পথমপৰিচ্ছেদ

মহিযঙ্গণাগমনং

১. নমস্সিত্ৱান সম্বুদ্ধং, সুসুদ্ধং সুদ্ধৱংসজং;

মহাৱংসং পৱক্খামি, নানানূনাধিকাৰিকং.

২. পোৰাণেহি কতো’পেসো, অতিৱিত্থাৰিতো ক্ৱচি;

অতীৱ ক্ৱচি সংখিত্তো, অনেকপুনৰুত্তকো.

৩. ৱজ্জিতং তেহি দোসেহি, সুখগ্গহণধাৰণং;

পসাদসংৱেগকৰং, সুতিতো চ উপাগতং.

৪. পসাদজনকে ঠানে, তথা সংৱেগকাৰকে;

জনযন্তো পসাদঞ্চ, সংৱেগঞ্চ সুণাথ তং.

৫. দীপঙ্কৰঞ্হি সম্বুদ্ধং, পস্সিত্ৱা নো জিনো পুৰা;

লোকং দুক্খা পমোচেতুং, বোধায পণিধিং অকা.

৬. ততো তঞ্চেৱ সম্বুদ্ধং, কোণ্ডঞ্ঞং মঙ্গলং মুনিং;

সুমনং ৰেৱতং বুদ্ধং, সোভিতঞ্চ মহামুনিং.

৭. অনোমদস্সিং সম্বুদ্ধং, পদুমং নাৰদং জিনং;

পদুমুত্তৰসম্বুদ্ধং, সুমেধঞ্চ তথাগতং.

৮. সুজাতং পিযদস্সিঞ্চ, অত্থদস্সিঞ্চ নাযকং;

ধম্মদস্সিঞ্চ সিদ্ধত্থং, তিস্সং ফুস্সজিনং তথা.

৯. ৱিপস্সিং সিখীসম্বুদ্ধং, সম্বুদ্ধং ৱেস্সভুং ৱিভুং;

ককুসন্ধঞ্চ সম্বুদ্ধং, কোণাগমনমেৱ চ.

১০. কস্সপং সুগতঞ্চ’মে, সম্বুদ্ধে চতুৱীসতি;

আৰাধেত্ৱা মহাৱীৰো, তেহি বোধায ব্যাকতো.

১১. পুৰেত্ৱা পাৰমী সব্বা, পত্ৱা সম্বোধিমুত্তমং;

উত্তমো গোতমো বুদ্ধো, সত্তে দুক্খা পমোচযি.

১২. মগধেসু ৰুৱেলাযং, বোধিমূলে মহামুনি;

ৱিসাখপুণ্ণমাযং সো, পত্তো সম্বোধিমুত্তমং.

১৩. সত্তাহানি তহিং সত্ত, সো ৱিমুত্তিসুখং পৰং;

ৱিন্দন্তং মধুৰত্তঞ্চ, দস্সযন্তো ৱসী ৱসি.

১৪. ততো বাৰাণসিং গন্ত্ৱা, ধম্মচক্কং পগত্তযি;

তত্থ ৱস্স ৱসন্তো’ৱ, সট্ঠিং অৰহতং অকা.

১৫. তে ধম্মদেসনত্থায, ৱিস্সজ্জেত্ৱান ভিক্খৱো;

ৱিনেত্ৱা চ ততো তিংস-সহা যে ভদ্দৱগ্গিযে.

১৬. সহস্সজটিলে নাথো, ৱিনেতুং কস্সপাদিকে;

হেমন্তে উৰুৱেলাযং, ৱসিতে পৰিপাচযং.

১৭. উৰুৱেলকস্সপস্স, মহাযঞ্ঞে উপট্ঠিতে;

তস্স’ত্তনো নাগমনে, ইচ্ছাচাৰং ৱিজানিয.

১৮. উত্তৰকুৰুতো ভিক্খং, আহৰিত্ৱা ৰিমদ্দনো;

অনোতত্তদহে ভুত্ৱা, সাযন্হসমযে সযং.

১৯. বোধিতো নৱমে মাসে, ফুস্সপুণ্ণমিযং জিনো;

লঙ্কাদীপং ৱিসোধেতুং, লঙ্কাদীপমুপাগমি.

২০. সাসনুজ্জোতনং ঠানং, লংকা ঞাতা জিনেন হি;

যক্খপুণ্ণায লঙ্কায, যক্খা নিব্বা সিযাতি চ.

২১. ঞাতোৱ লঙ্কামজ্ঝম্হি, গঙ্গাভীৰে মনোৰমে;

তিযোজনায তে ৰম্মে, একযোজনৱিত্থতে.

২২. মহানাগৱনুয্যানে, যক্খসঙ্গামভূমিযা;

লঙ্কাদীপট্ঠযক্খানং, মহাযক্খসমাগমো.

২৩. উপাগতো তং সুগতো, মহাযক্খসমাগমং;

সমাগমস্স মজ্ঝম্হি, তত্থ তেসং সিৰোপৰি.

২৪. মহিযঙ্গণথূপস্স, ঠানে ৱেহাযসং জিনো;

ৱুট্ঠিৱাতন্ধকাৰেসি, তেসং সংৱেজনং অকা.

২৫. তে ভযট্ঠা’ভযং যক্খা, অযাচুং অভযং জিনং;

জিনো অভযদো আহ, যক্খে তে’তি ভযদ্দীতে.

২৬. যক্খা ভযং ৱো দুক্খঞ্চ, হৰিস্সামি ইদং অহং;

তুম্হে নিসজ্জঠানং মে, সমগ্গা দেথ নো ইধ.

২৭. আহু তে সুগতং যক্খা, দেম মাৰিস তে ইধ;

সব্বেপি সকলং দীপং, দেহি নো অভযং তুৱং.

২৮. ভযং সীতং তমং তেসং, হন্ত্ৱা তং দিন্নভূমিযং;

চম্মক্খন্ধং অত্থৰিত্ৱা, তত্থা’ সীনো জিনো ততো.

২৯. চম্মক্খণ্ডং পসাৰেসি, আদিত্তং তং সমন্ততো;

ঘম্মাভিভূতা তে ভীতা, ঠিতা অন্তে সমন্ততো.

৩০. গিৰিদীপং ততো নাথো, ৰম্মং তেসং ইধা’নযি;

তেসু তত্থ পৱিট্ঠেসু, যথাঠানে ঠপেসি চ.

৩১. নাথো তং সংখিপি ধম্মং, তদা দেৱা সমাগমুং;

তস্মিং সমাগমে তেসং, সত্থা ধম্ম মদেসযি.

৩২. নেকেসং পাণকোটীনং, ধম্মাভিসমযো অহু;

সৰণেসু চ সীলেসু, ঠিতা আসুং অসংখিযা.

৩৩. সোতাপত্তিফলং পত্ৱা, সেলে সুমনকূটকে;

মহাসুমনদেৱিন্দো, পূজিযং যাচি পূজিযং.

৩৪. সিৰং পৰামসিত্ৱান, নীলামলসিৰোৰুহো;

পাণিমত্তেঅদা কেসে, তস্স পাণ হিতো জিনো.

৩৫. সো তং সুৱণ্ণচঙ্কোট-ৱৰেনাদায সত্থুনো;

নিসিন্নট্ঠানৰচিতে, নানাৰতনসঞ্চযে.

৩৬. সব্বতো সত্তৰতনে, তে ঠপেত্ৱা সিৰোৰুহে;

সো ইন্দনীলথূপেন, পিদহেসি নমস্সি চ.

৩৭. পৰিনিব্বুতম্হি সম্বুদ্ধে, চিতকতো চ ইদ্ধিযা;

আদায জিনগীৱট্ঠিং, থেৰো সৰভূনামকো.

৩৮. থেৰস্স সাৰিপুত্তস্স, সিস্সো আনীয চেতিযে;

তস্মিংযেৱ ঠপেত্ৱান, ভিক্খূহি পৰিৱাৰিতো.

৩৯. ছাদাপেত্ৱা মেদৱণ্ণ-পাসাণেহি মহিদ্ধিকো;

থূপং দ্ৱাদসহত্থুচ্চং, কাৰাপেত্ৱান পক্কমি.

৪০. দেৱানংপিযতিস্সস্স, ৰঞ্ঞো ভাতুকুধাৰকো;

উদ্ধচূড়াভযো নাম, দিস্ৱা চেতিয মব্ভুতং.

৪১. তং ছাদযিত্ৱা কাৰেসি, তিংসহত্থুচ্চ চেতিযং;

মদ্দন্তো দমিড়ে ৰাজা, তত্ৰট্ঠো দুক্খগামণি.

৪২. অসীতিহত্থং কাৰেসি, তস্স কঞ্জুকচেতিযং;

মহিযঙ্গণথূপোয-মেসো এৱং পতিট্ঠিতো.

৪৩. এৱং দীপমিমংকত্ৱা, মনুস্সাৰহমিস্সৰো;

উৰুৱেলমগা ধীৰো, উৰুৱীৰ পৰক্কমোতি.

মহিযঙ্গণাগমনং নিট্ঠিতং.

নাগদীপাগমন

৪৪. মহাকাৰুণিকো সত্থা, সব্বলোকহিতে ৰতো;

বোধিতো পঞ্চমে ৱস্সে, ৱসং জেতৱনে জিনো.

৪৫. মহোদৰস্স নাগস্স, তথা চূড়োদৰস্স চ;

মাতুলভাগিনেয্যানং, মণিপল্লঙ্কহেতুকং.

৪৬. দিস্ৱা সপাৰিসজ্জানং, সঙ্গামং পচ্চুপট্ঠিতং;

সম্বুদ্ধো চিত্তমাসস্স, কাড়পক্খে উপোসথে.

৪৭. পাতোযেৱ সমাদায, পৱৰং পত্তচীৱৰং;

অনুকম্পায নাগানং, নাগদীপমুপাগমি.

৪৮. মহাদৰো’পিসো নাগো, তদা ৰাজা অহিদ্ধিকো;

সমুদ্দে নাগভৱনে, দসদ্ধসতযোজনে.

৪৯. কণিট্ঠিকা তস্স কণ্হা, ৱড্ঢমানম্হি পব্বতে;

নাগৰাজস্স দিন্না’সি, তস্স চূড়োদৰো সুতো.

৫০. তস্স মাতা মহামাতু, মণিপল্লঙ্কমুত্তমং;

দত্ৱা কালকতা নাগী, মাতুলেন তথা হি সো.

৫১. অহোসি ভাগিনেয্যস্স, সঙ্গামো পচ্চুপট্ঠিতো;

পব্বতেয্যা’পি নাগা তে, অহেসুঞ্হি মহিদ্ধিকা.

৫২. সমিদ্ধিসুমনো নাম, দেৱো জেতৱনে ঠিতং;

ৰাজাযতনমাদায, অত্তনো ভৱনং সুভং.

৫৩. বুদ্ধানুমতিযাযেৱ, ছত্তাকাৰং জিনোপৰি;

ধাৰযন্তো উপাগঞ্ছি, ঠানং তং পুব্বৱুট্ঠকং.

৫৪. দেৱো হি সো নাগদীপে, মনুস্সো’নন্তৰে ভৱে;

অহোসি ৰাজাযতন-ঠিতঠানে স অদ্দস.

৫৫. পচ্চেকবুদ্ধ ভুঞ্জন্তে, দিস্ৱা চিত্তং পসাদিয;

পত্তসোধনসাখাযো, তেসং পাদাসি তেন সো.

৫৬. নিব্বত্তিতস্মিং ৰুক্খস্মিং, জেতুয্যানে মনোৰমে;

দ্ৱাৰকোট্ঠকপস্সম্হি, পচ্ছা বহি অহোসি সো.

৫৭. দেৱাতিদেৱো দেৱস্স, তস্স ৱুদ্ধিঞ্চ পস্সিয;

ইদং ঠান হিতত্থঞ্চ, তং সৰুক্খং ইধানযি.

৫৮. সঙ্গামমজ্ঝে আকাসে, নিসিন্নো তত্থ নাযকো;

তমং তমোনুদো তেসং, নাগানং হিংসনং অকা.

৫৯. অস্সাসেন্তো ভযট্টে তে, আলোকং পৱিদ্ধংসযি;

তে দিস্ৱা সুগতং তুট্ঠা, পাদে ৱন্দিংসু সত্থুনো.

৬০. তেসং ধম্মমদেসেসি, সামগ্গিকৰণং জিনো;

উভো’পি তে পতীতা তং, পল্লঙ্কং মুনিনো অদুং.

৬১. সত্থা ভূমিগতো তত্থ, পসীদিস্ৱান আসনে;

তেহি দিব্বন্নপানেহি, নাগৰাজেহি তপ্পিতো.

৬২. তে জলট্ঠে তলট্ঠে চ, ভুজগে’সীতিকোটিযো;

সৰণেসু চ সীলেসু, পতিট্ঠাপেসি নাযকো.

৬৩. মহোদৰস্স নাগস্স, মাতুলো মণিঅক্খিকো;

কল্যাণিযং নাগৰাজা, যুদ্ধং কাতুং তহিং গতো.

৬৪. বুদ্ধগামম্হি পঠমে, সুত্ৱা সদ্ধম্মদেসনং;

ঠিতো সৰণসীলেসু, তত্থা’যাচি তথাগতং.

৬৫. মহতী অনুকম্পানো, কতা নাথ তযা অযং;

তৱানাগমনে সব্বে, মযং ভস্মী ভৱামহে.

৬৬. অনুকম্পা মহী পিতে, ৱিসুং হোতু মহোদয;

পুনৰাগমনেনেত্থ, ৱাসভূমিং মমা মম.

৬৭. অধিৱাসযিত্ৱা ভগৱা, তুণ্হিভাৱে নিধাগমং;

পতিট্ঠাপেসি তত্থেৱ, ৰাজাযতনচেতিযং.

৬৮. তঞ্চপি ৰাজাযতনং, পল্লঞ্চঙ্ক মহাৰহং;

অপ্পেসি নাগৰাজূনং, লোকনাথো নমস্সিতুং.

৬৯. পৰিভোগচেতিযং ময্হং, নাগৰাজা নমস্সথ;

তং ভৱিস্সতি ৱোতাতা, হিতায চ সুখায চ.

৭০. ইচ্চেৱমাদিং সুগতো, নাগানং অনুসাসনং;

কত্ৱা জেতৱনং এৱ, গতো লোকানুকম্পকোতি.

নাগদীপাগমনং

কল্যাণাগমনং

৭১. ততো সো ততিযে ৱস্সে,

নাগিন্দো মণিঅক্খিকো;

উপসঙ্কম্ম সম্বুদ্ধং,

সতসঙ্ঘং নিমন্তযি.