৬. ৰাজকণ্ডো

১১২. একযামং সযে ৰাজা,

দ্ৱিযামঞ্ঞেৱ পণ্ডিতো;

ঘৰাৱাসো তিযামংৱ,

চতুযামং তু যাচকো.

১১৩. ধনৱা সুতৱা ৰাজা,

নদী ৱেজ্জো চিমেপঞ্চ;

যত্থ দেসে ন ৱিজ্জন্তি,

ন তত্থ দিৱসং ৱসে.

১১৪. যস্মিং পদেসে ন মানো,

ন পেমং নচ বন্ধৱা;

নচ ৱিজ্জাগমো কোচি,

ন তত্থ দিৱসং ৱসে.

১১৫. অপুত্তকং ঘৰং সুঞ্ঞং,

ৰট্ঠং সুঞ্ঞং অৰাজকং;

অ সিপ্পস্স মুখং সুঞ্ঞং,

সব্ব সুঞ্ঞং দলিদ্দকা.

১১৬. ধনমিচ্ছেয্য ৱাণিজ্জো,

ৱিজ্জমিচ্ছে ভজেসুতং;

পুত্তমিচ্ছে তৰুণিত্থিং,

ৰাজামচ্চং ৱসং গমে.

১১৭. নট্ঠোযতি অসন্তুট্ঠো,

সন্তুট্ঠো চ মহীপতি;

লজ্জা চ গণিকা নট্ঠা,

নিল্লজ্জা কুলধীতিকা.

১১৮. পক্খীনং বলমাকাসো,

মচ্ছানমুদকং বলং;

দুব্বলস্স বলং ৰাজা,

কুমাৰানং ৰুদং বলং.

১১৯. খমা জাগৰিযুট্ঠানং,

সংৱিভাগো দযিক্খণা;

নাযকস্স গুণা এতে,

ইচ্ছিতব্বা সতং গুণা.

১২০. সকিং ৱদন্তি ৰাজানো,

সকিং সমণব্ৰাহ্মণা;

সকিং সপ্পুৰিসা লোকে,

এস ধম্মো সনন্তনো.

১২১. অলসো গিহী কামভোগী ন সাধু,

অসঞ্ঞতো পব্বজিতো ন সাধু;

ৰাজা অনিসম্মকাৰী ন সাধু,

পণ্ডিতো কোধনো তংপি ন সাধু.

১২২. বহৱো যত্থ নেত্তাৰো,

সব্বে পণ্ডিতমানিনো;

সব্বে মহত্তমিচ্ছন্তি,

তেসং কম্মং ৱিনস্সতি.

১২৩. আযং খযং সযং জঞ্ঞা,

ৰাজা সযং কতাকতং;

নিগ্গহে নিগ্গহেতব্বং,

পগ্গহে পগ্গহাৰহং.

১২৪. পিট্ঠিতোক্কং নিসেৱেয্য,

কুচ্ছিনাৱ হুতাসনং;

সামিকং সব্বভাগেন,

পৰলোকং অমোহৱা.

১২৫. অগ্গি আপো ইত্থিমূড়্হো,

সপ্পো ৰাজ-কুলানিচ;

অপযন্তেন গন্তব্বা,

অচ্চেক-পাণহাৰকা.

১২৬. পদুট্ঠ-ভৰিয-সংৱাসো,

পদুট্ঠ চিত্ত দাসকো;

স-সপ্পে চ ঘৰে ৱাসো,

মচ্চু এৱ ন সংসযো.

১২৭. মূড়্হ সিস্সো পদেসেন,

কুনাৰী ভৰণেন চ;

অসতা সম্পযোগেন,

পণ্ডিতোপ্পৱসীদতি.

১২৮. মাতা পুত্তকৰং পাপং,

সিস্সপাপং গুৰুকতা;

ৰাজা ৰট্ঠকৰং পাপং,

ৰাজপাপং পুৰোহিতো.

১২৯. অকোধেন জিনে কোধং,

অসাধুং সাধুনা জিনে;

জিনে মচ্ছৰিং দানেন,

সচ্চেনালীকৱাদিনং;

১৩০. অদন্তং দমনং দানং,

দানং সব্বত্থ সাধকং;

দানেন পিয ৱাচায,

উন্নমন্তি নমন্তি চ;

১৩১. দানং সিনেহভেসজ্জং,

মচ্ছেৰং দোসনোসধং;

দানং যসস্সী ভেসজ্জং,

মচ্ছেৰং কপণোসধং.

১৩২. বহূনমপ্পসাৰানং,

সামগ্গিযা জযং জযে;

তিণেহি ৱত্ততে যোত্তং,

তেন নাগোপি বজ্ঝতে.

১৩৩. সহাযো অসমত্থোপি,

তেজসা কিংকৰিস্সতি;

নিৱাতে জলিতো অগ্গি,

সযমে ৱূপসম্পতি.

১৩৪. ন ৰঞ্ঞা সমকং ভুঞ্জে,

কামভোগং কুদাচনং;

আকপ্পং ৰস ভুত্তিংৱা,

মালা গন্ধ ৱিলেপনং;

ৱত্থং সব্বঅলঙ্কাৰং,

ন ৰঞ্ঞা সদিসং কৰে.

১৩৫. ন মে ৰাজা সখা হোতি,

ন ৰাজা হোতি মেথুনো;

এসো সামিকো ময্হন্তি,

চিত্তে নিট্ঠং সুথাপযে.

১৩৬. নাতিদূৰে ভজে ৰঞ্ঞো,

নাচ্চাসন্নোপৱাতকে;

উজুকে নাতিনিন্নে চ,

ন ভজে উচ্চমাসনে.

ছদোসে ৱজ্জে সেৱকো,

তিট্ঠে অগ্গিংৱ সংযতো.

১৩৭. গুণী সব্বঞ্ঞু তুল্যোপি,

নসোভতি অনিস্সযো;

অনগ্ঘমোপি মণিসেট্ঠো,

হেমং নিস্সায সোভতি.

ৰাজকণ্ডো নিট্ঠিতো.