৫. ইত্থিকণ্ডো

৯৪. কোকিলানং সদ্দং ৰূপং,

নাৰীৰূপং পতিব্বতা;

ৱিজ্জা ৰূপং অ-ৰূপানং,

খমা ৰূপং তপস্সিনং.

৯৫. ইত্থীনঞ্চ ধনং ৰূপং,

পুৰিসানং ৱিজ্জা ধনং;

ভিক্খূনঞ্চ ধনং সীলং,

ৰাজানঞ্চ ধনং বলং.

৯৬. তপস্সিনো কিসা সোভা,

থূলা সোভা চতুপ্পদা;

পুৰিসা ৱিজ্জৱা সোভা,

ইত্থী সোভাস সামিকা.

৯৭. পঞ্চ ৰত্যা সুগন্ধব্বা,

সত্ত ৰত্যা ধনুগ্গহা;

এক মাসা সুভৰিযা,

অড্ঢ মাসা সিস্সা মলা.

৯৮. হিং ৰমতি পঙ,

হঙ ৰমতি পোক.

থী ৰমতি পু,

খু ৰমতি ধং.

৯৯. জিণ্ণমন্নং পসংসেয্য,

দাৰঞ্চ গতযোব্বনং;

ৰণা পুনাগতা সূৰং,

সস্সঞ্চ গেহমাগতং.

১০০. দ্ৱত্তি-পতিকা নাৰী চ,

ভিক্খু দ্ৱত্তি-ৱিহাৰিকো;

দ্ৱত্তি-পাস-মুত্তো পক্খী,

কত-মাযা বহূথৰং.

১০১. দুজ্জনং পহাৰাদমে,

মিত্তং দমে অ-ভাণিকা;

ইত্থিঞ্চ ব্যসনা দমে,

ৰাগিনং অপ্প ভোজনা.

১০২. ন ৰত্তি ৱিনা চন্দিমা,

ৱীচিং ৱিনা চ অণ্ণৱো;

হংসং ৱিনা পোক্খৰণী,

পতিং কঞ্ঞাচ সোভতে.

১০৩. পতিনা জনিতো ভোগো,

ইত্থিযাৱ সংগোপ্পিতো;

পুৰিসোৱ হি পধানো,

ইত্থী সুত্তংৱ সূচিযা.

১০৪. সব্বানদী ৱঙ্কনদী,

সব্বে কট্ঠমযা ৱনা;

সব্বিত্থিযো কৰে পাপং,

লভমানে নিৱাতকে.

১০৫. ৱিৱাদসীলিং উসূযভাণিনিং,

সম্পস্সতণ্হিং বহুপাকভুত্তিনিং;

অগ্গন্তভুত্তিং পৰগেহৱাসিনিং,

নাৰিং চজে পুত্তসতম্পি পূমা.

১০৬. ভুত্তেসু মণ্ডেসু জনীৱ কন্তিনী,

গুয্হেচ ঠানে ভগিনীৱ হিৰিণী;

কম্মেসু পত্তেসু কৰোতি দাসীৱ,

ভযেসু মন্তী সযনেসু ৰামযে;

ৰূপীসু সিক্খী কুপনেসু খন্তিনী,

সা নাৰী সেট্ঠাতি ৱদন্তি পণ্ডিতা;

কাযস্স ভেদাচ দিৱেভৱেয্য সা.

১০৭. সামা মিগক্খী তনুমজ্ঝগত্তা,

সূৰূ সুকেসী সমদন্তপন্তী;

গম্ভীৰনাভী যুৱতী সুসীলী,

হীনে কুলে জাতাপি ৱিৱাহ্যা.

১০৮. সৰদংৰতু-কালানং,

ভৰিযানং ৰূপৱতী;

জেট্ঠো পধানং পুত্তানং,

দিসানং উত্তৰাদিসা.

১০৯. যা ইচ্ছে পুৰিসো হোতুং,

জাতি জাতি পুনপ্পুনং;

সামিকং অপচাযেয্য,

ইন্দংৱ পাৰিচাৰিকা.

১১০. যো ইচ্ছে পুৰিসো হোতুং,

জাতি জাতি পুনপ্পুনং;

পৰদানং ৱিৱজ্জেয্য,

ধোতপাদোৱ কদ্দমং.

১১১. অতিক্কন্ত ৱযো পোসো,

আনেতি তিম্বৰুত্তনিং;

তস্সা ইস্সা অসদ্ধাতি,

তং পৰাভৱতো মুখং.

ইত্থিকণ্ডো নিট্ঠিতো.