সোড়সম পৰিচ্ছেদ

চেতিযপব্বতৱিহাৰ পটিগ্গহকো

১. পুৰে চৰিত্ৱা পিণ্ডায, কৰিত্ৱা জনসঙ্গহং;

ৰাজগেহম্হি ভুঞ্জন্তো, কাৰেন্তো ৰাজসঙ্গহং.

২. ছব্বসদিৱসে থেৰো, মহামেঘৱনে ৱসী;

আসড়্হসুক্কপক্খস্স, তেৰসে দিৱসে পন.

৩. ৰাজগেহম্হি ভুঞ্জিত্ৱা, মহাৰঞ্ঞো মহামতি;

মহা’প্পমাদসুত্তন্তং, দেসযিত্ৱা ততো চ সো.

৪. ৱিহাৰকৰণং ইচ্ছং, তত্থ চেতিযপব্বতে;

নিক্খম্ম পুৰিমদ্ৱাৰা, অগা চেতিযপব্বতং.

৫. থেৰং তত্থ গতং সুত্ৱা, ৰথং আৰুয্হ ভূপতি;

দেৱিযো দ্ৱে চ আদায, থেৰস্সানুপদং অকা.

৬. থেৰা নাগচতুক্কম্হি, নহাত্ৱা ৰহদে তহিং;

পব্বতাৰোহণত্থায, অট্ঠংসু পটিপাটিযা.

৭. ৰাজা ৰথা তদো’ৰুয্হ, সব্বে থেৰে’ভিৱাদযি;

উণ্হে কিলন্তে কিংৰাজ, আগতোসী’তি অহুতে.

৮. তুম্হাকং গমনাসঙ্কী, আগতোম্হী’তি ভাসিতে;

ইধেৱ ৱস্সং ৱসিতুং, আগতম্হা’তি ভাসিয.

৯. তস্সূপনাযিকং থেৰো, খন্ধকং খন্ধকোৱিদো;

কথেসি ৰঞ্ঞো তং সুত্ৱা, ভাগিনেয্যো চ ৰাজিনো.

১০. মহাৰিট্ঠো মহামচ্চো, পঞ্চপঞ্ঞাসভাতুহি;

সদ্ধিং জেট্ঠকনিট্ঠেহি, ৰাজানমভিতো ঠিতো.

১১. যাচিত্ৱা তদহু চেৱ, পব্বজুং থেৰসন্তিকে;

পত্তাৰহত্তং সব্বেপি, তে খুৰগ্গে মহামতী.

১২. কন্তকচেতিযঠানে, পৰিতো তদহেৱ সো;

কম্মানি আৰভাপেত্ৱা, লেণানি অট্ঠসট্ঠিযো.

১৩. অগমাসি পুৰং ৰাজা, থেৰা তত্থেৱ তে ৱসুং;

কালে পিণ্ডায নগৰং, পৱিসন্তা’নুকম্পকা.

১৪. নিট্ঠিতে লেণকম্মম্হি, আসড়্হিপুণ্ণমাসিযং;

গন্ত্ৱা অদাসি থেৰানং, ৰাজা ৱিহাৰদক্খিণং.

১৫. দ্ৱত্তিংসমাড়কানঞ্চ, ৱিহাৰস্স চ তস্স খো;

সীমং সীমাতিগো থেৰো, বন্ধিত্ৱা তদহেৱ সো.

১৬. তেসং পব্বজ্জাপেক্খানং, অকাসি উপসম্পদং;

সব্বেসং সব্বপঠমং, বদ্ধে তুম্বৰুমাড়কে.

১৭. এতে দ্ৱাসট্ঠি অৰহন্তো, সব্বে চেতিযপব্বতে;

তত্থ ৱস্সং উপগন্ত্ৱা, অকংসু ৰাজসঙ্গহং.

১৮. দেৱমনুস্সগণগণিতং তং,

তঞ্চ গণং গুণৱিত্থতকিত্তিং;

যানমুপচ্চ চ মানযমানা,

পুঞ্ঞচযং ৱিপুলং অকৰিংসূতি.

সুজনপসাদসংৱেগত্থায কতে মহাৱংসে

চেতিযপব্বতৱিহাৰপটিগ্গহকো নাম

সোড়সমো পৰিচ্ছেদো.