তেৰসম পৰিচ্ছেদ

মহিন্দাগমনো

১. মহামহিন্দত্থেৰো সো, তদা দ্ৱাদসৱস্সিকো;

উপজ্ঝাযেন আণত্তো, সঙ্ঘেন চ মহামতী.

২. লংকাদীপং পসাদেতুং,

কালং পেক্খং ৱিচিন্তযী;

‘‘ৱুড্ঢো মুটসিৱো ৰাজা,

ৰাজা হোতু সুতো’’ ইতি.

৩. তদন্তৰে ঞাতিগণং, দট্ঠুং কত্ৱান মানসং;

উপজ্ঝাযঞ্চ সঙ্ঘঞ্চ, ৱন্দিত্ৱা পুচ্ছ ভূপতিং.

৪. আদায চতুৰো থেৰে, সঙ্ঘমিত্তায অত্ৰজং;

সুমনং সামণেৰঞ্চ, ছড়াভিঞ্ঞং মহিদ্ধিকং.

৫. ঞাতীনং সঙ্গহং কাতুং, অগমা দক্খিণাগিৰিং;

ততো তত্থ চৰন্তস্স, ছম্মাসা সমতিক্কমুং.

৬. কমেন ৱেদিসগিৰিং, নগৰং মাতুদেৱিযা;

সম্পত্ৱা মতৰং পস্সি, দেৱী দিস্ৱা পিযং সুতং.

৭. ভোজযিত্ৱা সপৰিসং, অত্তনাযেৱ কাৰিতং;

ৱিহাৰং চেতিযগিৰিং, থেৰং আৰোপযী সুভং.

৮. অৱন্তিৰট্ঠং ভুঞ্জন্তো, পিতৰা দিন্নমত্তনো;

সো অসোক কুমাৰো হি, উজ্জেনীগমনা পুৰা.

৯. ৱেদিসে নগৰে ৱাসং, উপগন্ত্ৱা তহিং সুভং;

দেৱিন্নাম লভিত্ৱান, কুমাৰিং সেট্ঠিধীতৰং.

১০. সংৱাসং তায কপ্পেসি, গব্ভং গণ্হিয তেন সা;

উজ্জেনিযং কুমাৰং তং, মহিন্দং জনযী সুভং.

১১. ৱস্সদ্ৱযমতিক্কম্ম, সঙ্ঘমিত্তঞ্চ ধীতৰং;

তস্মিং কালে ৱসতি সা, ৱেদিসে নগৰে তহিং.

১২. থেৰো তত্থ নিসীদিত্ৱা, কালঞ্ঞূ ইতি চিন্তযি;

পিতৰা মে সমাণত্তং, অভিসেক মহুস্সৱং.

১৩. দেৱানংপিযতিস্সো সো, মহাৰাজা’নুভোতু চ;

ৱত্থুত্তযগুণে চাপি, সুত্ৱা জানাতু দূহতো.

১৪. আৰোহতু মিস্সনগং, জেট্ঠমাসস্সু’পোসথে;

তদহেৱ গমিস্সাম, লংকাদীপৱৰং মযং.

১৫. মহিন্দো উপসঙ্কম্ম, মহিন্দত্থেৰ মুত্তমং;

যাহি লংকং পসাদেতুং, সম্বুদ্ধেনা’সি ব্যাকতো.

১৬. মযম্পি তত্থুপত্থম্ভা, ভৱিস্সামা’তি অব্ৰৱি;

দেৱিযা ভগিনী ধীতু-পুত্তো ভণ্ডুক নামকো.

১৭. থেৰেন দেৱিযা ধম্মং, সুত্ৱা দেসিতমেৱ তু;

অনাগামিফলং পত্ৱা, ৱসি থেৰস্স সন্তিকে.

১৮. তত্থ মাসং ৱসিত্ৱান, জেট্ঠমাসস্সু’ পোসথে;

থেৰো চতূহি থেৰেহি, সুমনেনা’থ ভণ্ডুনা.

১৯. সদ্ধিং তেন গহট্ঠেন, ন ৰতো ঞাতিহেতুনা;

তস্মা ৱিহাৰা আকাসং, উগ্গন্ত্ৱা সো মহিদ্ধিকো.

২০. খণেনেৱ ইধাগম্ম, ৰম্মে মিস্সক পব্বতে;

অট্ঠাসি ৱিলুকূটম্হি, ৰুচিৰম্বত্থলে ৱৰে.

২১. লংকাপসাদ গুণেন ৱিযাকতো সো;

লংকাহিতায মুনিনা সযিতেন অন্তে;

লংকায সত্থুসদিসো হিতহেতু তস্সা;

লংকামৰূহি মহিতো’ভিনিসীদি তত্তাতি.

সুজনপ্পসাদসংৱেগত্থায কতে মহাৱংসে

মহিন্দাগমনো নাম

তেৰসমো পৰিচ্ছেদো.