পঞ্চদসম পৰিচ্ছেদ

মহাৱিহাৰ পটিগ্গহকো

১. হত্থিসালাপি সম্বাধা, ইতি তত্থ সমাগতা;

তে নন্দনৱনে ৰম্মে, দক্খিণদ্ৱাৰতো বহি.

২. ৰাজুয্যানে ঘনচ্ছাযে, সীতলে নীলসদ্দলে;

পঞ্ঞাপেসুং আসনানি, থেৰানং সাদৰা নৰা.

৩. নিক্খম্ম দক্খিণদ্ৱাৰা, থেৰো তত্থ নিসীদি চ;

মহাকুলীনা চা’গম্ম, ইত্থিযো বহুকা তহিং.

৪. থেৰং উপনিসীদিংসু, উয্যানং পূৰযন্তিযো;

বালপণ্ডিতসুত্তন্তং, তাসং থেৰো অদেসযি.

৫. সহস্সং ইত্থিযো তাসু, পঠমং ফলমজ্ঝগুং;

এৱং তত্থেৱ উয্যানে, সাযণ্হসমযো অহু.

৬. ততো থেৰা নিক্খমিংসু, ‘‘যাম তং পব্বতং’’ ইতি;

ৰঞ্ঞো পটিনিৱেদেসুং, সীঘং ৰাজা উপাগমি.

৭. উপাগম্মা’ব্ৰৱী থেৰং, ‘‘সাযং দূৰো চ পব্বতো;

ইধেৱ নন্দনুয্যানে, নিৱাসো ফাসুকো ইতি.

৮. পুৰস্স অচ্চাসন্নত্তা, ‘‘অসাৰুপ্প’’ন্তি ভাসিতে;

‘‘মহামেঘৱনুয্যানং, নাতিদূৰাতি সন্তিকে.

৯. ৰম্মং ছাযূদকূপেতং, নিৱাসো তত্থ ৰোচতু;

নিৱত্তিতব্বং ভন্তে’’ন্তি, থেৰো তত্থ নিৱত্তযি.

১০. তস্মিং নিৱত্তঠানম্হি, কদম্বনদিযন্তিকে;

নিৱত্তচেতিযং নাম, কতং ৱুচ্চতি চেতিযং.

১১. তং নন্দনা দক্খিণেন, নযং থেৰং ৰথেসভো;

মহামেঘৱনুয্যানং, পাচিনদ্ৱাৰকং নযি.

১২. তত্থ ৰাজঘৰে ৰম্মে, মঞ্চপীঠানি সাধুকং;

সাধূতি সন্থৰাপেত্ৱা, ‘‘ৱসতে’ত্ত সুখং’’ ইতি.

১৩. ৰাজা থেৰে’ভিৱাদেত্ৱা, অমচ্চপৰিৱাৰিতো;

পুৰং পাৱিসি থেৰা তু, তং ৰত্তিং তত্থ তে ৱসুং.

১৪. পভাতেযেৱ পুপ্ফানি, গাহেত্ৱা ধৰণীপতি;

থেৰে উপচ্চ ৱন্দিত্ৱা, পূজেত্ৱা কুসুমেহি চ.

১৫. পুচ্ছি কচ্চি সুখং ৱুট্ঠং, উয্যানং ফাসুকং ইতি;

সুখং ৱুত্থং মহাৰাজ, উয্যানং যতি ফাসুকং.

১৬. আৰামো কপ্পতে ভন্তে, সঙ্ঘস্সা’’তি অপুচ্ছি সো;

‘‘কপ্পতে’’ইতি ৱত্ৱান, কপ্পাকপ্পেসু কোৱিদো.

১৭. থেৰো ৱেড়ুৱনাৰাম, পটিগ্গহণমব্ৰৱি;

তং সুত্ৱা অভিহট্ঠো সো, তুট্ঠহট্ঠো মহাজনো.

১৮. থেৰানং ৱন্দনত্থায, দেৱী তু অনুলাগতা;

সদ্ধিং পঞ্চসতিত্থীহি, দুতিযং ফলমজ্ঝগা.

১৯. সা পঞ্চসতা দেৱী, অনুলা’হ মহীপতি;

‘‘পব্বজিস্সাম দেৱা’’তি, ৰাজা থেৰমৱোচ সো.

২০. পব্বাজেথ ইমাযো’’তি, থেৰো আহ মহীপতিং;

‘‘ন কপ্পতি মহাৰাজ, পব্বাজেতুং থিযো হিনো.

২১. অত্থি পাটলিপুত্তস্মিং, ভিক্খুনী মে কনিট্ঠিকা;

সঙ্ঘমিত্তাতি নামেন, ৱিস্সুতা সা বহুস্সুতা.

২২. নৰিন্দসমণিন্দস্স, মহাবোধিদুমিন্দতো;

দক্খিণং সাখমাদায, তথা ভিক্খুনিযো ৱৰা.

২৩. আগচ্ছতূ’তি পেসেহি, ৰঞ্ঞো নো পিতু সন্তিকং;

পব্বাজেস্সতি সা থেৰী, আগতা ইত্থিযো ইমা.

২৪. ‘‘সাধু’’তি ৱত্ৱা গণ্হিত্ৱা, ৰাজা ভিঙ্কাৰমুত্তমং;

‘‘মহামেঘৱনুয্যানং, দম্মি সঙ্ঘস্সি’মং ইতি.

২৫. মহিন্দথেৰস্স কৰে, দক্খিণোদকমা’কিৰী;

মহিযা পতিতে তোযে, অকম্পিত্থ মহা মহী.

২৬. ‘‘তস্মা কম্পতি ভূমী’’তি, ভূমিপালো অপুচ্ছি তং;

পতিট্ঠিতত্তা দীপম্হি, সাসনস্সা’তি সো ব্ৰৱি.

২৭. থেৰস্স উপনামেসি, জাতিপুপ্ফানি জাতিমা;

থেৰো ৰাজঘৰং গন্ত্ৱা, তস্স দক্খিণতো ঠিতো.

২৮. ৰুক্খম্হি পিচুলে অট্ঠ, পুপ্ফমুট্ঠী সমোকিৰী;

তত্থাপি পুথৱী কম্পি, পুট্ঠো তস্সা’হ কাৰণং.

২৯. অহোসি তিণ্ণং বুদ্ধানং, কালে’পি ইধ মালকো;

নৰিন্দসঙ্ঘকম্মত্থং, ভৱিস্সতি ইদানিপি.

৩০. ৰাজগেহা উত্তৰতো, চাৰুপোক্খৰণিং অগা;

তত্তকা নেৱ পুপ্ফানি, থেৰো তত্থাপি ওকিৰি.

৩১. তত্থা’পি পুথুৱী কম্পি, পুট্ঠো তস্সা’হ কাৰণং;

‘‘জন্তঘৰ পোক্খৰণী, অযং হেস্সতি ভূমিপ’’.

৩২. তস্সেৱ ৰাজগেহস্স, গন্ত্ৱান দ্ৱাৰকোট্ঠকং;

তত্তকেহে’ৱ পুপ্ফেহি, তং ঠানং পূজযী ইসি.

৩৩. তত্থাপি পুথুৱীকম্পি, হট্ঠলোমো অতীৱসো;

ৰাজা তং কাৰণং পুচ্ছি, থেৰো তস্সা’হ কাৰণং.

৩৪. ইমম্হি কপ্পে বুদ্ধানং, তিণ্ণন্নং বোধিৰুক্খতো;

আনেত্ৱা দক্খিণাসাখা, ৰোপিতা ইধ ভূমিপ.

৩৫. তথাগতস্স অম্হাকং, বোধিসাখাপি দক্খিণা;

ইমস্মিংযেৱ ঠানম্হি, পতিট্ঠিস্সতি ভূমিপ.

৩৬. ততো’গমা মহাথেৰো, মহামুচলমালকং;

তত্তকানেৱ পুপ্ফানি, তস্মিং ঠানে সমোকিৰি.

৩৭. তথাপি পুথৱী কম্পি, পুট্ঠো তস্সা’হ কাৰণং;

সঙ্ঘস্সু পোসথা গাৰং, ইধ হেস্সতি ভূমিপ.

৩৮. পঞ্হম্বমালকট্ঠানং, ততো’গমা মহীপতি;

সুপক্কং অম্বপক্কঞ্চ, ৱণ্ণগন্ধৰসুত্তমং.

৩৯. মহন্তং উপনামেসি, ৰঞ্ঞো উয্যানপালকো;

তং থেৰস্সুপনামেসি, ৰাজা অতিমনোৰমং.

৪০. থেৰো নিসীদনাকাৰং, দস্সেসি জনতা হিতো;

অত্থৰাপেসি তত্থেৱ, ৰাজা অত্থৰণং ৱৰং.

৪১. অদা তত্থ নিসিন্নস্স, থেৰস্সম্বং মহীপতি;

থেৰো তং পৰিভুঞ্জিত্ৱা, ৰোপনত্থায ৰাজিনো.

৪২. অম্বট্ঠিকং অদা ৰাজা, তং সযং তত্থ ৰোপযি;

হত্থে তস্সোপৰিথেৰো, ধোৱি তস্স ৱিৰুড়্হিযা.

৪৩. তং খণংযেৱ বীজম্হা, তম্হা নিক্খম্ম অঙ্কুৰো;

কমেনা’তি মহাৰুক্খো, পত্তপক্কধৰো অহু.

৪৪. তং পাটিহাৰিযং দিস্ৱা, পৰিসা সা সৰাজিকা;

নমস্সমানা অট্ঠাসি, থেৰে হত্থতনুৰুহা.

৪৫. থেৰো তদা পুপ্ফমুট্ঠি, অট্ঠ তত্থ সমোকিৰি;

তথাপি পুথৱীকম্পি, পুট্ঠো তস্সা’হ কাৰণং.

৪৬. সঙ্ঘস্সপ্পন্নলাভানং, অনেকেসং নৰাধিপ;

সঙ্গম্মভাজনঠানং, ইদং ঠানং ভৱিস্সতি.

৪৭. ততো গন্ত্ৱা চতুস্সাল-ঠানং তত্থ সমোকিৰি;

তত্তকানেৱ পুপ্ফানি, কম্পি তত্থাপি মেদিনী.

৪৮. তং কম্পকাৰণং পুচ্ছি, ৰাজা থেৰো ৱিযাকৰি;

তিণ্ণন্নং পুব্ববুদ্ধানং, ৰাজুয্যান পটিগ্গহে.

৪৯. দান ৱত্থুনা’হটানি, দীপৱাসীহি সব্বতো;

ইধ ঠপেত্ৱা ভোজেসুং, সসঙ্ঘে সুগতে তযো.

৫০. ইদানি পন এত্থেৱ, চতুস্সালা ভৱিস্সতি;

সঙ্ঘস্স ইধ ভত্তগ্গং, ভৱিস্সতি নৰাধিপ.

৫১. মহথূপঠিতঠানং, ঠানাঠানৱিদূততো;

অগমাসি মহাথেৰো, মহিন্দো দীপদীপনো.

৫২. তদা অন্তোপৰিক্খেপে, ৰাজুয্যানস্স খুদ্দিকা;

ককুধৱ্হা অহু ৱাপী, তস্সো’পৰি জলন্তিকে.

৫৩. থূপাৰহং থলঠানং, অহু থেৰে তহিং গতে;

ৰঞ্ঞো চম্পকপুপ্ফানং, পুটকান’ট্ঠ আহৰুং.

৫৪. তানি চম্পকপুপ্ফানি, ৰাজা থেৰস্সু’পানযি;

থেৰো চম্পকপুপ্ফেহি, তেহি পূজেসি তং ফলং.

৫৫. তত্থাপি পুথৱী কম্পি, ৰাজা তং কম্পকাৰণং;

পুচ্ছি থেৰো’নু পুব্বেন, আহতং কম্পকাৰণং.

৫৬. ইদং ঠানং মহাৰাজ, চতুবুদ্ধ নিসেৱিতং;

থূপাৰহং হিতত্থায, সুখত্থায চ পাণিনং.

৫৭. ইমম্হি কপ্পে পঠমং, ককুসন্ধো জিনো অহু;

সব্ব ধম্মৱিদূ সত্থা, সব্বলোকানুকম্পকো.

৫৮. মহাতিত্থৱ্হযং আসি, মহামেঘৱনং ইদং;

নগৰং অভযং নাম, পুৰত্থিমদিসায’হু.

৫৯. কদম্ব নদিযা পাৰে, তত্থ ৰাজা’ভযো অহু;

ওজদীপোতি নামেন, অযং দীপো তদাঅহু.

৬০. ৰক্খসেহি জনস্সে’ত্থ, ৰোগো পজ্জৰকো অহু;

ককুসন্ধো দসবলো, দিস্ৱান তদুপদ্দৱং.

৬১. তং গন্ত্ৱা সত্তৱিনযং, পৱত্তিং সাসনস্স চ;

কাতুং ইমস্মিং দীপস্মিং, কৰুণা বলচোদিতো.

৬২. চত্তালীসসহস্সেহি, তাদীহি পৰিৱাৰিতো;

নভসা’গম্ম অট্ঠাসি, দেৱকূটম্হি পব্বতে.

৬৩. সম্বুদ্ধস্সা’নুভাৱেন, ৰোগো পজ্জৰকো ইধ;

উপসন্তো মহাৰাজ, দীপম্হি সকলে তদা.

৬৪. কত্থ ঠিতো অধিট্ঠাসি, নৰিস্সৰ মুনিস্সৰো;

সব্বে মং অজ্জ পস্সন্তু, ওজদীপম্হি মানুসা.

৬৫. আগন্তুকামা সব্বেৱ, মনুস্সা মম সন্তিকং;

আগচ্ছন্তু অকিচ্ছেন, খিপ্পঞ্চাপি মহামুনি.

৬৬. ওভাসযন্তং মুনিন্দং তং, ওভাসন্তঞ্চ পব্বতং;

ৰাজা চ নাগৰা চেৱ, দিস্ৱা খিপ্পং উপাগমুং.

৬৭. দেৱতা বলিদানত্থং, মনুস্সা চ তহিং গতা;

দেৱতা ইতি মঞ্ঞিংসু, সসঙ্ঘং লোকনাযকং.

৬৮. ৰাজা সো মুনিৰাজং তং, অতিহট্ঠো’ভি ৱাদিয;

নিমন্তযিত্ৱা ভত্তেন, আনেত্ৱা পুৰসন্তি কং.

৬৯. সসঙ্ঘস্স মুনিন্দস্স, নিসজ্জাৰহমুত্তমং;

ৰমণীযমিদং ঠান-মসম্বাধন্তি চিন্তিয.

৭০. কাৰিতে মণ্ডপে ৰম্মে, পল্লঙ্কেসু ৱৰে সুতং;

নিসীদাপেসি সম্বুদ্ধং, সসঙ্ঘং ইধ ভূপতি.

৭১. নিসিন্নম্পি চ পস্সন্তা, সসঙ্ঘং লোকনাযকং;

দীপে মনুস্সা আনেসুং, পণ্ণাকাৰে সমন্ততো.

৭২. অত্তনো খজ্জভোজ্জেহি, তেহি তেহা’ভতেহি চ;

সন্তপ্পেসি সসঙ্ঘং তং, ৰাজা সো লোকনাযকং.

৭৩. ইধেৱ পচ্ছাভত্তং তং, নিসিন্নস্স জিনস্স সো;

মহা তিত্থকমুয্যানং, ৰাজা’দা দক্খিণং ৱৰং.

৭৪. অকালপুপ্ফা লঙ্কাৰে, মহাতিত্থৱনে তদা;

পটিগ্গহিতে বুদ্ধেন, অকম্পিত্থ মহামহী.