তেলকটাহগাথা |ও০.০০০১|

নমো তস্স ভগৱতো অৰহতো সম্মাসম্বুদ্ধস্স

১. লংকিস্সৰো জযতু ৱাৰণৰাজগামী

ভোগিন্দভোগ ৰুচিৰাযত পীণ বাহু,

সাধুপচাৰনিৰতো গুণসন্নিৱাসো

ধম্মে ঠিতো ৱীগতকোধমদাৱলেপো;

২. যো সব্বলোকমহিতো কৰুণাধিৱাসো

মোক্খাকৰো ৰৱিকুলম্বৰ পুণ্ণ চন্দো,

ঞেয্যোদধিং সুৱিপুলং সকলং ৱিবুদ্ধো

লোকুত্তমং নমথ তং সিৰসা মুনিন্দং;

৩. সোপানমালমমলং তিদসালযস্স

সংসাৰ সাগৰসমুত্তৰণায সেতুং,

সব্বাগতীভয ৱিৱজ্জিত খেম মগ্গং

ধম্মং নমস্সথ সদা মুনিনা পণীতং;

৪. |ও০.০০০২|

দেয্যং তদপ্পমপি যত্থ পসন্ন চিত্তা

দত্ৱা নৰা ফলমুড়াৰতৰং লভন্তে,

তং সব্বদা দসবলেনপি সুপ্পসত্থং

সঙ্ঘং নমস্সথ সদামিতপুঞ্ঞখেত্তং;

৫. তেজো বলেন মহতা ৰতনত্তযস্স

লোকত্তযং সমধিগচ্ছতি যেন মোক্খং,

ৰক্খা ন চত্থি চ সমা ৰতনত্তযস্স

তস্মা সদা ভজথ তং ৰতনত্তযং ভো;

৬. লংকিস্সৰো পৰহিতেকৰতো নিৰাসো

ৰত্তিম্পি জাগৰৰতো কৰুণাধিৱাসো,

লোকং ৱিবোধযতি লোকহিতায কামং

ধম্মং সমাচৰথ জাগৰিযানুযুত্তা;

৭. |ও০.০০০৩|

সত্তোপকাৰ নিৰতা কুসলে সহাযা

ভো দুল্লভা ভুৱি নৰা ৱিহতপ্পমাদা,

লংকাধিপং গুণধনং কুসলে সহাযং

আগম্ম সংচৰথ ধম্মমলং পমাদং;

৮. ধম্মো তিলোক সৰণো পৰমো ৰসানং

ধম্মো মহগ্ঘৰতনো ৰতনেসু লোকে,

ধম্মো ভৱে তিভৱদুক্খ ৱিনাসহেতু

ধম্মং সমাচৰথ জাগৰিযানুযুত্তা;

৯. নিদ্দং ৱিনোদযথ ভাৱযথপ্পমেয্যং

দুক্খং অনিচ্চম্পি চেহ অনত্ততঞ্চ,

দেহে ৰতিং জহথ জ জজ্জৰভাজনাভো

ধম্মং সমাচৰথ জাগৰিযানুযুত্তা;

১০. |ও০.০০০৪|

ওকাস মজ্জ মম নত্থি সুৱে কৰিস্সং

ধম্মং ইতীহলসতা কুসলপ্পযোগে,

না’লং তিযদ্ধসু তথা ভুৱনত্তযে চ

কামং ন চত্থি মনুজো মৰণা পমুত্তো;

১১. খিত্তো যথা নভসি কেনচিদেৱ লেড্ডু

ভূমিং সমাপত্তি ভাৰতযা খণেন,

জাতত্তমেৱ খলু কাৰণমেকমত্ৰ

লোকং সদা ননু ধুৱং মৰণায গন্তুং;

১২. কামং নৰস্স পততো গিৰিমুদ্ধনাতো

মজ্ঝে ন কিঞ্চি ভযনিস্সৰণায হেতু,

কামং ৱজন্তি মৰণং তিভৱেসু সত্তা

ভোগে ৰতিং পজহথাপি চ জীৱিতে চ;

১৩. |ও০.০০০৫|

কামং পতন্তি মহিযা খলু ৱস্সধাৰা

ৱিজ্জুল্লতা ৱিততমেঘ মুখা পমুত্তা,

এৱং নৰা মৰণভীম পপাতমজ্ঝে

কামং পতন্তি নহি কোচি ভৱেসু নিচ্চো;

১৪. ৱেলাতটে পটুতৰোৰু তৰংগমালা

নাসং ৱজন্তি সততং সলিলালযস্স,

নাসং তথা সমুপযন্তি নৰামৰানং

পাণানি দাৰুণতৰে মৰণোদধিম্হি;

১৫. ৰুদ্ধোপি সো ৰথৱৰস্সগজাধিপেহি

যোধেহি চাপি সবলেহি চ সাযুধেহি,

লোকং ৱিৱংচিয সদা মৰণূসভো সো

কামং নিহন্তি ভুৱনত্তয সালি দণ্ডং;

১৬. |ও০.০০০৬|

ভো মাৰুতেন মহতা ৱিহতো পদীপো

খিপ্পং ৱিনাস মুখমেতি মহপ্পভোপি,

লোকে তথা মৰণচণ্ড সমীৰণেন

খিপ্পং ৱিনস্সতি নৰাযুমহা পদীপো;

১৭. ৰামজ্জুনপ্পভূতি ভূপতি পুংগৱা চ

সূৰা পুৰে ৰণমুখে ৱিজিতাৰি সঙ্ঘা,

তেপীহ চণ্ড মৰণোঘ নিমুগ্গদেহা

নাসং গতা জগতি কে মৰণা পমুত্তা?

১৮. লক্খী চ সাগৰপটা সধৰাধৰা চ

সম্পত্তিযো চ ৱিৱিধা অপি ৰূপসোভা,

সব্বা চ তা অপি চ মিত্তসুতা চ দাৰা

কে চাপি কং অনুগতা মৰণং ৱজন্তং?

১৯. |ও০.০০০৭|

ব্ৰহ্মাসুৰাসুৰগণা চ মহানুভাৱা

গন্ধব্বকিন্নৰমহোৰগৰক্খসা চ,

তে চা পৰে চ মৰণগ্গিসিখায সব্বে

অন্তে পতন্তি সলভা ইৱ খীণপুঞ্ঞা;

২০. যে সাৰিপুত্তপমুখা মুনিসাৱকা চ

সুদ্ধা সদাসৱনুদা পৰমিদ্ধিপত্তা,

তে চাপি মচ্চুৱড়ভা মুখ সন্নিমুগ্গা

দীপানিৱানলহতা খযতং উপেতা;

২১. বুদ্ধাপি বুদ্ধকমলামলচাৰুনেত্তা

বত্তিংসলক্খণ ৱিৰাজিত ৰূপসোভা,

সব্বাসচক্খযকৰাপি চ লোকনাথা

সম্মদ্দিতা মৰণমত্তমহাগজেন;

২২. |ও০.০০০৮|

ৰোগাতুৰেসু কৰুণা ন জৰাতুৰেসু

খিড্ডাপৰেসু সুকুমাৰকুমাৰকেসু,

লোকং সদা হনতি মচ্চু মহাগজিন্দো

দৱানলো ৱনমিৱাৱৰতং অসেসং;

২৩. আপুণ্ণতা ন সলিলে ন জলাসযস্স

কট্ঠস্স চাপি বহুতা ন হুতাসনস্স,

ভুত্ৱান সো তিভূৱনম্পি তথা অসেসং

ভো নিদ্দযো ন খলু পীতিমুপেতি মচ্চু;

২৪. ভো মোহ মোহিততযা ৱিৱসো অধঞ্ঞো

লোকো পতত্যপিপি মচ্চুমুখে সুভীমে,

ভোগে ৰতিং সমুপযাতি নিহীনপঞ্ঞো

দোলা তৰঙ্গচপলে সুপিনোপমেয্যে;

২৫. |ও০.০০০৯|

একোপি মচ্চুৰভিহন্তুমলং তিলোকং

কিং নিদ্দযা অপি জৰামৰণানুযাযী,

কো ৱা কৰেয্য ৱিভসুৱেসু চ জীৱিতাসং

জাতো নৰো সুপিন সংগম সন্নিভেসু;

২৬. নিচ্চাতুৰং জগদিদং সভযং সসোকং

দিস্ৱা চ কোধমদমোহজৰাভিভূতং,

উব্বেগমত্তমপি যস্স ন ৱিজ্জতী চে

সো দাৰুণোন মৰণং ৱত তং ধিৰত্থু!

ভো ভো ন পস্সথ জৰাসিধৰঞ্হি মচ্চু

মাহঞ্ঞমানমখিলং সততং তিলোকং,

কিং নিদ্দযা নযথ ৱীতভযা তিযামং

ধম্মং সদা’সৱনুদং চৰথ’প্পমত্তা;

২৮. |ও০.০০১০|

ভাৱেথ ভো মৰণমাৰৱিৱজ্জনায

লোকে সদা মৰণ সঞ্ঞমিমং যতত্তা,

এৱঞ্হি ভাৱনৰতস্স নৰস্স তস্স

তণ্হা পহীযতি সৰীৰগতা অসেসা;

২৯. ৰূপং জৰা পিযতৰং মলিনীকৰোতি

সব্বং বলং হৰতি অত্তনি ঘোৰৰোগো,

নানূপভোগ পৰিৰক্খিত মত্তভাৱং

ভো মচ্চু সংহৰতি কিং ফলমত্তভাৱে?

৩০. কম্মানিলাপহতৰোগতৰংগভংগে

সংসাৰ সাগৰ মুখে ৱিততে ৱিপন্না,

মা মাপমাদমকৰিত্থ কৰোথ মোক্খং

দুক্খোদযো ননু পমাদমযং নৰানং;

৩১. |ও০.০০১১|

ভোগা চ মিত্তসুতপোৰিস বন্ধৱা চ

নাৰী চ জীৱিতসমা অপি খেত্তৱত্থু,

সব্বানি তানি পৰলোকমিতো ৱজন্তং

নানুব্বজন্তি কুসলাকুসলংৱ লোকে;

৩২. ভো ৱিজ্জুচংচলতৰে ভৱসাগৰম্হি

খিত্তা পুৰা কতমহাপৱনেন তেন,

কামং ৱিভিজ্জতি খণেন সৰীৰনাৱা

হত্থে কৰোথ পৰমং গুণহত্থসাৰং;

৩৩. নিচ্চং ৱিভিজ্জতিহ আমক ভাজনংৱ

সংৰক্খিতোপি বহুধা ইহ অত্তভাৱো,

ধম্মং সমাচৰথ সগ্গপতিপ্পতিট্ঠং

ধম্মো সুচিণ্ণমিহমেৱ ফলং দদাতি;

৩৪. |ও০.০০১২|

ৰন্ত্ৱা সদা পিযতৰে দিৱি দেৱৰজ্জে

নম্হা চৱন্তি ৱিবুধা অপি খীণপুঞ্ঞা,

সব্বং সুখং দিৱি ভুৱীহ ৱিযোগনিট্ঠং

কো পঞ্ঞৱা ভৱসুখেসু ৰতিং কৰেয্য?

৩৫. বুদ্ধো সসাৱকগণো জগদেকনাথো