জিনৱংসদীপং |ও০.০০০১|

নমো তস্স ভগৱতো অৰহতো সম্মাসম্বুদ্ধস্স

১. মহাদযো যো হদযো’দযো’দযো

হিতায দুক্খানুভৱে ভৱে ভৱে,

অকাসি সম্বোধিপদং পদং পদং

তমাভিৱন্দামি জিনং জিনং জিনং; (যমকবন্ধনং)

২. |ও০.০০০২|

পহায যত্থা’ভিৰতিং ৰতিং ৰতিং

ৰমন্তি ধম্মেৱ মুনী মুনী মুনী,

ৱিমুত্তিদং সব্বভৱা ভৱা’ভৱা

তমাভিৱন্দে মহিতং হিতং হিতং; (যমকবন্ধনং)

৩. |ও০.০০০৪|

নিপীতসদ্ধম্মৰসা ৰসা’ৰসা

সুপুঞ্ঞখেত্তো’ৰসতং সতং সতং,

গতা ৱিধূতা ৱিনযেন যেন যে

তমাভিৱন্দে’সিগণঙ্গণ’ঙ্গণং; (যমকবন্ধনং)

৪. |ও০.০০০৫|

জিনা’নতম্ভোৰুহ হংসৰাজিনী

জিনোৰসানং মুখপঞ্জৰা’লি নী,

সদত্থসাৰং সৰসং ৱিসূদ নী

উপেতু মে মানসমেৱ ৱাণি নী;

৫. কম্মাৱসেসা ৱিচিতো’পজাত্যা

গন্থা’হিসঙ্খাৰৱিবন্ধকা মে,

পণাম পুঞ্ঞাতিসযেন’নেন

মা পাকদানা’ৱসৰা ভৱন্তু;

৬. সুৱণ্ণৱণ্ণস্স জিনস্স ৱণ্ণং

ৱণ্ণেয্য কপ্পম্পি কজিতো সুৱণ্ণো,

কপ্পস্সি’ৱোসান মনত্ততায

ন পাপুণে বুদ্ধগুণান মন্তং;

৭. |ও০.০০০৬|

নিদ্ধন্ত চামীকৰ চাৰু ৰূপং

সৰস্সতী ভূসণ ভাসনংচ,

অনঞ্ঞ সাধাৰণ ঞাণমস্স

অৱাৱিযা’চিন্তিয মপক্পমেয্যং;

৮. কুহিং অসাধাৰণ ৰূপ লীলা

কুহিং অসাধাৰণ ৱাণি লীলা,

কুহিং অসাধাৰণঞাণ লীলা

কুহিং নু মে মন্দমতিস্স লীলা;

৯. |ও০.০০০৭|

ৱিভাৱিমানী পৰৱম্হিনো যে

ইস্সা’ভিমানেন ৱিভঞ্ঞমানা,

গৱেসযন্তী’ধ পৰস্স ৰন্ধং

তেসং পসংসাগৰহাহি কিম্মে;

১০. পসত্থ সত্থাগম পাৰদস্সী

যে সাধৱো সাধু গুণপ্পসন্তা,

গন্থস্স নিম্মাণপৰিস্সমং নো

জানন্তি তেযেৱ ইধপ্পমাণা;

১১. আদিচ্চৱংসপ্পভৱস্স তস্স

জিনস্স সত্থাগমকোৱিদেহি,

ৱুত্তোপি পুব্বাচৰিযেহি যেসু

গন্থেসু সঙ্খেপৱসেন ৱংসো;

১২. ন তেহি সক্কা সুগতস্স ৱংসং

কিঞ্চাপি ৱিঞ্ঞাতু মসেসযিত্ৱা,

সম্পুণ্ণৱংসস্স ৱিভাৱনায

তস্মা সমুস্সাহিত মানসেন;

১৩. |ও০.০০০৮|

অভিপ্পসন্নো ৰতনত্তযম্হি

পসত্থৱংসপ্পভৱো পভুনং,

ৱিভুসণো ৱিস্সুতকিত্তিঘোসো

যো ভাতি লঙ্কায মুড়াৰভাগ্যো;

১৪. অমন্দচাগা’ভিৰতস্স

পুনন্দু নামস্স দযাধনস্স,

বুদ্ধে পসাদাতিসযস্স তস্স

অজ্ঝেসনঞ্চাপি পটিগ্গহেত্ৱা;

১৫. নস্সায পুব্বাচৰিযো’পদেসং

সোতূন মত্থায মযা হিতায,

নিৰুত্তিযা মাগধিকায সম্মা

ৱিধীযতে’দং জিনৱংসদীপং;

১৬. |ও০.০০০৯|

সদ্ধাসিনেহানুগতায পঞ্ঞা-

দসায সোতূহি মনোৱিমানে,

পদীপিতো’যং জিনৱংসদীপ-

দীপোহৰেপাপতমপ্পবন্ধং;

১৭. পুৰঙ্গপুণ্ণা সিৰিজম্বুদীপে

সম্পত্তিভাৰেন দিৱা’ৱতিণ্ণা,

যা দেৱৰাজস্স’মৰাৱতী’ৱা-

মৰাৱতীনাম পুৰী পুৰে’সী;

১৮. ৱিজ্জাধৰানঞ্চ ৱিহঙ্গমানং

ৱিবন্ধ ৱেহাসগতিং বহাস,

যস্মিং পুৰস্মিং জিতৱেৰি চক্কং

পাকাৰচক্কং ৱিয চক্কৱাড়ং;

১৯. |ও০.০০১০|

সঞ্চুম্বিতম্হোজ ৰজো পবন্ধ-

সুপিঞ্জৰাপা পৰিখাহিৰামা,

পুৰিত্থি পাকাৰ নিতম্বভাগে

সমুব্বহী কঞ্চন মেখলা’ভং;

২০. ৰত্তিন্দিৱা ৰত্তমণি’ন্দনীল-

মণিপ্পভাৰঞ্জিত ৰাজধানি,

ববন্ধ যা’মন্দসুৰিন্দচাপ-

সমুজ্জলাকাসতলব্বিলাসং;

২১. যহিংৱধূনং ৱদনম্বুজেহি

কতাৱমানং হৰিণঙ্কবিম্বং,

পভাহি নীলোপলতোৰণাতং

সোকাভীভূতংচ ৱিৱণ্ণমাপ;

২২. |ও০.০০১১|

সৰোৰুহ’ন্তী মণিমন্দিৰাভা-

সঞ্চুম্বিতং পুণ্ণসসঙ্কবিম্বং;

সঙ্কায ৰামাজনতা’ভিৰামা

কৰে পসাৰেসি পুৰম্হি যস্মিং;

২৩. যত্থ’ঙ্গনানং পটিবিম্বিতানি

আদাসভিত্তীসু মুখম্বুজানি,

আসুং ৱিঘাতায মধুব্বতানং

ৱিলোচনালীন মনুগ্গহায;

২৪. সম্মত্ত মাতঙ্গ ধৰাধৰেহি

যস্মিং অভিস্সন্দ মদস্সৱন্তি,

তুৰঙ্গ ৰঙ্গেহী তৰঙ্গ মালা

সমাকুলেৱা’সি ৱিধূত ধূলী;

২৫. |ও০.০০১২|

নিক্খিত্তৱীণা মণিনুপুৰানং

ৱিলাসিনীনং মুদুপাণি পাদে,

মত্তালিমালা কলনাদিনী কিং

নালঙ্কৰুং যত্থ কতাৱকাসা;

২৬. ধৱত্থিনীনং কুচসাৰসেহি

নেত্তালিভাৰা’নননীৰজেহি,

যা হাসৱীচীহি পুৰী ৰজন্যা

ৰৰাজ সমফুল্লসৰোজিনী’ৱ;

২৭. চন্দপ্পভা চুম্বিত চন্দকন্ত

পাসাণধাৰা মণিচন্দিকাসূ,

চন্দাননানং যহি মঙ্গনাহং

পৰিস্সমস্সো’পসমায’হেসুং;

২৮. |ও০.০০১৩|

যস্মিং পূৰে উদ্ধমধো ৱিনদ্ধ-

জুতিপ্পবন্ধো মণিমন্দিৰানং,

সমুব্বহী গেৰুক পঙ্ক দিদ্ধ-

ৱিতান পচ্চত্থৰণব্বিলাসং

২৯. সুৱণ্ণ মুত্তা মণি ৱংসৱণ্ণা-

পৱাড় ৰূপী ৱজিৰেহিঞ্চা’পি,

যা সত্তধঞ্ঞেহি ধনেহি ফীতা

অহূ পুৰি ধঞ্ঞৱতী’ৱ নাৰী; (সিলেসবন্ধনং)

৩০. পসাৰিতা’নেকদিসামুখেসু

ৱিচিত্তৱত্থা’ভৰণাদিপূৰা,

যত্থা’পণা নিজ্জিতকপ্পৰুক্খা

কৰিংসু লোকাভিমতত্থসিদ্ধিং;

৩১. |ও০.০০১৪|

পৰাগৰত্তা মধুপাতিমত্তা

সম্হিন্নৱেলা ঘননীলৱালা,

হংসাসযা পঞ্চসৰাভিৰামা

যস্মিং তড়াকা ৱিয কামভোগী; (সিলেসবন্ধনং)

৩২. পুৰন্তৰস্মিং ৰতনগ্ঘিকানং

ৰংসিপ্পবন্ধেহি হতন্ধকাৰে,

কুন্দাৰৱিন্দব্ভুদযেনযস্মিং

ৰত্তিন্দিৱাভেদ মৱেদি লোকো;

৩৩. |ও০.০০১৫|

মাতঙ্গজীমূতঘটায ঘণ্টা-

টঙ্কাৰগম্ভীৰৰৱায যস্মিং,

পলম্ভীতা মত্তসিখণ্ডিমালা

অকা ৱিকালেপি অখণ্ডকীড়ং;

৩৪. পুৰম্হি যস্মিং চৰণম্বুজেহি

ৱধূজতো বন্ধিতনূপুৰেহি,

ৱিকাস কোকাসন সীস বদ্ধ