দ্ৱাদসম পৰিচ্ছেদ

নানাদেসপসাদো

১. থেৰো মোগ্গলিপুত্তো সো, জিনসাসন জোতকো;

নিট্ঠাপেত্ৱান সংগীতিং, পেক্খমানো অনাগতং.

২. সাসনস্স পতিট্ঠানং, পচ্চন্তেসু অৱেক্খিয;

পেসেসি কত্তিকে মাসে, তেতে থেৰে তহিং তহিং.

৩. থেৰং কস্মীৰগন্ধাৰং, মজ্ঝন্তিকমপেসযি;

অপেসযী মহাদেৱ-ত্থেৰং মহিসমণ্ডলং.

৪. ৱনৱাসিং অপেসযি, থেৰং ৰক্খিতনামকং;

তথা’পৰন্তকং যোন-ধম্মৰক্খিতনামকং.

৫. মহাৰট্ঠং মহাধম্ম-ৰক্খিতত্থেৰ নামকং;

মহাৰক্খিত থেৰং তং, যোন লোকমপেসযি.

৬. পেসেসি মজ্ঝিমং থেৰং, হিমৱন্তপদেসকং;

সুৱণ্ণভূমিং থেৰে দ্ৱে, সোণমুত্তৰ মেৱ চ.

৭. মহামহিন্দত্থেৰং তং, থেৰ ইট্টিযমুত্তিযং;

সম্বলং ভদ্দসালঞ্চ, সকে সদ্ধিৱিহাৰিকে.

৮. লংকাদীপে মনুঞ্ঞম্হি, মনুঞ্ঞং জিনসাসনং;

পতিট্ঠাপেথ তুম্হে’তি, পঞ্চ থেৰে অপেসযি.

৯. তদা কস্মীৰগন্ধাৰে, পক্কং সস্সং মহিদ্ধিকো;

অৰৱালো নাগৰাজা, ৱস্সং কৰকসঞ্ঞিতং.

১০. ৱস্সা পেত্ৱা সমুদ্দস্মিং, সব্বং খিপতিদাৰুণো;

তত্ৰ মজ্ঝন্তিকত্থেৰো, খিপ্পং গন্ত্ৱা ৱিহাযসা.

১১. অৰৱালদহেৱাৰি-পিট্ঠে চঙ্কমনাদিকে;

অকাসি দিস্ৱা তংনাগা, ৰুট্ঠাৰঞ্ঞো নিৱেদযুং.

১২. নাগৰাজা’থৰুট্ঠো সো, ৱিৱিধা ভিসিকা’কৰি;

ৱাতা মহন্তা ৱাযন্তি, মেঘো গজ্জতি ৱস্সতি.

১৩. ফলন্ত্য’সনিযো ৱিজ্জু, নিচ্ছৰন্তি ততো ততো;

মহিৰুহা পব্বতানং, কূটানি পপতন্তি চ.

১৪. ৱিৰূপৰূপা নাগা চ, ভিংসাপেন্তি সমন্ততো;

সযং ধুপাযতি জলতি, অক্কোসন্তো অনেকধা.

১৫. সব্বং তং ইদ্ধিযা থেৰো, পটিবাহিয ভিংসনং;

অৱোচ নাগৰাজং তং, দস্সেন্তো বলমুত্তমং.

১৬. সদেৱ কোপি চে লোকো, আগন্ত্ৱা তাসযেয্য মং;

ন মে পটিবলো অস্স, জনেতুং ভযভেৰৱং.

১৭. সচে’পি ত্ৱং মহিং সব্বং, সসমুদ্দং সপব্বতং;

উক্খিপিত্ৱা মহানাগ, খিপেয্যাসি মমো’পৰি.

১৮. নেৱ মে সক্কুণেয্যাসি, জনেতুং ভযভেৰৱং;

অঞ্ঞদত্থু তৱে‘ৱ’স্স, ৱিঘাতো উৰগাধিপ.

১৯. তংসুত্ৱা নিম্মদস্স’স্স, থেৰো ধম্মমদেসযি;

ততো সৰণসীলেসু, নাগৰাজা পতিট্ঠহি.

২০. তথেৱ চতুৰাসীতি-সহস্সানি ভুজঙ্গমা;

হিমৱন্তেৱ গন্ধব্বা, যক্খা কুম্ভণ্ডকা বহূ.

২১. পণ্ডকো নাম যক্খো তু, সদ্ধিংহাৰিত যক্খিযা;

পঞ্চসতেহি পুত্তেহি, ফলং পাপুণি আদিকং.

২২. ‘‘মা’’দানি কোধং জনিযিত্থ, ইতো উদ্ধং যথাপুৰে;

সসঘাতঞ্চ মা’কত্থ, সুখকামাহি পাণিনো.

২৩. কৰোথ মেত্তং সত্তেসু, ৱসন্তু মনুজা সুখং;

ইতি তেনা’নুসিট্ঠা তে, তথেৱ পটিপজ্জিসুং.

২৪. ততো ৰতনপল্লঙ্কে, থেৰং সো উৰগাধিপো;

নিসীদাপিয অট্ঠাসি, বীজমানো তদন্তিকে.

২৫. তদা কস্মীৰগন্ধাৰ-ৱাসিনো মনুজা’গতা;

নাগৰাজস্স পূজত্থং, মন্ত্ৱা থেৰং মহিদ্ধিকং.

২৬. থেৰমেৱা’ভি ৱাদেত্ৱা, একমন্তং নিসীদিসুং;

তেসং ধম্মমদেসেসি, থেৰো আসিৱিসোপমং.

২৭. অসীতিযা সহস্সানং, ধম্মাভিসমযো অহু;

সতসহস্স পুৰিসা, পব্বজুং থেৰসন্তিকে.

২৮. ততোপ্পভুপতি কস্মিৰ-গন্ধাৰং তে ইদানিপি;

আসুং কাসাৱ পজ্জোতা, ৱত্থুত্তযপৰাযনা.

২৯. গন্ত্ৱা মহাদেৱত্থেৰো, দেসং মহিসমণ্ডলং;

সুত্তন্তং দেৱদূতং সো, কথেসি জনমজ্ঝগো.

৩০. চত্তালীস সহস্সানি, ধম্মচক্খুং ৱিসোধযুং;

চত্তালীস সহস্সানি, পব্বজিংসু তদন্তিকে.

৩১. গন্ত্ৱা’থ ৰক্খিতত্থেৰো, ৱনৱাসিং নভে ঠিতো;

সংযুত্তমনমতগ্গং, কথেসি জনমজ্ঝগো.

৩২. সট্ঠি নৰসহস্সানং, ধম্মাভিসমযো অহু;

সত্ততিংস সহস্সানি, পব্বজিংসু তদন্তিকে.

৩৩. ৱিহাৰানং পঞ্চসতং, তস্মিংদেসে পতিট্ঠহি;

পতিট্ঠাপেসি তত্থেৱং, থেৰো সো জিনসাসনং.

৩৪. গন্ত্ৱা’পৰন্তকং থেৰো, যোনকো ধম্মৰক্খিতো;

অগ্গিক্খন্ধোপমং সুত্তং, কথেত্ৱা জনমজ্ঝগো.

৩৫. সত্ততিংস সহস্সানি, পাণে তত্থ সমাগতে;

ধম্মামতমপাযেসি, ধম্মা ধম্মেসু কোৱিদো.

৩৬. পুৰিসানঞ্চ সহস্সঞ্চ, ইত্থিযো চ ততো’ধিকা;

খত্তিযানং কুলাযেৱ, নিক্খমিত্ৱান পব্বজুং.

৩৭. মহাৰট্ঠমিসী গন্ত্ৱা, সো মহাধম্মৰক্খিতো;

মহানাৰদকস্সপৱ্হং, জাতকং কথযী তহিং.

৩৮. মগ্গফলং পাপুণিংসু, চতুৰাসীতি সহস্সকা;

তেৰসন্তু সহস্সানি, পব্বজিংসু তদন্তিকে.

৩৯. গন্ত্ৱান যোনৱিসযং, সো মহাধম্মৰক্খিতো ইসি;

কাড়কাৰাম সুত্তন্তং, কথেসি জনমজ্ঝগো.

৪০. পাণসত সহস্সানি, সহস্সানি চ সত্ততি;

মগ্গফলং পাপুণিংসু, দস সহস্সানি পব্বজুং.

৪১. গন্ত্ৱা চতূহি থেৰেহি, দেসেসি মজ্ঝিমো ইসি;

হিমৱন্তপদেসস্মিং, ধম্মচক্কপৱত্তনং.

৪২. মগ্গফলপাপুণিংসু, অসীতিপাণ কোটিযো;

ৱিসুং তে পঞ্চৰট্ঠানি, পঞ্চথেৰা পসাদযুং.

৪৩. পুৰিসসতসহস্সানি, একেকস্সেৱ সন্তিকে;

পব্বজিংসু পসাদেন, সম্মাসম্বুদ্ধ সাসনে.

৪৪. সদ্ধিং উত্তৰথেৰেন, সোণত্থেৰো মহিদ্ধিকো;

সুৱণ্ণভূমিং অগমা, তস্মিং তু সমযে পন.

৪৫. জাতে জাতে ৰাজগেহে, দাৰকে ৰুদ্দৰক্খসী;

সমুদ্দতো নিক্খমিত্ৱা, ভক্খিত্ৱা পন গচ্ছতি.

৪৬. তস্মিং খণে ৰাজগেহে,

জাতো হোতি কুমাৰকো;

থেৰে মনুস্সা পস্সিত্ৱা,

ৰক্খসানং সহাযকা.

৪৭. ইতি চিন্তিয মাৰেতুং, সা যুৱা উপসঙ্কমুং;

‘‘কিমেতন্তি’’চ পুচ্ছিত্ৱা, থেৰং তে এৱ মাহুতে.

৪৮. সমণা মযং হিমৱন্তা, ন ৰক্খসি সহাযকা;

ৰক্খসী সা সপৰিসা, নিক্খন্তা হোতি সাগৰা.

৪৯. তং দিস্ৱান মহাৰাৱং, ৱিৰৱিংসু মহাজনা;

দিগুণে ৰক্খসে থেৰো, মাপযিত্ৱা ভযানকে.

৫০. তং ৰক্খসিং সপৰিসং, পৰিক্খিপি সমন্ততো;

ইদং ইমেহি উদ্ধন্তি, মন্ত্ৱা ভীতা পলাযিসা.

৫১. তস্স দেসস্স আৰক্খং, ঠপেত্ৱান সমন্ততো;

তস্মিং সমাগমে থেৰো, ব্ৰহ্মজালমদেসযি.

৫২. সৰণেসু চ সীলেসু, অট্ঠংসু বহৱো জনা;

সট্ঠিযা তু সহস্সানং, ধম্মাভিসমযো অহু.

৫৩. অড্ঢুড্ঢানি সহস্সানি, পব্বজুং কুলদাৰকা;

পব্বজিংসু দিযড্ঢন্তু, সহস্সং কুলধীতৰো.

৫৪. ততোপ্পভুতি সঞ্জাতে, ৰাজগেহে কুমাৰকে;

নামং কৰিংসু ৰাজানো, সোণুত্তৰ সনামকে.

৫৫. মহাজনস্সাপি জিনস্স কড্ঢনং;

ৱিহায পত্তং অমতং সুখম্পিতে;

কৰিংসু লোকস্স হিতং তহিং তহিং;

ভৱেয্য যো লোকহিতে পমাদৱাতি.

সুজনপ্পসাদ সংৱেগত্থায কতে মহাৱংসে

নানাদেসপসাদো নাম দ্ৱাদসমো পৰিচ্ছেদো.