্ততো;

অন্তলিক্খে পৱজ্জিংসু, অনেক তূৰিযানি চ.

১৮. দেৱতাহি অনেকাহি, পূজা’নেকা পৱত্তিতা;

গহেতুঞ্চ মহাবোধি, নাগা’কাসুং ৱিকুব্বনং.

১৯. সঙ্ঘমিত্তা মহাথেৰি, অভিঞ্ঞাবলপাৰগা;

সুপণ্ণৰূপা হুত্ৱান, তে তাসেসি মহোৰগে.

২০. তে তাসিতা মহাথেৰিং, যাচিত্ৱান মহোৰগা;

নযিত্ৱান মহাবেমধিং, ভুজঙ্গভৱনং ততো.

২১. সত্তাহং নাগৰজ্জেন, পূজাহি ৱিৱিধাহি চ;

পূজযিত্ৱান আনেত্ৱা, নাৱাযং ঠপযিংসু তে.

২২. তদহেৱ মহাবোধি, জম্বুকোলমিধগমা;

দেৱানংপিযতিস্সো তু, ৰাজা লোকহিতে ৰতো.

২৩. সুমনা সামণেৰম্হা, পুব্বে সুততদাগমো;

মগ্গসিৰাদিদিনঘো, পভুতি ৱচসাদৰো.

২৪. উত্তৰদ্ৱাৰতো যাৱ, জম্বুকোলং মহাপথং;

ৱিভূসযিত্ৱা সকলং, মহাবোধিগতাসযো.

২৫. সমুদ্দাসনসালায, ঠানে ঠত্ৱা মহণ্ণৱে;

আগচ্ছন্তং মহাবোধিং, মহাথেৰিদ্ধিযা’দ্দস.

২৬. তস্মিংঠানে কতা সালা, পকা সেতুং তমব্ভুতং;

সমুদ্দাসনসালাতি, নামেনা‘সি’ধ পাকটা.

২৭. মহাথেৰানুভাৱেন, সদ্ধিং থেৰেহি তেহি চ;

তদহেৱ’গমা ৰাজা, জম্বুকোলং স সেনকো.

২৮. মহাবোধা গমেপীতি-ৱেগেনু’ন্নো উদানযং;

গলপ্পমাণং সলিলং, ৱিগাহেত্ৱা সুৱিগ্গহো.

২৯. মহাবোধিং সোড়সহি, কুলেহি সহ মুদ্ধনা;

আদাযো’ৰোপযিত্ৱান, ৱেলাযং মণ্ডপে সুভে.

৩০. ঠপযিত্ৱান লংকিন্দো, লংকাৰজ্জেন পূজযি;

সোড়সন্নং সমপ্পেত্ৱা, কুলানং ৰজ্জমত্তনো.

৩১. সযং দোৱাৰিকঠানে, ঠত্ৱান দিৱসে তযো;

তত্থেৱ পূজং কাৰেসি, ৱিৱিধং মনুজাধিপো.

৩২. মহাবোধিং দসমিযং, আৰোপেত্ৱা ৰথেসুভে;

আনযন্তো মনুস্সিন্দো, দুমিন্দং তং ঠপাপযি.

৩৩. পাচিনস্স ৱিহাৰস্স, ঠানে ঠানৱিচক্খণো;

পাতৰাসং পৱত্তেসি, সসঙ্ঘস্স জনস্স সো.

৩৪. মহামহিন্দথেৰে’ত্থ, কতং দসবলেন তং;

কথেসি নাগদমনং, ৰঞ্ঞো তস্স অসেসতো.

৩৫. থেৰস্স সুত্ৱা কাৰেত্ৱা, সঞ্ঞাণানি তহিং তহিং;

পৰিভুত্তেসু ঠানেসু, নিসজ্জাদীহি সত্থুনা.

৩৬. তিৱক্কস্স ব্ৰাহ্মণস্স, গামদ্ৱাৰে চ ভূপতি;

ঠপাপেত্ৱা মহাবোধিং, ঠানেসু তেসু তেসু চ.

৩৭. সুদ্ধৱালুক সন্থাৰে, নানাপুপ্ফসমাকুলে;

পগ্গহিতধজে মগ্গে, পুপ্ফগ্ঘিকৱিভূসিতে.

৩৮. মহাবোধিং পূজযন্তো, ৰত্তিন্দিৱ মতন্দিতো;

আনযিত্ৱা চুদ্দসিযং, অনুৰাধ পুৰন্তিকং.

৩৯. ৱড্ঢমানকচ্ছাযায, পুৰং সাধু ৱিভূসিতং;

উত্তৰেন চ দ্ৱাৰেন, পূজযন্তো পৱেসিয.

৪০. দক্খিণেন চ দ্ৱাৰেন, নিক্খমিত্ৱা পৱেসিয;

মহা মেঘৱনাৰামং, চতুবুদ্ধনিসেৱিতং.

৪১. সুমনস্সেৱ ৱচসা, পদেসং সাধুসঙ্খতং;

পুব্ববোধিঠিতট্ঠানং, উপনেত্ৱা মনোৰমং.

৪২. কুলেহি সো সোড়সহি, ৰাজা লঙ্কাৰধাৰিহি;

ওৰোপেত্ৱা মহাবোধিং, পতিট্ঠা পেতু মোস্সজ্জি.

৪৩. হত্থতো মুত্তমত্তসা, অসীতিৰতনং নভং;

উগ্গন্ত্ৱান ঠিতা মুঞ্চি, ছব্বণ্ণা ৰস্মিযো সুভা.

৪৪. দীপে পত্থৰিযা’হচ্চ, ব্ৰহ্মলোকং ঠিতা অহু;

সূৰিযত্থঙ্গমনাযাৱ, ৰস্মিযো তা মনোৰমা.

৪৫. পুৰিসা দসসহস্সানি, পসন্না পাটিহাৰিযে;

ৱিপস্সিত্ৱানা’ৰহত্থং, পত্ৱান ইধ পব্বজুং.

৪৬. ওৰোহিত্ৱা মহাবোধি, সূৰিযত্থঙ্গমে ততো;

ৰোহিণিযা পতিট্ঠাসি, মহিযং কম্পি মেদিনী.

৪৭. মূলানি তানি উগ্গন্ত্ৱা, কটাহমুখৱট্টিতো;

ৱিনন্ধন্তা কটাহং তং, ওতৰিংসু মহীতলং.

৪৮. পতিট্ঠিতং মহাবোধিং, জনা সব্বে সমগতা;

গন্ধমালাদি পূজাহি, পূজযিংসু সমন্ততো.

৪৯. মহামেঘো পৱস্সিত্থ, হিমগব্ভা সমন্ততো;

মহাবোধিং ছাদযিংসু, সীতলানি ঘনানি চ.

৫০. সত্তাহানি মহাবোধিং, তহিংযেৱ অদস্সনা;

হিমগব্ভে সন্নিসীদি, পসাদজননী জনে.

৫১. সত্তাহা তিক্কমে মেঘা, সব্বে অপগমিংসু তে;

মহাবোধি চ দিস্সিত্থ, ছব্বণ্ণা ৰংসিযোপি চ.

৫২. মহামহিন্দত্থেৰোচ, সঙ্ঘমিত্তা চ ভিক্খুনী;

তত্থা’গঞ্ছুংসপৰিসা, ৰাজা সপৰিসোপি চ.

৫৩. খত্তিযা কাজৰগ্গামে, চন্দনগ্গাম খত্তিযা;

তিৱক্ক ব্ৰাহ্মণো চেৱ, দীপৱাসী জনাপি চ.

৫৪. দেৱানুভাৱেনা’গঞ্ছুং, মহাবোধি মহুস্সুক্কা;

মহাসমাগমে তস্মিং, পাটিহাৰিযৱিম্হিতে.

৫৫. পক্কং পাচিনসাখায, পেক্খতং পক্ক’মক্খতং;

থেৰো পতন্তমাদায, ৰোপেতুং ৰাজিনো অদা.

৫৬. পংসূনং গন্ধমিস্সানং, পুণ্ণে সোণ্ণ কটাহকে;

মহাসনস্স ঠানে তং, ঠপিতং ৰোপ’যিস্সৰো.

৫৭. পেক্খতংযেৱ সব্বেসং, উগ্গন্ত্ৱা অট্ঠ অঙ্কুৰা;

জাযিংসু বোধিতৰুণা, অট্ঠংসু চতুহত্থকা.

৫৮. ৰাজা তে বোধিতৰুণে, দিস্ৱা ৱিম্হিতমানসো;

সেতচ্ছত্তেন পূজেসি, অভিসেকমদাসি চ.

৫৯. পতিট্ঠাপেসি অট্ঠন্নং, জম্বুকোলম্হি পট্টনে;

মহাবোধি ঠিত ঠানে, নাৱাযো ৰোহনে তদা.

৬০. তিৱক্কব্ৰাহ্মণগামে, থূপাৰামে তথেৱ চ;

ইস্সৰসমণাৰামে, পঠমে চেতিযঙ্গণে.

৬১. চেতিয পব্বতা ৰামে, তথা কাজৰগামকে;

চন্দনগামকে চাতি, একেকং বোধিলট্ঠিকং.

৬২. সেসা চতুপক্কজাতা, দ্ৱত্তিংস বোধিলট্ঠিযো;

সমন্তা যোজনঠানে, ৱিহাৰেসু তহিং তহিং.

৬৩. দীপাৱাসী জনস্সেৱ, হিতত্থায পতিট্ঠিতে;

মহাবোধি দুমিন্দম্হি, সম্মাসম্বুদ্ধ তেজসা.

৬৪. অনুলাসাস পৰিসা, সঙ্ঘমিত্তায থেৰিযা;

সন্তিকে পব্বজিত্ৱান, অৰহত্তমপাপুণি.

৬৫. অৰিট্ঠো সো পঞ্চসত-পৰিৱাৰো চ খত্তিযো;

থেৰন্তিকে পব্বজিত্ৱা, অৰহত্তমপাপুণি.

৬৬. যানি সেট্ঠিকুলান’ট্ঠ-মহাবোধিমিধাহৰুং;

বোধাহৰকুলানীতি, তানি তেন পৱুচ্চৰে.

৬৭. উপাসিকা ৱিহাৰোতি, ঞাতে ভিক্খুনুপস্সযে;

সসঙ্ঘা সঙ্ঘমিত্তা সা, মহাথেৰী তহিং ৱসি.

৬৮. অগাৰত্তযপামোক্খে, অগাৰে তত্থ কাৰযি;

দ্ৱাদস তেসু একস্মিং, মহাগাৰে ঠপাপযি.

৬৯. মহাবোধিসমেতায, নাৱায কূপযট্ঠিকং;

একস্মিং পিয মেকস্মিং, অৰিত্তং তেহি তেৱিদুং.

৭০. জাতে অঞ্ঞনিকাযেপি, অগাৰা দ্ৱাদসাপি তে;

হত্থাড়ক ভিক্খুনীহি, ৱড়ঞ্জযিংসু সব্বদা.

৭১. ৰঞ্ঞো মঙ্গলহত্থি সো, ৱিচৰন্তো যথাসুখং;

পুৰস্স একপস্সম্হি, কন্দৰন্তম্হি সীতলে.

৭২. কদম্বপুপ্ফগুম্বন্তে, অট্ঠাসি গোচৰং চৰং;

হত্থিং তত্থৰতং ঞত্ৱা, অকংসু তত্থ আড়্হকং.

৭৩. অথেক দিৱসং হত্থী, নগণ্হি কবড়ানি সো;

দীপপ্পসাদকং থেৰং, ৰাজা সো পুচ্ছিতং মতং.