৫. তদ্ধিতকপ্প

অট্ঠমকণ্ড

৩৪৪. , ৩৬১. ৱাণ’পচ্চে.

ণপচ্চযো হোতি ৱা ‘‘তস্সাপচ্চ’’ মিচ্চেতস্মিং অত্থে.

ৱসিট্ঠস্স অপচ্চং ৱাসিট্ঠো, ৱসিট্ঠস্স অপচ্চং ৱা, ৱসিট্ঠস্স অপচ্চং ৱাসিট্ঠী, ৱসিট্ঠস্স অপচ্চং ৱাসিট্ঠং. এৱং ভাৰদ্ৱাজো, ভাৰদ্ৱাজী, ভাৰদ্ৱাজং. গোতমো, গোতমী, গোতমং. ৱাসুদেৱো, ৱাসুদেৱী, ৱাসুদেৱং. বালদেৱো, বালদেৱী, বালদেৱং. ৱেসামিত্তো, ৱেসামিত্তী ৱেসামিত্তং.

৩৪৫. , ৩৬৬. ণাযন ণান ৱচ্ছাদিতো.

তস্মা ৱচ্ছাদিতো গোত্তগণতো ণাযনণানপচ্চযা হোন্তি ৱা ‘‘তস্সাপচ্চ’’মিচ্চেতস্মিং অত্থে.

ৱচ্ছস্স অপচ্চংৱচ্ছাযনো, ৱচ্ছানো, ৱচ্ছস্স অপচ্চং ৱা, ৱচ্ছস্স অপচ্চং ৱচ্ছাযনী, ৱচ্ছানী, ৱচ্ছস্স অপচ্চং ৱচ্ছাযনং, ৱচ্ছানং. সকটস্স অপচ্চং সাকটাযনো, সাকটানো, সকটস্স অপচ্চং ৱা, সাকটাযনী, সা কটানী, সাকটাযনং, সাকটানং. এৱং কণ্হাযনো, কণ্হানো, কণ্হস্স অপচ্চং ৱা. কণ্হাযনী, কণ্হানী, কণ্হাযনং, কণ্হানং. অগ্গিৱেস্সাযনো, অগ্গিৱেস্সানো, অগ্গিৱেস্সাযনী, অগ্গিৱেস্সানী, অগ্গিৱেস্সাযনং, অগ্গিৱেস্সানং. গচ্ছাযনো, গচ্ছানো, গচ্ছাযনী, গচ্ছানী, গচ্ছাযনং, গচ্ছানং. কপ্পাযনো, কপ্পানো, কপ্পাযনী, কপ্পানী, কপ্পাযনং, কপ্পানং. মোগ্গল্লাযনো, মোগ্গল্লানো, মোগ্গল্লাযনী, মোগ্গল্লানী, মোগ্গল্লাযনং, মোগ্গল্লানং. মুঞ্চাযনো, মুঞ্চানো, মুঞ্চাযনী, মুঞ্চানী, মুঞ্চাযনং, মুঞ্চানং. সঙ্ঘাযনো, সঙ্ঘানো, সঙ্ঘাযনী, সঙ্ঘানী, সঙ্ঘাযনং, সঙ্ঘানং. লোমাযনো, লোমানো, লোমাযনী, লোমানী, লোমাযনং, লোমানং, সাকমাযনো, সাকমানো, সাকমাযনী, সাকমানী, সাকমাযনং, সাকমানং. নাৰাযনো, নাৰানো, নাৰাযনী, নাৰানী, নাৰাযনং, নাৰানং. চোৰাযনোচোৰানো, চোৰাযনী, চোৰানী, চোৰাযনং, চোৰানং, আৱসালাযনো, আৱসালানো, আৱসালাযনী, আৱসালানী, আৱসালাযনং, আৱসালানং. দ্ৱেপাযনো, দ্ৱেপানো, দ্ৱেপাযনী, দ্ৱেপানী, দ্ৱেপাযনং, দ্ৱেপানং. কুঞ্চাযনো, কুঞ্চানো, কুঞ্চাযনী, কুঞ্চানী, কুঞ্চাযনং, কুঞ্চানং. কচ্চাযনো, কচ্চানো, কচ্চাযনী, কচ্চানী, কচ্চাযনং, কচ্চানং.

৩৪৬. , ৩৬৭. ণেয্যো কত্তিকাদীহি.

তেহি গোত্তগণেহি কত্তিকাদীহি ণেয্যপচ্চযো হোতি ৱা ‘‘তস্সাপচ্চ’’মিচ্চেতস্মিং অত্থে.

কত্তিকায অপচ্চং কত্তিকেয্যো, কত্তিকায অপচ্চং ৱা. এৱং ৱেনতেয্যো, ৰোহিণেয্যো, গঙ্গেয্যো, কদ্দমেয্যো, নাদেয্যো, আলেয্যো, আহেযো, কামেয্যো, সুচিযা অপচ্চং সোচেয্যো, সালেয্যো, বালেয্যো, মালেয্যো, কালেয্যো.

৩৪৭. , ৩৬৮. অতো ণি ৱা.

তস্মা অকাৰতো ণিপচ্চযো হোতি ৱা ‘‘তস্সাপচ্চ’’মিচ্চেতস্মিং অত্থে.

দক্খস্স অপচ্চং দক্খি, দক্খস্স অপচ্চং ৱা. দুণস্স অপচ্চং দোণি, দুণস্স অপচ্চং ৱা, এৱং ৱাসৱি, সক্যপুত্তি, নাটপুত্তি, দাসপুত্তি, দাসৱি, ৱাৰুণি, গণ্ডি, বালদেৱি, পাৱকি, জেনদত্তি, বুদ্ধি, ধম্মি, সঙ্ঘি, কপ্পি, অনুৰুদ্ধি.

ৱাতি ৱিকপ্পনত্থেন ণিকপচ্চযো হোতি ‘‘তস্সাপচ্চ’’মিচ্চেতস্মিং অত্থে. সক্যপুত্তস্স অপচ্চং সক্যপুত্তিকো. এৱং নাটপুত্তিকো, জেনদত্তিকো.

১৪৮. , ৩৭১. ণৱো’ পক্ৱাদীহি.

উপকুইচ্চেৱমাদীহি ণৱপচ্চযো হোতি ৱা ‘‘তস্সাপচ্চ’’মিচ্চেতস্মিং অত্থে.

উপকুস্স অপচ্চং ওপকৱো, উপকুস্স অপচ্চং ৱা. মনুনো অপচ্চং মানৱো, মনুনো অপচ্চং ৱা. ভগ্গুস্স অপচ্চং ভগ্গৱো, ভগ্গুস্স অপচ্চং ৱা, পণ্ডুস্স অপচ্চং পণ্ডৱো, পণ্ডুস্স অপচ্চং ৱা, বহুস্স অপচ্চং বাহৱো, বহুস্স অপচ্চং ৱা.

৩৪৯. , ৩৭২. ণেৰ ৱিধৱাদিতো.

তস্মা ৱিধৱাদিতো ণেৰপচ্চযো হোতি ৱা ‘‘তস্সাপচ্চ’’মিচ্চেতস্মিং অত্থে.

ৱিধৱায অপচ্চং ৱেধৱেৰো, ৱিধৱায অপচ্চং ৱা. বন্ধুকিযা অপচ্চং বন্ধুকেৰো, বন্ধুকিযা অপচ্চং ৱা. সমণস্স অপচ্চং সামণেৰো, সমণস্স অপচ্চং ৱা. এৱং সামণেৰী, সামণেৰং, নাড়িকেৰো, নাড়িকেৰী, নাড়িকেৰং.

৩৫০. , ৩৭৩. যেন ৱা সংসট্ঠং তৰতি চৰতি ৱহতি ণিকো.

যেন ৱা সংসট্ঠং, যেন ৱা তৰতি, যেন ৱা চৰতি, যেন ৱা ৱহতি ইচ্চেতেস্ৱত্থেসু ণিকপচ্চযো হোতি ৱা.

তিলেন সংসট্ঠং ভোজনং তেলিকং, তিলেন সংসট্ঠং ৱা. এৱং গোড়িকং, ঘাতিকং.

নাৱায তৰতীতি নাৱিকো, নাৱায তৰতি ৱা. এৱং ওড়ুম্পিকো.

সকটেন চৰতীতি সাকটিকো, সকটেন চৰতি ৱা. এৱং পত্তিকো, দণ্ডিকো, ধম্মিকো, পাদিকো.

সীসেন ৱহতীতি সীসিকো, সীসেন ৱহতি ৱা. অংসেন ৱহতীতি অংসিকো, অংসেন ৱহতি ৱা. এৱং খন্ধিকো, অঙ্গুলিকো.

ৱাতি ৱিকপ্পনত্থেন অঞ্ঞেসুপি ণিকপচ্চযো হোতি. ৰাজগহে ৱসতীতি ৰাজগহিকো, ৰাজগহে ৱসতি ৱা. ৰাজগহে জাতো ৰাজগহিকো, ৰাজগহে জাতো ৱা. এৱং মাগধিকো, সাৱত্থিকো, কাপিল ৱত্থিকো, পাটলিপুত্তিকো, ৱেসালিকো.

৩৫১. , ৩৭৪. তমধীতে তেনকতাদি সন্নিধান নিযোগ সিপ্প ভণ্ড জীৱিকত্থেসু চ.

তমধীতে, তেনকতাদিঅত্থে, তম্হি সন্নিধানা, তত্থ নিযুত্তো, তমস্স সিপ্পং, তমস্স ভণ্ডং, তমস্স জীৱিকং ইচ্চেতেস্ৱত্থেসু চ ণিকপচ্চযো হোতি ৱা.

ৱিনযমধীতে ৱেনযিকো, ৱিনযমধীতে ৱা. এৱং সুত্তন্তিকো, আভিধম্মিকো, ৱেয্যাকৰণিকো.

কাযেন কতং কম্মং কাযিকং, কাযেন কতং কম্মং ৱা. এৱং ৱাচসিকং, মানসিকং.

সৰীৰে সন্নিধানা ৱেদনা সাৰীৰিকা, সৰীৰে সন্নিধানা ৱা, এৱং মানসিকা.

দ্ৱাৰে নিযুত্তো দোৱাৰিকো, দ্ৱাৰে নিযুত্তো ৱা. এৱং ভণ্ডাগাৰিকো, নাগৰিকো, নাৱকম্মিকো.

ৱীণা অস্স সিপ্পং ৱেণিকো, ৱীণা অস্স সিপ্পং ৱা. এৱং পাণৱিকো, মোদিঙ্গিকো, ৱংসিকো.

গন্ধো অস্স ভণ্ডং গন্ধিকো, গন্ধো অস্স ভণ্ডং ৱা. এৱং তেলিকো, গোড়িকো.

উৰব্ভং হন্ত্ৱা জীৱতীতি ওৰব্ভিকো, উৰব্ভং হন্ত্ৱা জীৱতি ৱা. মগং হন্ত্ৱা জীৱতীতি মাগৱিকো, মগং হন্ত্ৱা জীৱতি ৱা. এৱং সোকৰিকো, সাকুণিকো.

আদিগ্গহণেন অঞ্ঞত্থাপি ণিক পচ্চযো যোজেতব্বো. জালেন হতো জালিকো, জালেন হতো ৱা.

সুত্তেন বন্ধো সুত্তিকো, সুত্তেন বন্ধো ৱা.

চাপো অস্স আৱুধো চাপিকো, চাপো অস্স আৱুধো ৱা. এৱং তোমৰিকো, মুগ্গৰিকো, মোসলিকো.

ৱাতো অস্স আবাধো ৱাতিকো, ৱাতো অস্স আবাধো ৱা. এৱং সেম্হিকো, পিত্তিকো.

বুদ্ধে পসন্নো বুদ্ধিকো, বুদ্ধে পসন্নো ৱা. এৱং ধম্মিকো, সঙ্ঘিকো.

বুদ্ধস্স সন্তকং বুদ্ধিকং, বুদ্ধস্স সন্তকং ৱা. এৱং ধম্মিকং, সঙ্ঘিকং.

ৱত্থেন কীতং ভণ্ডং ৱত্থিকং, ৱত্থেন কীতং ভণ্ডং ৱা. এৱং কুম্ভিকং, ফালিকং, কিং কণিকং, সোৱণ্ণিকং.

কুম্ভো অস্স পৰিমাণং কুম্ভিকং, কুম্ভো অস্স পৰিমাণং ৱা.

কুম্ভস্স ৰাসি কুম্ভিকং, কুম্ভস্স ৰাসি ৱা.

কুম্ভং অৰহতীতি কুম্ভিকো, কুম্ভং অৰহতি ৱা.

অক্খেন দিব্বতীতি অক্খিকো, অক্খেন দিব্বতি ৱা. এৱং সালাকিকো, তিন্দুকিকো, অম্বফলিকো. কপিট্ঠফলিকো, নাড়িকেৰিকো ইচ্চেৱমাদি.

৩৫২. , ৩৭৬. ণ ৰাগা তস্সে দমঞ্ঞত্থেসু চ.

ণপচ্চযো হোতি ৱা ৰাগম্হা ‘‘তেন ৰত্তং’’ ইচ্চেতস্মিং অত্থে, ‘‘তস্সেদং’’ অঞ্ঞত্থেসু চ.

কসাৱেন ৰত্তং ৱত্থং কাসাৱং, কসাৱেন ৰত্তং ৱত্থং ৱা. এৱং কোসুম্ভং, হালিদ্দং, পাটঙ্গং, ৰত্তঙ্গ, মঞ্জিট্ঠং, কুঙ্কুমং.

সূকৰস্স ইদং মংসং সোকৰং, সূকৰস্স ইদং মংসং ৱা. এৱং মাহিসং.

উদুম্বৰস্স অৱিদূৰে পৱত্তং ৱিমানং ওদুম্বৰং, উদুম্বৰস্স অৱিদূৰে পৱত্তং ৱিমানং ৱা.

ৱিদিসায অৱিদূৰে নিৱাসো ৱেদিসো, ৱিদিসায অৱিদূৰে নিৱাসো ৱা.

মথুৰায জাতো মাথুৰো, মথুৰায জাতো ৱা.

মথুৰায আগতো মাথুৰো, মথুৰায আগতো ৱা.

কত্তিকায নিযুত্তো মাসো কত্তিকো, কত্তিকায নিযুত্তো মাসো ৱা. এৱং মাগসিৰো, ফুস্সো, মাঘো, ফগ্গুনো, চিত্তো, ৱেসাখো, জেট্ঠো, আসড়্হো, সাৱণো, ভদ্দো, অস্সযুজো.

ন ৱুদ্ধি নীলপীতাদো, পচ্চযে সণকাৰকে.

ফকাৰো ফুস্সসদ্দস্স, ‘‘সিৰো’’তি সিৰসং ৱদে.

সিক্খানং সমূহো সিক্খো, ভিক্খানং সমূহো ভিক্খো. এৱং কাপোতো, মাযূৰো, কোকিলো.

বুদ্ধে, অস্স দেৱতা বুদ্ধো. এৱং ভদ্দো, মাৰো, মাহিন্দো, ৱেস্সৱণো, যামো, সোমো, নাৰাযণো.

সংৱচ্ছৰমধীতে সংৱচ্ছৰো. এৱং মোহুত্তো, নেমিত্তো, অঙ্গৱিজ্জো, ৱেয্যাকৰণো, ছন্দো, ভাস্সো, চন্দো.

ৱসাদানং ৱিসযো দেসো ৱাসাদো. এৱং কুম্ভো, সাকুন্তো, আতিসাৰো.

উদুম্বৰা অস্মিং পদেসে সন্তীতি ওদুম্বৰো. সাগৰেহি নিব্বত্তো সাগৰো. সাগলমস্স নিৱাসো সাগলো. মথুৰা অস্স নিৱাসো মাথুৰো. মথুৰায ইস্সৰো মাথুৰো. ইচ্চেৱমাদযো যোজেতব্বা.

৩৫৩. , ৩৭৮. জাতাদীনমিমিযা চ.

জাতইচ্চেৱমাদীনমত্থে ইমইযপচ্চযা হোন্তি.

পচ্ছা জাতো পচ্ছিমো. এৱং অন্তিমো, মজ্ঝিমো, পুৰিমো, উপৰিমো, হেট্ঠিমো, গোপ্ফিমো. বোধিসত্তজাতিযা জাতো বোধিসত্তজাতিযো, এৱং অস্সজাতিযো, হত্থিজাতিযো, মনুস্সজাতিযো.

আদিগ্গহণেন নিযুত্তত্থাদিতোপি তদস্সত্থাদিতোপি ইম ইয ইক ইচ্চেতে পচ্চযা হোন্তি. অন্তো নিযুত্তো অন্তিমো. এৱং অন্তিযো, অন্তিকো.

পুত্তো অস্স অত্থি, তস্মিং ৱা ৱিজ্জতীতি পুত্তিমো. এৱং পুত্তিযেৱ, পুত্তিকো, কপ্পিমো, কপ্পিযো, কপ্পিকো.

চগ্গহণেন কিযপচ্চযো হোতি নিযুত্তত্থে. জাতিযং নিযুত্তো জাতিকিযো, অন্ধে নিযুত্তো অন্ধকিযো, জাতিযা অন্ধো জচ্চন্ধো, জচ্চন্ধে নিযুত্তো জচ্চন্ধকিযো.

৩৫৪. , ৩৭৯. সমূহত্থে কণ ণা.

সমূহত্থে কণ ণইচ্চেতে পচ্চযা হোন্তি.

ৰাজপুত্তানং সমূহো ৰাজপুত্তকো. এৱং ৰাজপুত্তো, মানুস্সকো, মানুস্সো, মাযূৰকো, মাযূৰো, মাহিংসকো, মাহিংসো.

৩৫৫. , ৩৮০. গাম জন বন্ধু সহাযাদীহিতা.

গাম জন বন্ধু সহাযইচ্চেৱমাদীহি তাপচ্চযো হোতি সমূহত্থে.

গামানং সমূহো গামতা. এৱং জনতা, বন্ধুতা, সহাযতা, নগৰতা.

৩৫৬. , ৩৮১. তদস্স ঠানমিযো চ.

‘‘তদস্স ঠান’’ মিচ্চেতস্মিং অত্থে ইযপচ্চযো হোতি.

মদনস্স ঠানং মদনিযং, বন্ধনস্স ঠানং বন্ধনিযং, মুচ্ছনস্স ঠানং মুচ্ছনিযং, এৱং ৰজনিযং, কমনিযং, গমনিযং, দুস্সনিযং, দস্সনিযং.

৩৫৭. , ৩৮২. উপমত্থাযিতত্তং.

উপমত্থে আযিতত্তপচ্চযো হোতি.

ধূমো ৱিয দিস্সতি অদুং ৱনং তদিদং ধূমাযিতত্তং, তিমিৰং ৱিয দিস্সতি অদুং ৱনং তদিদং তিমিৰাযিতত্তং.

৩৫৮. , ৩৮৩. তন্নিস্সিতত্থে লো.

‘‘তন্নিস্সিতত্থে, তদস্স ঠান’’মিচ্চেতস্মিং অত্থে চ লপচ্চযো হোতি.

দুট্ঠু নিস্সিতং দুট্ঠুল্লং, ৱেদং নিস্সিতং ৱেদল্লং, দুট্ঠু ঠানং দুট্ঠুল্লং, ৱেদস্স ঠানং ৱেদল্লং.

৩৫৯. , ৩৮৪. আলু তব্বহুলে.

আলুপচ্চযো হোতি তব্বহুলত্থে.

অভিজ্ঝা অস্স পকতি অভিজ্ঝালু, অভিজ্ঝা অস্স বহুলা ৱা অভিজ্ঝালু. এৱং সীতালু, ধজালু, দযালু.

৩৬০. , ৩৮৭. ণ্য ত্ত তা ভাৱে তু.

ণ্যত্ততাইচ্চেতে পচ্চযা হোন্তি ভাৱত্থে.

অলসস্স ভাৱো আলস্যং, অৰোগস্স ভাৱো আৰোগ্যং. পংসুকূলিকস্স ভাৱো পংসুকূলিকত্তং, অনোদৰিকস্স ভাৱো অনোদৰিকত্তং. সঙ্গণিকাৰামস্স ভাৱো সঙ্গণিকাৰামতা, নিদ্দাৰামস্স ভাৱো নিদ্দাৰামতা.

তুগ্গহণেন ত্তনপচ্চযো হোতি. পুথুজ্জনত্তনং, ৱেদনত্তনং.

৩৬১. , ৩৮৮. ণ ৱিসমাদীহি.

ণপচ্চযো হোতি ৱিসমাদীহি ‘‘তস্স ভাৱো’’ইচ্চেতস্মিং অত্থে.

ৱিসমস্স ভাৱো ৱেসমং, সুচিস্স ভাৱো সোচং.

৩৬২. , ৩৮৯. ৰমণীযাদিতো কণ.

ৰমণীযইচ্চেৱমাদিতো কণ পচ্চযো হোতি ‘‘তস্স ভাৱো’’ইচ্চেতস্মিং অত্থে.

ৰমণীযস্স ভাৱো ৰামণীযকং, মনুঞ্ঞস্স ভাৱো মানুঞ্ঞকং.

৩৬৩. , ৩৯০. ৱিসেসে তৰতমিসিকিযিট্ঠা.

ৱিসেসত্থে তৰ তম ইসিক ইয ইট্ঠইচ্চেতে পচ্চযা হোন্তি.

সব্বে ইমে পাপা, অযমিমেসং ৱিসেসেন পাপোতি পাপতৰো. এৱং পাপতমো, পাপিসিকো, পাপিযো, পাপিট্ঠো.

৩৬৪. , ৩৯৮. তদস্সত্থীতি ৱী চ.

‘‘তদস্সত্থি’’ইচ্চেতস্মিং অত্থে ৱীপচ্চযো হোতি.

মেধা যস্স অত্থি, তস্মিং ৱা ৱিজ্জতীতিমেধাৱী. এৱং মাযাৱী.

চগ্গহণেন সোপচ্চযো হোতি. সুমেধা যস্স অত্থি, তস্মিং ৱা ৱিজ্জতীতি সুমেধসো.

৩৬৫. , ৩৯৯. তপাদিতো সী.

তপাদিতো সীপচ্চযো হোতি ‘‘তদস্সত্থি’’ইচ্চেতস্মিং অত্থে.

তপো যস্স অত্থি তস্মিং ৱা ৱিজ্জতীতি তপস্সী. এৱং যসস্সী, তেজস্সী.

২৬৬. , ৪০০. দণ্ডাদিতো ইকঈ.

দণ্ডাদিতো ইক ঈইচ্চেতে পচ্চযা হোন্তি ‘‘তদস্সত্থি’’ইচ্চেতস্মিং অত্থে.

দণ্ডো যস্স অত্থি, তস্মিং ৱা ৱিজ্জতীতি দণ্ডিকো, দণ্ডী. এৱং মালিকো, মালী.

৩৬৭. , ৪০১. মধ্ৱাদিতো ৰো.

মধুইচ্চেৱমাদিতো ৰপচ্চযো হোতি ‘‘তদস্সত্থি’’ইচ্চেতস্মিং অত্থে.

মধু যস্স অত্থি, তস্মিং ৱা ৱিজ্জতীতি মধুৰো. এৱং কুঞ্জৰো, মুগ্গৰো, মুখৰো, সুসিৰো, (সীসৰো, সুকৰো, সুঙ্কৰো), সুভৰো, সুচিৰো, ৰুচিৰো.

৩৬৮. , ৪০২. গুণাদিতো ৱন্তু.

গুণইচ্চেৱমাদিতো ৱন্তুপচ্চযো হোতি ‘‘তদস্সত্থি’’ইচ্চেতস্মিং অত্থে.

গুণো যস্স অত্থি, তস্মিং ৱা ৱিজ্জতীতি গুণৱা. এৱং যসৱা, ধনৱা, পঞ্ঞৱা, বলৱা, ভগৱা.

৩৬৯. , ৪০৩. সত্যাদীহি মন্তু.

সতিইচ্চেৱমাদীহি মন্তুপচ্চযোহোতি ‘‘তদস্সত্থি’’ ইচ্চেতস্মিং অত্থে.

সতি যস্স অত্থি, তস্মিং ৱা ৱিজ্জতীতি সতিমা, এৱং জুতিমা, ৰুচিমা, থুতিমা, ধিতিমা, মতিমা, ভাণুমা.

৩৭০. , ৪০৫. সদ্ধাদিতোণ.

সদ্ধাইচ্চেৱমাদিতো ণ পচ্চযো হোতি ‘‘তদস্সত্থি’’ইচ্চেতস্মিং অত্থে.

সদ্ধা যস্স অত্থি, তস্মিং ৱা ৱিজ্জতীভি সদ্ধো, এৱং পঞ্ঞো, অমচ্ছৰো.

৩৭১. , ৪০৪. আযুস্সুকাৰাস মন্তুম্হি.

আযুস্স অন্তো উকাৰো অসাদেসো হোতিমন্তুম্হি পচ্চযে পৰে.

আযু অস্স অত্থি, তস্মিং ৱা ৱিজ্জতীতি আযস্মা.

৩৭২. , ৩৮৫. তপ্পকতিৱচনে মযো.

তপ্পকতিৱচনত্থে মযপচ্চযো হোতি.

সুৱণ্ণেন পকতং কম্মং সোৱণ্ণমযং. এৱং ৰূপিযমযং জতুমযং, ৰজতমযং, ইট্ঠকমযং, অযোমযং, মত্তিকা মযং, দাৰুমযং, গোমযং.

৩৭৩. , ৪০৬. সঙ্খ্যাপূৰণে মো.

সঙ্খ্যাপূৰণত্থে মপচ্চযো হোতি.

পঞ্চন্নং পূৰণো পঞ্চমো, এৱং সত্তমো, অট্ঠমো, নৱমো, দসমো.

৩৭৪. , ৪০৮. স ছস্সৱা.

ছস্স সকাৰাদেসো হোতি ৱা সঙ্খ্যাপূৰণত্থে.

ছন্নং পূৰণো সট্ঠো, ছট্ঠো ৱা.

৩৭৫. , ৪১২. একাদিতো দসস্সী.

একাদিতো দসস্স অন্তে ঈপচ্চযো হোতি ৱা সঙ্খ্যাপূৰণত্থে.

একো চ দস চ একাদস, একাদসন্নং পূৰণী একাদসী. পঞ্চচ দস চ পঞ্চদস, পঞ্চদসন্নং পূৰণী পঞ্চদসী. চত্তাৰো চ দস চ চতুদ্দস, চতুদ্দসন্নং পূৰণী চাতুদ্দসী.

পূৰণেতি কিমত্থং? একাদস, পঞ্চদস.

৩৭৬. , ২৫৭. দসে সো নিচ্চঞ্চ.

দসসদ্দে পৰে নিচ্চং ছস্স সো হোতি.

সোড়স.

৩৭৭. , ০. অন্তে নিগ্গহিতঞ্চ.

তাসং সঙ্খ্যানং অন্তে নিগ্গহিতাগমো হোতি.

পঞ্চদসি, চাতুদ্দসি.

৩৭৮. , ৪১৪. তি চ.

তাসং সঙ্খ্যানং অন্তে তিকাৰাগমো হোতি. ৱীসতি, তিংসতি.

৩৭৯. , ২৫৮. ল দৰানং.

দকাৰ ৰকাৰানং সঙ্খ্যানং লকাৰাদেসো হোতি. সোড়স, চত্তালীসং.

৩৮০. , ২৫৫. ৱীসতি দসেসু বা দ্ৱিস্স তু.