৭. পকিণ্ণককণ্ডো

১৩৮. ইত্থিমিস্সে কুতোসীলং,

মংস ভক্খে কুতোদযা;

সুৰা পানে কুতোসচ্চং,

মহালোভে কুতোহিৰী;

মহাতন্দে কুতোসিপ্পং,

মহা কোধে কুতোধনং.

১৩৯. সুৰা যোগো ৱিকালো চ,

সমজ্জ চৰণালসং;

খিড্ডাধুত্তো পাপমিত্তো,

ভোগনাসমুখা ইমে.

১৪০. দিৱা নাদিক্খা ৱত্তব্বং,

ৰত্তো নাৱচনেন চ;

সঞ্চৰেয্য ভযা ভীতো,

ৱনে ৱনচৰী যথা.

১৪১. জীৱন্তাপি মতাপঞ্চ,

ব্যাসেন পৰিকিত্তিতা;

দুক্খিতো ব্যাধিতোমূড়্হো,

ইণৱা নিত্যসেৱকো.

১৪২. অনাগতং ভযং দিস্ৱা,

দূৰতো পৰিৱজ্জযে;

আগতঞ্চ ভযং দিস্ৱা,

অ ভীতো হোতি পণ্ডিতো.

১৪৩. নিদ্দালুকো পমত্তোচ,

সুখত্তো ৰোগৱালসো;

মহিচ্ছো কম্মাৰামোচ,

সত্তে তে সত্থৱজ্জিতা.

১৪৪. দুগ্গতং গচ্ছ হে লাভ,

লাভী লাভেন পূৰতি;

থলে পৱস্স পজ্জুন্ন,

সিন্ধু আপেন পূৰতি;

নত্থিদং কম্মপ্পধানকং.

১৪৫. ন হি কোচি কতে কিচ্চে,

কত্তাৰং সমুপেক্খতে;

তস্মা সব্বানি কিচ্চানি,

সাৱ সেসেন কাৰযে.

১৪৬. তূলং সল্লহুকং লোকে,

ততো চাপল্ল-জাতিকো;

ততো ৱুড্ঢ মনোৱাদো,

পমত্তো বুদ্ধসাসনে.

১৪৭. পাসাণছত্তং গৰুকং,

ততো দেৱানচিক্খণং;

ততো ৱুড্ঢানমোৱাদো,

ততো বুদ্ধস্স সাসনং.

১৪৮. কাযস্স দক্খিণ হত্থো,

দোসো এত্থ কনিট্ঠকো;

কণ্ণ ঘানান-মক্খীনং,

ৱামো তু পাদ-পাসকো.

১৪৯. তম্বূলস্স মজ্ঝ পত্তে,

কুৱেৰো ৰক্খতী সদা;

মূলম্হি ৰক্খতি যক্খো,

অগ্গম্হি কালকণ্ণিকা;

তানি ভুঞ্জেয্য ছিন্দিত্ৱা,

সিৰী এৱং পৱড্ঢতি.

১৫০. সম্পুণ্ণৰক্খো ব্ৰহ্মাৱ,

অচ্চুৰক্খো চ বিস্সণো;

তস্মা হি তে পূজযন্তু,

সদা মানেন্তি তং নৰং.

১৫১. গোণা হি সব্বগিহীনং,

পোসকা ভোগদাযকা;

তস্মা হি মাতা পিতূৱ,

মানযে সক্কৰেয্য চ.

১৫২. যেচ খাদন্তি গোমংসং,

মাতু মংসংৱ খাদৰে;

মতেসু তেসু গিজ্ঝানং,

দদে সোতে চ ৱাহযে.

১৫৩. গুৰুসিদ্ধো সিপ্পাৰম্ভো,

ৰৱি সোক্ৰা চ মজ্ঝিমো;

ন সিপ্পো বুদ্ধচন্দৰো,

সোৰী অঙ্গাচ মৰণং.

১৫৪. অট্ঠমিযং গুৰুং হন্তি,

সিস্সং হন্তি চতুদ্দসিং;

সিপ্পং হন্তি দস সিপ্পং,

মাতাপিতা চ পুণ্ণমিং.

১৫৫. নাড়িকং সত্ত নভুঞ্জে,

ন লাবুং নৱমং তথা;

দ্ৱাদস প্ৰিন্নংত্ৰিমিনং,

ভুঞ্জে সিপ্পং ৱিনস্সতি.

১৫৬. একং চজে কুলঅত্থং,

গামস্সত্থং কুৱং চজে;

গাম চজে জনপদত্থং,

অত্তত্থং পথৱিং চজে.

১৫৭. দেসং ওস্সজ্জ গচ্ছন্তি,

সীহো সপ্পুৰিসো গজো;

তত্থেৱ নিধনং যন্তি,

কাকো কাপুৰিসো মিগো.

১৫৮. যম্হি পদেসে ন মানো,

ন পেমং ন চ বন্ধৱা;

ন চ ৱিজ্জাগাহো কোচি,

ন তত্থ ৱসনং কৰে.

১৫৯. চৰত্যেকেন পাদেন,

তিট্ঠত্যেকেন পণ্ডিতো;

অ নিসম্ম পৰং ঠানং,

ন পুব্বমালযং জহে.

১৬০. ধন ধঞ্ঞ পযোগেসু,

তথা ৱিজ্জাগমেসু চ;

দূতেসু অপচাৰেসু,

চজ্জা লজ্জা তদা ভৱে.

১৬১. দ্ৱি গুণো থীনমাহাৰো,

বুদ্ধিচাপি চতুগ্গুণো;

ছগ্গুণো হোতি ৱাযামো,

কামোত্ৱট্ঠ-গুণো ভৱে.

১৬২. পব্বে পব্বে কমেনুচ্ছু,

ৱিসেসৰসৱাগ্গতো;

তথা সুমেত্তিকো সাধু,

ৱিপৰীতোৱ দুজ্জনো.

১৬৩. কস্সকো ৱাণিজো মচ্চো,

সমণো সুত সীলৱা;

তেসু ৱিপুল জাতেসু,

ৰট্ঠম্পি ৱিপুলং সিযা.

১৬৪. অসজ্ঝায মলা মন্তা,

অনুট্ঠান মলা ঘৰা;

মলং ৱণ্ণস্স কোসজ্জং,

পমাদো ৰক্খতো মলং.

১৬৫. হীনানং গচ্ছতে ৱিত্তং,

ৱীৰানং সন্তকত্তনং;

ৱদন্তি চ হীনা জনা,

পুব্ব-কম্মপ্পধানকা.

১৬৬. ন ৱদন্তি চেৱংধীৰা,

ৱাযমিংসু সব্বকম্মে;

ন চে সিজ্ঝতি তং কম্মং,

অ-ফলং এৱ কো দোসো.

১৬৭. নীচং কুলং নিপঞ্ঞং ৱা,

নিৰূপং নিবলং সমং;

ইমং কালং ছুত্তকালং,

ধনমেৱ ৱিসেসকং.

পকিণ্ণককণ্ডো নিট্ঠিতো.

পণ্ডিতো সুজনো কণ্ডো,

দুজ্জনো মিত্ত-ইত্থি চ;

ৰাজা পকিণ্ণকো চাতি,

সত্ত-কণ্ড-ৱিভূসিতং.

ৱিসুদ্ধা চাৰ-থেৰেন,

ৱিসুদ্ধাৰাম-ৱাসিনা;

সব্ব-কুলানমত্থায,

ৱিসোধিতং পথক্খযে.