একাদসম পৰিচ্ছেদ

দেৱানংপিযতিস্সাভিসেকো

১. তস্সচ্চযে তস্স সুতো, মুটসিৱো’তি ৱিস্সুতো;

সুৱণ্ণপালিযা পুত্তো, পত্তো ৰজ্জমনাকুলং.

২. মহামেঘৱনুয্যানং, নামনুগগুণোদিতং;

ফলপুপ্ফতৰুপেতং, সো ৰাজা কাৰযি সুভং.

৩. উয্যানঠানগ্গহণে, মহামেঘো অকালজো;

পাৱস্সিতেন উয্যানং, মহামেঘৱনং অহু.

৪. সট্ঠিৱস্সানি মুটসিৱো, ৰাজা ৰাজ্জমকাৰযি;

অনুৰাধে পুৰৱৰে, লংকা ভুৱদনে সুভে.

৫. তস্স পুত্তা দসা’হেসুং, অঞ্ঞমঞ্ঞহিতেসিনো;

দুৱে ধীতা চা’নুকুলা, কুলানুচ্ছৱিকা অহূ.

৬. দেৱানং পিযতিস্সোতি, ৱিস্সুতো দুতিযো সুতো;

তেসু ভাতূসু সব্বেসু, পুঞ্ঞাপঞ্ঞাধিকো অহু.

৭. দেৱানং পিযতিস্সো সো, ৰাজা’সি পিতুঅচ্চযে;

তস্সা’ভিসেকেন সমং, বহূন’চ্ছৰিযান’হুং.

৮. লংকাদীপম্হি সকলে, নিধযো ৰতনানি চ;

অন্তোঠিতানি উগ্গন্ত্ৱা, পথৱীতলমাৰুহুং.

৯. লংকাদীপসমীপম্হি, ভিন্ননাৱাগতানি চ;

তত্ৰজাতানি চ থলং, ৰতনানি সমাৰুহুং.

১০. ছাতপব্বতপাদম্হি, তিস্সো চ ৱেড়ুযট্ঠিযো;

জাতাৰথপতোদেন, সমানা পৰিমাণতো.

১১. তাসু একালতাযট্ঠি, ৰজতা’ভা তহিং লতা;

সুৱণ্ণাৱণ্ণাৰুচিৰা, দিস্সন্তেতা মনোৰমা.

১২. একা কুসুমা যট্ঠীতু, কুসুমানি তহিং পন;

নানানি নানাৱণ্ণানি, দিস্সন্তে’তি ফুটানি চ.

১৩. একাসকুণযট্ঠিতু, তহিং পক্খিমিগা বহূ;

নানা চ নানাৱণ্ণা চ, সজীৱা ৱিয দিস্সৰে.

১৪. ভযগজৰথামলকা, ৱলযঙ্গুলিৱেঠকা;

ককুধফলাপাকতিকা, ইচ্চেতা অট্ঠজাতিযো.

১৫. মুত্তাসমুদা উগ্গন্ত্ৱা, তীৰে ৱট্টি ৱিয ঠিতা;

দেৱানং পিযতিস্সস্স, সব্বং পুঞ্ঞৱিজম্ভিতং.

১৬. ইন্দনীলং ৱেড়ুৰিযং, লোহিতঙ্কমণিধি’মে;

ৰজতানি পনে’তানি, মুত্তা তা তাৱযট্ঠিযো.

১৭. সত্তহব্ভন্তৰেযেৱ, ৰঞ্ঞো সন্তিকমাহৰুং;

তানি দিস্ৱা পতীতো সো, ৰাজা ইতি ৱিচিন্তযি.

১৮. ৰতনানি অনগ্ঘানি, ধম্মাসোকো ইমানিমে;

সহাযো’ৰহতেনা’ঞ্ঞো, তস্স দস্সং ইমান’তো.

১৯. দেৱানং পিযতিস্সো চ, ধম্মাসোকো চ তে ইমে;

দ্ৱে অদিট্ঠসহাযাহি, চিৰপ্পভুতি ভূপতি.

২০. ভাগিনেয্যং মহাৰিট্ঠং, অমচ্চং পমুখং ততো;

দিজং অমচ্চং গণতং, ৰাজা তে চতুৰো জনে.

২১. দূতো কত্ৱান পাহেসি, বলোঘপৰিৱাৰিতে;

গাহা পেত্ৱা অনগ্ঘানি, ৰতনানি ইমানি সো.

২২. মণিজাতী চ তিস্সো তা, তিস্সো চ ৰথযট্ঠিযো;

সঙ্খঞ্চ দক্খিণাৱত্তং, মুত্তা জাতী চ অট্ঠ তা.

২৩. আৰুয্হ জম্বুকোলম্হি, নাৱং সত্তদিনেন তে;

সুখেন তিত্থং লদ্ধান, সত্তাহেন ততো পুন.

২৪. পাটলিপুত্তং গন্ত্ৱান, ধম্মাসোকস্স ৰাজিনো;

অদংসু পণ্ণাকাৰেতে, দিস্ৱা তানি পসীদি সো.

২৫. ৰতনানি’দিসানেত্থ, নত্থি মে ইতি চিন্তিয;

অদা সেনাপতিট্ঠানং, তুট্ঠো’ৰিট্ঠস্স ভূপতি.

২৬. পোৰোহিচ্চব্ৰাহ্মণস্স, দণ্ডনাযতং পন;

অদাসি তস্সা’মচ্চস্স, সেট্ঠিত্তং গণকস্স তু.

২৭. তেসং অনপ্পকে ভোগে, দত্ৱা ৱাসঘৰানি চ;

মহামচ্চেহি মন্তেন্তো, পস্সিত্ৱা পটিপাভতং.

২৮. ৱালবীজনী মুণ্হিসং, খগ্গং ছত্তঞ্চ পাদুকং;

মোড়িং ৱতং সপামঙ্গং, ভিঙ্কাৰং হৰিচন্দনং.

২৯. অধোৱিমং ৱত্থকোটিং, মহগ্ঘং হত্থপুঞ্ছনিং;

নাগা’হটং অঞ্জনঞ্চ, অৰুণাভঞ্চ মত্তিকং.

৩০. অনোতত্তোদকঞ্চেৱ, গঙ্গাসলিলমেৱ চ;

সঙ্খঞ্চ নন্দিযাৱট্টং, ৱড্ঢমানং কুমাৰিকং.

৩১. হেমভোজনকণ্ডঞ্চ, সিৱিকঞ্চ মহাৰহং;

হৰীটকং আমলকং, মহগ্ঘং অমতোসধং.

৩২. সুকাহটানং সালীনং, সট্ঠিৱাহসতানি চ;

অভিসেকো পকৰণং, পৰিৱাৰৱিসেসিতং.

৩৩. দত্ৱা কালে ভহাযস্স, পণ্ণাকাৰে নৰিস্সৰো;

দূতে পাহেসিসদ্ধম্ম-পণ্ণাকাৰমিমম্পিচ.

৩৪. অহং বুদ্ধঞ্চ ধম্মঞ্চ, সঙ্ঘঞ্চ সৰণং গতো;

উপাসকত্তং দেসেসিং, সক্যপুত্তস্স সাসনে.

৩৫. ত্ৱম্পিমানি ৰতনানি, উত্তমানি নৰুত্তম;

চিত্তং পসাদযিত্ৱান, সদ্ধায সৰণং ৱজ.

৩৬. ‘‘কৰোথ মে সহাযস্স, অভিসেকং পুনো’’ ইতি;

ৱত্ৱা সহযা’মচ্চেতে, সক্কৰিত্ৱা চ পেসযি.

৩৭. পঞ্চমাসে ৱসিত্ৱান, তে মচ্চা’তিৱসক্কতা;

ৱেসাখসুক্খপক্খাদি-দিনে দূতা ৱিনিগ্গতা.

৩৮. তামলিত্তিযমাৰুয্হ, নাৱং তেজম্বুকোলকে;

ওৰুয্হ কূপং পস্সিংসু, পত্ৱা দ্ৱাদসিযং ইধ.

৩৯. অদংসু পণ্ণাকাৰে তে, দূতা লংকাদীপস্সতে;

তেসং মহন্তং সক্কাৰং, লংকাপতি অকাৰযি.

৪০. তে মগ্গসিৰমাসস্স, আদিচন্দোদযেজিনে;

অভিসিত্তঞ্চ লংকিন্দং, অমচ্চা সামিভত্তিনো.

৪১. ধম্মাসোকস্স ৱচনং, ৱত্ৱা সামি হিতেৰতা;

পুনোপি অভিসিঞ্চিংসু, লংকাহিতসুখেৰতং.

৪২. ৱেসাখে নৰপতি পুণ্ণমাযমেৱং;

দেৱানং পিযৱচনো পগূড়নামো;

লংকাযং পৱীততপীতি উস্সৱাযং;

অত্তানং জনসুখদো’ভিসেচযী সোতি.

সুজনপ্পসাদসংৱেগত্থায কতে মহাৱংসে

দেৱানংপিযতিস্সাভিসেকোনাম

একাদসমো পৰিচ্ছেদো.