অট্ঠাৰসম পৰিচ্ছেদ

মহাবোধিগ্গহণো

১. মহাবোধিঞ্চ থেৰিঞ্চ, আণাপেতুং মহীপতি;

থেৰেন ৱুত্তৱচনং, সৰমানো সকে ঘৰে.

২. অন্তোৱস্সে’ক দিৱসং, নিসিন্নো থেৰসন্তিকে;

সহা’মচ্চেহি মন্তেত্ৱা, ভাগিনেয্যং সযং সকং.

৩. অৰিট্ঠনামকা’মচ্চং, তস্মিং কম্মে নিযোজিতুং;

মন্ত্ৱা আমন্তযিত্ৱান, ইদং ৱচনমব্ৰৱি.

৪. তা সক্খিস্সসি…, ধম্মাসোকস্স সন্তিকা;

মহাবোধিং সঙ্ঘমিত্তং, থেৰিং আনযিতুং ইধ.

৫. সক্খিস্সামি অহং দেৱ, আনেতুং তং দুৱে ততো;

ইধা’গতো পব্বজিতুং, সচে লচ্ছামি মানদ.

৬. এৱং হোতূতি ৱত্ৱান, ৰাজা তং তত্থ পেসযি;

সো থেৰস্স চ ৰঞ্ঞো চ, সাসনং গয্হ ৱন্দিয.

৭. অস্সযুজসুক্কপক্খে, নিক্খন্তো দুতিযে’হনি;

সানুযুত্তো জম্বুকোলে, নাৱমাৰুয্হ পট্টনে.

৮. মহোদমিং কৰিত্ৱান, থেৰাধিট্ঠানযোগতো;

নিক্খন্তদিৱসেযেৱ, ৰম্মং পুপ্ফপুৰং অগা.

৯. তদা তু অনুলাদেৱী, পঞ্চকঞ্ঞাসতেহি চ;

অন্তেপুৰিকইত্থীনং, সদ্ধিং পঞ্চসতেহি চ.

১০. দসসীলং সমাদায, কাসায ৱসনা সুচি;

পব্বজ্জাপেক্খি নিসেখা, পেক্খন্তি থেৰিযা’গমং.

১১. নগৰস্সে’কদেসম্হি, ৰম্মে ভিক্খুনুপস্সযে;

কাৰাপিতে নৰিন্দেন, ৱাসং কপ্পেসি সুব্বতা.

১২. উপাসিকাহি তাহে’স, ৱুত্তো ভিক্খুনুপস্সযো;

উপাসিকা ৱিহাৰোতি, তেন লংকায ৱিস্সুতো.

১৩. ভাগিনেয্যো মহা’ৰিট্ঠো, ধম্মাসোকস্স ৰাজিনো;

অপ্পেত্ৱা ৰাজসন্দেসং, থেৰসন্দেস’মব্ৰৱি.

১৪. ভাতুজযা সহাযস্স, ৰঞ্ঞো তে ৰাজকুঞ্জৰ;

আকঙ্খমানা পব্বজ্জং, নিচ্চং ৱসতি সঞ্ঞতা.

১৫. সঙ্ঘমিত্তং ভিক্খুনিং তং, পব্বাজেতুং ৱিসজ্জয;

তায সদ্ধিং মহাবোধি-দক্খিণসাখমেৱ চ.

১৬. থেৰিযা চ তমেৱত্থং, অব্ৰৱি থেৰভাসিতং;

গন্ত্ৱা পিতুসমীপং সা, থেৰী থেৰমতং ব্ৰৱী.

১৭. আহ ৰাজা তুৱং অম্ম, অপস্সন্তো কথং অহং;

সোকং ৱিনোদযিস্সামি, পুত্তনত্তৱিযোগজং.

১৮. আহ সা মে মহাৰাজ, ভাতুনো ৱচনং গৰু;

পব্বাজনীযা চ বহূ, গন্তব্বং তত্থ তেন মে.

১৯. ‘‘সত্থঘাতমনাৰহা, মহাবোধিমহীৰুহা;

কথন্নু সাখং গণিস্সং’’, ইতি ৰাজা ৱিচিন্তযী.

২০. অমচ্চস্স মহাদেৱ-নামকস্স মতেন সো;

ভিক্খুসঙ্ঘং নিমন্তেত্ৱা, ভোজেত্ৱা পুচ্ছি ভূপতিং.

২১. ভন্তে লংকং মহাবোধি, পেসেতব্বা নু খো ইতি;

থেৰো মোগ্গলিপুত্তো সো, পেসেতব্বাতি ভাসিয.

২২. কতং মহাঅধিট্ঠান-পঞ্চকং পঞ্চচক্খুনা;

আভাসি ৰঞ্ঞো তং সুত্ৱা, তুস্সিত্ৱা ধৰণীপতি.

২৩. সত্তযোজনিকং মগ্গং, সো মহাবোধিগামিনং;

সোধাপেত্ৱান সক্কচ্চং, ভূসাপেতি অনেকধা.

২৪. সুৱণ্ণং নীহৰাপেসি, কটাহকৰণায চ;

ৱিস্সকম্মো চ আগন্ত্ৱা, সতুলাধাৰৰূপৱা.

২৫. ‘‘কটাহং কিং পমাণং নু, কৰোমী’তি অপুচ্ছিতং;

‘‘ঞত্ৱা পমাণং ত্ৱংযেৱ, কৰোহি’’ ইতি ভাসিয.

২৬. সুৱণ্ণা গহেত্ৱান, হত্থেন পৰিমজ্জিয;

কটাহং তঙ্খণংযেৱ, নিম্মিনিত্ৱান পক্কমি.

২৭. নৱহত্থপৰিক্খেপং, পঞ্চহত্থং গভীৰতো;

তিহত্থৱিক্খম্ভযুতং, অট্ঠঙ্গুলঘনং সুভং.

২৮. যুৱস্স হত্থিনো সোণ্ড-পমাণমুখৱট্টিকং;

গাহা পেত্ৱান তং ৰাজা, বালসুৰসমপ্পকং.

২৯. সত্তযোজনদীঘায, ৱিত্থতাযতি যোজনং;

সেনায চতুৰঙ্গিন্যা, মহাভিক্খুগণেন চ.

৩০. উপগম্ম মহাবোধিং, নানালঙ্কাৰভূসিতং;

নানাৰতনচিত্তং তং, ৱিৱিধদ্ধজমালিনিং.

৩১. নানাকুসুমসংকিণ্ণং, নানাতুৰিযঘোসিতং;

সেনায পৰিৱাৰেত্ৱা, পৰিক্খিপিয সাণিযা.

৩২. মহাথেৰসহস্সেন, পমুখেন মহাগণে;

ৰঞ্ঞং পত্তাভিসেকানং, সহস্সেনা’ধিকেন চ.

৩৩. অত্তানং পৰিৱাৰেত্ৱা, মহাবোধিঞ্চ সাধুকং;

ওলোকেসি মহাবোধিং, পগ্গহেত্ৱান অঞ্জলিং.

৩৪. তস্সা দক্খিণসাখায, চতুহত্থপমাণকং;

ঠানং খন্ধঞ্চ ৱজ্জেত্ৱা, সাখা অন্তৰধাযিসুং.

৩৫. তং পাটিহাৰিযং দিস্ৱা, পতীতো পুথৱীপতি;

‘‘পূজেম’হং মহাবোধিং, ৰজ্জেনা’হি উদীৰিয.

৩৬. অভিসিঞ্চি মহাবোধীং, মহাৰজ্জে মহীপতি;

পুপ্ফাদীহি মহাবোধিং, পূজেত্ৱান পদক্খিণং.

৩৭. কত্ৱা অট্ঠসু ঠানেসু, ৱন্দিত্ৱান কতঞ্জলী;

সুৱণ্ণখচিতে পীঠে, নানাৰতনমণ্ডিতে.

৩৮. স্ৱাৰোহে যাৱ সাউচ্চে, তং সুৱণ্ণকটাহকং;

ঠপাপেত্ৱান আৰুয্হ, গহেতুং সাখমুত্তমং.

৩৯. আদিযিত্ৱান সোৱণ্ণ তুলিকায মনোসিলং;

লেখং দত্ৱান সাখায, সচ্চক্ৰিযমকা ইতি.

৪০. ‘‘লংকাদীপং যদি ইতো, গন্তব্বং উৰুবোধিযা;

নিব্বেমতিকো বুদ্ধস্স, সাসনম্হি সচে অহং.

৪১. সযংযেৱ মহাবোধি-সাখাযং দক্খিণা সুভা;

ছিজ্জিত্ৱান পতিট্ঠাতু, ইধ হেমকটাহকে.

৪২. লেখঠানে মহাবোধি, ছিজ্জিত্ৱা সযমেৱ সা;

গন্ধকদ্দমপূৰস্স, কটাহস্সো’পৰিট্ঠিতা.

৪৩. মূললেখায উপৰি, তিযঙ্গুলতিযঙ্গুলে;

দদং মনোসিলা লেখা, পৰিক্খিপি নৰিস্সৰো.

৪৪. আদিযা থূলমূলানি, খুদ্দকানি’তৰাহি তু;

নিক্খমিত্ৱা দস দস, জালীভূতা নিওতৰুং.

৪৫. তং পাটিহাৰিযং দিস্ৱা, ৰাজা’তীৱ পমোদিতো;

তত্থেৱা’কাসি উক্কুট্ঠিং, সমন্তা পৰিসাপি চ.

৪৬. ভিক্খুসঙ্ঘো সাধুকাৰং, তুট্ঠচিত্তো পমোদযি;

চেলুক্খেপসহস্সানি, পৱত্তিংসু সমন্ততো.

৪৭. এৱং সতেন মূলানং, তত্থ সা গন্ধকদ্দমে;

পতিট্ঠাসি মহাবোধি, পসাদেন্তী মহাজনং.

৪৮. তস্সা খন্ধো দসহত্থো, পঞ্চসাখা মনোৰমা;

চতুহত্থা চতুহত্থা, দসড্ঢফলমণ্ডিতা.

৪৯. সহস্সন্তু পসাখানং, সাখানং তাসমাসি চ;

এৱং আসি মহাবোধি, মনোহৰসিৰিধৰা.

৫০. কটাহম্হি মহাবোধি-পতিট্ঠিতক্খণে মহী;

অকম্পি পাটিহীৰানি, অহেসুং ৱিৱিধানি চ.

৫১. সযং নাদেহি তূৰিযানং, দেৱেসু মানুসেসু চ;

সাধুকাৰনিনাদেতি, দেৱব্ৰহ্মগণস্স চ.

৫২. মেঘানং মিগপক্খিনং, যক্খাদীনং ৰৱেহি চ;

ৰৱেহিচমহীকম্পে, এককোলাহলং অহু.

৫৩. বোধিযা ফলপত্তেহি, ছব্বণ্ণৰস্মিযো সুভা;

নিক্খমিত্ৱা চক্কৱাড়ং, সকলা সোভযিংসু চ.

৫৪. সকটাহা মহাবোধি, উগ্গন্ত্ৱান ততো নভং;

অট্ঠাসি হিমগব্ভম্হি, সত্তাহানি অদস্সনা.

৫৫. ৰাজা ওৰুয্হ পীঠম্হা, তং সত্তাহং তহিং ৱসং;

নিচ্চং মহাবোধিপূজং, অকাসি চ অনেকধা.

৫৬. অতীতে তম্হি সত্তাহে, সব্বে হিমৱলাৱকা;

পৱিসিংসু মহাবোধিং, সব্বাকা ৰংসিযোপি চ.

৫৭. সুদ্ধেনকদিসিস্সিত্থ, সাকটাহে পত্তিট্ঠিতা;

মহাজনস্স সব্বস্স, মহাবোধি মনোৰমা.

৫৮. পৱত্তম্হি মহাবোধি, ৱিৱিধে পাটিহাৰিযে;

ৱিম্হাপযন্তি জনতং, পথৱীতলমোৰুহি.

৫৯. পাটিহিৰেহি’নেকেহি, তেহি সো পীণিতো পুন;

মহাৰাজা মহাবোধিং, মহাৰজ্জেন পূজযি.

৬০. মহাবোধিং মহাৰজ্জে-নাভিসিঞ্চিয পূজযং;

নানাপূজাহি সত্তাহং, পুন তত্থেৱ সো ৱসি.

৬১. অস্সযুজসুক্কপক্খে, পন্নৰসউপোসথে;

অগ্গহেসি মহাবোধিং, দ্ৱিসত্তাহমচ্চযে ততো.

৬২. অস্সযুজকাড়পক্খে, চতুদ্দসউপোসথে;

ৰথে সুভে ঠপেত্ৱান, মহাবোধিং ৰথেসভো.

৬৩. পূজেন্তো তং দিনংযেৱ, উপনেত্ৱা সকং পুৰং;

অলঙ্কৰিত্ৱা বহুধা, কাৰেত্ৱা মণ্ডপং সুভং.

৬৪. কত্তিকসুক্কপক্খস্স, দিনে পাটিপদে তহিং;

মহাবোধিং মহাসাল-মূলে পাচিনতে সুভে.

৬৫. ঠপাপেত্ৱান কাৰেসি, পূজা’নেকা দিনে দিনে;

গাহতো সত্তৰসমে, ৱিৱসে তু নৱঙ্কিৰা.

৬৬. সকিং যেৱঅজাযিংসু, তস্সা’নেকনৰাধিপো;

তুট্ঠচিত্তো মহাবোধিং, পুন ৰজ্জেন পূজযি.

৬৭. মহাৰজ্জে’ভি সিঞ্চিত্ৱা, মহাবোধিং মহিস্সৰো;

কাৰেসি চ মহাবোধি-পূজা নানপ্পকাৰকং.

৬৮. ইতি কুসুমপুৰে সৰেসৰংসা,

বহুৱিধচাৰুধজাকুলাৱিসালা;

সুৰুচিৰপৱৰোৰু বোধিপূজা,

মৰুনৰচিত্তৱিকাসিনী অহোসীতি.

সুজনপ্পসাদসংৱেগত্থায কতে মহাৱংসে

মহাবোধিগ্গহণো নাম

অট্ঠাৰসমো পৰিচ্ছেদো.