চুদ্দসম পৰিচ্ছেদ

নগৰপ্পৱেসনো

১. দেৱানংপিযতিস্সো সো, ৰাজা সলিলকীড়িতং;

দত্ৱা নগৰৱাসীনং, মিগৱং কীড়িতুং অগা.

২. চত্তালীসসহস্সেহি, নৰেহি পৰিৱাৰিতো;

ধাৱন্তো পদসাযেৱ, অগমা মিস্সকং নগং.

৩. থেৰে দস্সেতুমিচ্ছন্তো, দেৱো তস্মিং মহীধৰে;

গুম্ভংভক্খযমানো’ৱ, অট্ঠা গোকণ্ণৰূপৱা.

৪. ৰাজা দিস্ৱা ‘‘পমত্তং তং, ন যুত্তং ৱিজ্ঝিতুং’’ ইতি;

জিযা সদ্দমকাধাপি, গোকণ্ণো পব্বতন্তৰং.

৫. ৰাজা’নুধাৱি সোধিং, থেৰানং সন্তিকং গতো;

থেৰে দিট্ঠে নৰিন্দেন, সযমন্তৰধাযিসো.

৬. থেৰো ‘‘বহূসু দিট্ঠেসু, অতিভাযিস্সতী’’ তিসো;

অত্তানমেৱ দস্সেসি, পস্সিত্ৱা তং মহীপতিং.

৭. ভীতো অট্ঠাসি তং থেৰো, ‘‘এহি তিস্সাতি অব্ৰৱি;

তিস্সা’তি ৱচনেনেৱ, ৰাজা যক্খো’’তি চিন্তযী.

৮. সমণা মযং মহাৰাজ, ধম্মৰাজস্স সাৱকা;

তমেৱ অনুকম্পায, জম্বুদীপা ইধাগতা.

৯. ইচ্চাহ থেৰো তং সুত্ৱা, ৰাজা ৱীতভযো অহু;

সৰিত্ৱা সখীসন্দেসং, ‘‘সমাণা’’ ইতি নিচ্ছিতো.

১০. ধনুং সৰঞ্চ নিক্খিপ্প, উপসঙ্কম্ম তং ইসিং;

সম্মোদমানো থেৰেন, সো নিসীদি তদন্তিকে.

১১. তদা তস্স মনুস্সা তে, আগম্ম পৰিৱাৰযুং;

তদা সেসে ছ দস্সেসি, মহাথেৰো সহাগতে.

১২. তে দিস্ৱা অব্ৰৱী ৰাজা, ‘‘কদা’’ মে আগতা ইতি;

‘‘মযা সদ্ধিং’’তি থেৰেন, ৱুত্তে পুচ্ছি ইদং পুন.

১৩. ‘‘সন্তি ঈদিসকা অঞ্ঞে, জম্বুদীপে যতী’’ ইতি;

আহ ‘‘কাসাৱপজ্জো তো, জম্বুদীপো তহিং পন.

১৪. তেৱিজ্জা ইদ্ধিপ্পত্তা চ, চেতোপৰিযকোৱিদা;

‘‘দিব্বসোতা’ৰহন্তো চ, বহূ বুদ্ধস্স সাৱকা’’.

১৫. পুচ্ছি ‘‘কেনাগতত্থা’’তি, ন থলেন ন ৱাৰিনা;

আগতম্হা’’তি ৱুত্তে সো, ৱিজানি নভসাগমং.

১৬. ৱীমংসংসো মহাপঞ্ঞো, কণ্হং পঞ্হমপুচ্ছিতং;

পুট্ঠো পুট্ঠো ৱিযাকাসি, তংতং পঞ্হং মহীপতি.

১৭. ৰুক্খোযং ৰাজকিন্নামো, অঞ্ঞো নাম অযং তৰু;

ইমং মুঞ্চিয অত্থ’ম্বো, সন্তি অম্বতৰূ বহুং.

১৮. ইমঞ্চ অম্বং তেচ’ম্বে, মুঞ্চিযত্থি মহীৰুহা;

সন্তি ভন্তে বহু ৰুক্খা, অনম্বাপন তে তৰু.

১৯. অঞ্ঞে অম্বে অনম্বে চ, মুঞ্চিয’ত্থি মহীৰুহা;

অযং ভন্তে অম্বৰুক্খো, পণ্ডিতো’সি নৰিস্সৰ.

২০. সন্তি তে ঞাতকা ৰাজ, সন্তি ভন্তে বহুজ্জনা;

সন্তি অঞ্ঞাতকা ৰাজ, সন্তি তে ঞাতিতো বহূ.

২১. ঞাতকে তে চ অঞ্ঞে চ, মুঞ্চিয’ঞ্ঞোপি অত্থি নু;

‘‘ভন্তে’’ হমেৱ সাধু ত্ৱং, পণ্ডিতো’সি নৰিস্সৰ.

২২. পণ্ডিতো’তি ৱিদিত্ৱান, চূড়হত্থিপদোপমং;

সুত্তন্তং দেসযী থেৰো, মহীপস্স মহামতী.

২৩. দেসনাপৰিযোসানে, সদ্ধিং তেহি নৰেহি সো;

চত্তালীসসহস্সেহি, সৰণেসু পতিট্ঠহি.

২৪. ভত্তা’ভীহাৰং সাযন্হে, ৰঞ্ঞো অভিহৰুং তদা;

‘‘ন ভুঞ্জিস্স’’ন্তি দানি মে, ইতি জনম্মি ভূপতি.

২৫. পুচ্ছিতুংযেৱ যুত্তন্তি, ভত্তেনা’পুচ্ছিতে ইসি;

ন ভুঞ্জাম ইদানী’তি, ৱুত্তে কালঞ্চ পুচ্ছিসো.

২৬. কালং ৱুত্তে’ব্ৰৱি এৱং, ‘‘গচ্ছাম নগৰং’’ইতি;

তুৱং গচ্ছ মহাৰাজ, ৱসিস্সাম মযং ইধ.

২৭. এৱং সতি কুমাৰো’যং, অম্হেহি সহ গচ্ছতু;

অযঞ্হি আগতফলো, ৰাজ ৱিঞ্ঞাতসাসনো.

২৮. অপেক্খমানো পব্বজ্জং, ৱসত’ম্হাকমন্তিকে;

ইদানি পব্বজেস্সাম, ইমং ত্ৱং গচ্ছ ভূমিপ.

২৯. পাতো ৰথং পেসযিস্সং, তুম্হে তত্থ ঠিতা পুৰং;

যাথা’তি থেৰে ৱন্দিত্ৱা, ভণ্ডুংনেত্ৱ’ক মন্তকং.

৩০. পুচ্ছি থেৰাধিকাৰংসো, ৰঞ্ঞো সব্বমভাসি সো;

থেৰং ঞত্ৱা’তি তুট্ঠোসো, ‘‘লাভা মে’’ইতি চিন্তযি.

৩১. ভণ্ডুস্স গীহিভাৱেন, গতাসঙ্কো নৰিস্সৰো;

অঞ্ঞাসি নৰভাৱং সো, ‘‘পব্বাজেম ইমং’’ ইতি.

৩২. থেৰো তং গামসীমাযং, তস্মিংযেৱ খণে অকা;

ভণ্ডুকস্স কুমাৰস্স, পব্বজ্জমুপসম্পদং.

৩৩. তস্মিংযেৱ খণে সো চ, অৰহত্তমপাপুণি;

সুমনং সামণেৰং তং, থেৰো আমন্তযী ততো.

৩৪. ধম্মসৱনকালং ত্ৱং, ঘোসেহী’’তি অপুচ্ছিসো;

সাৱেন্তো কিত্তকং ঠানং, ভন্তে ঘোসেম’হং ইতি.

৩৫. ‘‘সকলং তম্বপণ্ণী’’তি, ৱুত্তে থেৰেন ইদ্ধিযা;

সাৱেন্তো সকলং লংকং, ধম্মকালমঘোসযী.

৩৬. ৰাজা নাগচতুত্তেসো, সোণ্ণিপস্সে নিসীদিয;

ভুঞ্জন্তো তং ৰৱং সুত্ৱা, থেৰন্তিক মপেসযি.

৩৭. ‘‘উপদ্দৱো নু অত্থী’’তি, আহ নত্থি উদ্দৱো;

সোতুং সম্বুদ্ধৱচনং, কালো ঘোসাপিতো ইতি.

৩৮. সামণেৰ ৰৱং সুত্ৱা, ভুম্মাদেৱা অঘোসযুং;

অনুক্কমেন সো সদ্দো, ব্ৰহ্মলোকং সমাৰুহি.

৩৯. তেন ঘোসেন দেৱানং, সন্নিপাতো মহা অহু;

সমচিত্তসুত্তং দেসেসি, থেৰো তস্মিং সমাগমে.

৪০. অসংখিযানং দেৱানং, ধম্মাভিসমযো অহু;

বহূ নাগা সুপণ্ণা চ, সৰণেসু পতিট্ঠযুং.

৪১. যথেদং সাৰিপুত্তস্স, সুত্তং থেৰস্স ভাসতো;

তথা মহিন্দত্থেৰস্স, অহু দেৱসমাগমো.

৪২. ৰাজা পভা তে পাহেসি, ৰথং সাৰথি সো গতো;

‘‘আৰোহথ ৰথং যাম, নগৰং’’ ইতি তে’ব্ৰৱি.

৪৩. না’ৰোহাম ৰথং গচ্ছ, গচ্ছাম তৱ পচ্ছতো;

ইতি ৱত্ৱান পেসেত্ৱা, সাৰথিং সুমনোৰথং.

৪৪. ৱেহাসমব্ভুগন্ত্ৱা, তে নগৰস্স পুৰত্থতো;

পঠমত্থূপট্ঠানম্হি, ওতৰিংসু মহিদ্ধিকা.

৪৫. থেৰেহি পঠমোতিণ্ণ-ঠানম্হি কতচেতিযং;

অজ্জাপি ৱুচ্চতে তেন, এৱং পঠমচেতিযং.

৪৬. ৰঞ্ঞা থেৰগুণং সুত্ৱা, সব্বা অন্তেপুৰিত্থিযো;

থেৰদস্সনমিচ্ছিংসু, যস্মা তস্মামহীপতি.

৪৭. অন্তো’ৱ ৰাজৱত্থুস্স, ৰম্মং কাৰেসি মণ্ডপং;

সেতেহি ৱত্থপুপ্ফেহি, ছাদিতং সমলঙ্কতং.

৪৮. উচ্চসেয্যাৱিৰমণং, সুতত্তা থেৰসন্তিকে;

কঙ্খী ‘‘উচ্চাসনে থেৰো, নিসীদিদেয্যনুনোতি চ.

৪৯. তদন্তৰে সাৰথি সো, থেৰে দিস্ৱা তহিং ঠিতে;

চীৱৰং পাৰুপন্তে তে, অতিৱিম্হিত মানসো.

৫০. গন্ত্ৱা ৰঞ্ঞো নিৱেদেসি, সুত্ৱা সব্বং মহীমতি;

‘‘নিসজ্জং ন কৰিস্সন্তি, পীঠকেসূ’’তি নিচ্ছিতো.

৫১. ‘‘সুসাধু ভুম্মত্থৰণং, পঞ্ঞাপেথা’’তি ভাসিয;

গন্ত্ৱা পটিপথং থেৰে, সক্কচ্চং অভিৱাদিয.

৫২. মহামহিন্দত্থেৰস্স, হত্থতো পত্তমাদিয;

সক্কাৰপূজাৱিধিনা, পুৰং থেৰং পৱেসযি.

৫৩. দিস্ৱা আসনপঞ্ঞত্তিং, নেমিত্তা ব্যাকৰুং ইতি;

‘‘গহিতা পথৱী’মেহি, দীপে হেস্সন্তি ইস্সৰা.

৫৪. নৰিন্দো পূজযন্তো তে, থেৰে অন্তেপুৰং নযি;

তত্থ তে দুস্সপীঠেসুং, নিসীদিংসু যথাৰহং.

৫৫. তে যাগুখজ্জভোজ্জেহি, সযং ৰাজা অতপ্পযি;

নিট্ঠিতে ভত্তকিচ্চম্হি, সযং উপনিসীদিয.

৫৬. কনিট্ঠস্সোপৰাজস্স, মহানাগস্স জাযিকং;

ৱসন্তিং ৰাজগেহে’ৱ, পক্কোসা পেসিচা’নুলং.

৫৭. আগম্ম অনুলাদেৱী, পঞ্চ ইত্থিসতেহি সা;

থেৰেৱন্দিয পূজেত্ৱা, একমন্তমুপাৱিসি.

৫৮. পেতৱত্থুং ৱিমানঞ্চ, সচ্চসংযুত্তমেৱ চ;

দেসেসি থেৰো তা ইত্থী, পঠমং ফলমজ্ঝগুং.

৫৯. হিয্যো দিট্ঠমনুস্সেহি, সুত্ৱা থেৰগুণে বহূ;

থেৰদস্সনমিচ্ছন্তা, সমাগন্ত্ৱান নাগৰা.

৬০. ৰাজদ্ৱাৰে মহাসদ্দং, অকৰুং তং মহীপতি;

সুত্ৱা পুচ্ছিয জানিত্ৱা, আহ তেসং হিতত্থিকো.

৬১. সব্বেসং ইধ সম্বাধো, সালামঙ্গলহত্থিনো;

সোধেথ তত্থ দক্খন্তি, থেৰে’মে নাগৰা’ইতি.

৬২. সোধেত্ৱা হত্থিসালং তং, ৱিতানাদীহি সজ্জুকং;

অলঙ্কৰিত্ৱা সযনে, পঞ্ঞপেসুং যথাৰহং.

৬৩. সথেৰো তত্থ গন্ত্ৱান, মহাথেৰো নিসীদিয;

সো দেৱদূতসুত্তন্তং, কথেসী কথিকো মহা.

৬৪. তং সুত্ৱান পসীদিংসু, নগৰা তে সমাগতা;

তেসু পাণসহস্সংতু, পঠমং ফলমজ্ঝগা.

৬৫. লংকাদীপে সো সত্থুকপ্পো অকপ্পো;

লংকাধিট্ঠানে দ্ৱীসু ঠানেসু থেৰো;

ধম্মং ভাসিত্ৱা দীপভাসায এৱং;

সদ্ধম্মো তাৰং কাৰযী দীপদীপোতি.

সুজনপ্পসাদসংৱেগত্থায কতে মহাৱংসে

নগৰপ্পৱেসনো নাম

চুদ্দসমো পৰিচ্ছেদো.