২. নামকপ্প

পঠমকণ্ড

৫২. , ৬০. জিনৱচনযুত্তং হি.

‘‘জিনৱচনযুত্তং হি’’ ইচ্চেতং অধিকাৰত্থং ৱেদিতব্বং.

৫৩. , ৬১. লিঙ্গঞ্চ নিপ্পজ্জতে.

যথা যথা জিনৱচনযুত্তং হি লিঙ্গং, তথা তথা ইধ লিঙ্গঞ্চ নিপ্পজ্জতে.

তং যথা? এসো নো সত্থা, ব্ৰহ্মা অত্তা, সখা, ৰাজা.

৫৪. , ৬২. ততো চ ৱিভত্তিযো.

ততো জিনৱচনযুত্তেহি লিঙ্গেহি ৱিভত্তিযো পৰা হোন্তি.

৫৫. , ৬৩. সি যো, অং যো, না হি, স নং, স্মা হি, স নং, স্মিং সু.

কা চ পন তাযো ৱিভত্তিযো? সি, যো ইতি পঠমা, অং, যোইতি দুতিযা, না হি ইতি ততিযা, স, নংইতি চতুত্থী, স্মা, হি ইতি পঞ্চমী, স, নং ইতি ছট্ঠী, স্মিং, সু ইতি সত্তমী.

ৱিভত্তিইচ্চনেন ক্ৱত্থো? অম্হস্স মমং সৱিভত্তিস্স সে.

৫৬. , ৬৪. তদনুপৰোধেন.

যথা যথা তেসং জিনৱচনানং অনুপৰোধো. তথা তথা ইধ লিঙ্গঞ্চ নিপ্পজ্জতে.

৫৭. , ৭১. আলপনে সি গ সঞ্ঞো.

আলপনত্থে সি গসঞ্ঞো হোতি.

ভোতি অয্যে, ভোতি কঞ্ঞে, ভোতি খৰাদিযে.

আলপনেতি কিমত্থং? সা অয্যা.

সীতি কিমত্থং? ভোতিযো অয্যাযো.

গইচ্চনেন ক্ৱত্থো? ঘতে চ.

৫৮. , ২৯. ইৱণ্ণুৱণ্ণা ঝলা.

ইৱণ্ণুৱণ্ণাইচ্চেতে ঝলসঞ্ঞা হোন্তি যথাসঙ্খ্যং.

ইসিনো, অগ্গিনো, গহপতিনো, দণ্ডিনো. সেতুনো, কেতুনো, ভিক্খুনো. সযম্ভুনো, অভিভুনো.

ঝলইচ্চনেন ক্ৱত্থো? ঝলতো সস্স নো ৱা.

৫৯. , ১৮২. তে ইত্থিখ্যা পো.

তে ইৱণ্ণুৱণ্ণা যদা ইত্থিখ্যা, তদা পসঞ্ঞা হোন্তি.

ৰত্তিযা, ইত্থিযা, ধেনুযা, ৱধুযা.

ইত্থিখ্যাতি কিমত্থং? ইসিনা, ভিক্খুনা.

সইচ্চনেন ক্ৱত্থো? পতো যা.

৬০. , ১৭৭. আ ঘো.

আকাৰো যদা ইত্থিখ্যো, তদা ঘসঞ্ঞো হোতি.

সদ্ধায, কঞ্ঞায, ৱীণায, গঙ্গায, দিসায সালায, মালায, তুলায, দোলায, পভায, সোভায, পঞ্ঞায, কৰুণায নাৱায, কপালিকায.

আতি কিমত্থং? ৰত্তিযা, ইত্থিযা.

ইত্থিখ্যোতি কিমত্থং? সত্থাৰা দেসিতো অযং ধম্মো.

ঘইচ্চনেন ক্ৱত্থো? ঘতো নাদীনং.

৬১. , ৮৬. সাগমো সে.

সকাৰাগমো হোতি সে ৱিভত্তিম্হি.

পুৰিসস্স, অগ্গিস্স, ইসিস্স, দণ্ডিস্স, ভিক্খুস্স, সযম্ভুস্স, অভিভুস্স.

সেতি কিমত্তং? পুৰিসস্মিং.

৬২. , ২০৬. সংসাস্ৱেকৱচনেসু চ.

সংসাসু একৱচনেসু ৱিভত্তাদেসেসু সকাৰাগমো হোতি.

এতিস্সং, এতিস্সা ইমিস্সং, ইমিস্সা, তিস্সং, তিস্সা,

তস্সং তস্সা, যস্সং, যস্সা, অমুস্সং, অমুস্সা.

সংসাস্ৱীতি কিমত্থং? অগ্গিনা, পাণিনা.

একৱচনেস্ৱীতি কিমত্থং? তাসং, সব্বাসং.

ৱিভত্তাদেসেস্ৱীতি কিমত্থং? মনসা, ৱচসা, থামসা.

৬৩. , ২১৭. এতিমাসমি.

এতাইমাইচ্চেতেসমন্তো সৰো ইকাৰো হোতি সংসাসু একৱচনেসু ৱিভত্তাদেসেসু.

এতিস্সং, এতিস্সা, ইমিস্সং, ইমিস্সা.

সংসাস্ৱীতি কিমত্থং? এতায, ইমায.

একৱচনেস্ৱীতি কিমত্থং? এতাসং, ইমাসং.

৬৪. , ২১৬. তস্সা ৱা.

তস্সা ইত্থিযং ৱত্তমানস্স অন্তস্স আকাৰস্স ইকাৰো হোতি ৱা সংসাসু একৱচনেসু ৱিভত্তাদেসেসু.

তিস্সং, তিস্সা, তস্সং, তস্সা.

৬৫. , ২১৫. ততো সস্স স্সায.

ততো তা এতা ইমাতো সস্স ৱিভত্তিস্স স্সাযাদেসো হোতি ৱা.

তিস্সায, এতিস্সায, ইমিস্সায.

ৱাতি কিমত্থং? তিস্সা, এতিস্সা, ইমিস্সা.

৬৬. , ২০৫. ঘো ৰস্সং.

ঘো ৰস্সমাপজ্জতে সংসাসু একৱচনেসু ৱিভত্তাদেসেসু.

তস্সং, তস্সা, যস্সং, যস্সা, সব্বস্সং, সব্বস্সা.

সংসাস্ৱীতি কিমত্থং? তায, সব্বায.

একৱচনেস্ৱীতি কিমত্থং? তাসং, সব্বাসং.

৬৭. , ২২৯. নো চ দ্ৱাদিতো নংম্হি.

দ্ৱিইচ্চেৱমাদিতো সঙ্খ্যাতো নকাৰাগমো হোতি নংম্হি ৱিভত্তিম্হি.

দ্ৱিন্নং, তিন্নং, চতুন্নং, পঞ্চন্নং, ছন্নং, সত্তন্নং, অট্ঠন্নং, নৱন্নং, দসন্নং.

দ্ৱাদিতোতি কিমত্থং? সহস্সানং.

নংম্হীতি কিমত্থং? দ্ৱীসু, তীসু.

চগ্গহণেনস্সঞ্চাগমো হোতি. চতস্সন্নং ইত্থীনং তিস্সন্নং ৱেদনানং.

৬৮. , ১৮৪. অমা পতো স্মিংস্মানং ৱা.

পইচ্চেতস্মা স্মিংস্মাইচ্চেতেসং অংআআদেসা হোন্তি ৱা যথাসঙ্খ্যং.

মত্যং, মতিযং, মত্যা, মতিযা, নিকত্যং. নিকতিযং, নিকত্যা, নিকতিযা, ৱিকত্যং, ৱিকতিযং, ৱিকত্যা, ৱিকতিযা, ৱিৰত্যং, ৱিৰতিযং, ৱিৰত্যা, ৱিৰতিযা, ৰত্যং, ৰতিযং, ৰত্যা, ৰতিযা, পুথব্যং, পুথৱিযং, পুথব্যা, পুথৱিযা, পৱত্যং, পৱত্যা, পৱত্তিযং, পৱত্তিযা.

৬৯. , ১৮৬. আদিতো ও চ.

আদিইচ্চেতস্মা স্মিংৱচনস্স অংওআদেসা হোন্তি ৱা.

আদীং, আদো.

ৱাতি কিমত্থং? আদিস্মিং, আদিম্হি নাথং নমস্সিত্ৱান,

চগ্গহণেন অঞ্ঞস্মাপি স্মিং ৱচনস্স আ ও অংআদেসা হোন্তি. দিৱা চ ৰত্তো চ হৰন্তি যে বলি. বাৰাণসিং অহু ৰাজা.

৭০. , ৩০. ঝলানমিযুৱা সৰে ৱা.

ঝলইচ্চেতেসং ইয উৱইচ্চেতে আদেসা হোন্তি ৱা সৰে পৰে যথাসঙ্খ্যং.

তিযন্তং পচ্ছিযাগাৰে, অগ্গিযাগাৰে, ভিক্খুৱাসনে নিসীদতি, ৱুথুৱাসনে নিসীদতি.

সৰেতি কিমত্থং? তিমলং, তিফলং, তিচতুক্কং, তিদণ্ডং, তিলোকং, তিনযনং, তিপাসং, তিহংসং, তিভৱং, তিখন্ধং, তিপিটকং, তিৱেদনং, চতুদ্দিসং, পুথুভূতং.

ৱাতি কিমত্থং? পঞ্চহঙ্গেহি তীহাকাৰেহি. চক্খাযতনং.

ৱাতি ৱিকপ্পনত্থং, ইকাৰস্স অযাদেসো হোতি, ৱত্থুত্তযং.

৭১. , ৫০৫. যৱকাৰা চ.

ঝলানং যকাৰ ৱকাৰাদেসা হোন্তি সৰে পৰে যথাসঙ্খ্যং.

অগ্যাগাৰং, পক্খাযতনং, স্ৱাগতং, তে মহাৱীৰ.

চগ্গহণং সম্পিণ্ডনত্থং.

৭২. , ১৮৫. পসঞ্ঞস্স চ.

পসঞ্ঞস্স চ ইৱণ্ণস্স ৱিভত্তাদেসে সৰে পৰে যকাৰাদেসো হোতি.

পুথব্যা, ৰত্যা, মত্যা.

সৰেতি কিমত্থং? পুথৱিযং.

৭৩. , ১৭৪. গাৱ সে.

গোইচ্চেতস্স ওকাৰস্স আৱাদেসো হোতি সে ৱিভত্তিম্হি.

গাৱস্স.

৭৪. , ১৬৯. যোসু চ.

গোইচ্চেতস্স ওকাৰস্স আৱাদেসো হোতি যোইচ্চেতেসু পৰেসু.

গাৱো গচ্ছন্তি, গাৱো পস্সন্তি, গাৱী গচ্ছন্তি, গাৱী পস্সন্তি.

চগ্গহণং কিমত্থং? নাস্মাস্মিংসু ৱচনেসু আৱা দেসো হোতি.

গাৱেন, গাৱা, গাৱে, গাৱেসু.

৭৫. , ১৭০. অৱম্হি চ.

গোইচ্চেতস্স ওকাৰস্স আৱঅৱইচ্চেতে আদেসা হোন্তি অংম্হি ৱিভত্তিম্হি.

গাৱং, গৱং.

চগ্গহণেন সাদিসেসেসু পুব্বুত্তৱচনেসু গোইচ্চেতস্স ওকাৰস্স অৱাদেসো হোতি.

গৱস্স, গৱো, গৱেন, গৱা, গৱে, গৱেসু.

৭৬. , ১৭১. আৱস্সু ৱা.

আৱইচ্চেতস্স গাৱাদেসস্স অন্ত সৰস্স উকাৰাদেসো হোতি ৱা অংম্হি ৱিভত্তিম্হি.

গাৱুং, গাৱং.

আৱস্সেতি কিমত্থং? গাৱো তিট্ঠন্তি.

৭৭. , ১৭৫. ততো নমং পতিম্হা লুত্তে চ সমাসে.

ততো গোসদ্দতো নংৱচনস্স অংআদেসো হোতি, গোইচ্চেতস্স ওকাৰস্স অৱাদেসো হোতি পতিম্হি পৰে অলুত্তে চ সমাসে.

গৱপতি.

অলুত্তেতি কিমত্থং? গোপতি.

চগ্গহণেন অসমাসেপি নংৱচনস্স অংআদেসো হোতি, গোইচ্চেতস্স ওকাৰস্স অৱাদেসো হোতি.

গৱং.

৭৮. , ৩. ওসৰে চ.

গোইচ্চেতস্স ওকাৰস্স অৱাদেসো হোতি সমাসে চ সৰে পৰে.

গৱস্সকং, গৱেড়কং, গৱাজিনং.

চগ্গহণেন উৱণ্ণইচ্চেৱমন্তানং লিঙ্গানং উৱঅৱউৰাদেসা হোন্তি স্মিংযোইচ্চেতেসু ক্ৱচি.

ভুৱি, পসৱো, গুৰৱো, চতুৰো.

সৰেতি কিমত্থং? গোধনো, গোৱিন্দো.

৭৯. , ৪৬. তব্বিপৰীতূপপদে ব্যঞ্জনে চ.

তস্স অৱসদ্দস্স যদা উপপদে তিট্ঠমানস্স তস্স ওকাৰস্স ৱিপৰীতো হোতি ব্যঞ্জনে পৰে.

উগ্গতে সূৰিযে, উগ্গচ্ছতি, উগ্গহেত্ৱা.

চগ্গহণমৱধাৰণত্থং. অৱসানে, অৱকিৰণে, অৱকিৰতি.

৮০. , ১৭৩. গোণ নংম্হি ৱা.

সব্বস্সেৱ গোসদ্দস্স গোণাদেসো হোতি ৱা নংম্হি ৱিভত্তিম্হি.

গোণানং সত্তন্নং.

ৱাতি কিমত্থং?

গোনঞ্চে তৰমানানং, উজুং গচ্ছতি পুঙ্গৱো.

সব্বা গাৱী উজুং যন্তি, নেত্তে উজুং গতে সতি.

যোগৱিভাগেন অঞ্ঞত্ৰাপি গোণাদেসো হোতি. গোণভূতানং.

৮১. , ১৭২. সুহিনাসু চ.

সুহিনাইচ্চেতেসু সব্বস্স গোসদ্দস্স গোণাদেসো হোতি ৱা.

গোণেসু, গোণেহি, গোণেভি, গোণেন.

ৱাতি কিমত্থং? গোসু, গোহি, গোভি, গৱেন.

চগ্গহণেন স্যাদিসেসেসু পুব্বুত্তৰৱচনেসুপি গোণ গু গৱযাদেসা হোন্তি. গোণো, গোণা, গোণং, গোণে, গোণস্স, গোণম্হা. গোণম্হি, গুন্নং, গৱযেহি, গৱযেভি.

৮২. , ১৪৯. অংমো নিগ্গহিতং ঝলপেহি.

অংৱচনস্স মকাৰস্স চ ঝলপইচ্চেতেহি নিগ্গহিতং হোতি

অগ্গিং, ইসিং, গহপতিং, দণ্ডিং, মহেসিং, ভিক্খুং, পটুং, সযম্ভুং, অভিভুং, ৰত্তিং, ইত্থিং, ৱধুং, পুল্লিঙ্গং, পুম্ভাৱো, পুঙ্কোকিলো.

অংমোতি কিমত্থং? অগ্গিনা, পাণিনা, ভিক্খুনা, ৰত্তিযা, ইত্থিযা, ৱধুযা.

ঝলপেহীতি কিমত্থং? সুখং, দুক্খং.

পুনাৰম্ভ হণং ৱিভাসানিৱত্তনত্থং. অগ্গিং, পটুং, বুদ্ধিং, ৱধুং.

৮৩. , ৬৭. সৰলোপো’ মাদেস পচ্চযাদিম্হি সৰলোপে তু পকতি.

সৰলোপো হোতি অমাদেসপচ্চযাদিম্হি সৰ লোপে তু পকতি হোতি.

পুৰিসং, পুৰিসে, পাপং, পাপে, পাপিযো, পাপিট্ঠো.

অমাদেসপচ্চযাদিম্হীতি কি ত্থং? অপ্পমাদো অমতং পদং.

সৰলোপেতি কিমত্থং? পুৰিসস্স, দণ্ডিনং.

তুগ্গহণমৱধাৰণত্থং. ভিক্খুনী, গহপতানী.

পকতিগ্গহণসামত্থেন পুন সন্ধিভাৱো চ হোতি. সেয্যো, সেট্ঠো, জেয্যো, জেট্ঠো.

৮৪. , ১৪৪. অঘোৰস্সমেকৱচনযোস্ৱপি চ.