সত্তৰসম পৰিচ্ছেদ

ধাতুআগমনো

১. ৱুত্থৱস্সো পৱাৰেত্ৱা, কত্তিকপুণ্ণমাসিযং;

অৱোচে’দং মহাৰাজং, মহাথেৰো মহামতি.

২. চিৰদিট্ঠো হি সম্বুদ্ধো, সত্থা নো মনুজাধিপ;

অনাথৱাসং অৱসিম্হ, নত্থি নো পূজিযং ইধ.

৩. ‘‘ভাসিত্থ ননু ভন্তেমে, সম্বুদ্ধো নিব্বুতো’’ ইতি;

আহ ধাতূসু দিট্ঠেসু, দিট্ঠো হোতি জিনো’’ ইতি.

৪. ৱিদিতো ৱো অধিপ্পাযো, থূপস্স কাৰণে মযা;

কাৰেস্সামি অহং থূপং, তুম্হে জানাথ ধাতুযো.

৫. মন্তেহি সুমনেনাতি, থেৰো ৰাজানমব্ৰৱি;

ৰাজা’হ সামণেৰং তং, কুতো লচ্ছাম ধাতুযো.

৬. ৱিভূসযিত্ৱা নগৰং, মগ্গঞ্চ মনুজাধিপ;

উপোসথী সপৰিসো, হত্থিং আৰুয্হ মঙ্গলং.

৭. সেতচ্ছত্তং ধাৰযন্তো, তালাৱচৰসংহিতো;

মহানাগৱনুয্যানং, সাযন্হসমযে ৱজ.

৮. ধাতুভেদঞ্ঞুনো ৰাজ, ধাতুযো তত্থ লচ্ছসি;

ইচ্ছাহ সামণেৰো সো, সুমনো তং সুমানসং.

৯. থেৰো’থ ৰাজকুলতো, গন্ত্ৱা চেতিযপব্বতং;

আমন্তিয সামণেৰং, সুমনং সুমনো গতিং.

১০. এহি ত্ৱং ভদ্ৰ সুমন, গন্ত্ৱা পুপ্ফপুৰং ৱৰং;

অয্যকং তে মহাৰাজং, এৱং নো ৱচনং ৱদ.

১১. সহাযো তে মহাৰাজ, মহাৰাজা মৰুপ্পিযো;

পসন্নো বুদ্ধসমযে, থূপং কাৰেতুমিচ্ছতি.

১২. মুনিনো ধাতুযো দেহি, পত্তং ভুত্তঞ্চ সত্থুনা;

সৰীৰধাতুযো সন্তি, বহৱো হি তৱন্তিকে.

১৩. পত্তপূৰা গহেত্ৱা তা, গন্ত্ৱা দেৱপুৰং ৱৰং;

সক্কং দেৱানমিন্দং তং, এৱং নো ৱচনং ৱদ.

১৪. তিলোকদক্খিণেয্যস্স, দাঠাধাতু চ দক্খিণা;

তৱন্তিকম্হি দেৱিন্দ, দক্খিণক্খকধাতু চ.

১৫. দাঠং ত্ৱমেৱ পূজেহি, অক্খকং দেহি সত্থুনো;

লংকাদীপস্স কিচ্চেসু, মাপমজ্জ সুৰাধিপ.

১৬. ‘‘এৱং ভন্তে’’তি ৱত্ৱা সো, সামণেৰো মহিদ্ধিকো;

তঙ্খণংযেৱ অগমা, ধম্মাসোকস্স সন্তিকং.

১৭. সালমূলম্হি ঠপিতং, মহাবোধিং তহিং সুতং;

কত্তিকচ্ছণপূজাহি, পূজিযং তঞ্চ অদ্দস.

১৮. থেৰস্স ৱচনং ৱত্ৱা, ৰাজতো লদ্ধধাতুযো;

পত্তপূৰং গহেত্ৱান, হিমৱন্তমুপাগমি.

১৯. হিমৱন্তে ঠপেত্ৱান, সধাতুং পত্তমুত্তমং;

দেৱিন্দসন্তিকং গন্ত্ৱা, থেৰস্স ৱচনং ভণি.

২০. চূড়ামণি চেতিযম্হা, গহেত্ৱা দক্খিণক্খকং;

সামণেৰস্স পাদাসি, সক্কো দেৱানমিস্সৰো.

২১. তং ধাতুং ধাতুপত্তঞ্চ, আদায সুমনো ততো;

আগম্ম চেতিযগিৰিং, থেৰস্স’দাসি তং যতি.

২২. মহানাগৱনুয্যানং, ৱুত্তেনা ৱিধিনা’গমা;

সাযন্হাসমযে ৰাজা, ৰাজসেনা পুৰক্খতো.

২৩. ঠপেসি ধাতুযো সব্বা, থেৰো তত্থেৱ পব্বতে;

মিস্সকং পব্বতং তস্মা, আহু চেতিয পব্বতং.

২৪. ঠপেত্ৱা ধাতুপত্তং তং, থেৰো চেতিযপব্বতে;

গহেত্ৱা অক্খকং ধাতুং, সঙ্কেতং সগণো’গমা.

২৫. সচাযং মুনিনো ধাতু, ছত্তং নমতু মে সযং;

জণ্ণুকেহি কৰীধাতু, ধাতুচঙ্কোটকো অযং.

২৬. সিৰস্মিং মে পতিট্ঠাতু, আগম্ম সহ ধাতুকো;

ইতি ৰাজা ৱিচিন্তেসি, চিন্তিতং তং তথা অহু.

২৭. অমতেনা’ভিসিত্তোৱ, অহু হট্ঠো’তি ভূপতি;

সীসতো তং গহেত্ৱান, হত্থিক্খন্ধে ঠপেসিতং.

২৮. হট্ঠো হত্তী কুঞ্চনাদং, অকা কম্পিত্থ মেদিনী;

ততো নাগো নিৱত্তিত্ৱা, সথেৰ বলৱাহনো.

২৯. পুৰত্থিমেন দ্ৱাৰেন, পৱিসিত্ৱা পুৰং সুভং;

দক্খিণেন চ দ্ৱাৰেন, নিক্খমিত্ৱা ততো পুন.

৩০. থূপাৰামে চেতিযস্স, ঠানতো পচ্ছতো কতং;

পমোজৱত্থুং গন্ত্ৱান, বোধিঠানে নিৱত্তিয.

৩১. পুৰত্থাৱদনো অঠা, থূপঠানং তদা হিতং;

কদম্বপুপ্ফআদাৰি-ৱল্লীহি চিতকং অহু.

৩২. মনুস্সদেৱো দেৱেহি, তং ঠানং ৰক্খিতং সুচিং;

সোধাপেত্ৱা ভূসযিত্ৱা, তঙ্খণংযেৱ সাধুকং.

৩৩. ধাতুং ওৰোপনত্থায, আৰভী হত্থিক্খন্ধতো;

নাগো ন ইচ্ছিতং ৰাজা, থেৰং পুচ্ছিত্থ তং মনং.

৩৪. অত্তনো খন্ধসমকে, ঠানে ঠপনমিচ্ছতি;

ধাতুওৰোপনং তেন, ন ইট্ঠমী’তি সো ব্ৰৱি.

৩৫. আণাপেত্ৱা খণংযেৱ,

সুক্খাতো’ভযৱাপিতো;

সুক্খকদ্দম খণ্ডেহি,

চিতা পেত্ৱান তং সমং.

৩৬. অলঙ্কৰিত্ৱান বহুধা, ৰাজা তং ঠানমুত্তমং;

ওৰোপেত্ৱা হত্থিক্খন্ধা, ধাতুং তত্থ ঠপেসিতং.

৩৭. ধাতাৰক্খং সংৱিধায, ঠপেত্ৱা তত্থ হত্থিনং;

ধাতুথূপস্স কৰণে, ৰাজা তুৰিতমানসো.

৩৮. বহূ মনুস্সে যোজেত্ৱা, ইত্থিকাকৰণে লহুং;

ধাতুকিচ্চং ৱিচিন্তেন্তো, সামচ্চো পাৱিসী পুৰং.

৩৯. মহামহিন্দত্থেৰো তু, মহা মেঘৱনং সুভং;

সগণো অভিগন্ত্ৱান, তত্থ ৱাসমকপ্পযি.

৪০. ৰত্তিং নাগো’নুপৰিযাতি, তং ঠানং সো সধাতু কং;

বোধিঠানম্হি সালায, দিৱাঠাতি সধাতুকো.

৪১. ৱত্থুস্স তস্সো’পৰিতো, থূপং থেৰমতানু গো;

জঙ্ঘামত্তং চিতাপেত্ৱা, কতিপাহেন ভূপতি.

৪২. তত্থ ধাতুপতিট্ঠানং, ঘোসাপেত্ৱা উপাগমি;

ততো ততো সমন্তো চ, সমাগমি মহাজনো.

৪৩. তস্মিং সমাগমে ধাতু, হত্থিক্খন্ধা নগাগ্গতা;

সত্ততালপ্পমাণম্হি, দিস্সন্তি নভসিট্ঠিতা.

৪৪. ৱিম্হাপযন্তি জনতং, যমকং পাটিহাৰিযং;

কণ্ণম্বমূলে বুদ্ধো’ৱ, অকৰি লোমহংসনং.

৪৫. ততো নিক্খন্তজালাহি, জলধাৰাহি চা’সকিং;

অযং ওভাসিতা’সিত্তা, সব্বালংকামহী মহু.

৪৬. পৰিনিব্বানমঞ্চম্হি, নিপন্নেন জিনেন হি;

কতং মহাঅধিট্ঠান-পঞ্চকং পঞ্চচক্খুনা.

৪৭. গয্হমানা মহাবোধি সাখাসোকেন দক্খিণা;

ছিজ্জিত্ৱান সযংযেৱ, পতিট্ঠাতু কটাহকে.

৪৮. পতিট্ঠহিত্ৱা সা সাখা, ছব্বণ্ণৰস্মিযো সুভা;

ৰঞ্জযন্তী দিসা সব্বা, ফলপত্তেহি মুচ্চতু.

৪৯. সসুৱণ্ণকটাহা সা, উগ্গন্ত্ৱান মনোৰমা;

অদিস্সমানা সত্তাহং, হিমগব্ভম্হি তিট্ঠতু.

৫০. থূপাৰামে পতিট্ঠন্তং, মম দক্খিণঅক্খকং;

কৰোতু নভমুগ্গন্ত্ৱা, যমযং পাটিহাৰিযং.

৫১. লঙ্কা লঙ্কাৰভূতম্হি, হেমমালিকচেতিযে;

পতিট্ঠহন্তিযো ধাতু, দোণমত্তা পমাণতো.

৫২. বুদ্ধৱেসধৰা হুত্ৱা, উগ্গন্ত্ৱা নভসিট্ঠিতা;

পতিট্ঠং তু কৰিত্ৱান, যমকং পাটিহাৰিযং.

৫৩. অধিট্ঠানানি পঞ্চে’ৱ, অধিট্ঠাসি তথাগতো;

অকাসি তস্মা সা ধাতু, তদা তং পাটিহাৰিযং.

৫৪. আকাসা ওতৰিত্ৱা সা, অট্ঠাভূপস্স মুদ্ধনি;

অতীৱহট্ঠো তং ৰাজা, পতিট্ঠাপেসি চেতিযে.

৫৫. পতিট্ঠিতায তস্সা চ, ধাতুযা চেতিযে তদা;

অহু মহাভূমিচালো, অব্ভুতো লোমহংসনো.

৫৬. এৱং অচিন্তিযা বুদ্ধা, বুদ্ধধম্মা অচিন্তিযা;

অচিন্তিযে পসন্নানং, ৱিপাকো হোতি অচিন্তিযো.

৫৭. তং পাটিহাৰিযং দিস্ৱা, পসীদিংসু জনে জনা;

মত্তাভযো ৰাজপুত্তো, কনিট্ঠো ৰাজিনো পন.

৫৮. মুনিস্সৰে পসীদিত্ৱা, যাচিত্ৱান নৰিস্সৰং;

পুৰিসানং সহস্সেন, সহ পব্বজিসাসনে.

৫৯. চেতাৰিগামতো চাপি, দ্ৱাৰমণ্ডলতোপি চ;

ৱিহীৰবীজতো চাপি, তথা গল্লকপিট্ঠিতো.

৬০. তথো’পতিস্সগামা চ, পঞ্চ পঞ্চ সতানি চ;

পব্বজুং দাৰকা হট্ঠা, জাতসদ্ধা তথাগতে.

৬১. এৱং পুৰা বাহিৰা চ, সব্বে পব্বজিতা তদা;

তিংস ভিক্খুসহস্সানি, অহেসুং জিনসাসনে.

৬২. থূপাৰামে থূপৱৰং, নিট্ঠাপেত্ৱা মহীপতি;

ৰতনাদীহি’নেকেহি, সদা পূজমকাৰযি.

৬৩. ৰাজোৰোধা খত্তিযা চ, অমচ্চা নাগৰা তথা;

সব্বে জনপদা চেৱ, পুজা’কংসু ৱিসুং ৱিসুং.

৬৪. থূপপুব্বঙ্গমং ৰাজা, ৱিহাৰং তত্থ কাৰযি;

থূপাৰামোতি তেনে’স, ৱিহাৰো ৱিস্সুতো অহু.

৬৫. সকধাতুসৰীৰকেন চে’ৱং,

পৰিনিব্বানগতোপি লোকনাথো;

জনকাযহিতং সুখঞ্চ সম্মা,

বহুধা’কাসি ঠিতে জিনে কথাৱকাতি.

সুজনপ্পসাদসংৱেগত্থায কতে মহাৱংসে

ধাতুঅগমনো নাম

সত্তৰসমো পৰিচ্ছেদো.